ຂ່າວຫຼ້າສຸດ

ສສຊ-ສສ ນວ ລົງເຄື່ອນໄຫວພົບປະປະຊາຊົນ 9 ເມືອງ

627 16 ກ.ພ. 2018 ຂ່າວໜ້າ​ໜຶ່ງ
ສສຊ-ສສ ນວ ລົງເຄື່ອນໄຫວພົບປະປະຊາຊົນ 9 ເມືອງ

ສະມາຊິກ​ສະພາ​ແຫ່ງ​ຊາດ (​ສສຊ) ປະຈຳ​ເຂດ​ເລືອກ​ຕັ້ງ​ທີ 1 ແລະ ສະມາຊິກ​ສະພາ​ປະຊາຊົນ ນະຄອນຫຼວງ​ວຽງ​ຈັນ (​ສສ ນວ) ທັງ​ໝົດ 35 ທ່ານ ໄດ້​ລົງ​ເຄື່ອນໄຫວ​ພົບ​ປະ​ປະຊາຊົນ ແລະ ເຜີຍແຜ່​ຜົນສຳເລັດ​ກອງ​ປະຊຸມ​ສະໄໝ​ສາມັນ​ເທື່ອ​ທີ 4 ຂອງ​ສະພາ​ແຫ່ງຊາດ ຊຸດ​ທີ VIII ແລະ ສະພາປະຊາຊົນ ນະຄອນຫຼວງ​ວຽງ​ຈັນ ຊຸດ​ທີ I ຢູ່ 9 ຕົວ​ເມືອງ ນະຄອນຫຼວງ​ວຽງ​ຈັນ.

ວັນ​ທີ 15 ກຸມພາ 2018 ​ສສຊ ແລະ ​ສສ ນວ ທັງ​ໝົດ 6 ໜ່ວຍ ໄດ້​ລົງ​ເຄື່ອນ​ໄຫວ​ພົບ​ປະ​ປະຊາຊົນ ຢູ່​ເມືອງ​ໄຊ​ເສດ​ຖາ ເມືອງ​ສີ​ໂຄດຕະບອງ ເມືອງ​ໄຊ​ທານີ ເມືອງຫາດ​ຊາຍ​ຟອງ ເມືອງ​ປາກ​ງື່ມ ແລະ ເມືອງ​ສັງ​ທອງ ເຊິ່ງ​ໜ່ວຍ​ທີ 7 ໄດ້​ລົງ​ເຄື່ອນ​ໄຫວ​ພົບ​ປະ​ປະຊາຊົນທີ່​ບ້ານ​ດອນ ແລະ ບ້ານໂພ​ສີ ເມືອງ​ຫາດ​ຊາຍ​ຟອງ ນຳໂດຍ​ທ່ານ ອານຸພາບ ຕຸ​ນາ​ລົມ ປະທານ​ສະພາ​ປະຊາຊົນນະຄອນ​ຫຼວງ ທ່ານ ສຸກ​ສະຫວັນ ບຸດ​ຕະ​ວົງ ແລະ ທ່ານ ທອງ​ສະຫວັນ ມີ​ບຸນ ສະມາຊິກ​ສະພາ​ປະຊາ​ຊົນ ນວ ຊຸດ​ທີ I.

ບັນດາ​ທ່ານ ​ສສຊ ແລະ ​ສສ ນວ ໄດ້​ຜັດປ່ຽນ​ກັນ​ມີ​ຄຳ​ເຫັນ​ຕໍ່​ຜູ້ເຂົ້າ​ຮ່ວມ ໂດຍ​ໄດ້​ຍົກ​ໃຫ້​ເຫັນ​ເຖິງພາລະ​ບົດບາດ​ ໃນ​ການ​ເປັນ​ຕົວແທນ​ແຫ່ງ​ສິດຜົນປະໂຫຍດຂອງ​ປະຊາຊົນບັນດາເຜົ່າ ແລະ ໄດ້​ຍົກ​ໃຫ້​ເຫັນ​ເຖິງ​ບັນຍາກາດ ແລະ ຜົນສຳເລັດ​ກອງ​ປະຊຸມ​ສະໄໝ​ສາມັນ​ເທື່ອ​ທີ 4 ຂອງ​ສະພາແຫ່ງ​ຊາດ ຊຸດ​ທີ VIII ແລະ ສະພາ​ປະຊາຊົນ ນວ ຊຸດ​ທີ I ທີ່​ກອງປະຊຸມ​ໄດ້​ພິຈາລະນາ​ຮັບຮອງເອົາ.

ພ້ອມ​ນີ້ ບັນດາ​ທ່ານ ​ສສຊ ແລະ ​ສສ ນວ ຍັງ​ໄດ້​ຮັບ​ຟັງ​ຄຳຄິດ​ຄຳ​ເຫັນ ຄຳ​ສະເໜີ ແລະ ບັນຫາ​ຂ້ອງ​ໃຈ​ຂອງ​ພໍ່​ແມ່​ປະຊາຊົນ ເປັນຕົ້ນ​ແມ່ນບັນຫາ​ລາຍ​ຮັບຂອງ​ຊາວ​ກະສິກອນ ເມື່ອ​ທຽບໃສ່​ຕົ້ນ​ທຶນ​ການ​ຜະລິດ ແມ່ນ​ຖືວ່າ​ຍັງ​ຕ່ຳ​ຫຼາຍເສັ້ນທາງ​ເປ່​ເພ ເປັນ​ບວກ​ເປັນ​ຂຸມ ສ້າງ​ຄວາມຫຍຸ້ງຍາກ​ໃຫ້​ແກ່​ການ​ສັນຈອນຂອງ​ປະຊາຊົນ ບັນຫາ​ລູກ​ຫຼານຂອງ​ປະຊາຊົນ​ທີ່​ຮຽນ​ຈົບ​ມາ​ແຕ່ບໍ່​ມີ​ວຽກ​ເຮັດ​ງານ​ທຳ ບັນຫາ​ໄຟຟ້າ​ບໍ່​ທັນ​ພຽງພໍ​ກັບ​ຄວາມ​ຕ້ອງການ ແລະ ບັນຫາ​ປາກົດການຫຍໍ້ທໍ້​ທີ່​ສຳຄັນ​ອື່ນໆ​ອີກ.

ຈາກ​ນັ້ນ ບັນດາ​ທ່ານ ​ສສຊ ແລະ ​ສສ ນວ ກໍ່​ໄດ້​ຊີ້​ແຈງອະທິ​ບາຍ​ຄຳ​ສະເໜີ​ໃຫ້​ປະຊາຊົນ ໄດ້​ຮັບ​ຊາບ​ບາງ​ບັນຫາ ແລະ ເກັບ​ເອົາ​ບາງ​ຄຳ​ສະເໜີ​ເພື່ອ​ນຳໄປ​ສະເໜີ​ພາກສ່ວນ​ກ່ຽວຂ້ອງ ພ້ອມ​ກັນ​ຄົ້ນຄວ້າແກ້​ໄຂ​ໃຫ້​ແທດເໝາະ​ກັບ​ສະພາບ​ຄວາມ​ເປັນ​ຈິງ ແລະ ທັນ​ເວລາ.

ຂ່າວທີ່ກ່ຽວຂ້ອງ