ຂ່າວຫຼ້າສຸດ

ລາວ-ໄທ ຮັດແໜ້ນການຮ່ວມມືວຽກແຮງງານ

1.199 27 ກ.ພ. 2018 ຂ່າວໜ້າ​ໜຶ່ງ

ທ່ານ ທອງ​ລຸນ ສີ​ສຸ​ລິດ ນາຍົກ​ລັດຖະມົນຕີ​ແຫ່ງ ​ສປປ ລາວ ໄດ້​ໃຫ້​ກຽດ​ຕ້ອນຮັບ​ການ​ເຂົ້າຢ້ຽມ​ຄຳນັບ​ຂອງ​ຄະນະ​ຜູ້​ແທນ​ຂັ້ນສູງ ກະຊວງ​ແຮງ​ງານ​ຂອງ​ຣາຊະ​ອານາຈັກ​ໄທ ນຳ​ໂດຍ​ທ່ານພົນ​ຕຳຫຼວດ​ເອກ ອາດຸນ ແສງ​ສິງແກ້ວ ລັດຖະມົນຕີ​ກະຊວງ​ແຮງງານ ວັນ​ທີ 26 ກຸມພາ 2018 ຢູ່ສຳນັກງານ​ນາຍົກລັດຖະມົນຕີ ໂອກາດ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ຢ່າງ​ເປັນ​ທາງ​ການ ເພື່ອ​ຮັດແໜ້ນ​ສາຍ​ພົວພັນ​ຮ່ວມ​ມື​ສອງຝ່າຍ ໂດຍ​ສະເພາະແມ່ນ​ວຽກງານ​ແຮງ​ງານ​ສອງ​ປະເທດ ລາວ-ໄທ ໃຫ້​ນັບ​ມື້​ໜັກ​ແໜ້ນ ແລະ ຕອບ​ສະໜອງ ໄດ້​ຄວາມ​ຮຽກຮ້ອງ​ຕ້ອງການພັດທະນາ​ເສດຖະກິດ-ສັງຄົມ ໃນ​ຍຸກ​ທີ່​ມີ​ການ​ແຂ່ງຂັນ​ສູງ.

ທ່ານ​ນາຍົກລັດຖະມົນຕີ ສະແດງ​ຄວາມ​ຊົມເຊີຍ​ຕໍ່​ການ​ເດີນທາງ​ມາ​ຢ້ຽມຢາມ ແລະ ເຮັດວຽກ​ຄັ້ງ​ນີ້ ຖື​ເປັນ​ການ​ປະກອບສ່ວນ​ສຳຄັນ ໃນ​ການ​ເພີ່ມ​ທະວີການ​ຮ່ວມ​ມື​ຂອງ​ສອງ​ປະເທດ​ ໃຫ້ນັບ​ມື້​ເຂັ້ມແຂງ ແລະ ກ້າວ​ຂະຫຍາຍ​ຕົວ​ຍິ່ງ​ຂຶ້ນ ເປັນຕົ້ນແມ່ນ ການ​ຮ່ວມ​ມື​ດ້ານ​ວຽກ​ງານ​ແຮງງານ​ສອງ​ປະເທດ​ໃຫ້​ມີ​ຄວາມຖືກຕ້ອງ ແລະ ສອດຄ່ອງ​ກັບການ​ພັດທະນາ ເຊິ່ງ ສປປ ລາວ ແລະ ຣາ​ຊະ​ອານາຈັກ​ໄທ ຖື​ວ່າເປັນ​ສອງ​ຊາດ​ທີ່​ມີ​ຊາຍ​ແດນ​ຕິດຈອດ​ກັນ​ແຕ່​ເໜືອ​ເຖິງ​ໃຕ້ ບັນຫາ​ການ​ເຄື່ອນ​ຍ້າຍ​ແຮງ​ງານ​ທີ່ຜິດ​ກົດໝາຍ ​ກໍ່​ເກີດ​ຂຶ້ນ​ເປັນ​ຈຳນວນ​ຫຼາຍ ໂອກາດ​ນີ້ ທ່ານ ທອງ​ລຸນ ສີ​ສຸ​ລິດ ຮຽກຮ້ອງ​ໃຫ້ລັດຖະມົນຕີ​ກະຊວງ​ແຮງ​ງານຂອງ​ສອງ​ປະເທດ ເອົາໃຈໃສ່ຢ່າງ​ຕັ້ງໜ້າ​ເຂົ້າ​ໃນ​ການ​ປຶກສາຫາລື ແລະ ແກ້​ໄຂ​ບັນຫາ​ດັ່ງກ່າວ​ດ້ວຍ​ຄວາມ​ຮັບຜິດຊອບ​ສູງ ເປັນ​ເຈົ້າ​ການ​ຕ້ານ ແລະ ສະກັດກັ້ນ​ແຮງ​ງານ​ຜິດ​ກົດໝາຍ ການຄ້າ​ແຮງ​ງານ​ເຖື່ອນ ຕະຫຼອດ​ເຖິງການ​ຄ້າ​ມະນຸດ​ໃຫ້​ມີ​ປະ​ສິດທິ​ຜົນສູງ ນຳ​ມາ​ເຊິ່ງ​ຜົນ​ປະໂຫຍດ​ທັງສອງ​ຝ່າຍ ເພື່ອ​ສ້າງ​ແຮງ​ງານ​ທີ່ມີ​ຄຸນະພາບ ແລະ ຖືກ​ກົດໝາຍຕາມ​ທີ່​ລັດຖະບານ​ສອງ​ປະເທດ ວາງ​ອອກ​ໃຫ້​ປະສົບ​ຜົນ​ເປັນ​ຈິງ.

ໂອກາດ​ດັ່ງກ່າວ ທ່ານ​ພົນ​ຕຳຫຼວດ​ເອກ ອາດຸນ ແສງ​ສິງ​ແກ້ວ ໄດ້​ສະແດງ​ຄວາມ​ຂອບໃຈ​ຕໍ່​ການຕ້ອນຮັບ​ອັນ​ອົບ​ອຸ່ນ ພ້ອມ​ທັງລາຍ​ງານ​ເຖິງ​ຈຸດປະສົງ​ການ​ເດີນທາງ​ມາ​ຢ້ຽມຢາມ ແລະ ຮ່ວມເຮັດ​ວຽກ​ກັບ​ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ​ຂອງ ​ສປປ ລາວ ໂດຍ​ມີ​ເປົ້າ​ໝາຍ​ສຳຄັນ ​ເພື່ອ​ສົ່ງເສີມ​ການ​ຮ່ວມ​ມື​ວຽກງານ​ແຮງ​ງານ​ທັງ​ສອງ​ປະເທດ ໃຫ້​ນັບ​ມື້​ກ້າວ​ຂະຫຍາຍຕົວ​ຍິ່ງຂຶ້ນ ນຳ​ມາ​ເຊິ່ງ​ຜົນ​ປະໂຫຍດ​ຂອງຊາວ​ຜູ້​ອອກແຮງ​ງານ ແລະ ຄວາມ​ໝັ້ນຄົງ​ຂອງ​ສອງ​ປະເທດ.

ຂ່າວທີ່ກ່ຽວຂ້ອງ