ເປີດນຳໃຊ້ຂົວມິດຕະພາບ ລາວ-ຍີ່ປຸ່ນ ຢູ່ແຂວງເຊກອງ

130 13 ກ.ພ. 2018 ຂ່າວໜ້າ​ໜຶ່ງ
ເປີດນຳໃຊ້ຂົວມິດຕະພາບ ລາວ-ຍີ່ປຸ່ນ ຢູ່ແຂວງເຊກອງ

ວັນ​ທີ 12 ກຸມພາ 2018 ໄດ້ຈັດ​ພິທີ​ມອບ-ຮັບ ແລະ ເປີດ​ນຳໃຊ້​ຂົວ​ມິດຕະພາບ ລາວ-ຍີ່ປຸ່ນ ເຊິ່ງ​ເປັນ​ຂົວ​ຂ້າມ​ນ້ຳ​ເຊ​ກອງ​ ແຕ່ເມືອງ​ລະ​ມາມ​ຫາ​ເມືອງ​ດາກ​ຈຶງ ແຂວງ​ເຊ​ກອງ ມີ​ທ່ານ ບຸນ​ທອງ ຈິດ​ມະນີ ຮອງ​ນາຍົກ​ລັດ​ຖະ​ມົນຕີ ປະທານ​ຄະນະ​ກວດກາ​ສູນກາງ​ພັກ-ປະທານ​ອົງການ​ກວດກາ​ລັດຖະບານ ທ່ານ ທາ​ເຄ​ຊິ ຮິ​ຄິ​ຮາ​ຣະ ເອກ​ອັກຄະລາຊະທູດຍີ່ປຸ່ນ​ປະຈຳ​ລາວ ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງໂຍທາ​ທິ​ການ ແລະ ຂົນສົ່ງ ທ່ານ ຄຳ​ເຜີຍ ບຸດ​ດາ​ວຽງ ເຈົ້າແຂວງເຊ​ກອງ ທ່ານ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ທ່ານ​ປະທານ​ກຳມາ​ທິ​ການແຜນການ ການ​ເງິນ ແລະ ກວດສອບ ຕາງໜ້າ​ຈາກ​ອົງການ​ໄຈກາ ​ພ້ອມ​ດ້ວຍ​ການ​ນຳ​ຂອງແຂວງ ການ​ນຳ​ຂອງ​ເມືອງ ປະທານ​ກຸ່ມ​ບໍລິສັດ​ຜູ້​ຮັບ​ເໝົາ​ໂຄງການ ແຂກ​ຖືກ​ເຊີນ​ເຂົ້າ​ຮ່ວມ.

ໂຄງການ​ກໍ່ສ້າງ​ຂົວ​ນ້ຳ​ເຊກອງ​ມິດຕະພາບ ລາວ-ຍີ່ປຸ່ນ ໄດ້ສ້າງ​ມາ​ແຕ່​ຕົ້ນປີ 2015 ໃຊ້​ເວລາ​ກໍ່ສ້າງ 39 ເດືອນ ມີ​ຄວາມຍາວ 300 ແມັດ ອອກ​ແບບ​ກໍ່ສ້າງ​ຕາມ​ມາດຕະຖານ​ເຕັກນິກຂອງ​ສາກົນ ເປັນ​ຂົວ​ເບ​ຕົງ​ເສີມເຫຼັກອັດ​ແຮງ​ແບບ​ປະສົມ ລະຫວ່າງສາຍ​ກາບ​ຖ່ວງ​ດຶງ ແລະ ຂາງ​ແບບ​ຮູບ​ກັບ 4 ລ່ຽມ ສາມາດ​ຮັບ​ນ້ຳໜັກ​ໄດ້ 800 ໂຕນ ມີ 3 ເສົາ​ກາງ​ນ້ຳ ແລະ ເສົາ​ຫົວ​ຂົວ 2 ເສົາ ລະບົບ​ຮາກ​ຖານ​ຈຳນວນໜຶ່ງ ຕອກ​ເສົາ​ເຂັມມີ​ຈຳນວນ 17 ຕົ້ນ ມີ 4 ໄລຍະ ໄລຍະ​ກາງນ້ຳ​ທີ່​ກວ້າງ​ທີ່​ສຸດ 110 ແມັດ ຄວາມ​ກວ້າງ​ຂອງ​ໜ້າ​ຂົວ 11 ແມັດ ໜ້າ​ທາງ​ລົດ​ແລ່ນ 8 ແມັດ ທາງ​ຍ່າງ​ເບື້ອງ​ລະ 1,5 ແມັດ ປູດ້ວຍ​ຢາງ​ຂົ້ວໜາ 8 ຊັງ​ຕີ​ແມັດ ມີ​ທາງ​ເຂົ້າ​ຂົວ 2 ເບື້ອງ ຍາວ 528 ແມັດ ກວ້າງ 10 ແມັດ ປູດ້ວຍ​ຢາງ​ຂົ້ວໜາ 10 ຊັງ​ຕີ​ແມັດ ມີ​ລະບົບ​ໄຟ​ເຍືອງ​ທາງ ເພື່ອ​ຮັບປະກັນ​ຄວາມ​ປອດ​ໄພ​ໃນ​ເວລາການ​ສັນຈອນ ທ່ານ ບຸນ​ຈັນ ສິນ​ທະ​ວົງ ກ່າວວ່າ: ໂຄງການ​ຂ້າມ​ຂົວ​ນ້ຳ​ເຊກອງ​ ໄດ້​ຮັບ​ການ​ຊ່ວຍເຫຼືອ​ລ້າຈາກ​ລັດຖະບານ ແລະ ປະຊາຊົນຍີ່ປຸ່ນ ໃນ​ມູນ​ຄ່າ​ທັງ​ໝົດ 1,62 ຕື້ເຢັນ ຫຼື ປະມານ 16,20 ລ້ານ​ໂດລາ​ສະຫະລັດ ໂດຍ​ຜ່ານ​ອົງການໄຈ​ກາ ພິເສດ​ແມ່ນ​ທ່ານ​ທູດ​ຍີ່ປຸ່ນ ປະຈຳ​ລາວ ທີ່​ໄດ້​ໃຫ້ການ​ສະໜັບສະ​ໜູນ​ຊ່ວຍເຫຼືອ​ລັດຖະບານລາວ ຕາງໜ້າ​ໃຫ້​ລັດຖະບານລາວ​ຂໍ​ຂອບໃຈ​ຕໍ່​ລັດຖະບານ ແລະ ປະຊາຊົນ​ຍີ່ປຸ່ນ ແລະ ອົງການ​ໄຈ​ກາ ໂອກາດ​ນີ້ ຂໍ​ຮັບ​ເອົາໂຄງການ​ຈາກ​ທ່ານ​ທູດ​ຍີ່ປຸ່ນ​ປະຈຳ​ລາວ ເຊິ່ງ​ເປັນ​ຂອງຂວັນ​ອັນລ້ຳ​ຄ່າ​ຈາກ​ລັດຖະບານ ແລະ ປະຊາ​ຊົນ​ຍີ່ປຸ່ນທີ່​ມອບ​ໃຫ້​ລັດ​ຖະບານ ແລະ ປະຊາຊົນ​ລາວ ແລະ ພ້ອມ​ດຽວ​ກັນ​ນີ້ ຂໍ​ມອບ​ຂົວ​ນີ້​ໃຫ້ທ່ານ​ເຈົ້າແຂວງ​ເຊ​ກອງ ເພື່ອ​ສືບຕໍ່​ຄຸ້ມ​ຄອງປົກ​ປັກ​ຮັກສາ​ນຳ​ໃຊ້ໃຫ້​ຍາວ​ນານ ແລະ ມີ​ປະໂຫຍດສູງ​ສຸດ.

