ຂ່າວຫຼ້າສຸດ

ໃຊ້ພືດຜັກຕົບແຕ່ງເປັນພາຂວັນ ສ້າງຄວາມສົນໃຈໃຫ້ສັງຄົມສົ່ງເສີມການທ່ອງທ່ຽວ

391 26 ກ.ພ. 2018 ຂ່າວໜ້າ​ໜຶ່ງ
ໃຊ້ພືດຜັກຕົບແຕ່ງເປັນພາຂວັນ ສ້າງຄວາມສົນໃຈໃຫ້ສັງຄົມສົ່ງເສີມການທ່ອງທ່ຽວ

ບໍລິສັດ ແກ້ວທະວີຄູນເພີ່ມພູນຊັບ ຂາເຂົ້າ-ຂາອອກ ຈຳກັດ ເປັນບໍລິສັດທີ່ດຳເນີນທຸລະກິດສົ່ງເສີມການຜະລິດກະສິກຳປອດສານພິດ ຈຳໜ່າຍຕະຫຼາດພາຍໃນ ເພື່ອໃຫ້ສັງຄົມໄດ້ບໍລິໂພກພືດຜັກທີ່ສະອາດ ຈາກທ່າແຮງທີ່ບໍລິສັດມີພືດຜັກທີ່ຕົນເອງປູກຈຳນວນຫຼວງຫຼາຍນັ້ນ ນອກຈາກຈຳໜ່າຍຂາຍແລ້ວ ປັດຈຸບັນ ບໍລິສັດໄດ້ນຳໃຊ້ພືດຜັກດັ່ງກ່າວມາຕົບແຕ່ງເປັນພາຂວັນແທນໝາກເບັງທີ່ເຮັດດ້ວຍຕອງ ແລະ ດອກໄມ້ ພາຍຫຼັງທີ່ເຮັດຂຶ້ນມາກໍ່ໄດ້ຮັບຄວາມສົນໃຈຈາກລູກຄ້າ ກໍ່ຄືສັງຄົມ ໃນຄວາມສວຍງາມຂອງການຕົບແຕ່ງດ້ວຍພືດປອດສານພິດຫຼາຍສົມຄວນ ຈາກສີໄມ້ລາຍມີອັນປານີດ ແລະ ຫົວຄິດປະດິດສ້າງຂອງຄົນລາວ.

ທ່ານນາງ ຂັນທະລີ ແສງສຸລິເດດ ຜູ້ຮັບຜິດຊອບການຕະຫຼາດ ບໍລິສັດ ແກ້ວທະວີຄູນເພີ່ມພູນຊັບ ຂາເຂົ້າ-ຂາອອກ ຈຳກັດ ໄດ້ໃຫ້ສຳພາດວັນທີ 22 ກຸມພາ 2018 ວ່າ: ດ້ວຍໃຈມັກຮັກດ້ານນີ້ຕົນເອງພ້ອມດ້ວຍຄອບຄົວ ແລະ ລູກຈຶ່ງໄດ້ຫັນມານຳໃຊ້ພືດຜັກຕາມລະດູການຂອງບໍລິສັດປູກເອງ ມາຕົບແຕ່ງເປັນພາຂວັນຮັບໃຊ້ງານຕ່າງໆຕາມລູກຄ້າຕ້ອງການ ເປັນຕົ້ນ ງານແຕ່ງງານ ງານຂຶ້ນເຮືອນໃໝ່ ງານສູ່ຂວັນ ແລະ ງານອື່ນໆ ເພື່ອເປັນການປະກອບສ່ວນສົ່ງເສີມວັດທະນະທຳ ຮີດຄອງປະເພນີອັນດີງາມຂອງຊາດລາວເຮົາ ຮັບໃຊ້ປີທ່ອງທ່ຽວລາວ 2018 ໂດຍບໍລິສັດຈະບໍລິການຕົບແຕ່ງຢູ່ສະຖານທີ່ຂອງລູກຄ້າຈັດງງານເອງ ຈະໃຊ້ເວລາຕົບແຕ່ງປະມານ 3 ຊົ່ວໂມງ ສຳລັບອົງປະກອບຂອງພາຂວັນປະກອບມີພາເຂົ້າຫວາຍ ພືດຜັກປະເພດໃບ ໝາກ ແລະ ປະເພດຫົວຕາມລະດູການ ແຕ່ຂາດບໍ່ໄດ້ແມ່ນປະເພດຫົວກະລົດ ໝາກເຜັດ ໝາກເລັ່ນ ໝາກເຂືອ ໂດຍລວມແລ້ວຢູ່ໃນພາຂວັນຈະມີພືດສີຂຽວ ສີເຫຼືອງ ສີມ່ວງ ສີສົ້ມ ສີຂາວ ສີແດງ ແລະ ສີອື່ນໆ ຕາມສີຂອງພືດຜັກ ເພື່ອເປັນການແທນສີຂອງດອກໄມ້ຊະນິດຕ່າງໆ ເຊິ່ງຈຸດດີພາຍຫຼັງພິທີເປີດງານໄປໄລຍະໜຶ່ງແລ້ວ ແຂກທີ່ເຂົ້າຮ່ວມງານກໍ່ສາມາດເອົາພືດຜັກທີ່ຕົບແຕ່ງຢູ່ພາຂວັນນັ້ນເປັນຂອງຕ້ອນຂອງຝາກກັບບ້ານໄປ ປຸງແຕ່ງເປັນອາຫານ ພາຍຫຼັງທີ່ເຮັດມາໄດ້ສາມງານ ເຫັນວ່າບັນຫາໃໝ່ນີ້ໄດ້ສ້າງຄວາມສົນໃຈໃຫ້ແກ່ແຂກທີ່ເຂົ້າຮ່ວມງານຫຼາຍສົມຄວນ ດັ່ງນັ້ນບໍລິສັດຈະສືບຕໍ່ປັບປຸງ ແລະ ເຮັດໄປເລື້ອຍໆ ເພື່ອບໍລິການຮັບໃຊ້ລູກຄ້າທັງຢູ່ນະຄອນຫຼວງວຽງຈັນ ແລະ ຕ່າງແຂວງ.

ທ່ານນາງ ຂັນທະລີ ແສງສຸລິເດດ ຍັງກ່າວຕື່ມວ່າ: ສຳລັບພາຂວັນທີ່ເປັນສິລິມຸງຄຸນເຮັດຢູ່ປັດຈຸບັນຈະມີ 3 ຂະໜາດໃຫ້ລູກຄ້າໄດ້ເລືອກ ຄື: ຂະໜາດໃຫຍ່ ຈະມີ 9 ຊັ້ນ ສູງປະມານເກືອບ 3 ແມັດ ໃຊ້ພືດຜັກ 80 ກິໂລ ລາຄາ 9 ລ້ານກີບ ຂະໜາດກາງຈະມີ 7 ຊັ້ນ ສູງປະມານ 2 ແມັດ ໃຊ້ພືດຜັກ 50 ກິໂລ ລາຄາ 5 ລ້ານກີບ ແລະ ຂະໜາດນ້ອຍ ຈະມີ 5 ຊັ້ນ ສູງປະມານແມັດປາຍ ໃຊ້ພືດຜັກ 30 ກິໂລ ລາຄາ 3 ລ້ານກີບ ແຕ່ພືດຜັກທີ່ມາຕົບແຕ່ງຕ້ອງເປັນພືດຜັກປອດສານພິດເທົ່ານັ້ນ ຈຶ່ງຈະສາມາດຮັກສາຄວາມງາມໄວ້ໄດ້ດົນເປັນຕົ້ນບໍ່ເນົ່າເປື່ອຍ ແລະ ບໍ່ຊໍ້າ ນອກຈາກເອົາພືດຜັກມາຕົບແຕ່ງເປັນພາຂວັນແລ້ວ ບໍລິສັດຍັງເອົາພືດຜັກສົດໆປະເພດໃບ ມາຕົບແຕ່ງແທນດອກໄມ້ຕັ້ງຢູ່ໂຕະອາຫານ ແລະ ຕົບແຕ່ງຕາມຈຸດຕ່າງໆພາຍໃນງານຕາມຄວາມຕ້ອງການຂອງລູກຄ້າ ບໍ່ວ່າຈະເປັນງານແຕ່ງງານ ແລະ ງານກອງປະຊຸມຕ່າງໆຕື່ມອີກ ດັ່ງນັ້ນ ລູກຄ້າທ່ານໃດຫາກມີຄວາມສົນໃຈໃຫ້ໄປບໍລິການຕົບແຕ່ງພາຂວັນ ດ້ວຍພືດຜັກຮັບໃຊ້ງານຂອງທ່ານ ກໍ່ສາມາດຕິດຕໍ່ພົວພັນໄດ້ທີ່ບໍລິສັດ ຕັ້ງຢູ່ບ້ານໂນນຫວາຍ ເມືອງໄຊເຊດຖາ ນະຄອນຫຼວງວຽງຈັນ.

ຂ່າວທີ່ກ່ຽວຂ້ອງ