ຜະລິດຕະພັນພືດເປັນຢາຂອງລາວ ຄາດວ່າຈະເປັນທີ່ນິຍົມໃນຕະຫຼາດຍີ່ປຸ່ນ

117 07 ທ.ວ. 2017 ຂ່າວໜ້າ​ໜຶ່ງ

ພາຍຫຼັງ​ບໍລິສັດ ຊູ​ຈິ​ໂກະ ປະເທດ​ຍີ​ປຸ່ນ ໄດ້​ເຊັນ​ສັນຍາ​ຮ່ວມ​ມືກັບ​ລັດ​ວິ​ສາ​ຫະ​ກິດ​ໂຮງງານ​ຜະລິດ​ຢາ​ເລກ 3 ໃນ​ເດືອນ​ມັງກອນ 2017 ເພື່ອ​ດຳເນີນ​ທຸລະ​ກິດ​ໂດຍໃຊ້​ພືດ​ທີ່​ເປັນ​ຢາ​ຂອງ​ລາວ ແລະ ນຳ​ໃຊ້​ເຕັກ​ໂນ​ໂລ​ຊີ​ຂອງ​ຍີ່ປຸ່ນ​ຜະລິດ​ເປັນ​ຜະລິດ​ຕະ​ພັນ​ອາຫານ ແລະ ເຄື່ອງ​ດື່ມ ເພື່ອ​ລາຍ​ງານຜົນສຳເລັດ​ໃຫ້ການ​ຄົ້ນຄວ້າ ທົດລອງ​ໃນ​ການ​ຜະລິດ ຈຶ່ງ​ຈັດ​ກອງປະຊຸມ​ລາຍ​ງານ​ຜົນ​ໄລຍະ​ກາງ ຂອງ​ການ​ປະຕິບັດ​ໂຄງການ​ຮ່ວມມື​ດັ່ງກ່າວ ​ຂຶ້ນ​ວັນ​ທີ 30 ພະຈິກ 2017 ທີ່​ກະຊວງ​ສາທາລະນະ​ສຸກ ມີ​ທ່ານ ຄຳ​ພອນ ພຸດ​ທະ​ວົງ ຮອງລັດຖະມົນຕີ​ກະຊວງ​ສາ​ທາ​ລະນະ​ສຸກ ແລະ ທ່ານ ທາ​ເຄ​ຊິ ​ຮິ​ຄິຮາ​ຣະ ເອກ​ອັກຄະລາຊະທູດ​ຍີ່ປຸ່ນ ປະຈຳ​ລາວ ພ້ອມ​ດ້ວຍ​ພະນັກງານ​ວິຊາ​ການ​ຂອງ​ທັງ​ສອງ​ຝ່າຍ ເຂົ້າ​ຮ່ວມ.

ໃນ​ກອງ​ປະຊຸມ​ຄັ້ງ​ນີ້ ແມ່ນ​ໄດ້ຮັບ​ຟັງ​ຜົນສຳເລັດ ຈາກ​ທີມ​ງານຂອງ​ປະເທດ​ຍີ່ປຸ່ນ ​ທີ່​ໄດ້​ນຳ​ເອົາພືດ​ທີ່​ເປັນ​ຢາ​ຂອງ​ລາວ ເປັນຕົ້ນ ຜັກ​ບົວລະພາ ຂີ້​ໝີ້ນ ຂີ້​ມ້ອນ ດອກ​ອັນ​ຊັນ ສົ້ມພໍດີ ນຳ​ມາ​ທົດລອງ​ຜະລິດ​ເປັນ​ຜະລິດ​ຕະ​ພັນ​ອາຫານ ແລະ ເຄື່ອງ​ດື່ມ ເຊັ່ນ: ຂະໜົມ ໂຢ​ເກີດ ເຄື່ອງ​ດື່ມ ເຫັນ​ໄດ້ວ່າ​ຜ່ານ​ການ​ຜະລິດແມ່ນ​ໄດ້​ຮັບຜົນສຳເລັດ ທີ່​ສຳຄັນ​ເປັນ​ອາຫານ​ທີ່​ດີ​ຕໍ່​ສຸຂະພາບ ເພາະ​ຜະລິດ​ຕະ​ພັນ​ເຫຼົ່າ​ນີ້​ໄດ້​ຜະລິດ​ຈາກພືດ​ທີ່​ເປັນ​ຢາ​ຂອງ​ລາວ ພາຍຫຼັງຜະລິດ​ຕະ​ພັນ​ສຳເລັດ​ ແມ່ນ​ໄດ້​ນຳເອົາ​ໄປ​ສະເໜີ​ຕໍ່​ບັນດາ​ຮ້ານ​ຄ້າໃນ​ລາວ ແລະ ຍີ່ປຸ່ນ ເຫັນ​ວ່າມີຫຼາຍ​ບໍລິສັດ​ໃນ​ຍີ່ປຸ່ນ​ໃຫ້​ຄວາມສົນໃຈ ​ທີ່​ຈະ​ນຳ​ເອົາ​ຜະລິດ​ຕະ​ພັນດັ່ງກ່າວ​ໄປ​ວາງ​ຈຳໜ່າຍ.

ຂ່າວທີ່ກ່ຽວຂ້ອງ