ລາວ-ສິງກະໂປ ຊຸກຍູ້ສົ່ງເສີມການຮ່ວມມື

383 11 ພ.ພ. 2018 ຂ່າວໜ້າ​ໜຶ່ງ
ລາວ-ສິງກະໂປ ຊຸກຍູ້ສົ່ງເສີມການຮ່ວມມື

ໂດຍ​ຕອບ​ສະໜອງ​ຕາມ​ຄຳ​ເຊີນ​ຂອງພະນະ​ທ່ານ​ນາງ ຮາ​ລິ​ມາ ຢາ​ໂຄບ ປະທານາທິບໍດີ ແຫ່ງ ສາທາລະນະ​ລັດ ສິງກະໂປ ພະນະ​ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແຫ່ງ ສາທາລະນະ​ລັດ ປະຊາທິປະໄຕ ປະຊາຊົນ​ລາວ ພ້ອມ​ດ້ວຍ​ພັນ​ລະ​ຍາ ແລະ ຄະນະ ໄດ້​ເດີນທາງ​ຢ້ຽມຢາມ​ລັດ​ຖະ​ກິດ ທີ່ສາທາລະນະ​ລັດ ສິງກະໂປ ໃນ​ລະຫວ່າງ​ວັນ​ທີ 9-10 ພຶດສະພາ 2018 ເຊິ່ງ​ເປັນ​ການ​ຢ້ຽມຢາມ​ສິງກະໂປ​ຄັ້ງ​ທຳ​ອິດ ນັບ​ແຕ່​ດຳລົງ​ຕຳແໜ່ງ​ເປັນ​ປະທານ​ປະເທດ ແຫ່ງ ​ສປປ ລາວ ເພື່ອ​ເພີ່ມ​ທະວີ​ຮັດ​ແໜ້ນ​ສາຍ​ພົວພັນ​ມິດຕະພາບ​ອັນ​ດີງາມ ແລະ ຊຸກຍູ້​ສົ່ງເສີມ​ການ​ຮ່ວມ​ມື​ທີ່​ມີ​ມາ​ແຕ່​ດົນ​ນານລະຫວ່າງ​ສອງ​ປະເທດ ໃຫ້​ນັບ​ມື້​ນັບ​ຂະຫຍາຍຕົວ​ຍິ່ງ​ຂຶ້ນ.

ພິທີ​ຕ້ອນຮັບ​ຢ່າງ​ເປັນ​ທາງ​ການ ໄດ້​ຈັດ​ຂຶ້ນ​ຢ່າງ​ສົມ​ກຽດ ທີ່​ສຳນັກງານ​ປະທານາທິບໍດີ ສິງກະໂປ ພາຍຫຼັງ​ສຳເລັດ​ພິທີ​ຕ້ອນຮັບ ພະນະ​ທ່ານ​ປະທານ​ປະເທດ ບຸນ​ຍັງ ວໍລະ​ຈິດ ແລະ ພະນະ​ທ່ານ​ປະທານາທິບໍດີ ຮາ​ລິ​ມາ ຢາ​ໂຄບ ໄດ້​ພົບ​ປະ​ສອງ​ຝ່າຍ ໃນ​ການ​ພົບ​ປະ​ຄັ້ງ​ນີ້ ຜູ້ນຳ​ທັງ​ສອງ​ຝ່າຍ​ໄດ້​ຕີ​ລາຄາ​ສູງ​ຕໍ່​ໝາກຜົນ​ຂອງ​ການ​ຮ່ວມ​ມື​ທີ່​ດີ ລະຫວ່າງ​ສອງ​ປະເທດ ຕະຫຼອດ​ໄລຍະ 44 ປີຜ່ານມາ ນັບ​ແຕ່​ລາວ ແລະ ສິງກະໂປ ໄດ້​ສ້າງ​ສາຍ​ພົວພັນ​ການ​ທູດ​ນຳກັນ ​ໃນ​ປີ 1974 ເປັນຕົ້ນ​ມາ ເຊິ່ງສາມາດ​ຍາດ​ມາ​ໄດ້​ຜົນສຳເລັດຫຼາຍ​ດ້ານ ທັງ​ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ອັນ​ໄດ້​ນຳ​ເອົາຜົນ​ປະໂຫຍດ​ມາສູ່​ປະຊາຊົນ​ສອງຊາດ ເຫັນ​ໄດ້​ຈາກ​ການ​ແລກປ່ຽນ​ການ​ຢ້ຽມຢາມ​ເຊິ່ງ​ກັນ ແລະ ກັນ​ຢ່າງ​ເປັນ​ປົກກະຕິ​ຂອງ​ການນຳ​ຂັ້ນ​ສູງ ຈົນ​ເຖິງ​ວິຊາ​ການຕ່າງໆ​ຂອງ​ສອງ​ປະເທດ ແລະ ການ​ຮ່ວມ​ມື​ໃນ​ຂົງເຂດ​ເສດ​ຖະກິດ ການ​ຄ້າ ການ​ລົງທຶນ ການສຶກ​ສາ ການ​ພັດທະນາ​ຊັບ​ພະຍາ​ກອນ​ມະນຸດ ແລະ ອື່ນໆ ໄດ້ຮັບ​ການ​ເສີມ​ຂະຫຍາຍ​ໃຫ້​ນັບ​ມື້ເຂັ້ມແຂງ​ເຂົ້າ​ສູ່​ລວງ​ເລິກ.

