ຂ່າວຫຼ້າສຸດ

ການເງິນ ນວ ປະຕິບັດລາຍຮັບບັນລຸ 1.038 ຕື້ກວ່າກີບ

984 19 ກ.ພ. 2018 ຂ່າວໜ້າ​ໜຶ່ງ
ການເງິນ ນວ ປະຕິບັດລາຍຮັບບັນລຸ 1.038 ຕື້ກວ່າກີບ

ພະແນກການ​ເງິນ ນະຄອນຫຼວງ​ວຽງ​ຈັນ (​ກງ.ນວ) ຈັດ​ກອງປະຊຸມ​ສະຫຼຸບ​ວຽກ​ງານ​ຮອບດ້ານປີ 2017ແລະ ທິດ​ທາງ​ແຜນການປີ 2018 ຂອງ​ຂະແໜງການ​ເງິນ ຂຶ້ນ​ວັນ​ທີ 16 ກຸມພາ 2018 ຢູ່​ພະແນກ​ດັ່ງກ່າວ ໂດຍ​ເປັນ​ປະທານຂອງ​ທ່ານ ຄຳ​ພັນ ມາລາ​ບັນດິດ ຫົວໜ້າ​ພະ​ແນກ ​ກງ.ນວ ໃຫ້ກຽດ​ເຂົ້າ​ຮ່ວມ​ຂອງ​ທ່ານ ສິນ​ລະວົງ ຄຸດ​ໄພທູນ ເຈົ້າ​ຄອງ ນວ ທ່ານ ສີ​ລາ ວຽງ​ແກ້ວ ຮອງ​ລັດຖະ​ມົນຕີ​ກະຊວງ​ການ​ເງິນ ພ້ອມດ້ວຍ​ບັນດາ​ກົມ ເມືອງ ແລະ ພາກສ່ວນກ່ຽວຂ້ອງ​ເຂົ້າ​ຮ່ວມ.

ທ່ານ ຄຳ​ພັນ ມາລາ​ບັນດິດ ກ່າວ​ວ່າ: ພະ​ແນກ ​ກງ.ນວ ເປັນພະ​ແນກ​ໜຶ່ງ​ທີ່​ມີ​ສາຍ​ຕັ້ງ​ຂຶ້ນ​ກັບກະຊວງ​ການ​ເງິນ ສາຍ​ຂວາງ​ຂຶ້ນກັບ ນວ ມີ 6 ຫ້ອງການ ເປັນ​ຄະນະ​ພັກ​ໜຶ່ງ​ຊີ້​ນຳ-ນຳພາ 6 ຫ້ອງການ 3 ຂະແໜງການ​ສາຍ​ຕັ້ງ (ພາສີ ສ່ວຍ​ສາ​ອາກອນ ນວ ຄັງເງິນ​ແຫ່ງ​ຊາດ​ປະຈຳ ນວ) ດ້ານວິຊາ​ສະເພາະ ເຊິ່ງ​ເຄື່ອນ​ໄຫວວຽກ​ງານ​ຕາມ​ພາລະ​ບົດບາດ ຂອບ​ເຂດ ​ສິດ ແລະ ໜ້າທີ່​ຂອງໃຜລາວ ປັດຈຸບັນ ທົ່ວ​ຂະແໜງການ​ເງິນ​ມີ​ພະນັກງານ 886 ຄົນ ຍິງ 290 ຄົນ ປີ 2017 ໄດ້​ຮັບມອບ​ໝາຍ​ໃຫ້​ຈັດ​ເກັບ​ລາຍ​ຮັບ 1.107 ຕື້​ກີບ ທຽບໃສ່​ປີຜ່ານມາ ເພີ່ມ​ຂຶ້ນ 2,9% ແລະ ໄດ້​ດັດແກ້ເປັນ 1.103,91 ຕື້​ກີບ ໃນ​ນີ້ ສ່ວຍສາ​ອາກອນ 1.053,2 ຕື້​ກີບ ຊັບສິນ​ຂອງ​ລັດ 50 ຕື້​ກີບ ແລະ ຄຸ້ມຄອງ​ການ​ເງິນ 708,96 ລ້ານ​ກີບ ຜ່ານ​ການຈັດຕັ້ງ​ຕົວ​ຈິງ​ປະຕິບັດໄດ້ 1.038,96 ຕື້​ກີບ ເທົ່າ​ກັບ 94,12% ໃນ​ນີ້ ສ່ວຍ​ສາ​ອາກອນປະຕິບັດ​ໄດ້ 91,3% ຊັບ​ສິນ​ຂອງລັດ 152,86% ການ​ເງິນ​ລັດ​ວິສາ​ຫະ​ກິດ 128,31% ແລະ ລາຍຮັບ​ອື່ນໆ 72,06 ລ້ານ​ກີບ ດ້ານລາຍ​ຈ່າຍ 672,05 ຕື້​ກີບ ປະຕິບັດ​ໄດ້ 657,33 ຕື້​ກີບ ເທົ່າ​ກັບ 97,81% ດຸ່ນ​ດ່ຽງ​ໃຫ້​ສູນ​ກາງ 338,58 ຕື້​ກີບ ເທົ່າ​ກັບ 78,29%.

