ລມຕ ລົງຕິດຕາມຄວາມຄືບໜ້າ 2 ໂຄງການພັດທະນາ

226 ວັນສຸກ ເວລາ 09:36 ຂ່າວໜ້າ​ໜຶ່ງ
ລມຕ ລົງຕິດຕາມຄວາມຄືບໜ້າ 2 ໂຄງການພັດທະນາ

ວັນ​ທີ 10 ມັງກອນ 2018 ທ່ານ ສຸພັນ ແກ້ວ​ມີ​ໄຊ ລັດ​ຖະມົນຕີ​ກະຊວງ​ແຜນການ ແລະ ການ​ລົງທຶນ ພ້ອມ​ດ້ວຍ​ຄະນະ ໄດ້ເຄື່ອນ​ໄຫວ​ຢ້ຽມຢາມ​ເພື່ອ​ຊຸກຍູ້ໂຄງການ​ກໍ່ສ້າງ​ເຂດ​ພັດທະນາກວມ​ລວມ​ໄຊ​ເຊດ​ຖາ ນະຄອນຫຼວງ​ວຽງ​ຈັນ ຂອງ​ບໍລິສັດ​ຮ່ວມ ທຶນ​ລາວ-ຈີນ ຈຳກັດ ຖືກ​ຕ້ອນຮັບ​ໂດຍ​ທ່ານ ກຽງຄຳ ພຸດ​ທະ​ວົງສາ ຮອງ​ອຳນວຍ​ການ​ບໍລິສັດ ຮ່ວມ​ທຶນລາວ-ຈີນ ຈຳກັດ ພ້ອມບັນດາ​ຄະນະ​ບໍລິຫານ ແລະ ພະນັກ​ງານ​ກ່ຽວຂ້ອງ​ເຂົ້າ​ຮ່ວມ.

ການເຄື່ອນໄຫວ​ຄັ້ງ​ນີ້ ເປັນການ​ຕິດຕາມ​ໂຄງການ​ກໍ່ສ້າງຂອງ​ເຂດ​ພັດທະນາ​ກວມ​ລວມ​ໄຊເຊດ​ຖາ ເພື່ອ​ເຮັດ​ໃຫ້​ໂຄງການໄດ້​ຮັບ​ການຈັດຕັ້ງ​ປະຕິບັດ ແລະ ສຳເລັດ​ຕາມ​ແຜນການ​ທີ່​ວາງ​ໄວ້ ພ້ອມ​ນັ້ນ​ໄດ້​ຮັບ​ຟັງ​ລາຍ​ງານ​ສະພາບ​ການ​ພັດທະນາ​ເຂດ​ກວມລວມ​ໄຊ​ເຊດ​ຖາ ຈາກ​ທ່ານ ຫຼິວ ຫູ້ ປະທານ​ບໍລິສັດ ​ຮ່ວມ​ທຶນລາວ-ຈີນ ຈຳກັດ ວ່າ: ເຂດ​ພັດທະນາກວມ​ລວມ​ໄຊ​ເຊດ​ຖາ ​ແມ່ນ​ການຮ່ວມ​ທຶນລະຫວ່າງ​ອົງການ​ປົກຄອງນະຄອນຫຼວງ​ວຽງ​ຈັນ ຕາງໜ້າ​ລັດຖະບານ​ລາວ ແລະ ບໍ​ລິສັດ​ລົງ ທຶນ​ຕ່າງປະເທດແຂວງຢູນ​ນານ ທີ່​ຂຶ້ນ​ກັບ​ກຸ່ມ​ບໍລິສັດ​ກໍ່ສ້າງ ແລະ ລົງທຶນ​ແຂວງ​ຢູນນານຫຸ້ນ​ສ່ວນ ຈຳກັດ ຕາງໜ້າລັດຖະບານ​ຈີນ ເຊິ່ງ​ທັງ​ສອງ​ຝ່າຍໄດ້​ສ້າງຕັ້ງ​ບໍລິສັດ ​ຮ່ວມ​ທຶນລາວ-ຈີນ ຈຳກັດ ​ຂຶ້ນ ເພື່ອ​ເປັນ​ຜູ້​ພັດທະ​ນາ​ເຂດ​ດັ່ງກ່າວ ໂດຍ​ມີ​ທຶນທັງ​ໝົດ 128 ລ້ານ​ໂດ​ລາ​ສະຫະລັດ ຫຼື ປະມານ 1.000 ຕື້​ກີບ ໃນນັ້ນ ອົງການ​ປົກຄອງ​ນະຄອນຫຼວງ​ວຽງ​ຈັນ ອອກທຶນ 30 ລ້ານໂດ​ລາ ໂດຍ​ຖື​ເອົາ​ການ​ເວນ​ຄືນທີ່​ດິນ​ເປັນ​ທຶນ​ກວມ​ເອົາ 25% ແລະ ບໍລິສັດ ​ລົງທຶນ​ຕ່າງປະເທດແຂວງ​ຢູນ​ນານ ອອກທຶນ 98 ລ້ານ​ໂດ​ລາ ໂດຍ​ຖື​ເອົາ​ມູນ​ຄ່າການ​ກໍ່ສ້າງ​ສະໜາມ​ກີລາ​ຊີເກມ ປີ 2009 ເປັນ​ທຶນ​ກວມ 75% ຜ່ານ​ມາ​ໄດ້​ມີ​ການ​ກໍ່ສ້າງ​ພື້ນຖານໂຄງ​ລ່າງ​ຢ່າງ​ບໍ່​ຢຸດ​ຢັ້ງ ເພື່ອ​ໃຫ້ກາຍເປັນ​ກຳລັງ​ຄ້ຳ​ດັນ ປັດຈຸບັນ ໄດ້​ລົງທຶນ​ທັງ​ໝົດປະມານ 400 ລ້ານ​ໂດ​ລາ ເຊິ່ງ​ໜ້າ​ວຽກ​ສຳເລັດ ມີ​ຄື​ກໍ່ສ້າງ​ພື້ນຖານ​ໂຄງ​ລ່າງໄລຍະ​ທີ 1 ແລະ ປັບ​ໜ້າດິນ ເນື້ອທີ່ 400 ເຮັກຕາ ກໍ່ສ້າງ​ເສັ້ນທາງຍາວ 18 ກິໂລແມັດ ປູກ​ຕົ້ນໄມ້ລຽບ​ຕາມ​ເສັ້ນທາງ​ກໍ່ສ້າງ ວາງຕາ​ຂ່າຍ​ທໍ່​ສະໜອງ​ນ້ຳ​ປະປາ ທໍ່ລະບາຍ​ນ້ຳ​ເປື້ອນ ໄລຍະ​ທີ 1 ກໍ່ສ້າງ​ໂຮງງານ​ມາດຕະຖານ​ຫຼາຍກວ່າ 50.000 ຕາ​ແມັດ ກໍ່ສ້າງອາຄານ​ບໍລິຫານ ຫໍ​ພັກ​ພະນັກງານ ສູນ​ບໍລິການ​ລູກ​ຄ້າ ຕຶກ​ອາຄານ​ຫໍ​ພັກ​ເຂດ​ໂຮງງານ ແລະ ອື່ນໆ ລວມ​ເນື້ອທີ່​ກໍ່ສ້າງ​ທັງ​ໝົດຫຼາຍ​ກວ່າ 20.000 ຕາ​ແມັດ ແລະ ກຳລັງ​ເລີ່ມ​ກໍ່ສ້າງ​ສະຖານີໄຟຟ້າ 115 ກິ​ໂລ​ວັດ (KV) ນອກນັ້ນ ໄດ້​ເຊີນ​ນັກ​ອອກ​ແບບ​ທີ່​ມີ​ຊື່ສຽງ​ຂອງ​ປະເທດ​ສິງກະໂປ ອອກແບບ​ວາງ​ແຜນ​ໄລຍະ 2 ແລະ ໄລຍະ 3 ຂອງ​ເຂດ​ພັດທະນາ ພາຍຫຼັງ​ສຳເລັດ​ການ​ອອກ​ແບບແລ້ວ ​ຈະ​ຈັດ​ຕັ້ງ​ປະຕິບັດ​ກໍ່ສ້າງຢ່າງຮອບດ້ານ ເພື່ອ​ສ້າງ​ເປັນເຂດ​ເສດຖະກິດ​ແບບ​ກວມ​ລວມຂອງ​ລາວ​ທີ່​ມີ​ຊື່​ສຽງ.