ໃນ​ໂອກາດ​ນີ້ ປະທານ​ປະເທດ ບຸນ​ຍັງ ວໍລະ​ຈິດ ໄດ້​ສະແດງຄວາມ​ຂອບໃຈ​ຕໍ່​ການ​ຕ້ອນຮັບອັນ​ອົບ​ອຸ່ນ ແລະ ສົມ​ກຽດ ແລະ ສະແດງ​ຄວາມ​ຂອບໃຈ​ຕໍ່​ການຊ່ວຍເຫຼືອ​ອັນ​ລ້ຳ​ຄ່າ​ຂອງ​ລັດ​ຖະບານ ກໍ່​ຄືປະຊາຊົນ​ສິງກະໂປຕໍ່ ​ສປປ ລາວ ໃນ​ດ້ານ​ຕ່າງໆ ເປັນຕົ້ນ​ແມ່ນ​ການ​ພັດທະນາ​ຊັບ​ພະຍາ​ກອນ​ມະນຸດ ການ​ສົ່ງ​ອາສາສະໝັກ​ຊາວ​ໜຸ່ມ ແລະ ຄະນະແພດ​ຂອງ​ສິງກະໂປ ເຂົ້າ​ມາ​ຊ່ວຍເຫຼືອ​ບັນດາ​ໂຮງຮຽນ ແລະ ຊຸມຊົນ​ຕ່າງໆ​ຢູ່ ​ສປປ ລາວ ພ້ອມ​ທັງການ​ຊ່ວຍເຫຼືອ​ດ້ານ​ຕ່າງໆ​ແກ່ ​ສປປ ລາວ ໃນ​ການ​ເປັນ​ປະທານອາ​ຊຽນ ໃນ​ປີ 2016 ທີ່​ຜ່ານ​ມາ ພ້ອມ​ດຽວ​ກັນ​ນັ້ນ ພະນະ​ທ່ານ ບຸນ​ຍັງ ວໍລະ​ຈິດ ຍັງ​ໄດ້​ສະແດງຄວາມ​ຊົມເຊີຍ​ສິງກະໂປ​ຕໍ່​ຜົນ​ສຳເລັດ​ອັນ​ຈົບງາມ ໃນ​ການ​ເປັນເຈົ້າພາບ​ຈັດ​ກອງ​ປະຊຸມ​ສຸດ​ຍອດອາ​ຊຽນ ຄັ້ງ​ທີ 32 ພາຍ​ໃຕ້​ຄຳຂວັນ “ຄວາມ​ເຂັ້ມແຂງ ແລະ ທັນ​ສະໄໝ” ຊຶ່ງ​ເປັນ​ຫົວຂໍ້​ທີ່​ສອດຄ່ອງ​ກັບ​ສະພາບ​ຄວາມ​ເປັນ​ຈິງ ໃນ​ປັດຈຸບັນ ແລະ ແທດເໝາະກັບ​ບົດບາດນຳ​ໜ້າ​ຂອງ​ສິງກະໂປ ໃນ​ການ​ສ້າງ​ປະຊາ​ຄົມ​ອາ​ຊຽນ ໃຫ້​ມີ​ຄວາມ​ເຂັ້ມແຂງ ແລະ ມີຄວາມ​ທັນ​ສະໄໝ ແລະ ໄດ້​ຢືນຢັນ​ວ່າ ​ສປປ ລາວ ພ້ອມ​ທີ່​ຈະ​ໃຫ້ການ​ຮ່ວມ​ມື​ຢ່າງ​ເຕັມ​ປ່ຽມ ​ໃນການ​ບັນລຸ​ເປົ້າ​ໝາຍ​ຂອງ​ການເປັນ​ປະທານ​ອາ​ຊຽນ​ໃນ​ຄັ້ງ​ນີ້.

