ຂ່າວຫຼ້າສຸດ

ສະຫຼອງວັນສ້າງຕັ້ງກອງສິລະປະກອນກອງທັບ ຄົບຮອບ 50 ປີ

1.654 01 ມີ.ນ. 2018 ຂ່າວໜ້າ​ໜຶ່ງ
ສະຫຼອງວັນສ້າງຕັ້ງກອງສິລະປະກອນກອງທັບ ຄົບຮອບ 50 ປີ

ພິທີ​ສະເຫຼີມສະຫຼອງ​ວັນ​ສ້າງຕັ້ງ​ກອງ​ສິລະ​ປະກອນ​ກອງທັບ​ປະຊາ​ຊົນ​ລາວ ກະຊວງ​ປ້ອງ​ກັນ​ປະເທດ ຄົບຮອບ 50 ປີ (20/1/1968-20/1/2018) ຈັດ​ຂຶ້ນ​ວັນ​ທີ 28 ກຸມພາ 2018 ທີ່​ສະໂມສອນກົມ​ໃຫຍ່​ການເມືອງ​ກອງທັບ ເປັນປະທານ​ຂອງ​ທ່ານ ​ພັອ ພິມ​ພາ ບຸນ​ນະພາ ຫົວໜ້າ​ການ​ທະຫານ ແລະ ທ່ານ ​ພັອ ບົວ​ຄຳ ແກ້ວ​ມະຫາ​ວົງ ຫົວໜ້າ​ການ​ທະຫານ ກອງ​ສິລະ​ປະກອນ​ກອງທັບ ໃຫ້ກຽດ​ເຂົ້າ​ຮ່ວມ​ໂດຍ​ທ່ານພົນ​ຕີ ສອນ​ທອງ ພົມ​ລາ​ວົງ ຮອງ​ຫົວໜ້າ​ກົມ​ໃຫຍ່​ການເມືອງ​ກອງທັບ ມີ​ບັນດາ​ນາຍ ແລະ ພົນທະຫານ ພະນັກງານ​ອາວຸໂສ​ບຳນານ ຄະນະ​ພັກ-ຄະນະ​ບັນຊາ ພະນັກງານ-ນັກຮົບ ແລະ ແຂກ​ຖືກເຊີນ.

ໃນ​ພິທີ ທ່ານ ​ພັອ ພິມ​ພາ ບຸນ​ນະພາ ໄດ້​ກ່າວ​ວ່າ: ກ່ອນ​ໜ້ານີ້ 50 ປີ ກອງ​ສິລະ​ປະກອນ​ກອງທັບ​ປະຊາຊົນ​ລາວ ໄດ້​ຮັບ​ການສ້າງຕັ້ງ​ຂຶ້ນ ວັນ​ທີ 20 ມັງກອນ 1968 ຢູ່​ຖານ​ທີ່​ໝັ້ນ​ເມືອງ​ວຽງ​ໄຊ ແຂວງ​ຫົວພັນ ໂດຍ​ສືບ​ທອດ​ຈາກກອງ​ສິລະ​ປະກອນ​ກຳລັງ​ປະກອບອາວຸດ​ປະເທດ​ລາວ​ໃນ​ເມື່ອ​ກ່ອນ ແລະ ການ​ກຳເນີດ​ເກີດ​ຂຶ້ນ ເປັນເຫດການ​ການເມືອງ​ທີ່​ສຳຄັນ​ໃນປະຫວັດສາດ ແລະ ກອງທັບ​ເຮົາເປັນ​ຂີດ​ໝາຍ ປະຫວັດສາດ​ສຳຄັນ​ຍິ່ງ​ທີ່​ສ່ອງ​ແສງ​ໃຫ້​ເຫັນ​ເຖິງການ​ເຕີບ​ໃຫຍ່​ຂະຫຍາຍຕົວ ແລະ ເຂັ້ມແຂງ​ຂອງ​ກອງທັບ​ປົດປ່ອຍ​ປະຊາຊົນ​ລາວ ການ​ນຳ​ເອົາລາຍ​ການສະແດງ​ທາງ​ດ້ານ​ສິລະປະ​ວັນນະຄະດີ ທີ່​ສ່ອງ​ແສງ​ເຖິງແນວທາງ​ນະໂຍບາຍ​ຂອງ​ພັກ ແລະ ມູນເຊື້ອ​ຂອງ​ຊາດ​ຂອງກອງທັບ ໄປ​ໂຄສະນາ​ເຜີຍແຜ່​ໃນຖັນ​ແຖວ​ກຳລັງ​ປະກອບ​ອາວຸດ ກໍ່ຄື​ປະຊາຊົນ​ລາວ ແນໃສ່​ປຸກ​ລະດົມ​ປະຊາຊົນ​ປະກອບສ່ວນ​ກໍ່ສ້າງກຳລັງ​ປະກອບ​ອາວຸດ ມີ​ນ້ຳໃຈຮັກ​ຊາດ ຄຽດ​ແຄ້ນ​ສັດຕູ​ຜູ້​ຮຸກຮານ ທັງ​ເປັນ​ການ​ສັນລະເສີນນ້ຳໃຈ​ສູ້​ຮົບ​ອັນ​ພິລະ​ອາດ​ຫານຂອງ​ກອງທັບ ແລະ ປະຊາຊົນລາວ​ບັນດາເຜົ່າ.

