ມອບ-ຮັບຫໍພິພິທະພັນແຫ່ງຊາດຫຼັງໃໝ່

1.715 06 ທ.ວ. 2017 ຂ່າວໜ້າ​ໜຶ່ງ
ມອບ-ຮັບຫໍພິພິທະພັນແຫ່ງຊາດຫຼັງໃໝ່

ພິທີ​ມອບ-ຮັບ​ໂຄງການ​ກໍ່ສ້າງຫໍ​ພິ​ພິ​ທະ​ພັນ​ແຫ່ງ​ຊາດ​ຫຼັງ​ໃໝ່ ​ທີ່ຕັ້ງ​ຢູ່​ຖະໜົນ ໄກສອນ ພົມວິຫານ ບ້ານ​ສີວິໄລ ເມືອງ​ໄຊ​ທານີ ນະຄອນ​ຫຼວງ​ວຽງ​ຈັນ ລະຫວ່າງ​ກຸ່ມບໍລິສັດ ຄຳ​ໄພ​ຊະນະ ຈຳກັດ​ຜູ້ດຽວ ແລະ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ (ຖວທ) ໄດ້​ຈັດ​ຂຶ້ນ​ວັນ​ທີ 1 ທັນວາ 2017 ກ່າວ​ມອບ​ໂດຍ​ທ່ານ ຄຳໄພ ສົມ​ຊະນະ ປະທານ​ກຸ່ມ​ບໍ​ລິສັດ ຄຳ​ໄພຊະນະ ຈຳກັດ​ຜູ້​ດຽວ ແລະ ກ່າວ​ຮັບ​ໂດຍ​ທ່ານ ບໍ່​ແສງຄຳ ວົງ​ດາລາ ລັດຖະມົນຕີ​ກະຊວງ ຖວທ ມີ​ທ່ານ ສອນ​ໄຊ ສີພັນ​ດອນ ຮອງ​ນາຍົກລັດຖະມົນຕີ ບັນດາ​ຮອງ​ລັດຖະມົນຕີ ການ​ນຳກະຊວງ ອະດີດ​ການ​ນຳ​ກະຊວງ ແລະ ພະນັກງານ​ເຂົ້າ​ຮ່ວມ.

ໃນ​ພິທີ ທ່ານ ບົວ​ເງິນ ຊາ​ພູ​ວົງ ຮອງ​ລັດຖະມົນຕີ​ກະຊວງ ຖວທ ໄດ້​ຂຶ້ນ​ກ່າວ​ຄວາມ​ເປັນ​ມາ​ຂອງການ​ກໍ່ສ້າງ​ຫໍ​ພິ​ພິ​ທະ​ພັນ​ແຫ່ງຊາດ ເຊິ່ງ​ເຫັນ​ວ່າ​ຫໍ​ພິ​ພິ​ທະ​ພັນແຫ່ງ​ຊາດ​ຫຼັງ​ໃໝ່ ເປັນ​ບ່ອນ​ສະສົມ​ເຕົ້າໂຮມ​ບູຮານ​ວັດຖຸ​ພັນ​ປະເພດ​ຕ່າງໆ ອັນ​ເປັນ​ມູນ​ມໍລະດົກທີ່​ລ້ຳ​ຄ່າ​ທາງ​ດ້ານ​ວັດທະນະທຳ ແລະ ປະຫວັດສາດ​ໃນ​ແຕ່​ລະ​ຍຸກສະໄໝ ທັງ​ເປັນ​ສະຖານທີ່​ສຶກ​ສາຄົ້ນຄວ້າ​ຮຽນ​ຮູ້​ທາງ​ດ້ານ​ປະຫວັດສາດ ວັດທະນະທຳ ແລະ ອະລິຍະ​ທຳ​ຂອງ​ຊາດ​ລາວ​ເຮົາ ເພື່ອເປັນ​ຂໍ້​ມູນ​ພື້ນຖານ​ຕອບ​ສະໜອງຄວາມ​ຮຽກຮ້ອງ​ຕ້ອງການ​ຂອງນັກຮຽນ ນັກ​ສຶກ​ສາ ຊາວ​ໜຸ່ມ ເຍົາວະ​ຊົນ ແລະ ທ່ານ​ຜູ້​ທີ່​ມີຄວາມ​ສົນໃຈ​ໃນ​ການ​ສຶກ​ສາ​ຮ່ຳຮຽນ ແລະ ການ​ມາ​ທ່ຽວ​ຊົມ​ຂອງນັກ​ທ່ອງ​ທ່ຽວ ທັງ​ພາຍ​ໃນ ແລະ ຕ່າງປະເທດ.

