ຂ່າວຫຼ້າສຸດ

ກະຊວງປ້ອງກັນປະເທດ ສ້າງເສັ້ນທາງຍຸດທະສາດຫຼາຍເສັ້ນ

626 19 ກ.ພ. 2018 ຂ່າວໜ້າ​ໜຶ່ງ

ວັນ​ທີ 15 ກຸມພາ 2018 ກົມໃຫຍ່​ເສນາ​ທິ​ການ​ກອງທັບ ​ໄດ້​ຈັດພິທີ​ເຊັນ​ສັນຍາ​ໂຄງການ​ຮັບ​ເໝົາກໍ່ສ້າງ​ເສັ້ນທາງ​ຍຸດ​ທະ​ສາດ ແລະ ເສັ້ນທາງ​ເຂົ້າ​ກົມ​ກອງ​ຂອງກະຊວງ​ປ້ອງ​ກັນ​ປະເທດ​ຂຶ້ນ ທີ່​ສະໂມ​ສອນ​ກົມ​ໃຫຍ່​ເສນາ​ທິ​ການກອງທັບ ມີ​ທ່ານ ​ພົ.ວ ສິງ​ສະຫວັດ ພົມ​ມະ​ສັກ ຮອງ​ຫົວໜ້າກົມ​ໃຫຍ່​ເສນາ​ທິ​ການ​ກອງທັບ ບັນດາ​ຄະນະ​ພັກ-ຄະນະ​ບັນຊາ ກົມ​ກອງ ຫ້ອງການ ພະ​ແນກການ ກຳລັງ​ຫຼວງ ກຳລັງ​ທ້ອງຖິ່ນ ແລະ ບໍລິສັດ​ຜູ້​ຮັບ​ເໝົາ​ກໍ່ສ້າງ ເຂົ້າ​ຮ່ວມ.

