ສົ່ງເສີມນັກຮຽນເຂດຊົນນະບົດ ເຂົ້າເຖິງອາຫານທີ່ພຽງພໍ

99 ວັນພຸດ ເວລາ 10:10 ຂ່າວໜ້າ​ໜຶ່ງ
ສົ່ງເສີມນັກຮຽນເຂດຊົນນະບົດ ເຂົ້າເຖິງອາຫານທີ່ພຽງພໍ

ລັດຖະບານ ກໍ່​ຄື​ກະຊວງແຜນການ ແລະ ການ​ລົງທຶນ ຮ່ວມ​ກັບ​ອົງການ​ອາຫານ​ໂລກ (WFP) ຈັດ​ຕັ້ງ​ປະຕິບັດ​ແຜນງານ​ຍຸດ​ທະ​ສາດ​ການ​ຮ່ວມ​ມື​ສຳລັບ​ປີ 2017-2021 ເພື່ອ​ສົ່ງເສີມໃຫ້​ຊີວິດ​ການ​ເປັນ​ຢູ່​ຂອງ​ເດັກນ້ອຍ ​ຕະຫຼອດ​ຮອດ​ນັກຮຽນ​ເຂດຊົນນະບົດ​ໄດ້​ຮັບ​ການ​ປັບປຸງ​ທີ່​ດີຂຶ້ນ ແນໃສ່​ເປັນ​ການ​ທົບ​ທວນຄືນ ການຈັດຕັ້ງ​ປະຕິບັດ​ຍຸດ​ທະ​ສາດດັ່ງກ່າວ​ໃນ 1 ປີຜ່ານມາ (2017) ວັນ​ທີ 13 ກຸມພາ 2018 ທີ່​ກະຊວງ​ແຜນການ ແລະ ການ​ລົງທຶນ ຈັດ​ກອງ​ປະຊຸມ​ທົບ​ທວນຄືນວຽກ​ງານ ປະຈຳ​ປີ 2017 ແຜນງານ​ຍຸດ​ທະ​ສາດ​ການ​ຮ່ວມ​ມືລະຫວ່າງລັດຖະບານ ​ສປປ ລາວ ແລະ ອົງການ​ອາຫານ​ໂລກ ມີທ່ານ ກິ​ແກ້ວ ຈັນທະ​ບູ​ຣີ ຮອງ​ລັດຖະ​ມົນຕີ​ກະຊວງ​ແຜນການ ແລະ ການ​ລົງທຶນ ທ່ານ​ນາງ ຊາ​ຣາ ກໍ​ດອນ​ກິບ​ຊັນ ຜູ້ຕາງໜ້າ​ອົງການ​ອາຫານ​ໂລກ​ປະຈຳ​ລາວ ພ້ອມ​ດ້ວຍ​ພະນັກງານ-ວິຊາ​ການຈາກ​ພາກສ່ວນ​ກ່ຽວຂ້ອງ​ເຂົ້າ.

ແຜນ​ຍຸດ​ທະ​ສາດ​ການ​ຮ່ວມ​ມື 2017-2021 ຖື​ວ່າ​ເປັນ​ຍຸດ​ທະສາດ​ທີ່​ປະກອບສ່ວນ​ຢ່າງ​ຕັ້ງໜ້າ ເຂົ້າ​ໃນ​ການຈັດຕັ້ງ​ປະຕິບັດ​ແຜນພັດທະນາ​ເສດຖະກິດ-ສັງຄົມແຫ່ງ​ຊາດ 5 ປີ ຄັ້ງ​ທີ 8 ຂອງ​ລັດຖະ​ບານ ຍຸດ​ທະ​ສາດ​ດັ່ງກ່າວ​ມີມູນ​ຄ່າ 84,9 ລ້ານ​ກວ່າ​ໂດ​ລາສະຫະລັດ ຫຼື ປະມານ 650 ຕື້ກວ່າ​ກີບ ເພີ່ມ​ຂຶ້ນ 10% ທຽບໃສ່ການ​ຮ່ວມ​ມື ປີ 2012-2016 ຜ່ານ​ມາ ສຳລັບ​ງົບປະມານ​ປະຈຳປີ 2017 ອົງການ​ອາຫານໂລກ​ອະນຸມັດ ມີ 15,5 ລ້ານ​ໂດລາ ຈັດ​ຕັ້ງ​ປະຕິບັດ​ໄດ້ 8,3 ລ້ານໂດ​ລາ ເທົ່າ​ກັບ 53% ໂດຍ​ໃນ​ປີ 2018 ການຈັດຕັ້ງ​ປະຕິບັດ​ວຽກງານ​ຍຸດ​ທະ​ສາດ​ການ​ຮ່ວມ​ມື ສອງ​ຝ່າຍ​ໄດ້​ເນັ້ນ​ເຂົ້າ​ໃນ 4 ວຽກງານ​ສຳຄັນ ຄື: ສົ່ງເສີມ​ໃຫ້​ເດັກນັກຮຽນ​ເຂດ​ຊົນນະບົດ​ເຂົ້າ​ເຖິງອາຫານ​ຢ່າງ​ພຽງພໍ ແລະ ຍືນ​ຍົງ ພາຍ​ໃນປີ 2021 ຊຸກຍູ້​ໃຫ້​ອັດຕາການ​ຂາດ​ສານ​ອາຫານ​ແບບ​ຊຳເຮື້ອ​ໃນ​ກຸ່ມ​ເດັກນ້ອຍອາຍຸ​ຕ່ຳກວ່າ 2 ປີ ຢູ່​ບັນດາ​ແຂວງ​ທີ່​ມີອັດຕາ​ການ​ຂາດ​ສານ​ອາຫານ​ສູງ ໃຫ້​ບັນລຸ​ເປົ້າ​ໝາຍ​ລະດັບ​ຊາດ ໃນ​ປີ 2025 ສ້າງ​ຄວາມ​ເຂັ້ມແຂງ​ໃຫ້​ຄົວ​ເຮືອນ​ທີ່​ມີ​ພູມ​ຕ້ານທານ​ຕ່ຳ ໃຫ້​ສາມາດ​ຮັບ​ມື​ກັບຜົນ​ກະທົບ​ຈາກ​ການ​ປ່ຽນແປງດິນ​ຟ້າ​ອາກາດ​ທັງ​ໄລຍະ​ສັ້ນ-ຍາວ ແລະ ວຽກ​ງານ​ທີ 4 ແມ່ນເຮັດ​ໃຫ້​ພາຍ​ໃນປີ 2025 ອົງການຈັດຕັ້ງ​ຂອງ​ລັດ​ນັບ​ແຕ່​ສູນກາງ-ທ້ອງຖິ່ນ ໄດ້​ຮັບ​ການ​ປັບປຸງການ​ໃຫ້​ບໍລິການ ໂດຍ​ສະເພາະແມ່ນ​ໃນ​ເຂດ​ທີ່​ເຂົ້າ​ເຖິງ​ຍາກ​ ໃຫ້ນັບ​ມື້​ດີ​ຂຶ້ນ​ເປັນ​ລຳດັບ.

ຂ່າວທີ່ກ່ຽວຂ້ອງ