ຂ່າວຫຼ້າສຸດ

ສຸມໃສ່ 2 ແຂວງທີ່ມີທ່າແຮງຜະລິດເຂົ້າສົ່ງໄປຈີນ

408 20 ກ.ພ. 2018 ຂ່າວໜ້າ​ໜຶ່ງ

ເພື່ອ​ຮັບປະກັນ​ຄວາມ​ໝັ້ນຄົງ​ທາງ​ດ້ານ​ສະບຽງ​ອາຫານ​ ໃຫ້​ມີ​ຄວາມ​ພຽງພໍ ກໍ່​ຄືຕະຫຼາດ​ທັງພາຍ​ໃນ ແລະ ຕ່າງປະເທດ ກະຊວງ​ກະສິກຳ ແລະ ປ່າໄມ້​ ໄດ້​ສືບຕໍ່​ຈັດ​ຕັ້ງ​ປະຕິບັດ​ວຽກ​ງານ​ຕາມສິດ ແລະ ພາລະ​ບົດບາດ​ຂອງຕົນ ໂດຍ​ສະເພາະແມ່ນ​ວຽກງານ​ປູກຝັງ ແລະ ລ້ຽງສັດ.

ທ່ານ ບຸນ​ຂວາງ ຄຳ​ບຸນ​ເຮືອງ ຮອງ​ລັດຖະມົນຕີ​ກະຊວງ​ກະສິກຳ ແລະ ປ່າໄມ້ ໃຫ້​ສຳພາດ​ ໂອກາດທີ່​ທ່ານ​ເຂົ້າ​ຮ່ວມ​ງານ​ວາງ​ສະແດງ​ກະສິກຳ ຫັດຖະກຳ ອຸດ​ສາຫະ​ກຳ ​ປະຈຳ​ປີ 2018 ຄັ້ງ​ທີ 23 ຂອງ​ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ​ວ່າ: ໃນ​ປີ 2018 ກະຊວງ​ກະສິກຳ ແລະ ປ່າໄມ້ ໄດ້ສຸມ​ໃສ່​ຈັດ​ຕັ້ງ​ປະຕິບັດ 2 ໂຄງການ​ໃຫຍ່​ ເພື່ອ​ຮັບປະກັນ​ຄວາມໝັ້ນຄົງ​ສະບຽງ​ອາຫານ ເປັນຕົ້ນ ວຽກ​ງານ​ການ​ປູກຝັງ-ລ້ຽງສັດ ແລະ ການ​ຜະລິດ​ເປັນ​ສິນຄ້າຂອງ​ພໍ່​ແມ່​ປະຊາຊົນ ພ້ອມ​ນັ້ນ ໄດ້​ສຸມ​ໃສ່​ການ​ຜະລິດ​ເຂົ້າ ໂດຍສະເພາະໄລຍະ​ນີ້​ແມ່ນ​ຊຸກຍູ້​ຊາວກະສິກອນ ​ຂຸ້ນຂ້ຽວ​ປັກ​ດຳ​ເຂົ້ານາແຊງ​ໃນ​ເນື້ອທີ່ 95 ພັນ​ເຮັກຕາ ໃນ​ທົ່ວ​ປະເທດ ປັດຈຸບັນ​ໄດ້​ປັກດຳ​ສຳເລັດ​ແລ້ວ​ຫຼາຍ​ຈຸດ ແລະ ບາງ​ບ່ອນ​ກໍ່​ກຳລັງ​ຂຸ້ນຂ້ຽວ​ປັກ​ດຳ​ ເພື່ອ​ໃຫ້​ສຳເລັດ​ຕາມ​ແຜນ​ວາງໄວ້ ສະມັດຖະພາບ​ສະເລ່ຍ 3-4 ໂຕນ​ຕໍ່​ເຮັກຕາ ພ້ອມ​ນັ້ນ ເພື່ອຜະລິດ​ເຂົ້າ​ໃຫ້​ໄດ້​ຕາມ​ແຜນທີ່ລັດຖະບານ ​ສປ ຈີນ ມອບ​ໃຫ້ພວກ​ເຮົາ​ໄດ້​ສຸມ​ໃສ່​ແຂວງ​ສະຫວັນ​ນະ​ເຂດ ແລະ ແຂວງ​ຄຳມ່ວນ ເນື່ອງ​ຈາ​ກວ່າ​ສອງ​ແຂວງດັ່ງກ່າວ​ມີ​ເນື້ອທີ່​ກວ້າງ ມີ​ຊົນ​ລະປະທານ​ຂະໜາດ​ໃຫຍ່ ສາມາດຕ້ານ​ແລ້ງ​ຖ້ວມ ແລະ ອື່ນໆ ນອກຈາກ​ນີ້ ຍັງ​ໄດ້​ເກັບ​ຊື້​ເຂົ້າ​ນຳ​ບັນດາ​ແຂວງ​ອ້ອມ​ຂ້າງ​ຕື່ມ​ອີກ ໂດຍແນວ​ພັນ​ເຂົ້າ​ທີ່​ສົ່ງ​ໄປ​ແມ່ນ​ແນວພັນ​ເຂົ້າຈ້າວ ເຊິ່ງ​ປີ 2017 ໄດ້​ສົ່ງເຂົ້າ​ໄປ​ຍັງ ​ສປ ຈີນ​ມີ​ພຽງ​ແຕ່ 3 ພັນ​ໂຕນ​ເທົ່າ​ນັ້ນ.

ສ່ວນ​ໂຄງການ​ແຮ​ເຂົ້າຂອງລັດຖະບານ​ຈຳນວນ 30 ພັນ​ໂຕນ ແມ່ນ​ກະຊວງ​ອຸດສາຫະກຳ ແລະ ການ​ຄ້າ​ຮັບຜິດຊອບ ໃນ​ນີ້ ກະຊວງ​ກະສິກຳ ແລະ ປ່າໄມ້ ເປັນ​ຜູ້ຮັບປະກັນ​ສົ່ງເສີມ​ຂອດ​ໂຮງສີ ແລະ ຈຸດ​ສຸມ​ຕ່າງໆ​ໄປ​ຕາມ​ສູນສະ​ຖາ​ບັນ​ຕ່າງໆ​ທີ່​ມີ​ຢູ່​ຕາມ​ແຕ່ລະ​ແຂວງ ​ເພື່ອ​ຜະລິດ​ພັນ​ເຂົ້າ​ລຸ້ນ 1 ແລະ ລຸ້ນ 2 ເພື່ອ​ຮັບປະກັນໄດ້​ຕາມ​ເປົ້າ​ໝາຍ ແລະ ອື່ນໆ.

ຂ່າວທີ່ກ່ຽວຂ້ອງ