ນະຄອນຫຼວງ ສຳຫຼວດແຫຼ່ງທ່ອງທ່ຽວຢູ່ຕາມລຳນ້ຳງື່ມ

217 13 ກ.ພ. 2018 ຂ່າວໜ້າ​ໜຶ່ງ
ນະຄອນຫຼວງ ສຳຫຼວດແຫຼ່ງທ່ອງທ່ຽວຢູ່ຕາມລຳນ້ຳງື່ມ

ພະ​ແນກ​ຖະແຫຼງ​ຂ່າວ ວັດ​ທະນະ​ທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ໂດຍ​ພາຍ​ໃຕ້​ການຊີ້​ນຳ​ຂອງ​ທ່ານ​ເຈົ້າ​ຄອງ​ນະຄອນຫຼວງ​ວຽງ​ຈັນ ໄດ້​ດຳເນີນ​ແຜນກິດຈະກຳ​ການທ່ອງທ່ຽວ​ທາງ​ທຳມະ​ຊາດ ໂດຍ​ສະເພາະ​ຂອງ​ນະຄອນ​ຫຼວງ​ວຽງ​ຈັນ ກໍ່​ຄື​ແຜນ​ກິດຈະ​ກຳ​ເປັນ​ເຈົ້າພາບ​ທີ່​ດີ​ປີ​ທ່ອງທ່ຽວ​ລາວ ປີ 2018 ເຊິ່ງ​ການທ່ອງ​ທ່ຽວ​ຕາມ​ລຳ​ນ້ຳ​ງື່ມ​ ກໍ່​ເປັນກິດຈະກຳ​ໜຶ່ງ​ທີ່​ເອົາ​ເຂົ້າ​ໃນ​ແຜນ ເພື່ອ​ເປັນ​ການ​ສົ່ງເສີມ ແລະ ພັດທະ​ນາ​ການທ່ອງທ່ຽວ ໃນ​ວັນ​ທີ 9 ກຸມພາ 2018 ນະຄອນຫຼວງ​ວຽງຈັນ ໄດ້​ຈັດ​ກິດຈະກຳ​ເດີນ​ສຳຫຼວດ​ແຫຼ່ງ​ທ່ອງ​ທ່ຽວ​ຕາມ​ລຳ​ນ້ຳງື່ມ ຢູ່​ເມືອງ​ໄຊ​ທານີ ນະຄອນຫຼວງ​ວຽງ​ຈັນ ນຳ​ໂດຍ​ທ່ານ ສິນລະ​ວົງ ຄຸດ​ໄພທູນ ເຈົ້າ​ຄອງ​ນະຄອນ​ຫຼວງ​ວຽງ​ຈັນ ພ້ອມ​ດ້ວຍ​ຄະນະ ມີ​ກົມ​ພັດທະນາ​ທ່ອງ​ທ່ຽວ ຄະນະ​ນຳ​ເມືອງ ພະແນກການ ຫ້ອງການ ຂະແໜງການ ບັນດານັກທຸລະກິດ ແລະ ພະນັກງານວິຊາ​ການ​ກ່ຽວຂ້ອງ​ເຂົ້າ​ຮ່ວມ.