ພ້ອມ​ນີ້ ທ່ານ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ພ້ອມ​ຄະນະ ​ຍັງ​ໄດ້​ເຄື່ອນ​ໄຫວຢ້ຽມຢາມ​ເຂດ​ນິຄົມ​ອຸດ​ສະຫະ​ກຳ ແລະ ການ​ຄ້າ​ວຽງ​ຈັນ-ໂນນທອງ ເຊິ່ງ​ໄດ້​ສ້າງຕັ້ງ​ຂຶ້ນ​ປີ 2009 ພາຍ​ໃຕ້​ສັນຍາ​ການ​ຮ່ວມ​ມືລະຫວ່າງລັດຖະບານ​ລາວ ຕາງໜ້າ​ໂດຍ​ກະຊວງ​ອຸດ​ສະຫະ​ກຳ ແລະ ການ​ຄ້າ ເອົາ​ສິດ​ນຳ​ໃຊ້​ທີ່ດິນ 110 ເຮັກຕາ ປະກອບ​ຮຸ້ນ 30% ແລະ ບໍລິສັດ ໜຳ​ເວ​ພັດທະ​ນາ ຈຳກັດ (ຈີນໄຕ້​ຫວັນ) ຖື​ຮຸ້ນ 70% ໄດ້​ສ້າງຕັ້ງ​ເປັນ​ບໍ​ລິສັດ​ ຮ່ວມ​ທຶນລາວ-ວີ​ຕາພັດ​ທະນາ ຈຳກັດ ມີ​ມູນ​ຄ່າ​ການ​ລົງທຶນທັງ​ໝົດ 43 ລ້ານ​ໂດ​ລາ ແລະ ມີອາຍຸ​ການ​ສຳ​ປະທານ 75 ປີ.

ຂ່າວທີ່ກ່ຽວຂ້ອງ