ເຊີດຊູຄວາມຮັບຜິດຊອບຕັດສິນຄະດີ ໃຫ້ມີຄວາມວ່ອງໄວ ພາວະວິໄສ ຖືກຕ້ອງ ເປັນທຳ

1.212 07 ທ.ວ. 2017 ຂ່າວໜ້າ​ໜຶ່ງ
ເຊີດຊູຄວາມຮັບຜິດຊອບຕັດສິນຄະດີ ໃຫ້ມີຄວາມວ່ອງໄວ ພາວະວິໄສ ຖືກຕ້ອງ ເປັນທຳ

ກອງ​ປະຊຸມ​ໃຫຍ່​ຜູ້​ພິພາກສາ ຄັ້ງ​ທີ IX ດຳເນີນ​ໃນ​ລະຫວ່າງວັນ​ທີ 6-8 ທັນວາ 2017 ທີ່​ອົງການ​ສານ​ປະຊາຊົນ​ສູງ​ສຸດ ໂດຍເປັນ​ປະທານ​ຂອງ​ທ່ານ ຄຳ​ພັນ ສິດທິ​ດຳ​ພາ ປະທານ​ສານ​ປະຊາຊົນ​ສູງ​ສຸດ ພ້ອມ​ນີ້ ມີ​ບັນດາ​ປະທານ​ຮອງ​ປະທານ ຫົວໜ້າ​ຄະນະສານ ຜູ້​ພິພາກສາ​ທົ່ວ​ປະເທດ ແຂກ​ຖືກ​ເຊີນ ແລະ ພາກສ່ວນ​ທີ່ກ່ຽວຂ້ອງ​ເຂົ້າ​ຮ່ວມ.

ທ່ານ ຄຳ​ພັນ ສິດທິ​ດຳ​ພາ ໄດ້ກ່າວ​ວ່າ: ກອງ​ປະຊຸມ​ຄັ້ງ​ນີ້ ​ໄດ້ພ້ອມ​ກັນ​ຄົ້ນຄວ້າ​ຕີ​ລາຄາ​ຄືນ​ ສະພາບ​ການຈັດຕັ້ງ​ປະຕິບັດ​ມະຕິກອງ​ປະຊຸມ​ໃຫຍ່ ​ຜູ້​ແທນ​ຜູ້​ພິພາກສາ​ທົ່ວ​ປະເທດ ຄັ້ງ​ທີ VIII ຕິດພັນ​ກັບ​ການ​ດຳເນີນ​ຄະດີ 2 ປີຜ່ານ​ມາ ແລະ ປຶກສາ​ຫາລື​ທິດທາງ​ວຽກ​ງານ​ໃນຕໍ່ໜ້າ ກຳນົດກ່ຽວ​ກັບ​ການ​ຊີ້​ແຈງ ອະທິບາຍຄວາມ​ໝາຍ​ຂອງ​ບາງ​ໝວດ ບາງ​ມາດຕາ​ຂອງ​ກົດໝາຍ ເຊິ່ງໃນ​ຊຸມ​ປີຜ່ານມາ ຢູ່​ບາງ​ສານ​ຍັງເຂົ້າໃຈ​ບໍ່​ທັນ​ສະພາບ​ກັນ ໃນການຈັດຕັ້ງ​ປະຕິບັດ​ທັງ​ໝົດ​ນັ້ນ ກໍ່​ເພື່ອ​ຄວາມ​ເປັນ​ເອກະ​ພາບ​ໃນການ​ຕີ​ລາຄາ ແລະ ສ້າງ​ທັດ​ສະນະ​ທີ່​ຖືກຕ້ອງ ​ໃນ​ການຈັດຕັ້ງ​ປະຕິ​ບັດ​ຕໍ່ໜ້າ.

ຈາກ​ການ​ສັງ​ລວມ​ບັນດາ​ຄຳຖາມ​ທັງ​ໝົດ ຈາກ​ຄວາມ​ຄິດ​ເຫັນຂອງ​ບັນດາ​ຜູ້​ພິພາກສາ​ທົ່ວ​ປະເທດ ທີ່​ໄດ້​ສົ່ງ​ມາໃຫ້​ສານ​ປະຊາຊົນ​ສູງ​ສຸດ​ເປັນ​ຜູ້​ຄົ້ນຄວ້າ ສັງລວມ​ຄຳ​ຕອບ​ແຕ່​ລະ​ບັນຫາ ໃນ​ນີ້ ໄດ້​ຄັດ​ຈ້ອນ​ເຂົ້າ​ແລ້ວ​ມີ 186 ຄຳຖາມ ທຽບໃສ່​ຄັ້ງ​ທີ VIII ເພີ່ມຂຶ້ນ 57 ຄຳ​ຖາມ ກ່ຽວ​ກັບ​ຄະດີອາຍາ 85 ບັນຫາ ຄະດີ​ແພ່ງ 69 ບັນຫາ ຄະດີ​ຄອບຄົວ 25 ບັນຫາ ຄະດີ​ເດັກ 3 ບັນຫາ ຄະດີ​ແຮງງານ 1 ບັນຫາ ແລະ ກ່ຽວ​ກັບ​ບັນຫາ​ທົ່ວ​ໄປ​ມີ 3 ບັນຫາ ເຊິ່ງ​ບັນຫາ​ເຫຼົ່າ​ນີ້​ສະເໜີ​ໃຫ້​ນຳ​ເອົາ​ໄປຄົ້ນຄວ້າ​ພິຈາລະນາ​ຕັດສິນ ແລະ ພິພາກສາ ຜ່ານ​ພຶດຕິ​ກຳ​ຕົວ​ຈິງ ເພື່ອ​ເປັນ​ບ່ອນ​ອີງ ເຍືອງ​ໃສ່​ແຕ່ລະ​ຄຳ​ຖາມ-ຄຳ​ຕອບໃຫ້​ລະອຽດ ເອົາ​ບັນຫາ​ເຫຼົ່າ​ນີ້ ​ຕິດ​ພັນ​ກັບ​ການເບິ່ງ​ຄືນ​ສະພາບ​ການຈັດຕັ້ງ​ປະຕິບັດ​ທີ່​ໄດ້​ເຮັດ​ຜ່ານ​ມາ ອັນ​ໃດ​ທີ່ຖືກຕ້ອງ​ພ້ອມ​ກັນ​ເສີມ​ຂະຫຍາຍອັນ​ໃດ​ຍັງ​ບໍ່​ທັນ​ດີ ບໍ່​ສອດຄ່ອງ​ກໍ່ຕ້ອງ​ພ້ອມ​ກັນ​ປັບປຸງ​ແກ້​ໄຂ ຈາກນັ້ນ ພ້ອມ​ກັນ​ເຊີດ​ຊູ​ຄວາມ​ຮັບ​ຜິດຊອບ ແລະ ນ້ຳໃຈ​ບຸກ​ບືນ​ສູ້​ຊົນຊີ້ນຳ-ນຳພາ ການຈັດຕັ້ງ​ປະຕິບັດກ່ຽວ​ກັບ​ການ​ຄົ້ນຄວ້າ​ພິ​ຈາລະນາ​ຕັດສິນ​ຄະດີ ​ໃຫ້​ມີ​ຄວາມ​ວ່ອງໄວ ພາວະ​ວິໄສ ຖືກຕ້ອງ​ເປັນ​ທຳ ແລະ ມີ​ປະສິດທິພາບ​ດີ​ຂຶ້ນ​ກວ່າເກົ່າ.

ຂ່າວທີ່ກ່ຽວຂ້ອງ