ປີ 2017 ນະຄອນຫຼວງ ຍາດໄດ້ຜົນງານໃຫຍ່ ແລະ ຮອບດ້ານ

140 10 ມ.ກ. 2018 ຂ່າວໜ້າ​ໜຶ່ງ
ປີ 2017 ນະຄອນຫຼວງ ຍາດໄດ້ຜົນງານໃຫຍ່ ແລະ ຮອບດ້ານ

ປີ 2017 ເປັນ​ປີ​ໜຶ່ງ​ທີ່​ນະຄອນຫຼວງ​ວຽງ​ຈັນ (ນວ) ສາມາດຍາດ​ໄດ້ຜົນ​ງານ​ໃຫຍ່​ຫຼວງ ແລະ ຮອບດ້ານ ບັນດາ​ແຜນ​ວຽກ​ຈຸດສຸມ ກໍ່​ຄືແຜນ​ພັດທະນາ​ເສດ​ຖະກິດ-ສັງຄົມຂອງ ນວ (13 ຄາດໝາຍ​ທີ່​ມະຕິ​ສະພາ ກໍ່​ຄືຂໍ້​ຕົກລົງເລກ​ທີ 0159/​ຈຄ ນວ ກຳນົດອອກ) ລ້ວນ​ແຕ່​ຖືກ​ຈັດ​ຕັ້ງ​ປະຕິບັດ ແລະ ສາມາດ​ບັນລຸ​ເປັນສ່ວນ​ໃຫຍ່ ພ້ອມ​ນີ້ ກໍ່​ມີ​ບາງ​ຄາດໝາຍ​ທີ່​ກຳລັງ​ຈັດ​ຕັ້ງ​ປະຕິບັດ ແລະ ຈະ​ສືບຕໍ່​ຈັດ​ຕັ້ງ​ປະຕິບັດ​ໃຫ້ສຳເລັດ​ໃນ​ປີ​ຕໍ່​ໄປ.

ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ ນວ ກ່າວ​ໃນ​ກອງ​ປະຊຸມ​ສະໄໝ​ສາມັນ ເທື່ອ​ທີ 4 ຂອງສະພາ​ປະຊາຊົນ ນວ ຊຸດ​ທີ I ໃນວັນ​ທີ 9 ມັງກອນ 2018 ວ່າ: ສະເພາະ​ວຽກ​ງານ​ເສດຖະກິດ ອົງການ​ປົກຄອງ ນວ ໄດ້​ຖື​ເປັນ​ວຽກແຖວ​ໜ້າ ໃນ​ນີ້ 1 ປີຜ່ານມາ ເສດຖະ​ກິດ​ຂອງ ນວ ໄດ້​ສືບຕໍ່​ຂະຫຍາຍ​ຕົວຢ່າງ​ຕໍ່​ເນື່ອງ ແລະ ມີທ່ວງ​ທ່າ​ດີ​ຂຶ້ນ​ເປັນ​ກ້າວໆ ການລົງທຶນ​ທົ່ວ​ສັງຄົມ ບັນລຸ 23.763,2 ຕື້​ກີບ ລວມ​ຍອດ​ຜະລິດ​ຕະ​ພັນ​ພາຍ​ໃນ (GDP) ເຕີບ​ໂຕ​ເກືອບ 10% ການ​ຈັດເກັບ​ລາຍ​ຮັບ​ເຂົ້າ​ງົບປະມານໄດ້ 93,5% ຕົວ​ເລກ​ການ​ລົງທຶນ​ຢູ່ ນວ ທີ່ ນວ ແລະ ກະຊວງອະນຸມັດ ມີ​ຫຼາຍ​ກວ່າ 2.919 ຫົວໜ່ວຍ ມູນ​ຄ່າ 18.000 ກວ່າ​ຕື້ກີບ ພ້ອມ​ນີ້ ກໍ່​ໄດ້​ເອົາໃຈໃສ່​ຈັດຕັ້ງ​ປະຕິບັດ​ນະໂຍບາຍ​ສົ່ງເສີມສິນຄ້າ​ໂອ​ດ໋ອບ ເສດຖະກິດ​ຂະໜາດ​ນ້ອຍ-ກາງ ແລະ ເສດ​ຖະກິດ​ຄອບຄົວ ໄດ້​ອອກ​ນິຕິ​ກຳຈັດແບ່ງ​ດິນ 8 ປະເພດ ແລະ ອອກໃບ​ຕາດິນ ນອກ​ນີ້ຍັງ​ໄດ້​ສຳ​ຫຼວດຄອງ​ບຶງ​ທາດຫຼວງ ແລະ ເຂົ້າຮ່ວມ-ຊຸກຍູ້​ເຂົ້າ​ຮ່ວມ​ການ​ຈັດຕັ້ງ​ປະຕິບັດ​ໂຄງການ​ໃຫຍ່ໆ​ລະດັບ​ຊາດ ໂຄງການ​ກໍ່ສ້າງ​ພື້ນຖານ​ໂຄງ​ລ່າງ​ໃນ​ເຂດ ນວ ເຊັ່ນ: ໂຄງການ​ທາງ​ລົດໄຟ ແລະ ສະຖາ​ນີ​ລົດໄຟ​ແຫ່ງ​ຊາດ ໂຄງການປ້ອງ​ກັນ​ຕະ​ຝັ່ງ​ເຈື່ອນ ແລະ ພັດທະ​ນາ​ແຄມຂອງ​ໄລຍະ II ໂຄງການ​ກໍ່ສ້າງ​ເສັ້ນທາງ​ຫຼວງ​ແຫ່ງຊາດ ແລະ ໂຄງການ​ອື່ນໆ.

