ການຄ້າປີ 2018 ເນັ້ນເປີດຕະຫຼາດອາຊຽນ ເພື່ອການເຕີບໂຕທາງທຸລະກິດ

142 09 ກ.ພ. 2018 ຂ່າວໜ້າ​ໜຶ່ງ

ປີ 2017 ການຈັດຕັ້ງ​ປະຕິບັດແຜນ​ພັດທະນາ​ຂອງ​ຂະແໜງ​ອຸດສາ​ຫະ​ກຳ ແລະ ການ​ຄ້າ ໄດ້​ເລັ່ງໃສ່ 3 ດ້ານ​ສຳຄັນ ປະກອບ​ມີ: ວຽກ​ງານ​ອຸດສາຫະກຳ​ປຸງ​ແຕ່ງ ແລະ ຫັດຖະກຳ ເຊິ່ງ​ມູນ​ຄ່າການ​ຜະລິດ​ອຸດສາຫະກຳ​ປຸງ​ແຕ່ງ ບັນລຸ 8.942 ຕື້​ກີບ ທຽບໃສ່​ປີ 2016 ມູນ​ຄ່າ 8.585 ຕື້​ກີບ ອັດຕາ​ການ​ຂະຫຍາຍຕົວ​ສະເລ່ຍ 4,15% ໃນ​ນັ້ນ ໝວດ​ປະເພດ​ສິນຄ້າ​ອຸດສາຫະກຳ ທີ່​ມີ​ອັດຕາ​ການຂະຫຍາຍຕົວ​ເພີ່ມ​ຂຶ້ນແມ່ນ​ອຸດສາ​ຫະ​ກຳ​ເຫຼັກ​ເສັ້ນ ການ​ຜະລິດສະບຽງ​ອາຫານ ເຄື່ອງ​ດື່ມ ແລະ ອຸດສາຫະກຳ​ຢາສູບ ດ້ານ​ວຽກງານ​ການ​ຄ້າ​ພາຍ​ໃນ ການ​ຈໍ​ລະຈອນ​ສິນຄ້າ​ພາຍ​ໃນ (ການ​ຄ້າຍົກ-ຍ່ອຍ ແລະ ບໍລິການ) ບັນລຸໄດ້ 51.687 ຕື້​ກີບ ທຽບໃສ່​ປີ 2016 ມີ​ມູນ​ຄ່າ 44.907 ຕື້​ກີບ ຂະຫຍາຍຕົວສະເລ່ຍ 15,10% ແລະ ທຽບໃສ່​ແຜນການ​ປີ​ເພີ່ມຂຶ້ນ 1% ໝວດ​ສິນຄ້າ​ພົ້ນ​ເດັ່ນແມ່ນ​ສິນຄ້າ​ແຜ່ນແພ ເຄື່ອງນຸ່ງຫົ່ມ ວຽກ​ງານ​ດ້ານ​ການ​ຄ້າກັບຕ່າງປະເທດ ມູນ​ຄ່າ​ການ​ນຳ​ເຂົ້າ-ສົ່ງ​ອອກ ຈະ​ບັນລຸ​ໄດ້ 9.345 ລ້ານ​ໂດ​ລາ​ສະຫະລັດ ເພີ່ມ​ຂຶ້ນປະມານ 11% ທຽບໃສ່​ໄລຍະດຽວ​ປີຜ່ານມາ ໃນ​ນັ້ນ ການ​ສົ່ງອອກ​ແມ່ນ 4.803 ລ້ານ​ໂດ​ລາ ເພີ່ມ​ຂຶ້ນ 13,4% ໂດຍ​ສິນຄ້າ​ສົ່ງອອກ​ສຳຄັນ​ເປັນ​ໄຟຟ້າ​ເພີ່ມ​ຂຶ້ນ 20,9% ຄຳ​ປະສົມ ຄຳ​ແທ່ງ ເພີ່ມ​ຂຶ້ນ 53% ເຄື່ອງນຸ່ງ​ຫົ່ມ 5,9% ນ້ຳຕານ 115,6% ນອກນີ້ຍັງ​ມີ​ສິນຄ້າ​ກະສິກຳ​ທັນ​ຍາພືດ ເຄື່ອງ​ດື່ມ​ຕ່າງໆ​ກໍ່​ເພີ່ມ​ຂຶ້ນຕາມ​ລຳດັບ ໂດຍ​ປະເທດໄທ ຈີນ ຫວຽດນາມ ອິນ​ເດຍ ຍີ່ປຸ່ນ ເຢຍລະ​ມັນ ແລະ ອາ​ເມ​ຣິ​ກາ ເປັນ​ປະເທດ​ຄູ່​ຄ້າ​ສົ່ງ​ອອກ​ທີ່​ສຳຄັນ ສ່ວນການ​ນຳ​ເຂົ້າ ມີ​ມູນ​ຄ່າ 4.542 ລ້ານ​ໂດ​ລາ ເພີ່ມ​ຂຶ້ນ 7,6% ສາເຫດ​ຈາກ​ການ​ນຳ​ເຂົ້າ​ນ້ຳມັນເຊື້ອ​ໄຟ ເພີ່ມ​ຂຶ້ນ​ສູງ​ເຖິງ 17% ສະເພາະ​ນ້ຳມັນກາດ​ມີ​ທ່າ​ອ່ຽງຫຼຸດ​ລົງ -7,7% ການ​ນຳ​ເຂົ້າ​ໄຟຟ້າ​ຫຼຸດ​ລົງ -18,8% ການ​ນຳເຂົ້າ​ອຸປະກອນ​ທີ່​ເຮັດ​ດ້ວຍ​ເຫຼັກ ເພີ່ມ​ຂຶ້ນ 22,21% ກົນ​ຈັກ 12,5% ແລະ ນ້ຳຕານ 66,9% ປະເທດ​ຄູ່​ຄ້າ​ການ​ນຳ​ເຂົ້າ​ທີ່​ສຳຄັນ​ແມ່ນ​ບັນດາ​ປະເທດ​ທີ່​ມີ​ຊາຍແດນ​ຕິດ​ຈອດ ໂດຍ​ສະເພາະແມ່ນໄທ ຈີນ ແລະ ຫວຽດນາມ.