ຍ້ອນ​ເຫັນ​ໄດ້​ຄວາມ​ສຳຄັນ​ນັ້ນ ບວກ​ກັບ​ຕຶກ​ອາຄານ​ຫໍ​ພິ​ພິ​ທະ​ພັນແຫ່ງ​ຊາດ​ຫຼັງ​ເກົ່າ ​ຕັ້ງ​ຢູ່​ຖະໜົນເຊດ​ຖາ​ທິ​ລາດ ບ້ານ​ຊຽງ​ຍືນ ເມືອງ​ຈັນທະ​ບູ​ລີ ທີ່​ມີ​ອາຍຸ​ການນຳ​ໃຊ້​ຍາວ​ນານ​ເກືອບ 100 ປີ​ມາແລ້ວ ສະພາບ​ອາຄານ​ຜຸ​ພັງ​ຊຸດໂຊມ ເປ່​ເພ ແລະ ຄັບແຄບ ບໍ່​ສາມາດ​ຕອບ​ສະໜອງ​ຄວາມ​ຮຽກຮ້ອງ​ຕ້ອງການ ​ຕໍ່​ການ​ຄຸ້ມ​ຄອງບັນດາ​ວັດຖຸ​ພັນ​ປະເພດ​ຕ່າງໆ​ທີ່ເປັນ​ມໍລະດົກ​ອັນ​ລ້ຳ​ຄ່າ​ທາງ​ດ້ານວັດທະນະທຳ ແລະ ປະຫວັດສາດ ທັງ​ມີ​ວິໄສ​ທັດ​ທີ່​ຈະ​ສ້າງ​ໃຫ້​ຫໍ​ພິ​ພິທະ​ພັນ​ແຫ່ງ​ຊາດ​ໃຫ້​ເປັນ​ລະບົບຄົບ​ຊຸດ ແລະ ທັນ​ສະໄໝ​ຄື​ກັບ​ປະເທດ​ອື່ນໆ.

ການ​ກໍ່ສ້າງ​ຫໍ​ພິ​ພິ​ທະ​ພັນ​ແຫ່ງຊາດ​ຫຼັງ​ໃໝ່​ມູນ​ຄ່າ 10 ລ້ານ​ໂດລາ​ສະຫະລັດ ຫຼື ປະມານ 80 ຕື້​ກີບ ເຊິ່ງ​ໂຄງການ​ໄດ້​ເລີ່ມ​ກໍ່ສ້າງ​ກາງ​ປີ 2013 ແລະ ສຳເລັດເດືອນ​ພະຈິກ 2017 ເຊິ່ງ​ຫໍ​ພິ​ພິທະ​ພັນ​ແຫ່ງ​ຊາດ​ຫຼັງ​ໃໝ່ ​ເປັນ​ອາຄານ​ທີ່​ມີ​ຮູບຊົງ​ແບບ​ສະຖາປັດຕະຍະກຳ​ລາວ​ປະຍຸກ​ ປະສົມ​ປະສານກັບ​ຄວາມ​ທັນ​ສະໄໝ ມີ​ຄວາມໂດດ​ເດັ່ນ​ທາງ​ດ້ານ​ລວດລາຍດອກ​ດວງເປັນ​ອາຄານ 4 ຊັ້ນ ຍາວ 80 ແມັດ ກວ້າງ 56 ແມັດ ແລະ ສູງ 29 ແມັດ.

ຂ່າວທີ່ກ່ຽວຂ້ອງ