ກິດຈະກຳ​ການ​ເດີນທາງ​ສຳຫຼວດ​ແຫຼ່ງ​ທ່ອງ​ທ່ຽວ​ຄັ້ງ​ນີ້ ແມ່ນໄດ້​ເລີ່ມ​ຈາກ​ຈຸດ​ບ້ານ​ນ້ຳກ້ຽງ ດ້ວຍ​ລ່ອງ​ເຮືອ​ລົງ​ຕາມ​ລຳ​ນ້ຳ​ງື່ມຫາ​ບ້ານ​ເວີນ​ແທ່ນ ໄລຍະ​ທາງປະມານ 30 ກິໂລແມັດ ໃນ​ນັ້ນ ຜ່ານ​ຈຳນວນ 22 ບ້ານ ຕະຫຼອດໄລຍະ​ຂອງ​ການ​ເດີນທາງ​ສຳຫຼວດ ຄະນະ​ໄດ້​ທ່ຽວ​ຊົມ​ສວນ​ໄຜ່ພັນ​ກໍ ໄດ້​ຊົມ​ທິວ​ທັດ​ທຳ​ມະ​ຊາດຕາມ​ສອງ​ຝັ່ງ​ນ້ຳ​ງື່ມ ວິຖີ​ຊີວິດການ​ດຳລົງ​ຊີວິດ​ຂອງ​ປະຊາຊົນຕາມ​ລຳ​ນ້ຳ​ງື່ມ ລວມ​ໄປ​ເຖິງ​ວັດທະນະ​ທຳ​ອັນ​ດີງາມ ມູນເຊື້ອ​ອັນດຸໝັ່ນ ເຮັດ​ການ​ຜະລິດ​ປູກຝັງລ້ຽງສັດ​ຢູ່​ລຽບ​ສອງ​ຝັ່ງ​ນ້ຳ​ງື່ມ ໃນໂອກາດ​ນີ້ ຄະນະ​ກໍ່​ໄດ້​ພົບ​ປະ​ກັບອຳນາດ​ການ​ປົກ​​​ຄອງ​ບ້ານ ແລະ ປະຊາຊົນ​ບ້ານ​ເວີນ​ແທ່ນ ພ້ອມ​ດຽວ​ກັນ​ນັ້ນ ກໍ່​ໄດ້​ຮັບ​ຟັງລາຍ​ງານ​ສະພາບ​ລວມ ຈຸດ​ພິເສດ ແລະ ທີ່​ຕັ້ງ​ໂດຍ​ຫຍໍ້​ຂອງບ້ານ​ຈາກ​ທ່ານ​ນາຍບ້ານ ໄດ້​ຮັບຟັງ​ການ​ເລົ່າ​ເລື່ອງ​ປະຫວັດຄວາມ​ເປັນ​ມາ​ຂອງ​ເວີນ​ແທ່ນ (ແທ່ນ​ນັ່ງ​ຂອງ​ພະ​ພຸດ​ທະ​ຮູບ​ພະສຸກ) ແລະ ປ່າ​ເຂດ​ສະຫງວນແຫຼ່ງ​ແກ່ນ​ພັນ​ໄມ້​ພື້ນເມືອງ (ປ່າມະເຫສັກ​ຫຼັກ​ເມືອງ​ສັກສິດ) ເຊິ່ງມີ​ເນື້ອທີ່​ທັງ​ໝົດ​ປະມານ 32 ເຮັກຕາ ຈາກ​ເຖົ້າ​ແກ່​ແນວ​ໂຮມບ້ານ.

