ຂ່າວຫຼ້າສຸດ

ນາຍົກ ເນັ້ນ ຖວທ ຕ້ອງປັບປຸງວຽກງານໃຫ້ສອດຄອງ ແລະ ແທດເໝາະກັບຕົວຈິງ ໃນໄລຍະໃໝ່

615 19 ກ.ພ. 2018 ຂ່າວໜ້າ​ໜຶ່ງ
ນາຍົກ ເນັ້ນ ຖວທ ຕ້ອງປັບປຸງວຽກງານໃຫ້ສອດຄອງ ແລະ ແທດເໝາະກັບຕົວຈິງ ໃນໄລຍະໃໝ່

ກອງ​ປະຊຸມ​ວຽກ​ງານ​ຖະແຫຼງຂ່າວ ວັດທະນະທຳ ແລະ ທ່ອງທ່ຽວ (​ຖວທ) ທົ່ວ​ປະເທດ ໄດ້​ອັດລົງ​ດ້ວຍ​ຜົນສຳເລັດ​ຢ່າງ​ຈົບງາມ ພາຍຫຼັງ​ດຳເນີນ​ມາ​ເປັນ​ເວລາ 2 ວັນ ໂດຍ​ພິທີ​ປິດ​ກອງ​ປະຊຸມ​ດັ່ງກ່າວ ໄດ້​ຈັດ​ຂຶ້ນ​ວັນ​ທີ 16 ກຸມພາ 2018 ຢູ່​ຫໍ​ວັດທະນະທຳ​ແຫ່ງຊາດ ໂດຍ​ເປັນ​ປະທານ​ຂອງ​ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີກະຊວງ ຖວທ ໃຫ້​ກຽດ​ເຂົ້າ​ຮ່ວມຂອງ​ທ່ານ ທອງ​ລຸນ ສີ​ສຸ​ລິດ ນາຍົກ​ລັດຖະມົນຕີ ພ້ອມ​ດ້ວຍ​ບັນດາ​ຮອງ​ລັດຖະມົນຕີ ແລະ ພາກສ່ວນ​ກ່ຽວຂ້ອງ.

ທ່ານ ບໍ່​ແສງ​ຄຳ ວົງ​ດາລາ ກ່າວ​ວ່າ: ກອງ​ປະຊຸມ​ຄັ້ງ​ນີ້ ໄດ້ເປັນ​ເອກະ​ພາບ​ກັນ​ກັບ​ບົດ​ສະຫຼຸບຕີ​ລາຄາ​ສະພາບ​ການ​ພັດທະນາວຽກ​ງານ ຖວທ ປີ 2017 ແລະ ກຳນົດ​ທິດ​ທາງ​ແຜນການ ປີ 2018 ເຊິ່ງ​ໄດ້​ຢັ້ງຢືນ​ວ່າ​ປັດຈຸບັນ ວຽກ​ງານ ຖວທ ຍັງ​ສືບຕໍ່​ເຄື່ອນໄຫວ​ຢ່າງ​ເປັນ​ຂະ​ບວນ​ຟົດຟື້ນ ສ້າງ​ໂອກາດ​ເງື່ອນໄຂ​ອຳນວຍຄວາມ​ສະດວກ​ໃຫ້​ວຽກ​ງານ ຖວທ ທົ່ວ​ປະເທດ​ມີ​ສີສັນ ບັນ​ຍາກາດ​ທີ່​ດີ ສາມາດ​ຍາດ​ໄດ້ຜົນ​ສຳເລັດ​ໃໝ່​ທີ່​ໜ້າ​ຊື່ນ​ຊົມ​ຍິນ​ດີ​ໃນຫຼາຍ​ດ້ານ ສຳລັບ​ປີ 2018 ຈະສືບຕໍ່​ເຮັດ​ວຽກ​ງານ​ແນວ​ຄິດ-ການເມືອງ​ຢ່າງ​ເປັນ​ຂະ​ບວນ​ຟົດຟື້ນ ທົ່ວ​ຂະແໜງການ​ປຸກລະດົມຂະ​ບວນ​ການ​ແຂ່ງຂັນ​ຮັກ​ຊາດ ແລະ ພັດທະນາ​ຢ່າງ​ແຂງແຮງປັບປຸງ​ກົງຈັກ​ການຈັດຕັ້ງ​ຂະແໜງ ຖວທ ທັງ​ສູນ​ກາງ ແລະ ທ້ອງຖິ່ນ​ໃຫ້​ສອດຄ່ອງ ແລະ ແທດເໝາະ​ກັບ​ໜ້າທີ່​ຕຳແໜ່ງງານ​ດ້ານ​ວິຊາ​ການ ແລະ ຄວາມຕ້ອງການ​ຂອງ​ວຽກ​ງານປັບປຸງລະບົບ​ການ​ຄຸ້ມ​ຄອງ​ບໍລິຫານ ການ​ປະສານ​ງານລະຫວ່າງຂະແໜງ​ການ​ຕ່າງໆ​ທີ່​ກ່ຽວຂ້ອງ ໃຫ້​ມີ​ຄວາມ​ວ່ອງໄວ ແລະ ຫັນເປັນ​ທັນ​ສະໄໝ ສ້າງ ແລະ ປັບປຸງ​ກົດໝາຍ ນິຕິ​ກຳ​ລຸ່ມ​ກົດໝາຍ ຂົງເຂດ ຖວທ ໃຫ້​ຄົບ​ຖ້ວນ ແລະ ຮັດກຸມ ການ​ສ້າງ​ພື້ນຖານ​ວັດຖຸເຕັກນິກ ແລະ ໂຄງ​ລ່າງ​ດ້ານ ຖວທ ໃຫ້​ມີ​ຄວາມ​ທັນ​ສະໄໝພຽງພໍ ແລະ ຄົບ​ຊຸດ​ເທື່ອ​ລະກ້າວ ພ້ອມ​ນີ້ ກໍ່​ຈະ​ປັບປຸງ​ແຜນວຽກ​ຈຸດ​ສຸມ​ຂະແໜງ ຖວທ ປີ 2018 ໂດຍ​ກຳນົດ​ຄາດໝາຍ​ລະອຽດ ແຕ່​ລະ​ວຽກ​ໃຫ້​ສອດຄ່ອງສືບຕໍ່​ຍົກ​ລະດັບ​ວຽກ​ງານ​ສື່​ມວນຊົນ​ຈາກ​ລະບົບ​ອານາ​ລ໋ອກ ໄປ​ສູ່ລະບົບ​ດີ​ຈີ​ຕອນ​ໃຫ້​ໄດ້ 1 ແຂວງ ຂະຫຍາຍ​ຕາ​ໜ່າງ​ໂທລະ​ໂຄ່ງໃຫ້​ໄດ້ 250 ບ້ານ ສ້າງ​ຄອບຄົວວັດທະນະທຳ 30.000 ຄອບຄົວ ບ້ານ​ວັດທະນະທຳ 200 ບ້ານ ຊຸກຍູ້​ຕິດຕາມ​ການ​ນຳ​ສະເໜີ​ທົ່ງໄຫ​ຫີນ ແຂວງ​ຊຽງ​ຂວາງ ແລະ ພູ​ຫີນ​ໜາມ​ໜໍ່ ແຂວງ​ຄຳ​ມ່ວນ ເຂົ້າ​ເປັນ​ມໍລະດົກ​ໂລກ ຈັດ​ຕັ້ງ​ປະຕິ​ບັດ​ກິດຈະກຳ​ຕ່າງໆ​ໃນ​ປີ​ທ່ອງທ່ຽວ​ລາວ 2018 ໃຫ້​ສາມາດດຶງ​ດູດ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວທົ່ວ​ປະເທດ​ບໍ່​ໃຫ້​ຫຼຸດ 5 ລ້ານ​ຄົນ ແລະ ສ້າງ​ລາຍ​ຮັບ​ໃຫ້​ໄດ້​ປະມານ 900 ລ້ານ​ໂດ​ລາ​ສະຫະລັດ ຫຼື ປະມານ 7.200 ຕື້​ກີບ.

