ຂ່າວຫຼ້າສຸດ

ສົ່ງເສີມຊາວກະສິກອນນຳໃຊ້ກົນຈັກເຂົ້າໃນການຜະລິດ

451 12 ມ.ກ. 2018 ຂ່າວໜ້າ​ໜຶ່ງ
ສົ່ງເສີມຊາວກະສິກອນນຳໃຊ້ກົນຈັກເຂົ້າໃນການຜະລິດ

ເພື່ອ​ສືບຕໍ່​ປະຕິບັດ​ການ​ຊີ້​ນຳຂອງ​ກະຊວງ​ກະສິກຳ ແລະ ປ່າໄມ້ ກໍ່​ຄືພະ​ແນກ​ກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ (ນວ) ໃນ​ການ​ສ້າງ​ຂະ​ບວນ​ການສາທິດ​ກົນ​ຈັກ​ຜະລິດ​ກະສິກຳ​ທີ່ທັນ​ສະໄໝ​ ໃຫ້​ຜູ້​ຜະລິດ​ກະສິກຳໄດ້​ຮັບ​ຮູ້ ເຂົ້າໃຈ ແລະ ຫັນ​ມາ​ນຳໃຊ້​ເຄື່ອງ​ກົນ​ຈັກ​ທີ່​ທັນ​ສະໄໝ​ເຂົ້າໃນ​ການ​ຜະລິດ​ ເພື່ອ​ໃຫ້​ເກີດ​ປະໂຫຍດ​ສູງ​ສຸດ​ໃຫ້​ຊາວ​ກະສິກອນ.

ວັນ​ທີ 11 ມັງກອນ 2018 ບໍ​ລິສັດ ​ອິນ​ຊີ​ທອງ​ມໍ​ເຕີ້​ຂາ​ອອກ-ຂາເຂົ້າ ຈຳກັດ​ຜູ້​ດຽວ ໄດ້​ຈັດ​ກິດ​ຈະກຳ​ສາທິດ​ການ​ດຳນາ​ດ້ວຍ​ກົນຈັກ​ທີ່​ທັນ​ສະໄໝ ​ຍີ່ຫໍ້​ຄູ​ໂບ​ຕ້າ ທີ່ບ້ານຖິ່ນ​ແທ່ນ ເມືອງ​ຫາດ​ຊາຍຟອງ ນວ ມີ​ທ່ານ ແກ່ນ ວໍລະສານ ຮອງ​ເຈົ້າເມືອງ​ຫາດ​ຊາຍຟອງ ທ່ານ​ນາງ ປິດ ພົມ​ເພັດ ຮອງ​ຫົວໜ້າພະ​ແນກ​ກະສິກຳ ແລະ ປ່າໄມ້ ນວ ພ້ອມ​ດ້ວຍພາກສ່ວນ​ກ່ຽວຂ້ອງ ແລະ ປະຊາຊົນ 8 ບ້ານ​ອ້ອມ​ຂ້າງ​ເຂົ້າ​ຮ່ວມ.

ທ່ານ ແກ່ນ ວໍລະ​ສານ ໄດ້ກ່າວ​ວ່າ: ພັກ-ລັດ ກໍ່​ຄືພາກສ່ວນ​ກ່ຽວຂ້ອງ ແລະ ອຳນາດການ​ປົກຄອງ​ເມືອງ​ຫາດ​ຊາຍຟອງ ໄດ້​ເປັນ​ຫ່ວງ​ເປັນ​ໃຍ ແລະ ເອົາໃຈໃສ່​ກ່ຽວ​ກັບ​ສະພາບ​ການຜະລິດ​ກະສິກຳ ຢູ່​ເມືອງ​ຫາດ​ຊາຍຟອງ ເພື່ອ​ເຮັດ​ໃຫ້​ຊາວ​ກະ​ສິກອນ​ສາມາດ​ຜະລິດ​ເຂົ້າ​ກຸ້ມ​ກິນ ແລະ ເປັນ​ສິນຄ້າ​ສົ່ງ​ອອກ ທັງແນໃສ່​ຫຼຸດຜ່ອນ​ແຮງ​ງານ​ຄົນ ຫຼຸດຜ່ອນ​ຕົ້ນ​ທຶນ​ການ​ຜະລິດ ແລະ ຫັນ​ມາ​ນຳ​ໃຊ້​ກົນ​ຈັກ​ເຂົ້າ​ໃນການ​ຜະລິດ​ກະສິກຳ​ໃຫ້​ຫຼາຍ​ຂຶ້ນ ເຊິ່ງ​ຜ່ານ​ການ​ສາທິດ​ດຳນາດ້ວຍ​ເຄື່ອງ​ຈັກ​ໃນ​ໄລຍະ​ຜ່ານ​ມາ ເຫັນ​ວ່າປະຊາຊົນ​ໄດ້​ໃຫ້​ຄວາມສົນໃຈ​ເປັນ​ຢ່າງ​ດີ ພ້ອມ​ນີ້ ເນື້ອທີ່ການ​ດຳນາ​ດ້ວຍ​ກົນ​ຈັກ​ຢູ່​ເມືອງຫາດ​ຊາຍ​ຟອງ​ໄດ້​ເພີ່ມ​ຂຶ້ນ​ທຸກ​ປີ ນັບ​ແຕ່​ສົກ​ປີ 2011-2012 ເປັນຕົ້ນ​ມາ ຈາກ​ເນື້ອທີ່ 100 ເຮັກຕາ ມາ​ເປັນ 300 ເຮັກຕາ ໃນ​ສົກ​ປີ 2014-2015 ແລະ 500 ເຮັກຕາ ໃນ​ສົກ​ປີ 2016-2017 ແລະ ແຜນການສົກ​ປີ 2017-2018 ແມ່ນ 800 ເຮັກຕາ ເຊິ່ງ​ປັດຈຸບັນ ແມ່ນ​ສຳເລັດ​ປັກ​ດຳ​ໄປ​ແລ້ວ​ຈຳນວນ​ໜຶ່ງ ແລະ ຈະ​ສືບຕໍ່​ປັກ​ດຳໃຫ້​ສຳເລັດ​ຕາມ​ແຜນການ ຫຼື ລື່ນ​ແຜນການ​ທີ່​ວາງ​ໄວ້.

ຂ່າວທີ່ກ່ຽວຂ້ອງ