ຂ່າວຫຼ້າສຸດ

ເປີດນຳໃຊ້ສະຖານີບຳບັດນ້ຳເປື້ອນ

624 11 ທ.ວ. 2017 ຂ່າວໜ້າ​ໜຶ່ງ
ເປີດນຳໃຊ້ສະຖານີບຳບັດນ້ຳເປື້ອນ

ກອງ​ປະຊຸມ​ສະຫຼຸບ​ສັງ​ລວມ ການຈັດຕັ້ງ​ປະຕິບັດ​ໂຄງການຮ່ວມ​ກັບ​ຜູ້​ໃຫ້​ທຶນ ແລະ ເປີດ​ນຳໃຊ້​ງານ​ສະຖານີ​ບຳບັດ​ນ້ຳ​ເປື້ອນຈາກ​ຄົວ​ເຮືອນ ຈັດ​ຂຶ້ນ​ວັນ​ທີ 8 ທັນວາ 2017 ທີ່​ຫ້ອງການ​ກອງ​ບໍລິ​ການ​ຂົນສົ່ງ​ຂີ້​ເຫຍື້ອ ບ້ານ​ນາໄຫ ເມືອງ​ໄຊ​ເຊດ​ຖາ ນະຄອນຫຼວງ​ວຽງ​ຈັນ ເປັນ​ປະທານ​ຮ່ວມຂອງ​ທ່ານ​ນາງ ວິໄລ​ວອນ ຈັນທະລາຕີ ຫົວໜ້າ​ຫ້ອງການ​ຄຸ້ມ​ຄອງ ແລະ ບໍລິການ​ຕົວ​ເມືອງ​ວຽງ​ຈັນ ແລະ ທ່ານ ເບ​ໄລ ເບດ​ເລດ​ດິນ (Belaide BEDREDDINE) ປະທານ​ອົງການ​ຊຽບ (SIAAP) ຫົວໜ້າ​ຄະນະ​ຜູ້​ແທນ​ສະມາຄົມ ນະຄອນ​ທີ່​ໃຊ້​ພາສາ​ຝຣັ່ງ (AIMF) ມີ​ທ່ານນາງ ຄຼູ​ດິນ ລີດຸກ (Claudine LEDOUX) ເອກ​ອັກ​ຄະ​ລັດ​ຖະ​ທູດຝຣັ່ງ​ປະຈຳລາວ ພ້ອມ​ດ້ວຍ​ບັນດາ​ຜູ້ຕາງໜ້າ​ຈາກ​ອົງການ​ຈັດຕັ້ງ​ສາກົນ​ປະຈຳ​ລາວ ພາກສ່ວນກ່ຽວຂ້ອງ​ເຂົ້າ​ຮ່ວມ.

ທ່ານ​ນາງ ວິໄລ​ວອນ ຈັນທະລາຕີ ກ່າວ​ວ່າ: ໂຄງການ​ບຳບັດນ້ຳ​ເປື້ອນ​ຈາກ​ຄົວ​ເຮືອນ ເປັນໂຄງການ​ໃໝ່​ສຳລັບນະຄອນຫຼວງ​ວຽງ​ຈັນ ທີ່​ເປັນ​ໂຄງການຊ່ວຍເຫຼືອ​ລ້າ​ຈາກ​ສະມາຄົມ​ນະຄອນ​ທີ່​ນຳ​ໃຊ້​ພາສາ​ຝຣັ່ງ ເຊິ່ງເລີ່ມ​ລົງມື​ກໍ່ສ້າງ​ສະຖານີ​ບຳບັດແຕ່​ເດືອນ​ພຶດສະພາ 2016 ແລະ ສຳເລັດ​ການ​ກໍ່ສ້າງ​ໃນ​ເດືອນ​ມັງກອນ 2017 ໂດຍ​ແມ່ນ​ບໍລິສັດ ສຸລິ​ຍະ​ວົງ ກໍ່ສ້າງ ແລະ ສ້ອມແປງ ຈຳກັດ​ຜູ້​ດຽວ ມີ​ມູນ​ຄ່າ​ການ​ກໍ່ສ້າງ​ທັງ​ໝົດ 1.220.000 ເອີ​ໂຣ ໃນ​ນີ້ ບໍ່​ລວມ​ມູນ​ຄ່າ​ການ​ສຶກ​ສາຄວາມ​ເປັນ​ໄປ​ໄດ້​ຂອງ​ໂຄງການ ຈຳນວນ 80.000 ເອີ​ໂຣ ພາຍຫຼັງ​ທີ່​ກໍ່ສ້າງ​ສຳເລັດ ໄດ້​ເປີດ​ທົດລອງ​ນຳ​ໃຊ້​ສະຖານີ​ບຳບັດ​ດັ່ງກ່າວ​ແຕ່​ເດືອນ​ມັງກອນ 2017 ເປັນຕົ້ນ​ມາ ເຫັນ​ວ່າ​ໄດ້​ຮັບ​ການຮ່ວມ​ມື​ຈາກ​ອຳນາດ​ການ​ປົກຄອງ ແລະ ຜູ້​ປະກອບ​ການ​ບໍ​ລິການ​ດູດ​ນ້ຳ​ເປື້ອນ​ຈາກ​ຄົວ​ເຮືອນເປັນ​ຢ່າງ​ດີ.