ທ່ານ​ປະທານ​ປະເທດ ບຸນ​ຍັງ ວໍລະ​ຈິດ ຍັງ​ໄດ້​ສະເໜີ​ໃຫ້​ຝ່າຍສິງກະໂປ​ຊຸກຍູ້ ແລະ ລະດົມ​ນັກລົງທຶນ​ຂອງ​ສິງກະໂປ​ເຂົ້າ​ມາ​ລົງທຶນ​ຢູ່ ​ສປປ ລາວ ໃຫ້​ຫຼາຍ​ຂຶ້ນ ເຊິ່ງ​ປັດຈຸບັນ​ລັດຖະບານ​ລາວ ​ກໍ່ໄດ້​ມີ​ມາດ​ຕະການ​ໃນ​ການ​ອຳນວຍ​ຄວາມ​ສະດວກ ແລະ ສ້າງເງື່ອນໄຂ​ໃນ​ການ​ດຶງ​ດູດ ແລະ ສົ່ງເສີມ​ການ​ລົງທຶນ​ຂອງ​ຕ່າງປະເທດ​ຢູ່​ລາວ ພ້ອມ​ທັງ​ຊ່ວຍເຊີນຊວນ​ນັກ​ທ່ອງ​ທ່ຽວ​ສິງກະໂປ ມາ​ທ່ອງ​ທ່ຽວ​ຢູ່​ລາວ​ໃຫ້​ຫຼາຍ​ຂຶ້ນ ໃນ​ໂອກາດ​ປີ​ທ່ອງ​ທ່ຽວ​ລາວ 2018 ນີ້ ໃນ​ຕອນ​ທ້າຍ ພະນະທ່ານ​ປະທານ​ປະເທດ ບຸນ​ຍັງ ວໍລະ​ຈິດ ກໍ່​ໄດ້​ເຊື້ອ​ເຊີນພະນະ​ທ່ານ ປະທານາທິບໍດີ ຮາ​ລິ​ມາ ຢາ​ໂຄບ ຢ້ຽມຢາມ ​ສປປ ລາວ ໃນ​ເວລາອັນ​ເໝາະ​ສົມ.

ໃນ​ໂອກາດ​ດຽວ​ກັນ ພະນະທ່ານ​ປະທານາທິບໍດີ ຮາ​ລິ​ມາ ຢາ​ໂຄບ ກໍ່​ໄດ້​ສະແດງ​ຄວາມຕ້ອນຮັບ ແລະ ຕີ​ລາຄາ​ສູງ​ຕໍ່ການ​ຢ້ຽມຢາມ ສ ສິງກະໂປ ຂອງພະນະ​ທ່ານ​ປະທານ​ປະເທດ ບຸນຍັງ ວໍລະ​ຈິດ ແລະ ຄະນະ​ໃນ​ຄັ້ງນີ້ ພ້ອມ​ທັງ​ສະ​​ແດງ​ຄວາມ​ຊົມເຊີຍ ​ສປປ ລາວ ທີ່​ມີ​ການ​ພັດ​ທະນາ​ເສດຖະກິດ​ຂະຫຍາຍ​ສູງ​ໃນບັນດາ​ປະເທດ​ອາ​ຊຽນ ພ້ອມ​ທັງໄດ້​ສະແດງ​ຄວາມ​ຍິນ​ດີ​ຈະ​ຊຸກຍູ້ ແລະ ເສີມ​ຂະຫຍາຍ​ການ​ພົວພັນ ແລະ ຮ່ວມ​ມື​ສອງ​ຝ່າຍ​ໃຫ້​ນັບ​ມື້ຂະຫຍາຍຕົວ​ຍິ່ງໆ​ຂຶ້ນ.

