ຂ່າວຫຼ້າສຸດ

ລາວໂທລະຄົມ ຈະສ້າງຖານລູກຄ້າໃຫ້ໄດ້ 3,4 ລ້ານເລກໝາຍ

808 16 ກ.ພ. 2018 ຂ່າວໜ້າ​ໜຶ່ງ
ລາວໂທລະຄົມ ຈະສ້າງຖານລູກຄ້າໃຫ້ໄດ້ 3,4 ລ້ານເລກໝາຍ

ບໍລິສັດ​ລັດ ວິ​ສາ​ຫະ​ກິດລາວໂທລະ​ຄົມມະນາຄົມ​ ໃນ​ໜຶ່ງ​ປີຜ່ານ​ມາ ແມ່ນ​ໄດ້​ມີ​ການ​ລົງທຶນຂະຫຍາຍ​ຕາ​ໜ່າງ​ລະບົບ​ໂທລະຄົມມະນາຄົມ ໃນ​ມູນ​ຄ່າ​ທັງ​ໝົດ 82,8 ລ້ານ​ໂດ​ລາ​ສະຫະລັດ ປັດຈຸ​ບັນ ລາວ​ໂທລະ​ຄົມ​ມີ​ສະຖານີມື​ຖື​ທັງ​ໝົດ 5.711 ສະຖານີ ມີສັນຍານ​ໂທລະສັບ​ມື​ຖື​ຄວບ​ຄຸມໄດ້ 18 ແຂວງ 148 ເມືອງ 8.500 ກວ່າ​ບ້ານ ໃນ​ນີ້ ລະບົບ 2G ກວມ 59% 3G ກວມ 38% 4G ກວມ 10% ຂອງ​ຈຳນວນ​ໝູ່​ບ້ານ​ທັງ​ໝົດ ແລະ 4,5G ກວມ 5% ຂອງ​ຕົວ​ເມືອງໃຫຍ່ ທັງ​ໝົດ​ນັ້ນ​ໄດ້​ກາຍເປັນ​ປັດໄຈ​ທີ່​ຊຸກຍູ້​ໃຫ້​ລາວ​ໂທລະ​ຄົມ​ ສາມາດ​ຂະຫຍາຍ​ລູກ​ຄ້າ​ໃໝ່ ແລະ ຮັກສາ​ຈຳນວນ​ລູກ​ຄ້າ​ເກົ່າ​ໄວ້​ໄດ້.

ມາ​ຮອດ​ປັດຈຸບັນ ມີ​ລູກ​ຄ້າ​ໃຊ້ໂທລະສັບ​ມື​ຖື​ໃນ​ລະບົບ​ຈຳນວນ 16 ລ້ານ​ເລກ​ໝາຍ ໂທລະສັບ​ຕັ້ງໂຕະ 40 ພັນ​ເລກ​ໝາຍ ໂທລະສັບ​ວິນ​ໂຟນ 430 ພັນ​ເລກ​ໝາຍ ແລະ ອິນ​ເຕີ​ເນັດ 1,5 ລ້ານ​ລູກຄ້າ ໃນ​ປີ 2017 ຜ່ານ​ມາ ລາວໂທລະ​ຄົມ​ສາມາດ​ສ້າງ​ລາຍ​ຮັບໄດ້​ທັງ​ໝົດ 1.843,5 ຕື້​ກີບ (ລວມ​ອາກອນ) ເພີ່ມ​ຂຶ້ນ​ຈາກ​ປີ 2016 ເທົ່າ​ກັບ 1,8% ໃນ​ນັ້ນ ມີກຳໄລ​ສຸດທິ 381 ຕື້​ກີບ ສາມາດປະຕິບັດ​ພັນທະ​ໃຫ້​ລັດຖະບານ ໄດ້​ທັງ​ໝົດ​ຈຳນວນ 535,2 ຕື້​ກີບ ກວມ​ເອົາ​ອັດຕາ​ສ່ວນ 34,7% ຂອງ​ລາຍ​ຮັບ​ທີ່​ລາວ​ໂທລະ​ຄົມ ປະຕິບັດ​ໄດ້​ໃນ​ປີ 2017.