ຄຽງ​ຄູ່​ກັບ​ໝາກຜົນ​ທີ່​ຍາດ​ມາໄດ້ ກໍ່​ຍັງ​ມີ​ຈຸດ​ອ່ອນ ແລະ ຂໍ້​ຄົງຄ້າງ​ຈຳນວນ​ໜຶ່ງ ​ທີ່​ຈະ​ຕ້ອງ​ໄດ້ເອົາໃຈໃສ່​ແກ້​ໄຂ ເຊັ່ນ: ເສດ​ຖະກິດ​ຂອງ ນວ ຂະຫຍາຍຕົວ​ສູງ ແຕ່​ການ​ຈັດ​ເກັບ​ລາຍ​ຮັບ​ເຂົ້າ​ງົບປະມານ ແລະ ຕົວ​ເລກ​ຄາດໝາຍ​ດຶງ​ດູດ​ນັກ​ທ່ອງ​ທ່ຽວ​ຍັງ​ບໍ່ສາມາດ​ບັນລຸ​ຄາດໝາຍ (ງົບ​ປະມານ​ໄດ້ 93,5% ນັກ​ທ່ອງ​ທ່ຽວໄດ້ 70%) ການ​ລົງທຶນ​ຂອງ​ລັດສາມາດ​ຢັບ​ຢັ້ງ​ໄດ້​ແຕ່​ບໍ່​ສ້າງ​ໜີ້ສິນ​ຂຶ້ນ​ໃໝ່​ເທົ່າ​ນັ້ນ ແຕ່​ການ​ແກ້ໄຂ​ໜີ້​ສິນ​ເກົ່າ​ຍັງ​ພົບ​ບັນຫາ​ຫຍຸ້ງຍາກ ການ​ປະຕິບັດ​ແຜນຜັງເມືອງ ການ​ຈັດ​ສັນ​ຄວາມ​ເປັນ​ລະບຽບ​ຮຽບ​ຮ້ອຍ​ບໍ່​ທັນ​ໄດ້​ດີ ການແກ້​ໄຂ​ປາກົດການ​ຫຍໍ້ທໍ້ ໂດຍ​ສະເພາະ ຢາ​ເສບ​ຕິດ ກຸ່ມ​ແກ້ງ​ກວນເມືອງ ອຸບັດ​ຕິ​ເຫດ ຂີ້ລັກ ບໍ່​ທັນເຖິງ​ກົກ​ເຖິງ​ຮາກ ຍັງ​ມີ​ຂໍ້​ຂັດ​ແຍ່ງຄະດີ​ຄວາມ​ກ່ຽວ​ກັບ​ທີ່​ດິນ ມໍ​ລະດົກ ກູ້​ຢືມ ນອກ​ນີ້ ການ​ຄຸ້ມ​ຄອງ-ບໍລິຫານ​ລັດ ແລະ ການ​ບໍລິການຮັບ​ໃຊ້​ປະຊາຊົນ​ຂອງ​ຂະແໜງການ ແລະ ພະນັກງານ​ຈຳນວນໜຶ່ງ​ຂາດ​ຄວາມ​ກະ​ຕື​ລື​ລົ້ນ ຂາດປະ​ສິດທິ​ຜົນ ຊັກ​ຊ້າ ແລະ ບາງຂະແໜງການ​ບໍ່​ທັນ​ສາມາດ​ບຸກທະລຸ​ໄດ້​ດ້ານ​ຈິນຕະນາການ ແລະ ກົນ​ໄກ ທັງ​ບໍ່​ທັນ​ສາມາດປົດ​ລ໋ອກ​ຂອດ​ອັດ​ຕັນ​ໄດ້​ເທື່ອ.

ຂ່າວທີ່ກ່ຽວຂ້ອງ