ຂ່າວຫຼ້າສຸດ

ທ່ານນາຍົກ ຈະເຂົ້າຮ່ວມກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ

444 08 ມ.ກ. 2018 ຂ່າວໜ້າ​ໜຶ່ງ

ໂດຍ​ຕອບ​ສະໜອງ​ຕາມ​ຄຳເຊີນ​ຂອງ​ສົມເດັດ ອັກ​ຄະມະ​ຫາ ເສນາ​ບໍດີ ເຕ​ໂຈ​ຮຸນ​ແຊນ ນາຍົກລັດຖະມົນຕີ​ແຫ່ງ​ຣາ​ຊະ​ອານາຈັກ​ກຳປູເຈຍ ໃນ​ວັນ​ທີ 10-11 ມັງກອນ 2018 ທ່ານ ທອງ​ລຸນ ສີ​ສຸລິດ ນາຍົກລັດຖະມົນຕີ ຈະ​ນຳພາຄະ​ນະ​ຜູ້​ແທນ​ລາວ​ເຂົ້າ​ຮ່ວມກອງ​ປະຊຸມ​ຜູ້ນຳ​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ຄັ້ງ​ທີ 2 ທີ່​ພະນົມເປັນ ກຳປູເຈຍ ພາຍ​ໃຕ້​ຫົວຂໍ້ “ແມ່ນ້ຳ​ແຫ່ງ​ສັນຕິພາບ​ຂອງພວກ​ເຮົາ ແລະ ການ​ພັດທະນາແບບ​ຍືນ​ຍົງ”.

ກອງ​ປະຊຸມ​ຄັ້ງ​ນີ້ ຈະ​ເປັນ​ກາລະ​ໂອກາດ​ໃຫ້​ແກ່​ຜູ້ນຳ​ປະເທດສະມາຊິກ​ໄດ້​ຕີ​ລາຄາ ແລະ ທົບທວນ​ຮ່ວມ​ກັນ​ຕໍ່​ກັບ​ຜົນ​ການ​ຈັດຕັ້ງ​ປະຕິບັດ​ວຽກ​ງານ​ຕ່າງໆ ຕາມຖະແຫຼງການ​ຊັນ​ຢາ​ທີ່​ໄດ້​ຮັບຮອງເອົາ​ໃນ​ກອງ​ປະຊຸມ​ຜູ້ນຳ​ແມ່ນ້ຳຂອງ-ແມ່ນ້ຳ​ລ້ານ​ຊ້າງ ຄັ້ງ​ທີ 1 ທີ່ໄດ້​ຈັດ​ຂຶ້ນ​ວັນ​ທີ 23 ມີນາ 2016 ທີ່​ເມືອງ​ຊັນ​ຢາ ແຂວງ​ໄຫ​ໜານ ​ສປ ຈີນ ພ້ອມ​ທັງ​ຮ່ວມ​ກັນ​ທົບທວນຄືນ​ຄວາມ​ຄືບ​ໜ້າ ແລະ ໝາກຜົນ​ຂອງ​ການຈັດຕັ້ງ​ປະຕິບັດ​ບັນດາ​ແຜນ​ວຽກ ແລະ ໂຄງການ​ຕ່າງໆ​ພາຍ​ໃຕ້​ຂອບ​ການຮ່ວມ​ມື​ດັ່ງກ່າວ​ໃນ​ໄລຍະ​ຜ່ານ​ມາ ພ້ອມ​ທັງ​ປຶກສາ​ຫາລື​ກ່ຽວ​ກັບວຽກ​ງານ​ທິດ​ທາງ​ການ​ຮ່ວມ​ມື​ໃນຂອບ​ແມ່ນ້ຳ​ຂອງ-ແມ່ນ້ຳ​ລ້ານຊ້າງ​ໃນຕໍ່ໜ້າ.

ພິເສດ​ກອງ​ປະຊຸມ​ຄັ້ງ​ນີ້ ຈະມີ​ພິທີ​ມອບ-ຮັບຕຳແໜ່ງ​ປະທານ​ຮ່ວມ​ກັບ ​ສປ ຈີນ ສຳລັບຂອງ​ການ​ຮ່ວມ​ມື​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ລະຫວ່າງ ລາວ ແລະ ກຳປູເຈຍ ເຊິ່ງ​ລາວ​ເຮົາ ຈະ​ໄດ້​ຮັບ​ກຽດ​ເປັນ​ປະທານ​ຮ່ວມກັບ ​ສປ ຈີນ ສຳລັບ​ສົກ​ປີ 2018-2020 ໂດຍ​ອີງ​ຕາມ​ຮອບ​ວຽນຕາມ​ຕົວ​ອັກສອນ​ພາສາ​ອັງກິດ.

ຂ່າວທີ່ກ່ຽວຂ້ອງ