ເປີດຂະບວນການເປັນແບບຢ່າງ ເສຍຄ່າທຳນຽມທາງ

450 14 ກ.ພ. 2018 ຂ່າວໜ້າ​ໜຶ່ງ
ເປີດຂະບວນການເປັນແບບຢ່າງ ເສຍຄ່າທຳນຽມທາງ

ພະ​ແນກ​ສ່ວຍ​ສາ​ອາກອນ ສົມທົບ​ກັບພະແນກການ​ເງິນ ນະຄອນຫຼວງ​ວຽງ​ຈັນ ແລະ ທະນາ​ຄານ​ການ​ຄ້າ​ຕ່າງປະເທດ ມະຫາຊົນ ເປີດ​ຂະ​ບວນ​ການເສຍ​ຄ່າ​ທຳນຽມ​ທາງ 2018 ລົດລັດ ແລະ ພະນັກງານ​ລັດ​ຖະກອນ​ເປັນ​ແບບຢ່າງ​ນຳ​ໜ້າ ຢູ່​ພະແນກ​ການ​ເງິນ ພະ​ແນກ​ອຸດ​ສາຫະ​ກຳ ແລະ ການ​ຄ້າ ແລະ ພະແນກ​ສ່ວຍ​ສາ​ອາກອນ ນະຄອນຫຼວງ​ວຽງ​ຈັນ ຄັງ​ເງິນ​ແຫ່ງ​ຊາດ ປະຈຳ​ນະຄອນຫຼວງ​ວຽງ​ຈັນ ແລະ ກອງ​ຄຸ້ມ​ຄອງ​ພາສີ 5 ຂຶ້ນ ວັນ​ທີ 13 ກຸມພາ 2018 ທີ່​ພະແນກ​ການ​ເງິນ ນະຄອນຫຼວງວຽງ​ຈັນ ເປັນ​ປະທານ​ຂອງ​ທ່ານ ຄຳ​ມອນ ບົວ​ພັນ ຫົວໜ້າ​ພະແນກ​ສ່ວຍ​ສາ​ອາກອນ ນະຄອນຫຼວງ​ວຽງ​ຈັນ ມີ​ທ່ານ ສີ​ສຸພັນ ໄຊ​ປັນຍາ ຮອງ​ຫົວໜ້າ​ພະ​ແນກການ​ເງິນ ນະຄອນຫຼວງ​ວຽງ​ຈັນ ພ້ອມ​ດ້ວຍ​ບັນດາ​ຄະນະ​ພະ​ແນກ ຫ້ອງການ ພະນັກງານ-ລັດ​ຖະກອນ​ອ້ອມ​ຂ້າງ​ເຂົ້າ​ຮ່ວມ.

ເພື່ອ​ເຮັດ​ໃຫ້​ການຈັດຕັ້ງ​ປະຕິບັດຕົວ​ເລກ​ແຜນການ​ເກັບ​ລາຍ​ຮັບ ປີ 2018 ໃຫ້​ບັນລຸ​ຕາມ​ແຜນການ ຫຼື ລື່ນ​ແຜນການ ແລະ ໃຫ້​ຖືກຕ້ອງ​ສອດຄ່ອງ​ກັບ​ບັນດາ​ນິຕິ​ກຳ ພ້ອມ​ນັ້ນ ເປັນ​ການ​ກະຕຸກ​ຊຸກຍູ້ອຳນວຍ​ຄວາມ​ສະດວກ​ໃຫ້​ອົງການຈັດຕັ້ງ ຫຼື ບຸກຄົນ​ທີ່​ນຳ​ໃຊ້ລົດ​ລັດ ເພື່ອ​ມາ​ເສຍ​ຄ່າ​ທຳນຽມທາງ​ປີ 2018 ເຊິ່ງ​ການ​ສ້າງ​ຂະບວນ​ການ​ຄັ້ງ​ນີ້ ແມ່ນ​ສ້າງ​ຂະບວນ​ການ​ໃຫ້​ເປັນ​ແບບຢ່າງ​ນຳໜ້າ​ພາ​ທາງ ມີ​ຈຳນວນ​ລົດທັງໝົດ 135 ຄັນ ໃນ​ນີ້ ພະ​ແນກການ​ເງິນ​ມີ 30 ຄັນ ພະ​ແນກ​ອຸດສາ​ຫະ​ກຳ ແລະ ການ​ຄ້າ 24 ຄັນ ພະ​ແນກ​ສ່ວຍ​ສາ​ອາກອນ 31 ຄັນ ຄັງ​ເງິນ​ແຫ່ງ​ຊາດ​ປະຈຳ​ນະຄອນຫຼວງ​ວຽງ​ຈັນ 20 ຄັນ ແລະ ກອງ​ຄຸ້ມ​ຄອງ​ພາສີ 5 ຈຳນວນ 30 ຄັນ ນອກຈາກ​ລົດ​ລັດແລ້ວ ທ່ານ​ໃດ​ມີ​ລົດ​ເອກະ​ຊົນ​ສາມາດ​ເສຍ​ໄດ້​ກັບ​ສະຖານທີ່​ດັ່ງກ່າວ ຜ່ານ​ການ​ຈັດ​ເກັບ​ລາຍ​ຮັບປີ 2017 ແຕ່​ວັນ​ທີ 1/1/-31/12/2017 ປະຕິບັດ​ໄດ້ທັງ​ໝົດ 961,56 ຕື້​ກີບ (ລວມ​ທັງ​ຕົວ​ເລກອວ່າຍ​ຈາກ​ກົມ​ຈຳນວນ 79,91 ຕື້​ກີບ) ເທົ່າ​ກັບ 91,30% ຂອງແຜນການ​ປີ ທຽບໃສ່​ການຈັດຕັ້ງປະຕິບັດ​ຂອງ​ສົກ​ປີ 2015-2016 ເພີ່ມ​ຂຶ້ນ 110,18 ຕື້​ກີບ ເທົ່າ​ກັບ 112,94%.

ນອກຈາກ​ທີ່​ກ່າວ​ມາ​ແລ້ວ​ນັ້ນ ຍັງ​ຈະ​ສືບຕໍ່​ດຳເນີນ​ໄປ​ແຕ່​ລະ​ຈຸດ ເປັນຕົ້ນແມ່ນ​ຫ້ອງ​ວ່າການ​ປົກຄອງນະຄອນຫຼວງ​ວຽງ​ຈັນ ກະຊວງ​ການ​ເງິນ ກົມ​ສ່ວຍ​ສາ​ອາກອນ ກົມ​ພາສີ ແລະ ບ່ອນ​ອື່ນໆ.

ຂ່າວທີ່ກ່ຽວຂ້ອງ