ທ່ານພັນ​ໂທ ອຸ່ນ​ທອງ ບຸດ​ສຸວັນ ຮອງ​ຫົວໜ້າ​ຫ້ອງການ​ກົມ​ໃຫຍ່ເສນາ​ທິ​ການ​ກອງທັບ ຂຶ້ນ​ຜ່ານ​ຂໍ້ຕົກລົງ​ວ່າ​ດ້ວຍ​ການ​ອະນຸມັດ​ໃຫ້ບັນດາ​ບໍລິສັດ ແລະ ກົມ​ກອງເຫຼົ່າ​ຮົບ​ຊ່າງ​ແສງ​ຮັບ​ເໝົາ​ໂຄງການ​ກໍ່ສ້າງ​ເສັ້ນທາງ ລວມ​ມີ 10 ໂຄງການ ແລະ ມີ 10 ບໍລິສັດ ຮັບ​ເໝົາ ຄື: ບໍລິສັດ ບຸນ​ທະວີ​ຊັບກໍ່ສ້າງ​ຂົວ​ທາງ​ຮັບ​ເໝົາ​ທະລຸ ແລະ ຍົກ​ລະດັບ​ເສັ້ນທາງ​ຍຸດ​ທະສາດ​ແຕ່​ບ້ານ​ນ້ຳ​ໄຕ ເມືອງ​ຊຳໃຕ້-ບ້ານ​ພຽງ​ລຽງ ເມືອງ​ວຽງ​ໄຊ ແຂວງ​ຫົວພັນ ມູນ​ຄ່າ 339,66 ຕື້​ກີບ ບໍລິສັດ ພູ​ທະ​ຈັກ​ກໍ່ສ້າງ ແລະ ພັດທະນາ​ຄົບ​ວົງ​ຈອນ​ຂາເຂົ້າ-ຂາ​ອອກ ​ຈຳກັດ ຮັບ​ເໝົາ​ທະລຸ ແລະ ຍົກ​ລະດັບເສັ້ນທາງ​ລຽບຕາມ​ຊາຍ​ແດນ ລາວ-ຈີນ ແຕ່ເມືອງ​ຫຼວງ​ນ້ຳ​ທາ ແຂວງ​ຫຼວງນ້ຳ​ທາ-ເມືອງ​ບຸນ​ໃຕ້ ແຂວງ​ຜົ້ງສາລີ (ໄລຍະ​ທີ 1) ມູນ​ຄ່າ 271,17 ຕື້​ກີບ ບໍລິສັດ ຫອມ​ສົມບັດ​ກໍ່ສ້າງ​ຂົວ-ທາງ ຮັບ​ເໝົາ​ທະລຸ ແລະ ຍົກ​ລະດັບ​ເສັ້ນທາງ​ລຽບຕາມ​ຊາຍ​ແດນ ລາວ-ກຳປູເຈຍ ແຂວງ​ຈຳປາ​ສັກ ໄລຍະ​ທີ 1 ມີ​ໄລ ຍະ​ທາງ 37 ກິໂລແມັດ ມູນ​ຄ່າ 92,10 ຕື້​ກີບ ແລະ ໄລຍະ​ທີ 2 ໄລຍະ​ທາງ​ແຕ່​ກິໂລແມັດທີ 37-ກິໂລແມັດທີ 74 ມູນ​ຄ່າ 96,10 ຕື້​ກີບ ບໍລິສັດ ຄູນ​ທະວີ​ຊັບ​ກໍ່ສ້າງຂົວ-ທາງ ແລະ ຊົນລະປະທານ ຈຳກັດ ຮັບ​ເໝົາ​ທະລຸ ແລະ ຍົກລະດັບ​ເສັ້ນທາງ​ຍຸດ​ທະ​ສາດ​ແຕ່ບ້ານ​ນ້ຳ​ຟ້າ ເມືອງ​ຕົ້ນ​ຜິ້ງ (ເຂດຍອດນ້ຳ​ເກິ່ງ)-ບ້ານ​ຫ້ວຍ​ນ້ຳຄານ-ບ້ານ​ປຸ່ງ​ຜາ ເມືອງ​ຕົ້ນ​ເຜິ້ງ ແຂວງ​ບໍ່​ແກ້ວ ມູນ​ຄ່າ 90,36 ຕື້ກີບ ບໍ​ລີ​ສັດ ທະວີ​ໄຊ​ກໍ່ສ້າງ ຈຳກັດ ຮັບ​ເໝົາ​ທະລຸ ແລະ ຍົກ​ລະດັບ​ເສັ້ນທາງ​ຍຸດ​ທະ​ສາດ ແຕ່ບ້ານ​ນ້ຳ​ປ່າ​ນະ ເມືອງ​ຕົ້ນ​ເຜິ້ງ (ເຂດ​ຍອດນ້ຳ​ຍອນ)-ລ້ອງ​ພະບາດ ເມືອງ​ເມິງ ແຂວງ​ບໍ່​ແກ້ວ ໄລຍະ​ທີ 1 ມີ​ໄລຍະ​ທາງ 16 ກິ​ໂລແມັດ ມູນ​ຄ່າ 44,05 ຕື້​ກີບ ບໍ​ລິສັດ ພີ​ເອັສ​ກໍ່ສ້າງ ແລະ ທ່ອງທ່ຽວ ຮັບ​ເໝົາ​ທະລຸ ແລະ ຍົກ​ລະດັບ​ເສັ້ນທາງ​ຍຸດ​ທະ​ສາດ​ແຕ່​ບ້ານ​ນ້ຳ​ປ່າ​ນະ ເມືອງ​ຕົ້ນ​ເຜິ້ງ (ເຂດຍອດນ້ຳ​ຍອນ)-ລ້ອງ​ພະ​ບາດ ເມືອງ​ເມິງ ແຂວງ​ບໍ່​ແກ້ວ ໄລຍະທີ 2 ມີ​ໄລຍະ​ທາງ 13 ກິໂລແມັດ ມູນ​ຄ່າ 43,78 ຕື້​ກີບ ບໍ​ລີ​ສັດ ລາຊາ​ໂຊກ ຈຳກັດ ຮັບ​ເໝົາ​ທະລຸ ແລະ ຍົກ​ລະດັບ​ເສັ້ນທາງ​ລຽບຕາມ​ຊາຍ​ແດນ ລາວ-ຫວຽດນາມ ແຂວງ​ບໍ​ລິ​ຄຳ​ໄຊ (ໄລຍະ​ທີ 1) ໄລຍະ​ທີ 1 ມູນ​ຄ່າ 35 ຕື້​ກີບ ບໍ​ລີ​ສັດ ພິ​ຊິດ​ໄຊ​ສົມບັດກໍ່ສ້າງຂົວ-ທາງ ຈຳກັດ ຮັບ​ເໝົາ​ທະລຸ ແລະ ຍົກ​ລະດັບ​ເສັ້ນທາງ​ລຽບຕາມ​ຊາຍ​ແດນ ລາວ-ຫວຽດນາມ ແຂວງ​ບໍ​ລິ​ຄຳ​ໄຊ (ໄລຍະ​ທີ 1) ໄລຍະ​ທີ 2 ມູນ​ຄ່າ 35 ຕື້​ກີບ ແລະ ບໍລິສັດ ແກ້ວ​ດາ​ວອນການໄຟຟ້າ ແລະ ກໍ່ສ້າງ​ຂົວ-ທາງ ຈຳກັດ​ຜູ້​ດຽວ ຮັບ​ເໝົາ​ທະລຸ ແລະ ຍົກ​ລະດັບ​ເສັ້ນທາງ​ລຽບ​ຕາມຊາຍ​ແດນ ລາວ-ຫວຽດນາມ ແຂວງ​ບໍ​ລິ​ຄຳ​ໄຊ (ໄລຍະ​ທີ 1) ໄລຍະ​ທີ 3 ມູນ​ຄ່າ 265,09 ຕື້​ກີບ.

ຂ່າວທີ່ກ່ຽວຂ້ອງ