ສູ້ຊົນເຮັດໃຫ້ລວມຍອດຜະລິດຕະພັນພາຍໃນ ເພີ່ມຂຶ້ນລະດັບ 7% ໃນປີໜ້າ

92 07 ທ.ວ. 2017 ຂ່າວໜ້າ​ໜຶ່ງ

ໃນ​ປີ 2018 ລັດຖະບານ​ຈະ​ສູ້ຊົນ​ເຮັດ​ໃຫ້​ລວມ​ຍອດ​ຜະລິດ​ຕະພັນ​ພາຍ​ໃນ (GDP) ເພີ່ມ​ຂຶ້ນ​ຢູ່ລະດັບ 7% ແລະ ສ້າງ​ມູນ​ຄ່າເພີ່ມ​ຕາມ​ລາຄາ​ໃນ​ປີ​ໃຫ້​ໄດ້​ປະມານ 149.471 ຕື້​ກີບ ລາຍ​ໄດ້​ສະເລ່ຍ​ຕໍ່​ຫົວ​ຄົນ 2.536 ໂດ​ລາ​ສະຫະ​ລັດ ລວມ​ຍອດ​ລາຍ​ໄດ້​ແຫ່ງຊາດ​ຕໍ່​ຫົວ​ຄົນ ປະມານ 2.004 ໂດ​ລາ ໃນ​ນັ້ນ ຂະແໜງ​ກະສິກຳເພີ່ມ​ຂຶ້ນ 2,8% ກວມ​ເອົາ​ປະມານ 15,73% ອຸດສາຫະກຳ 9,1% ປະມານ 30,79% ບໍ​ລິການ 6,4% ປະມານ 41,83% ພາສີ-ອາກອນ ແລະ ການ​ນຳເຂົ້າ 9,0% ປະມານ 11,80% ຂອງ GDP.

ແນໃສ່​ເຮັດ​ໃຫ້​ແຜນການ​ຄາດໝາຍ​ທີ່​ວາງ​ໄວ້​ປະສົບ​ຜົນ​ສຳເລັດ ລັດຖະບານ​ໄດ້​ວາງ​ທິດທາງ​ໜ້າທີ່​ລວມ ແລະ ຄາດໝາຍ​ສູ້​ຊົນ ປະຈຳ​ປີ 2018 ຢ່າງຮັດກຸມ ໂດຍ​ສະເພາະແມ່ນແຜນ​ພັດທະນາ​ເສດຖະກິດ-ສັງຄົມ ປີ 2018 ຖື​ເປັນ​ປີ​ທີ 3 ຂອງການຈັດຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ແລະ ແຜນ​ພັດທະນາ​ເສດຖະກິດ-ສັງຄົມ 5 ປີ ຄັ້ງ​ທີ VIII ທີ່​ສະພາແຫ່ງ​ຊາດ ​ໄດ້​ດັດແກ້​ແຜນ 4 ປີ ທີ່​ຍັງ​ເຫຼືອການ​ເຕີບ​ໂຕ ສະເລ່ຍ GDP 7,2% ເພື່ອ​ເຮັດ​ໃຫ້​ບັນລຸ​ຄາດໝາຍ​ດັ່ງກ່າວ ລັດຖະບານມີ​ຈຸດ​ສຸມ​ການ​ພັດທະນາ​ທີ່​ຈະແຈ້ງ ແລະ ສອດຄ່ອງ ເປັນຕົ້ນແມ່ນ ​ການ​ສືບຕໍ່​ສ້າງ​ສະຖຽນ​ລະພາບ​ທາງ​ດ້ານ​ການເມືອງ ​ໃຫ້​ມີຄວາມ​ເຂັ້ມແຂງ ສັງຄົມ​ມີ​ຄວາມສະຫງົບ ຮັກສາ​ສະຖຽນ​ລະ​ພາບຂອງ​ເສດຖະກິດ​ມະຫາ​ພາກ​ໃຫ້​ມີຄວາມ​ໝັ້ນ​ທ່ຽງ ເຂັ້ມແຂງ ແລະ ຍືນ​ຍົງ ສຸມ​ໃສ່​ພັດທະນາ​ຊັບ​ພະຍາ​ກອນ​ມະນຸດ​ທາງ​ດ້ານ​ການສຶກ​ສາ ສາທາລະນະ​ສຸກ ຮັບ​ປະກັນ​ໄດ້​ທັງ​ປະລິມານ-ຄຸນະພາບ ສົ່ງເສີມ​ແຮງ​ງານ​ທີ່​ມີ​ຄວາມ​ຊຳນານ ຮັບປະກັນ​ໄດ້​ຄວາມ​ຮຽກຮ້ອງ​ຕ້ອງການ​ຂອງ​ຕະຫຼາດ​ແຮງງານ​ທັງ​ພາຍ​ໃນ-ພາກ​ພື້ນ ສົ່ງເສີມ ແລະ ໂຄສະນາ​ເຜີຍແຜ່ປີ 2018 ເຊິ່ງ​ເປັນ​ປີ​ທ່ອງ​ທ່ຽວ​ໃຫ້ກວ້າງຂວາງ ເພື່ອ​ກະ​ຕຸ້ນ​ເສດ​ຖະກິດ​ທີ່​ຕິດ​ພັນ​ກັບ​ວຽກ​ງານ​ປົກ​ປັກຮັກສາ​ວັດທະນະທຳ​ ຮີດຄອງ​ປະເພນີ​ອັນ​ດີງາມ​ຂອງ​ຊາດ ຄຽງ​ຄູ່ກັບ​ການ​ສົ່ງເສີມ​ການ​ຜະລິດ​ເປັນສິນຄ້າ ແລະ ການ​ສົ່ງ​ອອກ​ ດ້ວຍນະໂຍບາຍ​ສົ່ງເສີມ​ການ​ລົງທຶນພາຍ​ໃນ ແລະ ຕ່າງປະເທດ​ຢ່າງແຂງແຮງ ພ້ອມ​ກັບ​ປັບປຸງ-ຄົ້ນຄວ້າ​ກົນ​ໄກ​ການ​ຄຸ້ມ​ຄອງ ຕະຫຼອດ​ຮອດ​ບັນດາ​ກົດໝາຍ​ນິຕິ​ກຳຕ່າງໆ ​ໃຫ້​ມີ​ຄວາມ​ສອດຄ່ອງ ກະທັດ​ຮັດ ແນໃສ່​ຄຸ້ມ​ຄອງ​ລັດ ຄຸ້ມຄອງ​ສັງຄົມ ແລະ ສົ່ງເສີມ​ການພັດທະນາ​ທີ່​ຖືກ​ເປົ້າ​ໝາຍ​ທີ່ແທ້ຈິງ​ເປັນຕົ້ນ.

ຂໍ້​ມູນ​ຈາກ​ບົດ​ລາຍ​ງານ​ແຜນພັດທະນາ​ເສດຖະກິດ-ສັງຄົມຂອງ​ລັດຖະບານ​ ຕໍ່​ກອງ​ປະຊຸມ​ສະໄໝ​ສາມັນເທື່ອ​ທີ 4 ຂອງ​ສະພາແຫ່ງ​ຊາດ ຊຸດ​ທີ VIII.

ຂ່າວທີ່ກ່ຽວຂ້ອງ