ແມ່ນ້ຳ​ງື່ມ​ແມ່ນ​ໄດ້​ສົ່ງ​ຄຸນຄ່າ​ເຫຼືອ​ຫຼາຍ ມີ​ຄວາມ​ງົດ​ງາມທາງ​ທຳ​ມະ​ຊາດ ເປັນ​ແມ່ນ້ຳ​ທີ່ໃສ​ດີ ຜ່ານ​ມາ​ໄດ້​ຫຼໍ່ລ້ຽງ​ຄົນ​ວຽງຈັນ​ຫຼວງຫຼາຍ​ແລ້ວ ເກີດ​ໃຫ້​ມີເພງ​ທີ່​ອຳ​ມະຕະ ກໍ່​ຄື​ເພງກ້ຽວສາວ​ແຄມ​ງື່ມ ຄາດ​ວ່າ​ໃນ​ປີ​ນີ້ ແລະ ອະນາຄົດ​ແມ່ນ້ຳ​ງື່ມ​ສາຍນີ້​ຈະ​ມີ​ຄຸນ​ປະໂຫຍດ​ສູງ​ຂຶ້ນ​ຕື່ມອີກ ຜ່ານ​ການ​ທັດສະນະ​ສຶກ​ສາຄັ້ງ​ນີ້ ທາງ​ນະຄອນຫຼວງ ເມືອງໄຊ​ທານີ ບັນດາ​ບໍລິສັດ ແມ່ນ​ຈະໄດ້​ຮ່ວມ​ມື​ກັນ​ພັດທະນາ​ສາຍ​ນ້ຳງື່ມ ເປັນ​ແຫຼ່ງ​ທ່ອງ​ທ່ຽວ​ທາງ​ທຳມະ​ຊາດ ເຊິ່ງ​ໃນ​ປີ​ນີ້ ນະຄອນຫຼວງ​ຈະ​ເປີດ​ການທ່ອງທ່ຽວ​ທາງທຳ​ມະ​ຊາດ​ໃຫ້​ຫຼາຍ​ຂຶ້ນ ຖ້າວ່າ​ໂຄງການ​ນີ້ເລີ່ມເປີດ​ແຕ່​ປີ​ໃໝ່​ລາວ​ປີ​ນີ້ ສະເລ່ຍມື້ໜຶ່ງ​ມີ​ນັກ​ທ່ອງ​ທ່ຽວ 2 ພັນ​ຄົນ ແລະ ໃຊ້​ຈ່າຍ​ເງິນ​ຂອງ​ຄົນ​ຜູ້​ໜຶ່ງ ປະມານ 80 ພັນ​ກີບ ຫຼື ປະມານ 10 ໂດ​ລາ​ສະຫະລັດ ເຊິ່ງ​ຊາວຕ່າງປະເທດ​ແມ່ນ​ມັກ​ທ່ອງ​ທ່ຽວທາງ​ທຳ​ມະ​ຊາດ ສະນັ້ນ ກໍ່​ເປັນກາລະ​ໂອກາດ​ໃຫ້​ແກ່​ປະຊາຊົນ​ເມືອງ​ໄຊ​ທານີ ສົ່ງເສີມໃນ​ການ​ປູກຝັງ ຂຸດ​ຄົ້ນ​ທ່າແຮງບົ່ມ​ຊ້ອນ​ທີ່​ມີ​ຢູ່​ນັ້ນ​ອອກ​ມາ ເຊິ່ງຕໍ່​ໄປ​ຈະ​ສ້າງ​ເຂື່ອນ​ໄຟຟ້າ​ຢູ່​ເວີນກະເບົາ ໄດ້​ຜ່ານ​ການ​ສຶກ​ສາ​ຄົ້ນຄວ້າ​ແລ້ວ ປ້ານ​ຢູ່​ພື້ນ​ທີ່​ນັ້ນ ສ່ວນລະດັບ​ນ້ຳ​ຈະ​ຍຶ່ງ​ຂຶ້ນ​ໃນ​ຍາມ​ຝົນຈະ​ຍຶ່ງ​ສູງ​ເຖິງ​ເຂດ​ທາ​ງ່ອນ ພ້ອມກັນ​ນັ້ນ ຈະ​ພັດທະນາ​ສາຍ​ນ້ຳເຄັມ ຫ້ວຍ​ເຈມ ເຮັດ​ເປັນ​ຄອງເຂົ້າ​ສູ່​ນະຄອນຫຼວງ​ວຽງ​ຈັນ ເຮັດໃຫ້​ນະຄອນຫຼວງ​ໄດ້​ຊົມໃຊ້​ນ້ຳ​ສະອາດ​ທີ່​ມີ​ຄວາມ​ໝາຍ​ທີ່​ສຸດ ເຊັ່ນ: ໃຊ້​ເພື່ອ​ດື່ມ ການ​ກິນ ການ​ກະເສດ ການ​ຫາ​ຢູ່​ຫາ​ກິນ ລ້ຽງ​ປາ ແລະ ໃຊ້​ເປັນ​ແຫຼ່ງ​ທ່ອງ​ທ່ຽວ ເຮັດ​ໃຫ້​ສາຍ​ນ້ຳ​ງື່ມ​ນີ້​ເປັນ​ແຫຼ່ງໜຶ່ງ ​ສ້າງ​ລາຍ​ຮັບ​ໃຫ້​ແກ່​ນະຄອນຫຼວງ​ວຽງ​ຈັນ​ໃນ​ອະນາຄົດ.

ຂ່າວທີ່ກ່ຽວຂ້ອງ