ໄຊຍະບູລີ ເປີດປີທ່ອງທ່ຽວລາວ ແລະ ບຸນກອງເຂົ້າໃຫຍ່

123 10 ມ.ກ. 2018 ຂ່າວໜ້າ​ໜຶ່ງ
ໄຊຍະບູລີ ເປີດປີທ່ອງທ່ຽວລາວ ແລະ ບຸນກອງເຂົ້າໃຫຍ່

ແຂວງ​ໄຊ​ຍະ​ບູ​ລີ ໄດ້​ຈັດ​ພິທີເປີດ​ປີ​ທ່ອງ​ທ່ຽວ​ລາວ 2018 ແລະ ງານ​ເທ​ສະການ​ບຸນ​ກອງເຂົ້າ​ໃຫຍ່​ຂອງ​ແຂວງ​ຂຶ້ນ ໃນ​ວັນ​ທີ 09 ມັງກອນ 2018 ທີ່​ເມືອງ​ພຽງ ໂດຍ​ການ​ໃຫ້​ກຽດ​ລັ່ນຄ້ອງ 9 ບາດ​ເປີດ​ງານຂອງ​ທ່ານ ສອນໄຊ ສີ​ພັນ​ດອນ ຮອງ​ນາຍົກ​ລັດ​ຖະມົນຕີ ທັງ​ເປັນ​ປະທານ​ຊີ້​ນຳ​ຈັດງານ​ປີ​ທ່ອງ​ທ່ຽວ​ລາວ 2018 ລະດັບ​ຊາດ ເຊິ່ງ​ມີ​ທ່ານ ພົງ​ສະຫວັນ ສິດ​ທະ​ວົງ ເຈົ້າແຂວງ​ໄຊ​ຍະ​ບູ​ລີ ມີ​ບັນດາ​ຄະນະ​ນຳ​ແຂວງ ບັນດາຜູ້ຕາງໜ້າ​ຈາກ​ແຂວງ​ອ້ອມ​ຂ້າງ ກະຊວງ-ກົມ​ກອງ​ທີ່​ກ່ຽວຂ້ອງ ແຂກ​ພາຍ​ໃນ ແລະ ຕ່າງປະເທດ ພ້ອມ​ດ້ວຍ​ພໍ່​ແມ່​ປະຊາຊົນ​ຊາວເມືອງ​ພຽງ ແລະ ບັນດາ​ເມືອງອ້ອມ​ຂ້າງ​ແຂວງ​ໄຊ​ຍະ​ບູ​ລີ​ ເຂົ້າຮ່ວມ​ຢ່າງ​ເປັນ​ຂະ​ບວນ​ຟົດຟື້ນ.

ທ່ານ ບຸດສະບົງ ຈະເລີນ​ຜົນ ປະທານ​ແນວ​ລາວ​ສ້າງ​ຊາດ ເມືອງ​ພຽງ ໄດ້​ລາຍ​ງານ​ໃຫ້​ຊາບກ່ຽວ​ກັບ​ການ​ຫ້າງ​ຫາ​ກະກຽມຄວາມ​ພ້ອມ​ດ້ານ​ຕ່າງໆ ເພື່ອການ​ຈັດ​ງານ​ເທ​ສະການ​ບຸນ​ກອງເຂົ້າ​ໃຫຍ່​ຂອງ​ເມືອງ​ພຽງ ແລະ ຕ້ອນຮັບ​ປີ​ທ່ອງ​ທ່ຽວ​ລາວ 2018 ຂອງ​ແຂວງ​ໄຊ​ຍະ​ບູ​ລີ ເຊິ່ງ​ຊາວເມືອງ​ພຽງ​ມີ​ມູນເຊື້ອ​ດຸໝັ່ນ​ຂະຫຍັນ​ພຽນ ໃນ​ການ​ຜະລິດ ແລະ ມີ​ຮີດຄອງ​ປະເພນີ​ອັນ​ດີງາມ​ທີ່ເປັນ​ເອກະລັກ​ຕັ້ງແຕ່​ໃດ​ມາ ໄດ້ຍຶດ​ຖື​ອາຊີບ​ປູກ​ເຂົ້າ-ປູກ​ພືດ ເປັນຕົ້ນຕໍ ແຕ່​ລະ​ປີ​ພາຍຫຼັງ​ສຳເລັດການ​ເກັບ​ກູ້​ຜົນ​ຜະລິດ​ແລ້ວ ປະຊາ​ຊົນ​ໄດ້​ພ້ອມ​ກັນ​ສະຫຼອງ​ບຸນປະເພນີ ດ້ວຍ​ການ​ເຮັດບຸນ​ເຂົ້າເປືອກ-ເຂົ້າສານ​ຢູ່​ແຕ່​ລະ​ບ້ານ ໂດຍ​ເອົາ​ເຂົ້າເປືອກ​ເຂົ້າສານ ໄປຖວາຍ​ທານ​ຢູ່​ແຕ່​ລະ​ວັດ ເພື່ອ​ລະນຶກ​ເຖິງ​ບຸນຄຸນ​ຂອງ​ເຂົ້າ ແລະ ເປັນ​ການ​ເຕົ້າໂຮມ​ທຶນຮອນ ເພື່ອປະຕິສັງຂອນ​ວັດ​ວາ​ອາ​ຮາມ ດັ່ງນັ້ນ ຄະນະ​ພັກ-ອຳນາດ​ການ​ປົກຄອງ​ເມືອງ ຈຶ່ງ​ໄດ້​ຍົກ​ລະດັບ​ບຸນປະເພນີ​ດັ່ງກ່າວ​ຂຶ້ນ ເປັນ​ງານ​ເທສະການ​ລະດັບ​ເມືອງ ແລະ ໄດ້ເລີ່ມ​ຈັດ​ງານ​ບຸນ​ດັ່ງກ່າວ ມາ​ແຕ່ປີ 2010 ໂດຍ​ຖື​ເອົາ​ວັນ​ທີ 9 ເດືອນ​ຍີ່ (ມັງກອນ) ເປັນ​ມື້​ຈັດງານ ໂດຍ​ຕິດ​ພັນ​ກັບ​ຍຸດ​ທະ​ສາດຂອງ​ເມືອງ​ທີ່​ວ່າ “ສ້າງ​ເມືອງ​ພຽງເປັນ​ເມືອງ​ຜະລິດ​ສະບຽງ​ອາຫານ ຕິດ​ພັນ​ກັບ​ການ​ປຸງ​ແຕ່ງ​ ບໍລິການທາງ​ຜ່ານ​ທ່ອງ​ທ່ຽວ​ທຳ​ມະ​ຊາດ ແລະ ວັດທະນະທຳ”.