ໂອກາດ​ນີ້ ທ່ານ​ນາຍົກ​ໄດ້​ໃຫ້ກຽດ​ໂອ້​ລົມ ເຊິ່ງ​ທ່ານ​ໄດ້​ສະແດງຄວາມ​ຍ້ອງຍໍ​ຊົມເຊີຍ​ຕໍ່​ຜົນງານ​ທີ່​ຂະແໜງ ຖວທ ຍາດ​ມາ​ໄດ້​ໃນໜຶ່ງ​ປີຜ່ານມາ ຂະແໜງ ຖວທ ໄດ້​ສືບຕໍ່​ຂະຫຍາຍຕົວ​ໄປ​ຕາມ​ທິດອັນ​ຕັ້ງໜ້າ​ກ້າວ​ຂຶ້ນ ແລະ ຂະຫຍາຍ​ຕົວ​ໃໝ່​ທັງ​ປະລິມານ ແລະ ຄຸນະພາບ ທັງ​ສາມາດ​ຮັບໃຊ້​ແນວທາງ​ການເມືອງ​ຂອງ​ພັກ ແລະ ລັດ ປະກອບສ່ວນ​ຢ່າງ​ຫຼວງຫຼາຍ​ເຂົ້າ​ໃນ​ຜົນງານ​ລວມ​ຂອງພາລະກິດ​ປ່ຽນແປງ​ໃໝ່ ແລະ ການ​ປົກ​ປັກ​ຮັກສາ​ພັດທະນາ​ປະເທດ​ຊາດ ພ້ອມ​ນີ້ ທ່ານ​ຍັງ​ໄດ້ເນັ້ນ​ບາງ​ດ້ານ​ໃຫ້​ຂະແໜງ ຖວທ ສຸມ​ໃສ່​ແກ້​ໄຂ ເປັນຕົ້ນ ຕ້ອງ​ສືບຕໍ່​ປັບປຸງ​ກົງຈັກ​ການຈັດຕັ້ງ​ຢູ່​ສູນກາງ ແລະ ທ້ອງຖິ່ນ​ໃຫ້​ສອດຄ່ອງ ແລະ ແທດເໝາະ​ກັບ​ວຽກ​ງານຕົວ​ຈິງ​ໃນ​ໄລຍະ​ໃໝ່ ກຳ​ແໜ້ນແນວທາງ​ນະໂຍບາຍ ຮູ້​ນຳ​ໃຊ້ ຄວາມ​ຮູ້​ຄວາມ​ສາມາດ​ເຂົ້າ​ໃນການ​ປະຕິບັດ​ໜ້າທີ່ໄປ​ຕາມ​ແນວທາງ ຊອກ​ໃຫ້​ເຫັນ ແລະ ສ້າງໃຫ້​ໄດ້​ຜູ້​ທີ່​ມີ​ພອນ​ສະຫວັນ​ແຕ່​ລະດ້ານ ພະຍາຍາມ​ຫັນ​ການ​ຄຸ້ມຄອງ​ບໍລິຫານ​ວຽກ​ງານ​ໄປ​ສູ່​ການນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະໄໝ ສຳລັບ​ວຽກ​ງານ​ຖະແຫຼງ​ຂ່າວ ນອກຈາກ​ຈະ​ຄຸ້ມ​ຄອງ​ປະເພດໜັງສືພິມ ວາລະສານ ວິທະຍຸ ໂທລະພາບ​ແລ້ວ ຕ້ອງ​ພະຍາຍາມ​ຄຸ້ມ​ຄອງ​ສື່​ປະເພດ​ອື່ນໆ ໂດຍ​ສະເພາະ ສື່​ອອນ​ລາຍ​ຕ່າງໆ ຕ້ອງ​ເຮັດ​ໃຫ້​ປະຊາຊົນ ສັງຄົມ​ບໍລິ​ໂພກ​ຂ່າວ​ທີ່​ດີ​ທີ່​ສຸດ ປອດ​ໄພ​ທີ່ສຸດ ເລືອກ​ໃຊ້​ສື່ ແລະ ຂ່າວຂອງ​ພວກ​ເຮົາ​ເປັນ​ຫຼັກ ຮູ້​ສົມທຽບ​ຊັ່ງຊາ ຮູ້​ອັນ​ຖືກ​ອັນ​ຜິດ ວຽກງານ​ວັດທະນະທຳ​ຕ້ອງ​ເອົາໃຈໃສ່​ຊຸກຍູ້​ຂະ​ບວນ​ການ​ສ້າງ​ຄອບຄົວ ວັດທະນະທຳ​ໃຫ້​ໄດ້​ຕາມ​ແຜນທີ່ວາງ​ໄວ້ ໂດຍ​ຮັບປະກັນ​ມາດຖານຂອງ​ຄອບຄົວ ແລະ ບ້ານ​ວັດ​ທະນະ​ທຳ​ທີ່ແທ້​ຈິງ ສືບຕໍ່​ຊຸກຍູ້ ແລະ ຕິດຕາມ​ການ​ພິຈາລະນາ​ທົ່ງ​ໄຫຫີນ ແຂວງ​ຊຽງ​ຂວາງ ແລະ ພູຫີນ​ໜາມ​ໜໍ່ ແຂວງ​ຄຳ​ມ່ວນ ເຂົ້າເປັນ​ມໍລະດົກ​ໂລກ ເອົາໃຈໃສ່ສົ່ງເສີມອະນຸ​ຮັກ​ວັດທະນະທຳ ຮີດຄອງ​ປະເພນີ​ອັນ​ດີງາມ​ຂອງຊາດ​ໃຫ້​ຍືນ​ຍົງ ສ່ວນ​ວຽກ​ງານທ່ອງ​ທ່ຽວ ຕ້ອງ​ສູ້​ຊົນ​ດຶງ​ດູດ​ນັກທ່ອງ​ທ່ຽວ​ເຂົ້າ​ທ່ອງ​ທ່ຽວ​ທົ່ວ​ປະເທດ​ ໃຫ້​ໄດ້​ຕາມ​ຄາດໝາຍ​ທີ່​ວາງໄວ້ ໂດຍ​ສ້າງ​ເງື່ອນໄຂ ແລະ ສິ່ງອຳນວຍ​ຄວາມ​ສະດວກ ສ້າງ​ກິດຈະ​ກຳ ໂຄສະນາ​ເຜີຍແຜ່​ວັດ​ທະນະ​ທຳ ແລະ ຮີດຄອງ​ປະເພນີ​ອັນດີງາມ​ຂອງ​ຊາດ ຊຸກຍູ້​ສົ່ງເສີມການ​ຜະລິດ​ເຄື່ອງ​ທີ່​ລະນຶກ​ໃຫ້​ມີຫຼາຍ​ສີສັນ ເພື່ອ​ສ້າງ​ລາຍ​ຮັບ​ໃຫ້ປະຊາຊົນ ກໍ່​ຄື​ປະເທດ​ຊາດ​ໂດຍລວມ ເພື່ອ​ດຶງ​ດູດ​ນັກ​ທ່ອງ​ທ່ຽວໃຫ້​ເພີ່ມ​ຂຶ້ນ​ທັງ​ປະລິມານ ແລະ ຄຸນະພາບ.

ຂ່າວທີ່ກ່ຽວຂ້ອງ