ຂ່າວຫຼ້າສຸດ

ນະຄອນຫຼວງ ສອບເສັງຄັດເລືອກພະນັກງານລັດຖະກອນໃໝ່

868 20 ກ.ພ. 2018 ຂ່າວໜ້າ​ໜຶ່ງ
ນະຄອນຫຼວງ ສອບເສັງຄັດເລືອກພະນັກງານລັດຖະກອນໃໝ່

ວັນ​ທີ 17 ກຸມພາ 2018 ຫ້ອງວ່າການ​ປົກຄອງ​ນະຄອນຫຼວງວຽງ​ຈັນ ໄດ້​ສອບເສັງ​ຄັດ​ເລືອກເອົາ​ພະນັກງານ​ລັດຖະກອນ​ໃໝ່ ຂອງ​ນະຄອນຫຼວງ​ວຽງ​ຈັນ ປະຈຳປີ 2018 ເປັນ​ປະທານ​ຂອງທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າຄອງ​ນະຄອນຫຼວງ​ວຽງ​ຈັນ ມີບັນດາ​ອະນຸ​ກຳມະການ​ສອບເສັງ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ທ່ານ ບຸນ​ໜາ ຜາ​ທຸມ​ມະ​ວົງ ຫົວໜ້າ​ພະ​ແນກ​ພາຍ​ໃນ ນະຄອນ​ຫຼວງ​ວຽງ​ຈັນ ກ່າວ​ວ່າ: ຕາມ​ຂໍ້​ຕົກລົງ​ຂອງ​ນາຍົກ​ລັດ​ຖະມົນຕີ​ວ່າ​ດ້ວຍ​ການ​ແບ່ງ​ຕົວ​ເລກລັດຖະກອນ​ໃໝ່ ປີ 2018 ນະຄອນ​ຫຼວງ​ວຽງ​ຈັນ ໄດ້​ຮັບການ​ແບ່ງປັນ​ແຜນ​ຮັບ​ລັດຖະກອນ 12 ຄົນ ໃນ​ນີ້ ແບ່ງປັນ​ໃຫ້​ອົງການຈັດ​ຕັ້ງ​ຕ່າງໆຂັ້ນ​ນະຄອນຫຼວງວຽງ​ຈັນ 7 ຄົນ ແລະ ຂັ້ນເມືອງ 5 ຄົນ ປະກອບ​ມີຫ້ອງວ່າການ​ນະຄອນຫຼວງ​ວຽງ​ຈັນ 2 ຄົນ ສະ​ຖາ​ບັນ​ຄົ້ນຄວ້າ​ເສດຖະ​ກິດ ພະແນກການ​ຕ່າງປະເທດ ສະຫະພັນ​ນັກຮົບ​ເກົ່າ ຄະນະຊາວ​ໜຸ່ມນະຄອນຫຼວງ​ວຽງ​ຈັນ ເມືອງ​ປາກ​ງື່ມ ຫາດ​ຊາຍ​ຟອງ ໄຊ​ເຊດ​ຖາ ສີ​ໂຄດ​ຕະບອງ ແລະ ເມືອງ​ສັງ​ທອງ ພາກສ່ວນ​ລະ 1 ຄົນ ເພື່ອ​ເຮັດ​ໃຫ້ການ​ສອບເສັງ​ຄັດ​ເລືອກ​ເອົາ​ລັດຖະກອນໃໝ່ ​ປະຕິບັດ​ຕາມ​ຫຼັກການ​ສະເໝີພາບ ເປີດເຜີຍ ພາວະ​ວິໄສ ແລະ ເປັນ​ທຳ ຈຶ່ງ​ໄດ້​ມີ​ການ​ແຕ່ງຕັ້ງ​ຄະນະ​ຮັບຜິດຊອບ​ວຽກ​ງານ​ດັ່ງກ່າວຂຶ້ນ ໂດຍ​ແມ່ນ​ຮອງ​ເຈົ້າ​ຄອງ​ນະຄອນ​ຫຼວງ​ວຽງ​ຈັນ ເປັນ​ຫົວໜ້າ ມີ​ບັນດາ​ພາກສ່ວນ​ກ່ຽວຂ້ອງ​ເປັນຄະນະ ພ້ອມ​ນັ້ນ ໄດ້​ປະກາດ​ແຈ້ງຂາຍ​ຟອມ​ແບບ​ສອບເສັງ​ລັດ​ຖະກອນ​ໃໝ່ ໂດຍ​ໄດ້​ຈຳໜ່າຍ​ຄຳຮ້ອງ​ທັງ​ໝົດ 81 ສະບັບ ແລະ ຮັບລົງທະບຽນ​ນັກ​ສອບເສັງ ​ພ້ອມ​ໄດ້ອອກ​ບັດ​ເຂົ້າ​ຫ້ອງ​ສອບເສັງ​ໃຫ້ແກ່​ຜູ້​ມາ​ສະໝັກ​ໄດ້ 78 ຄົນ ຍິງ 43 ຄົນ ພາຍຫຼັງ​ສອບເສັງ​ແລ້ວ ຈະ​ຄັດ​ເລືອກ​ເອົາ​ຜູ້​ທີ່​ໄດ້​ຄະແນນ​ບໍ່ຕ່ຳ​ກວ່າ 70 ຂຶ້ນ​ໄປ ແລ້ວ​ຈະ​ນຳມາ​ສຳພາດ ເພື່ອ​ຄັດ​ເລືອກ​ພະນັກ​ງານ​ລັດຖະກອນ​ໃຫ້​ມີ​ຄຸ​ນະພາບ ແລະ ເປັນ​ຜູ້​ທີ່​ມີ​ຄວາມ​ຮູ້ຄວາມ​ສາມາດ​ຮັບ​ໃຊ້​ໜ້າທີ່​ວຽກງານ​ໄດ້​ເປັນ​ຢ່າງ​ດີ ເພື່ອ​ສ້າງ​ເປັນພະນັກງານ​ສືບ​ທອດ​ໃນ​ອະ​ນາຄົດ.

ຂ່າວທີ່ກ່ຽວຂ້ອງ