ຂ່າວຫຼ້າສຸດ

ນາຊາຍທອງ ປັກດຳນາແຊງສຳເລັດ 100%

270 14 ກ.ພ. 2018 ຂ່າວໜ້າ​ໜຶ່ງ
ນາຊາຍທອງ ປັກດຳນາແຊງສຳເລັດ 100%

ຊາວ​ກະສິກອນ​ໃນ​ທົ່ວ​ປະເທດ ກໍ່​ຄືນະຄອນຫຼວງ​ວຽງ​ຈັນ ທີ່ພວມ​ກຳລັງ​ຂຸ້ນຂ້ຽວ​ໃສ່​ການ​ຜະລິດ​ພືດ​ລະດູແລ້ງ ໂດຍ​ສະເພາະແມ່ນ​ເມືອງ​ນາ​ຊາຍ​ທອງ ນະຄອນ​ຫຼວງ​ວຽງ​ຈັນ​ທີ່​ໄດ້​ສຸມ​ໃສ່ການ​ປັກ​ດຳ​ເຂົ້ານາແຊງ ແລະ ປູກ​ພືດ​ຜັກ​ລະດູແລ້ງ ເພື່ອ​ສະໜອງ​ໃຫ້​ກັບ​ຕະຫຼາດ ກໍ່​ຄືຜູ້​ບໍ​ລິໂພກພາຍ​ໃນ​ນະຄອນຫຼວງ​ວຽງຈັນ​ໃຫ້​ພຽງພໍ.

ທ່ານ ຄຳ​ໃຟ່ ພົມມະຈັນ ຫົວໜ້າ​ຫ້ອງການ​ກະສິກຳ ແລະ ປ່າໄມ້ ເມືອງ​ນາ​ຊາຍ​ທອງ ໃຫ້​ຮູ້​ວ່າ: ພາຍຫຼັງ​ທີ່​ສຳເລັດ​ການ​ເກັບກ່ຽວ​ພືດ​ລະດູຝົນ​ແລ້ວ ຊາວ​ກະສິ​ກອນພາຍ​ໃນ​ເມືອງ​ນາ​ຊາຍທອງ ໄດ້​ຂຸ້ນຂ້ຽວ​ໃສ່​ການ​ຜະລິດພືດ​ລະດູແລ້ງ​ຢ່າງ​ເປັນ​ຂະ​ບວນຟົດຟື້ນ ເຊິ່ງ​ທົ່ວ​ເມືອງ​ມີ​ເນື້ອທີ່ການ​ຜະລິດ​ທັງ​ໝົດ 7.994 ເຮັກຕາ ໃນ​ນີ້ມີ​ເນື້ອທີ່​ແຜນການ​ປັກດຳ​ນາແຊງ​ແມ່ນ 4.251 ເຮັກຕາ ຄາດ​ຄະເນ​ສະມັດຖະພາບ 4,37 ໂຕນ​ຕໍ່​ເຮັກຕາ ໄດ້​ເລີ່ມ​ລົງມື​ປັກດຳ​ແຕ່​ຕົ້ນ​ເດືອນ​ທັນວາ 2017 ເປັນຕົ້ນ​ມາ ປັດຈຸບັນ ປະຕິບັດ​ສຳເລັດ 100% ໃນ​ນັ້ນ ມີ​ນາຫວ່ານ 2.104 ເຮັກຕາ ແລະ ນາ​ດຳ 2.147 ເຮັກຕາ (ດຳ​ດ້ວຍ​ກົນ​ຈັກ 3,92 ເຮັກຕາ) ສ່ວນ​ການ​ຜະລິດພືດ​ຜັກ​ລະດູແລ້ງ ແຜນການແມ່ນ 710 ເຮັກຕາ ຄາດ​ຄະເນຜົນ​ຜະລິດ 5.624 ໂຕນ ປະຕິບັດໄດ້ 616 ເຮັກຕາ ເທົ່າ​ກັບ 86,76% ແລະ ພືດ​ອຸດ​ສາ​ຫະກຳ​ມີ​ເນື້ອທີ່​ແຜນການ​ປູກ 150 ເຮັກຕາ ປະຕິບັດ​ໄດ້ 85 ເຮັກຕາ ເທົ່າ​ກັບ 56,66%.

ສ່ວນ​ການ​ຕ້ານ​ແລ້ງ ແລະ ຕ້ານ​ຖ້ວມ​ທົ່ວ​ເມືອງ​ມີ​ຊົນ​ລະ​ປະທານ 18 ແຫ່ງ ສາມາດ​ສະໜອງ​ນ້ຳ​ໃຫ້ການ​ຜະລິດ​ລະດູແລ້ງ ​ໄດ້​ຕາມ​ຄາດໝາຍ​ແຜນການ​ຕົວ​ເລກ ນອກ​ນັ້ນຍັງ​ໄດ້ສ້າງ​ຂະ​ບວນ​ການ​ອອກແຮງ​ງານອະນາໄມ​ລວງ​ຄອງເໝືອງ ​ມີຄວາມ​ຍາວ 20.422 ແມັດ ພ້ອມ​ນັ້ນ ໄດ້​ກະກຽມ​ການຈັດຕັ້ງປະຕິບັດ​ລວງ​ຄອງ​ລະບາຍ​ນ້ຳທຳ​ມະ​ຊາດ ​ທີ່​ຕິດ​ພັນ​ກັບ​ວຽກງານ​ຕ້ານ​ແລ້ງ​ຕ້ານ​ຖ້ວມ ມີ 4 ຮ່ອງ​ຫ້ວຍ ຄວາມ​ຍາວ 19.500 ແມັດ ແລະ 2 ໜອງ ມີ​ເນື້ອທີ່ 43,6 ເຮັກຕາ.

ຂ່າວທີ່ກ່ຽວຂ້ອງ