ລມຕ ຕ່າງປະເທດ ສົ່ງສານອວຍພອນ ໃນໂອກາດວັນສ້າງຕັ້ງອາເຊັມ ຄົບຮອບ 22 ປີ

1.544 01 ມີ.ນ. 2018 ຂ່າວໜ້າ​ໜຶ່ງ

ເນື່ອງ​ໃນ​ໂອກາດ​ວັນ​ສ້າງຕັ້ງ​ອາ​ເຊັມ (1 ມີນາ 1996-1 ມີນາ 2018) ຄົບຮອບ 22 ປີ ຂ້າພະເຈົ້າ ສະເຫຼີມ​ໄຊ ກົມ​ມະ​ສິດ ລັດ​ຖະມົນຕີ​ກະຊວງ​ການ​ຕ່າງປະເທດ ໃນ​ນາມ​ລັດຖະບານ ແຫ່ງ ສາ​ທາລະນະ​ລັດ ປະຊາທິປະໄຕ ປະຊາຊົນ​ລາວ ແລະ ໃນ​ນາມ​ສ່ວນ​ຕົວ ຂໍສະແດງ​ຄວາມ​ຊົມເຊີຍ​ຢ່າງ​ຈິງ​ໃຈ ແລະ ສົ່ງ​ຄຳ​ອວຍພອນ​ໄຊ​ອັນປະເສີດ ມາ​ຍັງ​ປະຊາຊົນ​ບັນດາ​ປະເທດ​ສະມາຊິກ​ອາ​ເຊັມ ກໍ່​ຄືປະຊາ​ຊົນ​ລາວ​ທຸກ​ຖ້ວນ​ໜ້າ.

ຕະຫຼອດ​ໄລຍະ​ແຫ່ງ​ການ​ດຳລົງຄົງ​ຕົວ​ມາ​ໄດ້ 22 ປີ ອາ​ເຊັມ ໄດ້​ກາຍເປັນ​ອີກ​ເວທີ​ໜຶ່ງແຫ່ງ​ການ​ຮ່ວມ​ມື​ກັນ​ຂອງ​ພາກ​ພື້ນ​ອາຊີ ແລະ ເອີ​ຣົບ ຊຶ່ງ​ກວມ​ເອົາ​ສາມ​ເສົາຄ້ຳ​ຂອງ​ການ​ຮ່ວມ​ມື​ຄື: ເສົາຄ້ຳດ້ານ​ການເມືອງ ເສົາຄ້ຳ​ດ້ານ​ເສດຖະກິດ ແລະ ເສົາຄ້ຳ​ດ້ານ​ວັດທະນະ​ທຳ-ສັງຄົມ ໃນ​ກອງ​ປະຊຸມ​ສຸດ​ຍອດ​ອາ​ເຊັມ ຄັ້ງ​ທີ 11 ທີ່​ໄດ້ຈັດ​ຂຶ້ນ​ຢູ່​ນະຄອນຫຼວງ ອູ​ລານ​ບາ​ຕໍ ປະເທດ​ມົງ​ໂກ​ລີ.

ໃນ​ປີ 2016 ອາ​ເຊັມ ໄດ້​ມີ​ຂໍ້​ລິ​ເລີ່ມ​ດ້ານ​ການ​ເຊື່ອມ​ຈອດ​ລະຫວ່າງ​ສອງ​ພາກ​ພື້ນ ເພື່ອ​ສົ່ງເສີມ​ຄວາມ​ຮ່ວມ​ມື​ດ້ານ​ການ​ຄົມ​ມະນາ​ຄົມ ການ​ຄ້າ ການ​ລົງທຶນ ແລະ ການໄປມາຫາສູ່​ລະຫວ່າງຄົນ​ກັບ​ຄົນ ເພື່ອ​ຜັນ​ຂະຫຍາຍ​ຂໍ້​ລິເລີ່ມ​ດັ່ງກ່າວ ກອງ​ປະຊຸມ​ລັດ​ຖະມົນຕີ​ຕ່າງປະເທດ ຄັ້ງ​ທີ 13 ທີ່​ຈັດຂຶ້ນ​ຢູ່ ​ສສ ມຽນ​ມາ ໃນ​ທ້າຍ​ປີ 2017 ໄດ້​ຮັບຮອງ​ເອົາ​ກົນ​ໄກ​ເຮັດວຽກ​ຂອງ​ໜ່ວຍ​ງານ​ລິ​ເລີ່ມ​ດ້ານການ​ເຊື່ອມ​ຈອດ (ASEM Pathfinder Group on Connectivity) ແລະ ມອບໝາຍ​ໃຫ້​ໜ່ວຍ​ງານ​ດັ່ງກ່າວ​ດຳເນີນ​ການ​ຄົ້ນຄວ້າ ກຳນົດ​ຄຳ​ນິຍາມ​ດ້ານ​ການ​ເສື່ອມ​ຈອດ​ອາເຊັມ​ໃຫ້​ສຳເລັດ ແລະ ລາຍ​ງານຕໍ່​ກອງ​ປະຊຸມ​ສຸດ​ຍອດ ຄັ້ງ​ທີ 12 ທີ່​ຈະ​ຈັດ​ຂຶ້ນ​ຢູ່ບຣຸກ​ແຊນ ປະເທດແບນ​ຊິກ ໃນ​ເດືອນ​ຕຸລາ 2018 ໃນ​ປີ 2017 ນີ້ ໄດ້​ມີ​ການ​ຟື້ນ​ຄືນກອງ​ປະຊຸມ​ລັດຖະມົນຕີ​ເສດ​ຖະກິດ​ອາ​ເຊັມ ຊຶ່ງ​ໄດ້​ຖືກ​ໂຈະ​ມາ​ແຕ່ປີ 2005 ຄວາມ​ຄືບ​ໜ້າ​ບາດກ້າວ​ໜຶ່ງ​ທີ່​ກ່າວ​ມາ​ນີ້ ໄດ້​ເປັນການ​ປະກອບສ່ວນ​ເພື່ອ​ສືບຕໍ່​ເສີມຂະຫຍາຍ​ການ​ພົວພັນ​ຮ່ວມ​ມືລະຫວ່າງ​ສອງ​ທະວີບ ໃຫ້​ນັບ​ມື້ນັບ​ກວ້າງຂວາງ​ອອກ​ຕື່ມ.