ການ​ສ້າງ​ສະຖານີ​ບຳບັດ​ນ້ຳເປື້ອນ​ເພື່ອ​ສ້າງ​ຄວາມ​ເຂັ້ມແຂງ ໃນ​ການ​ຄຸ້ມ​ຄອງບຳບັດ​ນ້ຳເປື້ອນ​ຈາກ​ຄົວ​ເຮືອນ​ແບບ​ຍືນຍົງ ແລະ ມີ​ປະສິດທິພາບ ຮັກສາໄດ້​ສະພາບ​ແວດ​ລ້ອມ​ທີ່​ດີ ຫຼຸດຜ່ອນ​ການ​ເອົາ​ອາຈົມ​ທີ່​ບໍ່​ໄດ້​ຜ່ານການ​ສັງ​ເຄາະ ​ໄປ​ປ່ອຍ​ຖິ້ມ​ໃສ່​ໄຮ່ນາ​ຮົ້ວ​ສວນ​ແບບ​ຊະຊາຍ ທີ່​ສົ່ງຜົນ​ກະທົບ​ບໍ່​ດີ​ຕໍ່​ສິ່ງແວດລ້ອມ ລວມ​ທັງ​ສຸຂະພາບ ແລະ ຊີວິດການ​ເປັນ​ຢູ່​ຂອງ​ພໍ່​ແມ່​ປະຊາຊົນ ເພື່ອ​ເຮັດ​ໃຫ້​ໂຄງການ​ດັ່ງກ່າວ​ປະສົບ​ຜົນສຳເລັດ ​ຫ້ອງການ​ຄຸ້ມ​ຄອງ ແລະ ບໍລິການ​ຕົວ​ເມືອງ​ວຽງ​ຈັນ ໄດ້​ຈັດ​ສັນ​ເນື້ອທີ່​ດິນ 2,5 ເຮັກຕາ ຢູ່​ບ້ານ​ນາ​ໄຫ ເມືອງ​ໄຊ​ເຊດ​ຖາ ນະຄອນຫຼວງ​ວຽງ​ຈັນ ພ້ອມ​ດ້ວຍສິ່ງ​ອຳນວຍ​ຄວາມ​ສະດວກ ເຊັ່ນ: ປັບປຸງ​ເສັ້ນທາງ​ເຂົ້າ​ຫາ​ໂຄງການລະບົບ​ໄຟຟ້າ ແລະ ນ້ຳ​ປະປາ ພ້ອມ​ນັ້ນ ນະຄອນຫຼວງ​ວຽງ​ຈັນ ໄດ້​ປະກອບສ່ວນ​ສຳລັບ​ການ​ກໍ່ສ້າງ​ເປັນ​ເງິນສົດ ທັງ​ໝົດ 20 ພັນ​ເອີ​ໂຣ.

ຂ່າວທີ່ກ່ຽວຂ້ອງ