ພາຍຫຼັງ​ສຳເລັດ​ການ​ພົບ​ປະພະນະ​ທ່ານ​ປະທານ​ປະເທດ ບຸນຍັງ ວໍລະ​ຈິດ ແລະ ພະນະ​ທ່ານປະທານາທິບໍດີ ຮາ​ລິ​ມາ ຢາ​ໂຄບ ໄດ້​ເຂົ້າ​ຮ່ວມ​ເປັນ​ສັກຂີ​ພິຍານ ​ໃນພິທີ​ລົງ​ນາມ​ບົດ​ບັນທຶກ​ຄວາມເຂົ້າໃຈ (MOU) ຈຳນວນ 2 ສະບັບ ຄື: ບົດ​ບັນທຶກ​ຄວາມ​ເຂົ້າໃຈວ່າ​ດ້ວຍ​ການ​ຮ່ວມ​ມື​ລະຫວ່າງກະຊວງ​ສຶກ​ສາ​ທິ​ການ ແລະ ກີລາ ແຫ່ງ ​ສປປ ລາວ ແລະ ກະຊວງ​ສຶກ​ສາ​ທິ​ການ ແຫ່ງ ສ ສິງກະ​ໂປ ແລະ ບົດ​ບັນທຶກ​ຄວາມເຂົ້າໃຈ​ວ່າ​ດ້ວຍ​ການ​ຮ່ວມ​ມື ​ລະຫວ່າງ​ກະຊວງ​ຊັບພະຍາກອນທຳ​ມະ​ຊາດ ແລະ ສິ່ງແວດລ້ອມ ແຫ່ງ ​ສປປ ລາວ ແລະ ກະຊວງສິ່ງແວດລ້ອມ ແລະ ຊັບ​ພະຍາກອນ​ນ້ຳ ແຫ່ງ ສ ສິງກະໂປ ຂໍ້ຕົກລົງ​ສອງ​ສະບັບ​ດັ່ງກ່າວ ​ຈະເປັນ​ການ​ປະກອບສ່ວນ​ອັນ​ສຳຄັນ ເຂົ້າ​ໃນ​ການ​ຮ່ວມ​ມື​ສອງ​ຝ່າຍ ແລະ ເສີມ​ຂະ​ຫາຍ​ການ​ພົວພັນຮ່ວມ​ກັນ​ໃຫ້​ກວ້າງຂວາງ ແລະ ສະໜິດ​ແໜ້ນ​ຍິ່ງໆ​ຂຶ້ນ.

ໃນ​ລະຫວ່າງ​ການ​ຢ້ຽມຢາມ ສິງກະໂປ​ ໃນ​ຄັ້ງ​ນີ້ ພະນະ​ທ່ານປະທານ​ປະເທດ ແຫ່ງ ​ສປປ ລາວ ຍັງ​ໄດ້​ໃຫ້​ກຽດ​ຕ້ອນຮັບການ​ເຂົ້າ​ຢ້ຽມ​ຂ່ຳນັບ​ຂອງ​ພະນະທ່ານ ລີ ຊຽນ ລຸງ ນາຍົກ​ລັດ​ຖະມົນຕີ ແຫ່ງ ສ ສິງກະໂປ ທີ່​ສຳນັກ​ງານ​ປະທານາທິບໍດີ ຢ້ຽມຢາມ​ອົງການ​ພັດທະນາ​ຕົວ​ເມືອງ ແລະ ຫ້ອງການ​ສົ່ງເສີມ​ການທ່ອງ​ທ່ຽວ​ຂອງ​ສິງກະໂປ​ອີກດ້ວຍ.

ການ​ພົວພັນ​ຮ່ວມ​ມື​ດ້ານ​ການຄ້າ​ລະຫວ່າງ ລາວ ແລະ ສິງ​ກະໂປ ໃນ​ປີ 2017 ມີ​ມູນ​ຄ່າ​ປະມານ 38 ລ້ານ​ໂດ​ລາ​ສະຫະລັດ ການລົງທຶນ​ຂອງ​ສິງກະໂປ​ຢູ່​ລາວ ມີຈຳນວນ 79 ໂຄງການ ມີ​ມູນ​ຄ່າທັງ​ໝົດ 187 ລ້ານ​ໂດ​ລາ​ສະຫະລັດ ຖືກ​ຈັດ​ຢູ່​ໃນ​ອັນ​ດັບ​ທີ 11 ຈາກ 52 ປະເທດ ທີ່​ມາ​ລົງທຶນ​ຢູ່ ​ສປປ ລາວ.

ຂ່າວທີ່ກ່ຽວຂ້ອງ