ແລກປ່ຽນປະສົບການພັດທະນາເສດຖະກິດທີ່ບໍ່ຊ້ຳຊ້ອນກັນ

1.108 28 ກ.ພ. 2018 ຂ່າວໜ້າ​ໜຶ່ງ
ແລກປ່ຽນປະສົບການພັດທະນາເສດຖະກິດທີ່ບໍ່ຊ້ຳຊ້ອນກັນ

ກະຊວງ​ແຜນການ ແລະ ການລົງທຶນ (​ຜທ) ຮ່ວມ​ກັບ​ສະ​ຖາ​ບັນພັດທະນາເກົາຫຼີ (KDI) ແລະ ສະຖານທູດ ສ ເກົາຫຼີ ປະຈຳ ​ສປປ ລາວ ຈັດ​ສຳ​ມະ​ນາ​ພາຍ​ໃຕ້ແຜນ​ງານ​ແລກປ່ຽນ​ທາງ​ດ້ານຄວາມ​ຮູ້ ລະຫວ່າງ ​ສປປ ລາວ-ສ ເກົາຫຼີ (KSP Regional Seminar) ໃນ​ຫົວຂໍ້ Industrial Development Strategy for ASEAN Countries ຂຶ້ນ​ວັນ​ທີ 27 ກຸມພາ 2018 ຢູ່​ໂຮງແຮມຄຣາວພລາ​ຊາ ໂດຍ​ເປັນ​ປະທານ​ຮ່ວມຂອງ​ທ່ານ​ນາງ ສີ​ສົມບູນ ອຸ​ນາວົງ ຫົວໜ້າ​ກົມ​ຮ່ວມ​ມື​ສາກົນກະຊວງ ​ຜທ ທ່ານ Sung Soo Shin ເອກ​ອັກ​ຄະ​ລັດ​ຖະ​ທູດ ສ ເກົາຫຼີ ປະຈຳ ​ສປປ ລາວ ທ່ານ Tae Kyung Kwon ຊ່ຽວຊານ​ທີ່​ປຶກສາ​ອາວຸໂສ KDI ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ສຳ​ມະ​ນາ​ຄັ້ງ​ນີ້ ເພື່ອ​ແລກປ່ຽນ​ປະສົບ​ການໃນ​ການ​ພັດທະນາ​ເສດຖະກິດ​ທີ່​ບໍ່​ຊ້ຳ​ຊ້ອນ​ກັນຈາກ​ບົດຮຽນ ສ ເກົາຫຼີ ກັບ​ປະເທດ​ສະມາຊິກ​ອາ​ຊຽນ (ກຳປູເຈຍ ລາວ ມຽນ​ມາ ແລະ ຫວຽດນາມ) ພາຍ​ໃຕ້​ໂຄງການ​ແຜນງານ​ໂຄງການ​ແລກປ່ຽນ​ທາງດ້ານ​ຄວາມ​ຮູ້ (Knowledge Sharing Program) ເພື່ອ​ດຳເນີນ​ການ​ຕິດຕາມ​ການ​ເປັນ​ຄູ່​ພັດທະ​ນາ​ທີ່​ຍືນ​ຍົງ ແລະ ສົ່ງເສີມການ​ແລກປ່ຽນ​ຄຳ​ຄິດ​ເຫັນ ​ກ່ຽວກັບ​ບັນຫາ​ສຳຄັນ​ຕ່າງໆ​ໃນ​ຂົງເຂດ​ພາກ​ພື້ນ ເຊິ່ງ​ປະກອບ​ມີ 3 ຫົວຂໍ້​ຄື: ຜົນ​ກະທົບ​ໂດຍ​ກົງ​ຈາກການ​ລົງທຶນ​ຂອງ​ຕ່າງປະເທດ ແລະ ນະໂຍບາຍ​ມາດຕະຖານ ໃນ​ການ​ພັດທະນາ​ອຸດສາຫະກຳ ແລະ ການ​ປັບປຸງ​ໂຄງ​ສ້າງ​ພື້ນຖານ​ທາງ​ດ້ານ​ການ​ເງິນ.

ແຜນ​ງານ Knowledge Sharing Program ໄດ້​ເລີ່ມຈັດ​ຕັ້ງ​ປະຕິບັດ​ແຕ່​ປີ 2004 ເປັນຕົ້ນ​ມາ ໂດຍ​ເນັ້ນ​ໃສ່​ການ​ແລກປ່ຽນ​ໃຫ້​ຄຳ​ປຶກສາ​ດ້ານ​ນະໂຍບາຍ ການ​ຄຸ້ມ​ຄອງ​ເສດຖະກິດ​ກັບ​ບັນດາ​ປະເທດ​ທີ່​ກຳລັງ​ພັດທະນາໃນ​ທົ່ວ​ໂລກ​ມີ 64 ປະເທດ​ທີ່​ຄົ້ນຄວ້າ​ຫົວຂໍ້​ຕ່າງໆ 990 ຫົວຂໍ້ ໂດຍ​ສະເພາະ ໃນ​ຂົງເຂດ​ອາຊີ​ມີ 300 ຫົວຂໍ້ ກັບ 10 ປະເທດ ສຳລັບ ​ສປປ ລາວ-ສ ເກົາຫຼີ ແມ່ນ​ເລີ່ມ​ມີ​ການ​ຮ່ວມ​ມື​ກັນແຕ່ປີ 2010 ເປັນຕົ້ນ​ມາ ມີ 36 ຫົວຂໍ້ ແລະ ກຳລັງ​ຈັດ​ຕັ້ງ​ປະຕິບັດ 3 ຫົວຂໍ້ ເຊິ່ງ​ຈະ​ສຳເລັດ​ໃນ​ລະຫວ່າງ​ເດືອນ​ເມສາ-ພຶດສະພາ​ນີ້.

ຂ່າວທີ່ກ່ຽວຂ້ອງ