ທ່ານ​ເຈົ້າແຂວງ​ເຊ​ກອງ​ກ່າວວ່າ: ການ​ເປີດ​ນຳ​ໃຊ້​ຂົວ​ຂ້າມ​ນ້ຳເຊ​ກອງ ນອກຈາກ​ສ້າງ​ຄວາມສະດວກ​ໃຫ້​ແກ່​ການ​ຄົມ​ມະ​ນາຄົມ​ຂົນສົ່ງ ການ​ໄປມາຫາສູ່​ຄ້າຂາຍ ແລະ ການ​ເຂົ້າ​ເຖິງ​ການ​ບໍລິ​ການ​ດ້ານ​ການ​ສຶກ​ສາ ສາ​ທາລະນະ​ສຸກ​ຂອງ​ປະຊາຊົນ​ທີ່​ອາໄສ​ຢູ່ 2 ຟາກ​ຝັ່ງ​ແມ່ນ້ຳ​ເຊ​ກອງແລ້ວ ຍັງ​ເປັນ​ການ​ເປີດ​ເສັ້ນທາງໃຫ້​ແກ່​ການ​ເຊື່ອມ​ໂຍງ​ດ້ານ​ເສດຖະ​ກິດ ການ​ຄ້າ ການ​ລົງທຶນ ແລະ ການທ່ອງທ່ຽວ​ທີ່​ອັດ​ຕັນມາ​ດົນ​ນານ​ລະຫວ່າງ​ພາກ​ພື້ນ ແລະ ອະນຸ​ພາກ​ພື້ນ ການ​ເຊື່ອມໂຍງ​ລະຫວ່າງ ລາວ ຫວຽດນາມ ກຳປູເຈຍ ແລະ ໄທ ຈາກ​ການເຊື່ອມ​ໂຍງ​ດັ່ງກ່າວ​ຈະ​ເຮັດ​ໃຫ້​ມູນຄ່າ​ດ້ານ​ການ​ຄ້າ ການ​ລົງທຶນ ແລະ ການ​ຂົນສົ່ງ​ສິນຄ້າ​ຂະຫຍາຍ​ໄປ​ເຖິງ​ຊາຍ​ແດນ​ຈີນ ໂດຍຜ່ານ​ຫວຽດນາມ​ອີກ​ດ້ວຍ ແລະ ໂອກາດ​ນີ້ ຍັງ​ໄດ້​ມອບ​ຫຼຽນ​ໄຊພັດທະນາ ແລະ ຫຼຽນ​ໄຊ​ແຮງງານ​ໃຫ້​ຜູ້​ສະໜອງ​ທຶນ​ຕື່ມ​ອີກ.

ຂ່າວທີ່ກ່ຽວຂ້ອງ