ສອງສະຖາບັນຫາລືການຮ່ວມມື

1.715 06 ທ.ວ. 2017 ຂ່າວໜ້າ​ໜຶ່ງ
ສອງສະຖາບັນຫາລືການຮ່ວມມື

ກອງ​ປະຊຸມ​ພົບ​ປະລະຫວ່າງສະພາ​ວິທະຍາສາດ​ແຫ່ງ​ຊາດ ​ສປປ ລາວ ນຳ​ໂດຍ​ທ່ານ ບໍ່​ວຽງຄຳ ວົງ​ດາລາ ກຳມະການ​ສູນກາງ​ພັກ ລັດຖະມົນຕີ​ກະຊວງ​ວິທະ​ຍາ​ສາດ ແລະ ເຕັກ​ໂນ​ໂລ​ຊີ ແລະ ສະພາ​ບັນດິດ​ວິທະຍາສາດ ແລະ ເຕັກ​ໂນ​ໂລ​ຊີ ​ສສ ຫວຽດນາມ ນຳ​ໂດຍ​ທ່ານ ເຈົາວັນ​ມິງ ກຳມະການ​ສູນ​ກາງ​ພັກ ປະທານ​ສະພາ​ບັນດິດ​ວິທະຍາສາດ ແລະ ເຕັກ​ໂນ​ໂລ​ຊີ ​ສສ ຫວຽດນາມ ຈັດ​ຂຶ້ນ​ວັນ​ທີ 5 ທັນວາ 2017 ທີ່​ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ມີ​ພາກສ່ວນ​ກ່ຽວຂ້ອງ​ສອງ​ຝ່າຍ​ເຂົ້າຮ່ວມ.

ເພື່ອ​ເປັນ​ການ​ສືບຕໍ່​ຮັດ​ແໜ້ນສາຍ​ພົວພັນ​ຮ່ວມ​ມື​ມິດຕະພາບ ແລະ ຜັນ​ຂະຫຍາຍ​ສັນຍາ​ຮ່ວມມື​ທີ່​ທັງ​ສອງ​ຝ່າຍ ​ໄດ້​ລົງ​ນາມ​ນຳກັນ​ໃນ​ການ​ພົບ​ປະ​ຄັ້ງ​ທີ່​ຜ່ານ​ມາ ທີ່​ນະຄອນ​ດາ​ນັງ ​ສສ ຫວຽດນາມ ພ້ອມ​ນັ້ນ ເພື່ອ​ເປັນ​ການ​ປຶກສາ​ຫາລື​ການ​ຮ່ວມ​ມື ລະຫວ່າງສະພາ​ວິທະຍາສາດ​ແຫ່ງ​ຊາດ ​ສປປ ລາວ ແລະ ສະພາ​ບັນດິດວິທະຍາສາດ ແລະ ເຕັກ​ໂນ​ໂລ​ຊີ ​ສສ ຫວຽດນາມ ນອກ​ນັ້ນ ໄດ້ສືບຕໍ່​ປຶກສາ​ຫາລື​ກັນ​ບົນ​ພື້ນຖານຫຼັກການ​ຊ່ວຍເຫຼືອ​ເຊິ່ງ​ກັນ ແລະ ກັນ ບົນ​ຈິດ​ໃຈຄວາມ​ສາມັກຄີແບບ​ພິເສດ ແລະ ຮ່ວມ​ມື​ຮອບດ້ານມິດຕະພາບ​ຖານ​ສະຫາຍອ້າຍ​ນ້ອງ ຄວາມ​ເຂົ້າ​ອົກ​ເຂົ້າໃຈເລິກເຊິ່ງ ແລະ ຕ່າງ​ຝ່າຍ​ຕ່າງ​ໄດ້ຮັບ​ຜົນ​ປະໂຫຍດ ໄດ້​ສະເໜີ​ໃຫ້ສະພາ​ບັນດິດ​ວິທະຍາສາດ ແລະ ເຕັກ​ໂນ​ໂລ​ຊີ ​ສສ ຫວຽດນາມ ສືບຕໍ່​ສະໜັບສະໜູນ​ໂຄງການ​ໄລຍະ​ທີ 2 ເປັນຕົ້ນ ສືບຕໍ່​ຍົກ​ລະດັບພະນັກງານ​ຂອງ ​ສປປ ລາວ ໄລຍະ​ສັ້ນ ແລະ ໄລຍະ​ຍາວ 10 ທຶນຕໍ່​ປີ ສືບຕໍ່​ເພີ່ມ​ຈຳນວນ​ອຸປະກອນ ຫ້ອງ​ທົດ​ລອງ​ໃຫ້​ຄົບ​ຊຸດ​ຂຶ້ນ ຮ່ວມກັບ​ຝ່າຍ​ຫວຽດນາມ​ນຳ​ໃຊ້​ເຮັດການ​ຄົ້ນຄວ້າ​ວິໄຈ ແລະ ຖ່າຍທອດ​ສູ່​ການ​ຜະລິດ​ເປັນ​ສິນຄ້າ ພ້ອມ​ທັງ​ສະເໜີ​ໃຫ້​ສະໜັບ​ສະໜູນ​ສ້າງ​ແຜນ​ແມ່​ບົດ ​ໃນ​ການສ້າງ​ສວນພຶກສາສາດ​ອະນຸ​ຮັກ​ຊີວະ​ນາໆພັນ ເພື່ອ​ເປັນ​ບ່ອນ​ສຶກສາ​ຄົ້ນຄວ້າ​ຮຽນ​ຮູ້​ໃຫ້​ແກ່​ຄົນ​ຮຸ່ນຕໍ່​ໄປ ແລະ ສ້າງ​ໂຄງການ​ຄົ້ນຄວ້າ​ຮ່ວມ​ກັນ ​ເພື່ອ​ຈັດ​ຕັ້ງ​ປະຕິບັດນຳ​ໃຊ້​ຫ້ອງ​ທົດ​ລອງ​ທີ່​ທາງ ​ສສ ຫວຽດນາມ ໄດ້​ຊ່ວຍເຫຼືອ​ດັ່ງກ່າວ.

ພ້ອມ​ນີ້ ໃນ​ວັນ​ດຽວ​ກັນ​ທີ່ຫ້ອງ​ວ່າການ​ສຳນັກງານ​ນາຍົກລັດຖະມົນຕີ ທ່ານ ທອງ​ລຸນ ສີ​ສຸລິດ ນາຍົກລັດຖະມົນຕີ ແຫ່ງ ​ສປປ ລາວ ໄດ້​ໃຫ້​ກຽດ​ຕ້ອນຮັບທ່ານ ເຈົາ​ວັນ​ມິງ ປະທານ​ສະພາບັນດິດ​ວິທະຍາສາດ ແລະ ເຕັກໂນ​ໂລ​ຊີ ແຫ່ງ ​ສສ ຫວຽດນາມ ພ້ອມ​ດ້ວຍ​ຄະນະ ໃນ​ໂອກາດ​ເດີນທາງ​ມາ​ຢ້ຽມຢາມ ແລະ ເຮັດວຽກ​ຢູ່ ​ສປປ ລາວ.

ຂ່າວທີ່ກ່ຽວຂ້ອງ