ຂ່າວຫຼ້າສຸດ

ຈັບເປົ້າໝາຍເຄື່ອນໄຫວຄ້າຂາຍຢາບ້າ 18 ພັນເມັດ

284 14 ກ.ພ. 2018 ຂ່າວໜ້າ​ໜຶ່ງ

ເມື່ອ​ບໍ່​ດົນ​ຜ່ານ​ມາ ເຈົ້າ​ໜ້າທີ່ຕຳຫຼວດ​ພະ​ແນກ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ແຂວງຊຽງ​ຂວາງ ໄດ້​ມ້າງ​ຄະດີ​ຄ້າຂາຍຢາ​ເສບ​ຕິດ ຢູ່​ເຂດ​ບ້ານ​ທ່າ​ໂຈກ ເມືອງ​ແປກ ແຂວງ​ຊຽງ​ຂວາງ ສາມາດ​ຈັບ​ຕົວ​ເປົ້າ​ໝາຍໄດ້ 2 ຄົນ ພ້ອມ​ຢາ​ບ້າຈຳນວນ 18.000 ເມັດ.

ພະ​ແນກ​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ແຂວງ​ຊຽງ​ຂວາງ ໃຫ້​ຮູ້​ວ່າ: ພາຍຫຼັງ​ທີ່​ໄດ້​ຮັບ​ລາຍ​ງານ​ວ່າ ມີ​ກຸ່ມຄົນ​ບໍ່​ດີ​ຈຳນວນ​ໜຶ່ງ​ ລັກລອບເຄື່ອນ​ໄຫວ​ຄ້າຂາຍ​ຢາ​ເສບ​ຕິດ ຈຶ່ງ​ໄດ້​ແຕ່ງຕັ້ງພະນັກງານ​ວິຊາສະເພາະ ​ລົງ​ຕິດຕາມ​ກວດກາ​ພິສູດ​ແຫຼ່ງ​ຂ່າວ​ເຫັນ​ວ່າມີ​ມູນຄວາມ​ຈິງ ຮອດ​ເວລາ​ປະມານ 11:30 ໂມງ​ຂອງ​ວັນ​ທີ 10 ມັງກອນ 2018 ກໍ່​ໄດ້​ພົບ​ເຫັນ​ກຸ່ມ​ເປົ້າໝາຍ​ດັ່ງກ່າວ ຈຶ່ງ​ໄດ້​ທຳ​ການເຂົ້າ​ຈັບ​ຕົວ​ເປົ້າ​ໝາຍ​ຄ້າຂາຍ​ຢາເສບ​ຕິດ​ໄດ້ 2 ຄົນ ​ຊື່ທ້າວ ດາວ​ລໍ່ ຫຼື ເຢຍ​ລໍ່ ອາຍຸ 27 ປີ​ຢູ່​ບ້ານ​ນາຊາຍ​ກາງ ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ແລະ ທ້າວ ສຸວັນ​ວິ​ໄຊ ຢ່າງ ອາຍຸ 27 ປີ ຢູ່ບ້ານ​ຫຼັກ 6 ເມືອງ​ໄຊ ແຂວງ​ອຸດົມ​ໄຊ ພ້ອມ​ຢາ​ບ້າ ຈຳນວນ 9 ມັດ ເທົ່າ​ກັບ 18.000 ເມັດ ນ້ຳໜັກ 1,8 ກິ​ໂລ​ກຼາມ ໂທລະສັບມື​ຖື 2 ໜ່ວຍ ໄປ​ດຳເນີນ​ການສອບ​ສວນ​ຂະຫຍາຍ​ຜົນ.

ຜ່ານ​ການ​ສອບ​ສວນ​ເບື້ອງ​ຕົ້ນ ພວກ​ກ່ຽວ​ຮັບ​ສາລະພາບ​ວ່າ: ໄດ້​ຮ່ວມ​ກັນ​ຄ້າຂາຍ​ຢາ​ເສບ​ຕິດມາ​ໄດ້​ຫຼາຍ​ປີ​ແລ້ວ ເຊິ່ງ​ຢາ​ບ້າຈຳນວນ​ດັ່ງກ່າວ ​ແມ່ນ​ຊື້​ນຳ​ຄົນ​ທີ່ຮູ້ຈັກ​ກັນ​ແຕ່​ບໍ່​ຮູ້​ທີ່ຢູ່ຜ່ານ​ມາ​ເຄີຍຊື້​ຄັ້ງ​ລະ 5-10 ມັດ ເທົ່າ​ກັບ 10.000-20.000 ເມັດ ພາຍຫຼັງ​ໄດ້​ຢາ​ບ້າ​ມາ​ແລ້ວ​ກໍ່​ໄດ້​ນຳໄປຂາຍ​ໃຫ້​ຜູ້​ສັ່ງ​ຊື້​ຢູ່​ບ້ານ​ທ່າ​ໂຈກ ເມືອງ​ແປກ ແຂວງ​ຊຽງ​ຂວາງ ມາ​ຮອດວັນ​ທີ 10 ມັງກອນ 2018 ກໍ່​ຖືກ​ເຈົ້າ​ໜ້າທີ່​ກັກ​ຕົວ​ໄປດຳເນີນ​ຄະດີ.

ຂ່າວທີ່ກ່ຽວຂ້ອງ