ຈັນທະບູລີ ເນັ້ນໃຫ້ຜູ້ປະກອບການ ບໍລິການໃຫ້ດີ-ມີມາດຕະຖານ

91 ວັນພຸດ ເວລາ 10:35 ຂ່າວໜ້າ​ໜຶ່ງ

ເພື່ອບັນລຸເປົ້າໝາຍທີ່ລັດຖະບານ ໄດ້​ກຳນົດ​ໃຫ້ 2018 ເປັນ​ປີ​ທ່ອງ​ທ່ຽວ​ລາວ ວັນ​ທີ 8 ກຸມພາ 2018 ຫ້ອງການ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ເມືອງ​ຈັນທະ​ບູລີ ນະຄອນຫຼວງ​ວຽງ​ຈັນ ໄດ້​ຈັດກອງ​ປະຊຸມ​ເຜີຍແຜ່​ກ່ຽວ​ກັບ​ວຽກງານ​ການ​ໃຫ້​ບໍລິການ​ຂອງ​ບັນດາ ຜູ້​ປະກອບ​ການໂຮງແຮມ ເຮືອນພັກ ຢູ່​ເຂດ​ຄຸ້ມ​ເມືອງເກົ່າ​ວັດ​ຈັນ ເຊິ່ງ​ປະກອບ​ມີ​ຫົວໜ່ວຍ​ຜູ້​ປະກອບ​ການ 35 ແຫ່ງ ຂະນະ​ທີ່​ທົ່ວເມືອງ​ມີໂຮງແຮມ 89 ແຫ່ງ ເຮືອນ​ພັກ 66 ແຫ່ງ ຮ້ານ​ອາຫານ 161 ແຫ່ງ ແລະ ຮ້ານ​ບັນເທີງ 3 ແຫ່ງ ມີ​ທ່ານ ບຸນ​ເຖິງ ສຸວັນນະ​ສີ ຮອງ​ເຈົ້າເມືອງ​ຈັນທະ​ບູ​ລີ ທ່ານ ຄຳ​ຫຼ້າ ໄພສານ ຫົວໜ້າ​ຫ້ອງການ ຖວທ ເມືອງຈັນທະ​ບູ​ລີ ພ້ອມ​ດ້ວຍ​ຜູ້ຕາງໜ້າຈາກ​ພາກສ່ວນ​ກ່ຽວຂ້ອງ.

ໂອກາດ​ນີ້ ທ່ານ​ຮອງ​ເຈົ້າເມືອງ ໄດ້​ເນັ້ນ​ໃຫ້ຜູ້​ປະກອບ​ການ​ເອົາໃຈໃສ່​ຈັດ​ຕັ້ງ​ປະຕິບັດ 6 ວຽກ​ສຳຄັນ ປະກອບ​ດ້ວຍວຽກ​ງານ​ປະຕິບັດລະບຽບ​ກົດໝາຍ​ຢ່າງ​ເຂັ້ມ​ງວດ ເຊິ່ງ​ຜູ້​ປະກອບ​ການ​ຕ້ອງ​ເປັນ​ເຈົ້າການ​ຢ່າງ​ຕັ້ງໜ້າ ​ປະຕິບັດ​ຕາມພາລະ​ບົດບາດ ສິດ ແລະ ໜ້າທີ່ຂອງ​ຕົນ ປະກອບສ່ວນ​ຢ່າງ​ຫ້າວຫັນ​ ເຂົ້າ​ໃນ​ວຽກ​ງານ​ປ້ອງ​ກັນຄວາມ​ສະຫງົບ ຍົກ​ລະດັບ​ການບໍລິການ​ໃຫ້​ດີ ແລະ ມີ​ມາດ​ຕະຖານ ​ເປັນ​ເຈົ້າ​ການ​ສ້າງ​ໃຫ້​ສະຖານ​ທີ່​ບໍລິການ​ມີ​ຄວາມ​ສະອາດ ຈົບງາມ ກຳນົດ​ລາຄາ​ອາຫານທີ່​ສົມ​ເຫດ​ສົມ​ຜົນ ບໍ່​ເອົາ​ລັດ​ເອົາປຽບ​ຜູ້​ມາ​ໃຊ້​ບໍລິການ ພ້ອມ​ນັ້ນຍັງ​ຕ້ອງ​ເອົາໃຈໃສ່​ໃນ​ການ​ນຸ່ງ​ຖືຂອງ​ພະນັກງານ ​ໃຫ້​ມີ​ຄວາມ​ເປັນລະບຽບ​ຮຽບ​ຮ້ອຍ ແລະ ຢຶດ​ຖື​ຮີດຄອງ​ປະເພນີ​ອັນ​ດີງາມ​ຂອງ​ຊາດເປັນ​ສຳຄັນ.

ຂ່າວທີ່ກ່ຽວຂ້ອງ