ສ້າງຄວາມເຂົ້າໃຈກ່ຽວກັບກອງທຶນສີຂຽວ

918 06 ທ.ວ. 2017 ຂ່າວໜ້າ​ໜຶ່ງ
ສ້າງຄວາມເຂົ້າໃຈກ່ຽວກັບກອງທຶນສີຂຽວ

ກອງ​ທຶນ​ສີຂຽວ ສຳລັບ​ວຽກງານ​ການ​ປ່ຽນແປງ​ດິນ​ຟ້າ​ອາກາດ ຫຼື Green Clomate Fun ຖື​ເປັນ​ກົນ​ໄກ​ໜຶ່ງ​ທີ່​ສ້າງຕັ້ງຂຶ້ນພາຍ​ໃຕ້​ສົນທິສັນຍາ​ ວ່າ​ດ້ວຍການ​ປ່ຽນແປງ​ດິນ​ຟ້າ​ອາກາດ ເພື່ອ​ສະໜັບສະໜູນ ແລະ ສະໜອງ​ທຶນ​ໃຫ້​ແກ່​ບັນດາ​ປະເທດກຳລັງ​ພັດທະນາ ​ໃນ​ຮູບ​ແບບການ​ຊ່ວຍເຫຼືອ​ລ້າ​ກູ້​ຢືມ ການ​ຄ້ຳປະກັນ ແລະ ການ​ມັດ​ຈຳນຳ​ໃຊ້ໃນ​ວຽກ​ງານ​ການ​ປັບ​ຕົວ​ເຂົ້າ​ກັບການ​ປ່ຽນແປງ​ດິນ​ຟ້າ​ອາກາດ ແລະ ຫຼຸດຜ່ອນ​ອາຍ​ພິດ​ເຮືອນແກ້ວ ໂດຍ​ໂຄງການ​ນີ້​ໄດ້​ເລີ່ມຈັດ​ຕັ້ງ​ປະຕິບັດ​ແຕ່​ປີ 2015 ເປັນຕົ້ນ​ມາ.

