ຂ່າວຫຼ້າສຸດ

ຮ່ວມສະເຫຼີມສະຫຼອງ 7 ກິດຈະກຳຫຼັກ ໃນໂອກາດວັນແມ່ຍິງສາກົນ

1.266 28 ກ.ພ. 2018 ຂ່າວໜ້າ​ໜຶ່ງ
ຮ່ວມສະເຫຼີມສະຫຼອງ 7 ກິດຈະກຳຫຼັກ ໃນໂອກາດວັນແມ່ຍິງສາກົນ

ເນື່ອງ​ໃນ​ໂອກາດ​ວັນ​ແມ່ຍິງສາກົນ ຄົບຮອບ 108 ປີ (8/3/1910-8/3/2018) ພາຍ​ໃຕ້​ຄຳຂວັນ “ເຖິງ​ເວລາ​ແລ້ວ ທີ່​ທຸກ​ຄົນຕ້ອງ​ຮ່ວມ​ມື​ກັນ​ປັບປຸງ​ຊີວິດ​ການເປັນ​ຢູ່​ຂອງ​ແມ່ຍິງ​ ໃນ​ຕົວ​ເມືອງ ແລະ ຊົນນະບົດ ໃຫ້​ໄດ້​ຮັບ​ການປ່ຽນແປງ ເພື່ອ​ຄຸນະພາບ​ທີ່​ດີ​ຂຶ້ນ” ທີ່​ມູນ​ວຽນມາ​ບັນຈົບ​ຄົບຮອບ​ອີກ​ວາລະ​ໜຶ່ງ.