ສຳລັບ​ປີ 2018 ພະ​ແນກ ​ກງ.ນວ ຈະ​ສູ້​ຊົນ​ປະຕິບັດ​ແຜນ​ງົບປະມານ​ໃຫ້​ໄດ້​ຕາມ​ຄາດໝາຍ ເຊິ່ງ​ຕົວ​ເລກ​ແຜນການ​ເບື້ອງ​ຕົ້ນ 1.212,25 ຕື້​ກີບ ເທົ່າ​ກັບ 2,66% ຂອງ​ລວມ​ຍອດ​ຜະລິດຕະ​ພັນ​ພາຍ​ໃນ (GDP) ນວ ໃນ​ນີ້ ສ່ວຍ​ສາ​ອາກອນ​ຈະ​ຈັດເກັບ 1.146,61 ຕື້​ກີບ ຄຸ້ມ​ຄອງຊັບ​ສິນ​ຂອງ​ລັດ 65 ຕື້​ກີບ ການເງິນ ລັດ​ວິ​ສາ​ຫະ​ກິດ 633,1 ຕື້ກີບ ນອກ​ນີ້ ລາຍ​ຮັບ​ສູນ​ກາງ​ປະຕິ​ບັດ​ຢູ່ ນວ ໃນ​ການ​ເກັບ​ລາຍ​ຮັບພາສີ ບັນດາ​ດ່ານ​ສາກົນ ດ່ານປະເພນີ ດ່ານ​ທ້ອງຖິ່ນ 3.327,96 ຕື້​ກີບ ສຳລັບ​ລາຍຈ່າຍ​ເບື້ອງ​ຕົ້ນ 619,2 ຕື້​ກີບ ເທົ່າ​ກັບ 1,35% ຂອງ GDP ນວ ສ່ວນ​ແຜນການ​ດຸ່ນ​ດ່ຽງ​ໃຫ້ສູນ​ກາງ 593,05 ຕື້​ກີບ ເທົ່າ​ກັບ 1,3% ຂອງ GDP ນວ.

ທ່ານ​ເຈົ້າ​ຄອງ ນວ ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຜົນງານ​ທີ່​ຂະແໜງການ​ເງິນ ນວ ຍາດ​ມາ​ໄດ້​ໃນ​ໜຶ່ງ​ປີຜ່ານມາ ເຊິ່ງໄດ້​ປະກອບສ່ວນ​ສຳຄັນ​ ໃນ​ການສ້າງສາ​ພັດທະນາ​ເສດຖະກິດ-ສັງຄົມ​ຂອງ ນວ ໄດ້​ເປັນ​ຢ່າງ​ດີ ພ້ອມ​ນີ້ ທ່ານ​ກໍ່​ໄດ້​ເນັ້ນ​ບາງ​ບັນຫາ​ໃຫ້​ຂະແໜງການ​ເງິນ ນວ ສືບຕໍ່​ປັບປຸງ​ແກ້​ໄຂ ຄື: ເອົາໃຈໃສ່ສຶກ​ສາ​ອົບຮົມ​ແນວ​ຄິດ-ການເມືອງ​ໃຫ້​ພະນັກງານ-ລັດ​ຖະກອນ​ທົ່ວ​ຂະແໜງການ​ເງິນ​ຢ່າງເລິກເຊິ່ງ-ແທດ​ເຖິງ​ກວ່າ​ເກົ່າ ເຜີຍແຜ່​ແຜນ​ງົບປະມານ​ປີ 2018 ສືບຕໍ່​ນຳ​ໃຊ້​ລະບົບ​ເຕັກ​ໂນ​ໂລ​ຊີ ເຂົ້າ​ໃນ​ການ​ຄຸ້ມ​ຄອງ​ຈັດ​ເກັບລາຍ​ຮັບ ແລະ ປະຕິບັດ​ລາຍຈ່າຍ​ໃຫ້​ນັບ​ມື້​ຫຼາຍ​ຂຶ້ນ ແລະ ຫັນເອົາ​ການ​ຊຳລະ​ພັນທະ​ພາສີ​ອາກອນ ແລະ ຄ່າ​ທຳນຽມ​ຕ່າງໆ ຜ່ານ​ລະບົບ​ທະນາຄານ ສືບຕໍ່​ສົມທົບ​ກັບ​ພາກສ່ວນ​ກ່ຽວຂ້ອງ ​ສ້າງກົດໝາຍ​ວ່າ​ດ້ວຍ​ອາກອນ​ຕົວເມືອງ​ໃຫ້​ສຳເລັດ ສັງ​ລວມ​ເກັບກຳ​ຂໍ້​ມູນ ແລະ ຕິດຕາມ​ບັນຊີ​ຊັບສິນ​ຂອງ​ລັດ​ໃຫ້​ຄົບ​ຖ້ວນ ເຂັ້ມງວດ ປະຕິບັດ​ກົດໝາຍ​ກ່ຽວ​ກັບການ​ປະຕິບັດ​ລາຍ​ຈ່າຍ​ງົບ​ປະມານ.

ຂ່າວທີ່ກ່ຽວຂ້ອງ