ສຳລັບ​ການ​ຈັດ​ງານ​ໃນ​ປີ​ນີ້ ປະກອບ​ດ້ວຍ​ມີ​ຫຼາຍ​ກິດຈະກຳ ເຊັ່ນ: ການ​ປະກາດ​ຮັບຮອງ​ກົມກອງ​ວັດທະນະທຳ ຂະ​ບວນ​ແຮ່ເຂົ້າເປືອກ ເຂົ້າສານ ພ້ອມ​ດ້ວຍກ້ອນ​ກຳລັງ​ມວນ​ຊົນ-ນັກຮຽນ ຈຳນວນ 27 ກ້ອນ​ກຳລັງ ກັນ​ທຳຜ້າປ່າ​ສາມັກຄີ ພິທີ​ສູດ​ຂວັນ​ເຂົ້າ ການ​ປະ​ກວດ​ທິດາ​ກອງ​ເຂົ້າ​ໃຫຍ່ ການສະແດງ​ສິລະ​ປະ​ວັນນະຄະດີ ການ​ແຂ່ງຂັນ​ນັກ​ຮ້ອງ​ສຽງ​ດີ ການ​ແຂ່ງຂັນ​ກີລາ​ພື້ນເມືອງ ການ​ປະ​ກວດ​ອາຫານ​ພື້ນເມືອງ ທ່ອງ​ທ່ຽວ​ວັດທະນະທຳ​ກອງ​ເຂົ້າໃຫຍ່ ວິຖີ​ການ​ດຳລົງ​ຊີວິດ​ຂອງຄົນ​ປ່າ ການ​ຕຳ​ເຂົ້າ-ຟາດ​ເຂົ້າແບບ​ພື້ນເມືອງ ແລະ ການ​ຕັກບາດ​ຖວາຍ​ສັງ​ຂະ​ທານ ນອກ​ນີ້ຍັງ​ໄດ້​ຈັດ​ງານ​ວາງສະແດງ ແລະ ຈຳໜ່າຍ​ສິນຄ້າ​ຂອງ​ປະຊາຊົນຊາວ​ເມືອງ​ພຽງ ສິນຄ້າ 1 ເມືອງ 1 ຜະລິດ​ຕະ​ພັນ (ODOP) ຂອງເມືອງ​ພຽງ ການວາງສະແດງຂອງ​ຫ້ອງການ​ຕ່າງໆ ແລະ ສິນຄ້າ ODOP ຈາກ​ບັນດາ​ແຂວງອ້ອມ​ຂ້າງ​ຈາກ ​ສສ ຫວຽດນາມ ແລະ ຣາ​ຊະ​ອານາຈັກ​ໄທ ລວມເກືອບ 100 ຫ້ອງ​ວາງສະແດງ.

ຂ່າວທີ່ກ່ຽວຂ້ອງ