ພາຍຫຼັງ​ປະເທດ​ຊາດ​ໄດ້​ຮັບການ​ປົດ​ປ່ອຍ​ສະຖາປະນາ​ເປັນ ​ສປປ ລາວ ໃນ​ວັນ​ທີ 2 ທັນວາ 1975 ໃນ​ໄລຍະ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດຊາດ ກອງ​ສິລະ​ປະກອນ​ກອງທັບ ກໍ່​ໄດ້​ຕັ້ງໜ້າ​ປະຕິບັດ​ສະແດງ​ຮັບໃຊ້​ໜ້າທີ່​ການເມືອງ​ຕໍ່​ກອງທັບ ແລະ ປະຊາຊົນ​ບັນດາເຜົ່າ​ໃນຂອບ​ເຂດ​ທົ່ວ​ປະເທດ​ດ້ວຍ​ຄວາມຫ້າວຫັນ ແລະ ມີ​ຄວາມ​ຮັບ​ຜິດຊອບ​ສູງ ສະແດງ​ຮັບ​ໃຊ້​ແຂກພາຍ​ໃນ ແລະ ຕ່າງປະເທດ ບັນດາ​ວັນ​ປະຫວັດສາດ​ທີ່​ສຳຄັນຂອງ​ພັກ-ຂອງ​ຊາດ ແລະ ຂອງກອງທັບ ເຂົ້າ​ຮ່ວມ​ສະແດງ​ຮັບໃຊ້​ກັບ​ກະຊວງ​ຖະແຫຼງ​ຂ່າວ ວັດທະນະ​ທຳ ແລະ ທ່ອງ​ທ່ຽວ ໃນງານ​ລະດັບ​ຊາດ ພາກ​ພື້ນ ອັນພົ້ນ​ເດັ່ນ​ກໍ່​ແມ່ນ​ລາຍການ​ສະແດງ​ຮັບ​ໃຊ້​ກອງ​ປະຊຸມ​ອາ​ຊຽນ ຄັ້ງ​ທີ 10 ຊີເກມ ຄັ້ງ​ທີ 25 ນະຄອນ​ຫຼວງ ຄົບຮອບ 450 ປີ ກອງ​ປະຊຸມ​ອາ​ເຊັບ 7 ອາ​ເຊັມ 9 ວັນ​ສ້າງຕັ້ງ​ພັກ​ປະຊາຊົນປະຕິວັດ​ລາວ ຄົບຮອບ 60 ປີ ວັນສ້າງຕັ້ງ ​ສປປ ລາວ ຄົບຮອບ 40 ປີ ແລະ ອື່ນໆ.

ໃນ​ໂອກາດ​ພິທີ​ສະເຫຼີມ​ສະຫຼອງ​ວັນ​ສ້າງຕັ້ງ​ກອງ​ສິລະ​ປະກອນ​ກອງທັບ ຄົບຮອບ 50 ປີ ພັກ-ລັດຖະບານ ກໍ່​ຄືກະຊວງປ້ອງ​ກັນ​ປະເທດ​ ໄດ້​ຕົກລົງ​ປະດັບຫຼຽນ​ໄຊ​ພິລະ​ອາດ​ຫານ ຊັ້ນ 1 ໃຫ້​ກອງ​ສິລະ​ປະກອນ​ກອງທັບ 1 ໜ່ວຍ ປະດັບ​ຫຼຽນ​ໄຊ​ພິລະ​ອາດຫານ​ຊັ້ນ 2 ໃຫ້ 2 ພະ​ແນກ ຄື: ພະ​ແນກ​ດົນຕີ ແລະ ພະ​ແນກຮ້ອງ ແລະ ປະດັບ​ຫຼຽນ​ໄຊ​ພິລະອາດ​ຫານ ຊັ້ນ 3 ໃຫ້ 5 ພະ​ແນກ ຄື: ພະ​ແນກ​ຟ້ອນ ພະ​ແນກ​ອົບຮົມ ພະ​ແນກ​ປະດິດ​ແຕ່ງ ພະແນກ​ເຕັກນິກ​ແສງ-ສຽງ ແລະ ພະ​ແນກ​ແຜນການ​ສັງ​ລວມ.

ຂ່າວທີ່ກ່ຽວຂ້ອງ