ເຈົ້າໜ້າທີ່ເລັ່ງຕິດຕາມນັກໂທດໂຕນໜີ ມາດຳເນີນຕາມລະບຽບກົດໝາຍ

134 17 ພ.ພ. 2018 ຂ່າວໜ້າ​ໜຶ່ງ
ເຈົ້າໜ້າທີ່ເລັ່ງຕິດຕາມນັກໂທດໂຕນໜີ ມາດຳເນີນຕາມລະບຽບກົດໝາຍ

ຈາກ​ເຫດການ​ຂອງ​ວັນ​ທີ 11 ພຶດສະພາ 2018 ໃນ​ເວລາ 19:10 ໂມງ ໄດ້​ເກີດ​ມີ​ເຫດການ​ຜູ້​ຕ້ອງ​ຫາ-ນັກໂທດ ຫ້ອງ​ເບີ 4 ທີ່​ຄ້າຍ​ກັກ​ຂັງ​ຊົ່ວຄາວ (ບ້ານ​ດົງ​ສະຫວາດ) ເມືອງ​ສີ​ສັດຕະ​ນາກ ນະຄອນຫຼວງ​ວຽງ​ຈັນ ໄດ້​ເຈາະ​ຝາ​ຫ້ອງ​ນ້ຳ​ໃນ​ຫ້ອງ​ຂັງ​ດ້ານ​ຫຼັງ ​ແລ້ວ​ລອດ​ອອກ ປີນ​ຂ້າມ​ກຳແພງ​ດ້ານ​ຫຼັງ​ໂຕນ​ໜີ​ໄປ​ຈຳນວນ 11 ຄົນ.

ຕໍ່​ເຫດການ​ໃນ​ຄັ້ງ​ນີ້ ທ່ານ ໂພ​ຄຳ ໄຊ​ຍະ​ສອນ ເຈົ້າເມືອງ​ສີ​ສັດຕະ​ນາກ ໄດ້​ລາຍ​ງານ​ຄວາມ​ຄືບ​ໜ້າ​ໃຫ້​ຊາບ​ວ່າ: ເຫດການ​ໃນ​ເວລາ 19:10 ໂມງຂອງ​ວັນ​ທີ 11 ພຶດສະພາ 2018 ໄດ້​ເກີດ​ມີ​ເຫດການ​ຜູ້​ຕ້ອງ​ຫາ-ນັກໂທດຫ້ອງ​ເບີ 4 ມີ​ຜູ້​ຕ້ອງ​ຫາ​ກັກ​ຂັງ​ຈຳນວນ 17 ຄົນ ໄດ້​ເຈາະ​ຝາ​ຫ້ອງ​ນ້ຳ​ໃນ​ຫ້ອງ​ຂັງ​ດ້ານ​ຫຼັງ ແລ້ວ​ລອດ​ອອກ ປີນ​ຂ້າມ​ກຳແພງ​ດ້ານ​ຫຼັງ​ໂຕນ​ໜີ​ໄປ​ຈຳນວນ 11 ຄົນ ຍັງ​ຢູ່ 6 ຄົນ ສ່ວນຜູ້​ໂຕນ​ໜີ ແມ່ນຄະດີຄ້າຂາຍ​ຢາ​ເສບ​ຕິດ.