ທ່ານ​ນາງ ອິນ​ລາ​ວັນ ແກ້ວບຸນ​ພັນ ກຳມະການ​ສູນ​ກາງ​ພັກ ປະທານ​ຄະນະ​ບໍລິຫານ​ງານ​ສູນກາງ​ສະຫະພັນ​ແມ່ຍິງ​ລາວ ໃຫ້​ສຳພາດ​ຕໍ່​ສື່​ມວນ​ຊົນ ໃນ​ວັນ​ທີ 26 ກຸມພາ 2018 ທີ່​ສູນ​ກາງ​ສະຫະພັນ​ແມ່ຍິງ​ລາວ ວ່າ: ເພື່ອເຮັດ​ໃຫ້ການ​ສະເຫຼີມສະຫຼອງ​ວັນແມ່ຍິງ​ສາກົນ​ໃນ​ປີ​ນີ້ ມີ​ເນື້ອ​ໃນຄວາມ​ໝາຍ​ເລິກເຊິ່ງ ເປັນ​ຂະບວນ​ການ​ກວ້າງຂວາງ​ໃນ​ທົ່ວ​ປະເທດ ຄະນະ​ນຳ​ສູນ​ກາງ​ສະຫະພັນ​ແມ່ຍິງ​ລາວ ໄດ້​ຮັບຮອງ​ເອົາ 7 ກິດຈະກຳ​ຫຼັກ ໃນ​ການ​ສະເຫຼີມສະຫຼອງ​ວັນ​ແມ່ຍິງ​ສາກົນ 1. ການ​ຈັດ​ງານ​ໂຮມ​ຊຸມນຸມ ເພື່ອທົບ​ທວນຄືນ​ປະຫວັດ​ການ​ຕໍ່ສູ້ຂອງ​ແມ່ຍິງ 2. ສຳ​ມະ​ນາ​ສົ່ງເສີມ​ຄວາມ​ຮູ້​ພາຍ​ໃຕ້​ຫົວຂໍ້ ແມ່ຍິງ​ກັບ​ສຸຂະພາບ 3. ກວດ​ສຸຂະພາບ ເປັນຕົ້ນ ສຸຂະພາບ​ຕາ ເພື່ອ​ສ້າງ​ເງື່ອນໄຂ​ໃຫ້​ແມ່ຍິງ​ໄດ້​ມີ​ໂອກາດ ​ເອົາໃຈໃສ່​ຕໍ່​ສຸຂະພາບ​ຂອງ​ຕົນ​ເອງ ແລະ ຄອບຄົວ 4. ວາງສະແດງ​ສິນຄ້າ ກໍ່​ຄື​ຜະລິດ​ຕະ​ພັນ ເພື່ອ​ໂຄສະນາ ແລະ ຈຳໜ່າຍ​ທີ່​ເປັນ​ສີໄມ້ລາຍມື ຫົວຄິດປະດິດ​ສ້າງ​ຂອງ​ເອື້ອຍ​ນ້ອງ​ແມ່ຍິງ​ລາວ​ບັນດາເຜົ່າ ຕິດ​ພັນ​ກັບ​ປີ​ທ່ອງ​ທ່ຽວ 2018 5. ກິດຈະກຳຖາມ-ຕອບ​ຄວາມ​ຮູ້​ແບບ​ຄອບຄົວ ເຊິ່ງ​ເນື້ອ​ໃນ​ເນັ້ນ​ໃຫ້​ຕິດ​ພັນກັບ​ວັນ​ແມ່ຍິງ​ສາກົນ ກິລິຍາ​ມາລະ​ຍາດ ແລະ ຄຸນ​ລັກສະນະ​ທີ່ເປັນ​ມູນເຊື້ອ​ຂອງ​ແມ່ຍິງ​ລາວ 6. ຖີບ​ລົດ​ເພື່ອ​ການ​ກຸສົນ ເຊິ່ງ​ເລີ່ມຈາກ​ປະຕູ​ໄຊ ຜ່ານ​ເສັ້ນທາງ​ແຄມຂອງ ແລະ ເສັ້ນທາງ​ຕ່າງໆ​ທີ່ແມ່ຍິງ​ນຳ​ໃຊ້​ໃນ​ການ​ອອກ​ກຳລັງ​ກາຍ ແລະ 7. ກິດຈະກຳກີລາ​ສິລະ​ປະ​ວັນນະຄະດີ​ແບບມວນ​ຊົນ ຕິດ​ພັນ​ກັບ​ຊີວິດ​ປະຈຳວັນ​ພາຍ​ໃນ​ຄອບຄົວ ແລະ ສາຍຟີມ​ວີ​ດີ​ໂອ​ທີ່​ເວົ້າ​ເຖິງ​ການ​ເຄື່ອນໄຫວ​ພົ້ນ​ເດັ່ນ​ໃນ​ເວທີ​ສາກົນ ເຊິ່ງກິດຈະກຳ​ການ​ຖີບ​ລົດ​ແມ່ນ​ເລີ່ມລົງທະບຽນແຕ່​ເດືອນ​ກຸມພາ 2018 ເປັນຕົ້ນ​ໄປ ໂດຍ​ວາລະສານ​ຂວັນ​ໃຈ ເປັນ​ຜູ້​ໃຫ້ການ​ສະໜັບ​ສະ​ໜູນ ເງິນ​ທີ່​ໄດ້​ຈາກ​ການຈັດ​ກິດຈະກຳ​ທັງ​ໝົດ ​ຈະ​ມອບ​ໃຫ້​ສູນ​ກາງ​ສະຫະພັນ​ແມ່ຍິງ ເພື່ອ​ນຳ​ໃຊ້​ເຂົ້າ​ໃນ​ການ​ພັດທະນາ​ແມ່ຍິງ​ລາວ.

ໂອກາດ​ນີ້ ຂໍ​ເຊີນຊວນ​ທຸກພາກສ່ວນ ເຂົ້າ​ຮ່ວມ​ສະເຫຼີມ​ສະຫຼອງ​ກິດຈະກຳ ດ້ວຍ​ຄວາມ​ພ້ອມພຽງ​ຮຽງ​ໜ້າ ເພື່ອ​ສະແດງ​ໃຫ້ເຫັນ​ບົດບາດ​ຄວາມ​ໝາຍ​ຄວາມສຳຄັນ ເນື່ອງ​ໃນ​ໂອກາດ​ວັນ​ດັ່ງກ່າວ.

ຂ່າວທີ່ກ່ຽວຂ້ອງ