ສະເພາະ ​ສປປ ລາວ ທີ່​ເຂົ້າເປັນ​ສະມາຊິກ​ອາ​ເຊັມ ແຕ່​ປີ 2004 ເປັນຕົ້ນ​ມາ ກໍ່​ໄດ້​ເຂົ້າ​ຮ່ວມກອງ​ປະຊຸມ ແລະ ປະກອບສ່ວນເຂົ້າ​ໃນ​ກິດຈະກຳ​ຕ່າງໆ​ຂອງ​ອາເຊັມ​ຢ່າງ​ຫ້າວຫັນ ແລະ ຕໍ່​ເນື່ອງ ໂດຍ​ສະເພາະການ​ໄດ້​ຮັບ​ກຽດອັນ​ສູງ ໃນ​ການ​ເປັນ​ເຈົ້າພາບ​ຈັດກອງ​ປະຊຸມ​ສຸດ​ຍອດອາ​ເຊັມ ຄັ້ງທີ 9 ທີ່​ນະຄອນຫຼວງ​ວຽງ​ຈັນ ໃນປີ 2012 ໃນ​ເດືອນ​ຕຸລາ 2017 ຜ່ານ​ມາ ​ສປປ ລາວ ກໍ່​ໄດ້​ເປັນເຈົ້າພາບ​ຈັດ​ກອງ​ປະຊຸມ​ສຳ​ມະນາ​ອາ​ເຊັມ ຄັ້ງ​ທີ 6 ວ່າ​ດ້ວຍການ​ຄຸ້ມ​ຄອງ​ນ້ຳ​ແບບ​ປະສົມ​ປະສານ​ເພື່ອ​ການ​ພັດທະນາ​ແບບຍືນ​ຍົງ ທີ່​ແຂວງ​ຈຳປາ​ສັກ ຊຶ່ງເປັນ​ບາດກ້າວ​ໃໝ່​ໃນ​ການ​ປະກອບ​ສ່ວນ​ຂອງ ​ສປປ ລາວ ເຂົ້າໃນ​ຂະ​ບວນ​ການ​ຊຸກຍູ້ ແລະ ສົ່ງເສີມ​ການ​ຮ່ວມ​ມື​ລະຫວ່າງ​ສອງພາກ​ພື້ນ ອາຊີ-ເອີ​ຣົບ.

ເນື່ອງ​ໃນ​ໂອກາດ​ອັນ​ສະຫງ່າລາສີ​ນີ້ ຂ້າພະເຈົ້າ​ຂໍ​ສະແດງຄວາມ​ຂອບໃຈ​ມາ​ຍັງ​ບັນດາ​ປະເທດ ສະມາຊິກ​ອາ​ເຊັມ ທີ່​ໄດ້​ໃຫ້ການ​ສະໜັບສະໜູນຮ່ວມ​ມື ແລະ ຊ່ວຍເຫຼືອ ​ສປປ ລາວ ຢ່າງຕໍ່​ເນື່ອງ ໃນ​ຖານະ​ທີ່​ເປັນ​ສະ​ມາຊິກ​ອາ​ເຊັມ​ດ້ວຍ​ກັນ ຫວັງ​ຢ່າງຍິ່ງ​ວ່າ ສາຍ​ພົວພັນ ແລະ ການຮ່ວມ​ມື​ທີ່​ດີງາມ ແລະ ຍາວ​ນານລະຫວ່າງສອງ​ພາກ​ພື້ນ​ອາຊີ-ເອີ​ຣົບ ຈະ​ຍິ່ງ​ນັບ​ມື້​ນັບ​ເພີ່ມ​ທະວີ​ຄວາມ​ແໜ້ນ​ແຟ້ນ​ຂຶ້ນ ແລະ ກ້າວ​ໄປ​ສູ່​ລະດັບ​ໃໝ່ ເພື່ອ​ຜົນ​ປະໂຫຍດ​ຮ່ວມ​ກັນຂອງ​ປະຊາຊົນສອງ​ທະວີບ.

ຂ່າວທີ່ກ່ຽວຂ້ອງ