ຜ່ານ​ການ​ສືບສວນ-ສອບ​ສວນ-ຜູ້​ຕ້ອງ​ຫາ​ນັກໂທດ​ທີ່​ບໍ່​ໂຕນ​ໜີ​ ຈຳນວນ 6 ຄົນ ແລະ ຈຳນວນ​ທີ່​ຈັບ​ໄດ້​ມາ​ແລ້ວ 4 ຄົນ ສາມາດ​ສັງ​ລວມ​ໄດ້ ໃນ​ວັນ​ທີ 10 ພຶດສະພາ 2018 ເວລາ 2:32 ນາທີ ໄດ້​ມີ​ຜູ້​ຕ້ອງ​ຫາ​ນັກໂທດ​ຢູ່​ຫ້ອງ​ເບີ 4 ໄດ້​ນຳ​ເອົາ​ຢາງບ້ວງ​ມາ​ຂອດ​ເຂົ້າກັນ​ເຮັດ​ເປັນ​ຫອນໄກ່​ ແລ້ວ​ເອົາ​ດ້າຍ​ສານ​ແຫ​ມັດ​ໃສ່​ຢາງບ້ວງ​ ຍິງ​ອອກ​ໄປ​ທາງ​ປ່ອງ​ຊ່ອງ​ລົມ​ຂ້າມ​ກຳແພງ​ດ້ານ​ຫຼັງ ຈາກ​ນັ້ນ ໄດ້​ມີ​ຄົນ​ບໍ່​ດີ​ຢູ່​ນອກ​ກຳແພງ​ເອົາ​ເຫຼັກ​ຊະ​ແລັງ ເຫຼັກ​ສະກັດ ແລະ ໃບ​ເລື່ອຍ​ຕັດ​ເຫຼັກ​ມັດ​ໃສ່​ເສັ້ນ​ດ້າຍ​ສານ​ແຫ ​ເລີ່ມ​ເຈາະ​ຝາ​ຫ້ອງ​ນ້ຳ​ຫ້ອງ​ຂັງ ໂດຍ​ໃຊ້​ເຫຼັກ​ສະ​ແລັງ ເຫຼັກ​ສະກັດ ແລະ ໃບ​ເລື່ອຍ​ຕັດ​ເຫຼັກ ຈົນ​ຮອດ​ເວລາ 19:10 ໂມງຂອງ​ວັນ​ທີ 11 ພຶດສະພາ 2018 ຈິ່ງ​ສາມາດ​ເຈາະ​ຊອດ​ຝາ​ຫ້ອງ​ນ້ຳ ໃນ​ຫ້ອງ​ຂັງ​ເປັນ​ຮູ​ພໍ​ຫຼົມ​ຕົວ ແລ້ວ​ລອດ​ອອກ​ຈາກ​ຫ້ອງ​ຂັງ​ປີນ​ຂ້າມ​ກຳແພງ​ດ້ານ​ຫຼັງ​ໂຕນ​ໜີ​ໄປ ເຊິ່ງ​ມີ​ຈຳນວນ​ຜູ້​ຕ້ອງ​ຫາ​ນັກໂທດ​ທີ່​ໂຕນ​ໜີ​ໄປ ​ຈຳນວນ 11 ຄົນ ຍັງ​ບໍ່​ໂຕນ​ໜີ 6 ຄົນ ໃນ​ຈຳນວນ 11 ຄົນ​ທີ່​ໂຕນ​ໜີ​ອອກ​ໄປ​ນັ້ນ ​ຈັບ​ໂຕ​ຄືນ​ໄດ້ 4 ຄົນ ຄື: ທ້າວ ອິນ​ປອນ ຫຼື ໝຳ ທ້າວ ສຳລີ ຫຼື ຕ໊ອກ ທ້າວ ພອນ​ປະເສີດ ແລະ ທ້າວ ທ໊ອບ​ສະ​ພອນ ສ່ວນ​ຜູ້​ຕ້ອງ​ຫາ​ນັກໂທດ​ ຈຳນວນ 7 ຄົນ ທາງ​ເມືອງ​ກໍ່​ຄື​ເຈົ້າ​ໜ້າທີ່​ຮັບຜິດຊອບ ສົມທົບ​ກັບ​ອຳນາດ​ການ​ປົກຄອງ ພາກສ່ວນ​ກ່ຽວຂ້ອງ ລົງ​ຕິດຕາມ​ຫາ​ຄອບຄົວ​ພວກ​ກ່ຽວ ພ້ອມ​ທັງ​ເຮັດ​ບົດ​ບັນທຶກ​ໃຫ້​ມອບ​ຕົວ ແລະ ຍັງ​ສືບຕໍ່​ຕິດຕາມ​ນຳ​ຈັບ​ໂຕ​ພວກ​ທີ່​ຍັງ​ເຫຼືອ ເພື່ອ​ໃຫ້​ມາ​ດຳເນີນ​ການ​ຕໍ່​ໄປ.

ຂ່າວທີ່ກ່ຽວຂ້ອງ