ໃນ​ປີ 2018 ລາວ​ໂທລະ​ຄົມ ຈະ​ສູ້​ຊົນ​ສ້າງ​ຖານ​ລູກ​ຄ້າ​ໃຫ້​ໄດ້ 3,4 ລ້ານ​ເລກ​ໝາຍ ແລະ ສ້າງລາຍ​ຮັບ​ໃຫ້​ໄດ້​ທັງ​ໝົດ 1.985,5 ຕື້​ກີບ ທຽບໃສ່​ປີ 2017 ເພີ່ມ​ຂຶ້ນ 7,7% ຄາດ​ຄະເນ​ກຳໄລ​ສຸດທິໃຫ້​ໄດ້ 409,7 ຕື້​ກີບ ເພີ່ມ​ຂຶ້ນ 7,5% ແລະ ຈະ​ມອບ​ພັນທະ​ໃຫ້ລັດຖະບານ​ຈຳນວນ 568 ຕື້​ກີບ ກວມ​ເອົາ​ອັດຕາ​ສ່ວນ​ບໍ່​ຫຼຸດ 30% ຂອງ​ລາຍ​ຮັບ​ປີ 2018 ນອກຈາກ​ນີ້ ຍັງ​ຈະ​ໄດ້​ລົງທຶນ​ໃນເບື້ອງ​ຕົ້ນ 50 ລ້ານ​ໂດ​ລາ​ສະຫະລັດ ຫຼື ປະມານ 400 ກວ່າ​ຕື້​ກີບ ເພື່ອ​ປັບປຸງ ແລະ ຂະຫຍາຍ​ຕາໜ່າງ​ລະບົບ​ໂທລະ​ຄົມມະນາຄົມ ໂດຍ​ສະເພາະແມ່ນ​ອິນ​ເຕີ​ເນັດ ໃຫ້​ຮັບປະກັນ​ທາງ​ດ້ານ​ປະລິມານ ແລະ ຄຸນະພາບ.

ບໍລິສັດ​ ລັດວິ​ສາ​ຫະ​ກິດລາວ​ໂທລະ​ຄົມມະນາຄົມ​ ຈັດກອງ​ປະຊຸມ​ສະຫຼຸບ​ຜົນງານ​ການເຄື່ອນ​ໄຫວ​ວຽກ​ງານ ປະຈຳ​ປີ 2017 ຂຶ້ນ​ໃນ​ວັນ​ທີ 14 ກຸມພາ 2018 ທີ່​ສຳນັກງານ​ໃຫຍ່​ບໍລິສັດດັ່ງກ່າວ ພາຍ​ໃຕ້​ການ​ເປັນ​ປະທານ​ຂອງ​ທ່ານ ຖາວອນ ສົມ​ສະກຸນ ຜູ້ອຳນວຍການ​ໃຫຍ່​ບໍລິສັດ ລັດ​ວິ​ສາ​ຫະ​ກິດລາວ​ໂທລະ​ຄົມມະ​ນາ​ຄົມ ເປັນ​ກຽດ​ເຂົ້າ​ຮ່ວມ​ມີທ່ານ ທັນ​ສະໄໝ ກົມ​ມະ​ສິດ ລັດຖະ​ມົນຕີ​ກະຊວງ​ໄປສະນີ ໂທລະຄົມມະນາຄົມ ແລະ ການ​ສື່ສານ ພ້ອມ​ກຳມະການ​ສະພາ​ຂາ​ຮຸ້ນ ພະນັກງານ​ຈາກ​ສູນ​ກາງ ແລະ ສາຂາ​ແຂວງ​ທົ່ວ​ປະເທດ.

ຂ່າວທີ່ກ່ຽວຂ້ອງ