ສຳລັບ​ປີ 2018 ຂະແໜງ​ອຸດສາ​ຫະ​ກຳ ແລະ ການ​ຄ້າ​ເນັ້ນ​ໃສ່ 3 ແຜນ​ງານ​ສຳຄັນ ຄື: ແຜນງານ​ເຊື່ອມ​ໂຍງ​ເສດຖະກິດ​ພາກພື້ນ-ສາກົນ ທີ່​ເນັ້ນ​ເປີດ​ຕະຫຼາດໃຫ້​ກັນ ແລະ ກັນ ໃນ​ກຸ່ມ​ປະຊາຄົມ​ອາ​ຊຽນ ອາ​ຊຽນ​ບວກ​ຄູ່​ເຈລະ​ຈາ ແລະ ຂອບ​ຄວາມ​ຮ່ວມ​ມືເສດຖະກິດ​ການ​ຄ້າ​ກ່ຽວຂ້ອງ ແຜນ​ງານ​ສ້າງ​ສະພາບ​ແວດລ້ອມທີ່​ເອື້ອ​ອຳນວຍ​ແກ່​ການສ້າງຕັ້ງ ແລະ ດຳເນີນ​ທຸລະ​ກິດຕາມ​ພາລະ​ບົດບາດ​ຂອງ​ກະຊວງ ແລະ ແຜນ​ງານ​ການ​ເພີ່ມ​ທະວີການ​ສ້າງ​ໃຫ້​ວິ​ສາ​ຫະ​ກິດ​ພາຍໃນ ໂດຍ​ສະເພາະ ວິ​ສາ​ຫະ​ກິດຂະໜາດ​ນ້ອຍ-ກາງ ໃຫ້​ມີ​ຄວາມເຂັ້ມແຂງ​ສາມາດ​ຮັບ​ມື ແລະ ແຂ່ງຂັນ​ກັບ​ພາກ​ພື້ນ-ສາກົນ.

ຂໍ້​ມູນ​ຈາກ​ບົດ​ລາຍ​ງານ​ກອງປະຊຸມ ປະຈຳ​ປີ 2017 ຂອງ​ຂະແໜງ​ອຸດສາຫະກຳ ແລະ ການຄ້າ.

ຂ່າວທີ່ກ່ຽວຂ້ອງ