ສຳລັບ ​ສປປ ລາວ ໂດຍ​ແມ່ນກົມ​ຄຸ້ມ​ຄອງ​ການ​ປ່ຽນແປງ​ດິນຟ້າ​ອາກາດ ກະຊວງ​ຊັບ​ພະຍາກອນ​ທຳ​ມະ​ຊາດ ແລະ ສິ່ງ​ແວດລ້ອມ ເຮັດ​ໜ້າທີ່​ເປັນ​ຈຸດ​ປະສານງານ​ຫຼັກ ເຊິ່ງ​ລັດຖະບານ​ໄດ້​ເອົາໃຈ​ໃສ່​ແກ້​ໄຂ​ບັນຫາ​ດັ່ງກ່າວ​ດ້ວຍຄວາມ​ຮັບຜິດຊອບ​ສູງ ໂດຍເຊື່ອມ​ສານ​ເອົາ​ວຽກ​ງານ​ປ່ຽນແປງ​ດິນ​ຟ້າ​ອາກາດ ​ເຂົ້າ​ໃນ​ແຜນພັດທະນາ​ເສດຖະກິດ-ສັງຄົມ ຄັ້ງ​ທີ 7-8 ຍຸດ​ທະ​ສາດ​ການ​ພັດທະ​ນາປີ 2025 ແລະ ວິໄສ​ທັດ​ປີ 2030 ພ້ອມ​ກັບ​ລົງ​ນາມ​ໃຫ້​ສະຕະ​ຍາ​ບັນ ​ເປັນ​ພາຄີ​ຂອງ​ສົນທິ​ສັນຍາ​ວ່າ​ດ້ວຍ​ການ​ປ່ຽນແປງ​ດິນ​ຟ້າ​ອາກາດ ​ໃນ​ປີ 1995 ອະນຸ​ສັນຍາກຽວ​ໂຕ ວ່າ​ດ້ວຍ​ການ​ຄວບ​ຄຸມການ​ປ່ອຍ​ທາດ​ອາຍ​ພິດ​ເຮືອນແກ້ວ​ໃນ​ປີ 2003 ສັນຍາ​ປາ​ຣີ ວ່າ​ດ້ວຍ​ການ​ປ່ຽນແປງ​ດິນ​ຟ້າອາກາດ​ໃນ​ປີ 2016 ແລະ ອະນຸສັນຍາ​ກີ​ກາລີວ່າ​ດ້ວຍ​ໂອ​ໂຊນ ວັນ​ທີ 15 ພະຈິກ 2017 ເປັນຕົ້ນ ພ້ອມ​ນັ້ນ ລາວ​ເຮົາ​ຍັງ​ໄດ້​ສຳເລັດວຽກ​ງານ​ສຳຄັນ​ອັນ​ເປັນ​ພື້ນຖານ ເພື່ອ​ຈັດ​ຕັ້ງ​ປະຕິບັດ​ວຽກງານ​ການ​ປ່ຽນແປງ​ດິນ​ຟ້າ​ອາກາດ​ລະດັບ​ຊາດ ໂດຍ​ສະເພາະແມ່ນ​ຍຸດ​ທະ​ສາດ ການ​ປ່ຽນແປງດິນ​ຟ້າ​ອາກາດ ປີ 2010 ແຜນດຳເນີນ​ງານ​ການ​ປ່ຽນແປງ​ດິນຟ້າ​ອາກາດ ປີ 2013-2020 ບົດສື່ສານ​ແຫ່ງ​ຊາດ ຫຼື ບົດ​ລາຍງານ​ແຫ່ງ​ຊາດ ສະບັບ​ທີ 1 ແລະ 2 ແຜນ​ງານ​ແຫ່ງ​ຊາດ​ການ​ປະກອບ​ສ່ວນ​ແກ້​ໄຂ​ບັນຫາ​ການປ່ຽນແປງ​ດິນ​ຟ້າ​ອາກາດ ໃນ​ປີ 2015 ແລະ ໃນ​ປັດຈຸບັນ​ພວມດຳເນີນ​ການ​ຮ່າງ​ກົດໝາຍວ່າດ້ວຍ​ການ​ປ່ຽນແປງ​ດິນ​ຟ້າ​ອາກາດ ຄາດ​ວ່າ​ຈະ​ນຳ​ເຂົ້າ​ຜ່ານສະພາ​ແຫ່ງ​ຊາດ ເພື່ອ​ພິ​ຈາລະນາ ແລະ ຮັບຮອງ​ໃນ​ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ຂອງສະພາ​ແຫ່ງ​ຊາດ ຊຸດ​ທີ VIII ໃນເດືອນ​ເມສາ 2018 ນີ້.

ເພື່ອ​ແນໃສ່​ສ້າງ​ຄວາມ​ຮັບ​ຮູ້ ແລະ ເຂົ້າໃຈ​ກ່ຽວ​ກັບ​ການຈັດຕັ້ງປະຕິບັດ​ວຽກ​ງານ​ກອງ​ທຶນ​ສີຂຽວຢູ່ ​ສປປ ລາວ ພ້ອມ​ກັບ​ເປີດ​ໂອກາດ​ໃຫ້​ພາກສ່ວນ​ກ່ຽວຂ້ອງ ​ປຶກສາ​ຫາລື​ການຈັດຕັ້ງ​ປະຕິບັດ​ໂຄງການ​ດັ່ງກ່າວ ກົມ​ຄຸ້ມ​ຄອງ​ການປ່ຽນແປງ​ດິນ​ຟ້າ​ອາກາດ ​ໄດ້​ຈັດກອງ​ປະຊຸມ​ລິ​ເລີ່ມ​ການຈັດຕັ້ງປະຕິບັດ​ໂຄງການ​ຂອງ ​ສປປ ລາວ ແລະ ການ​ເຜີຍແຜ່​ວຽກງານການ​ກະກຽມ​ຄວາມ​ພ້ອມຕໍ່​ກອງ​ທຶນ​ສີຂຽວ​ຂຶ້ນ ວັນ​ທີ 30 ພະຈິກ 2017 ຜ່ານ​ມາ ຢູ່​ຫໍ​ປະຊຸມ​ແຫ່ງ​ຊາດ ໂດຍ​ການ​ເຂົ້າຮ່ວມ​ຂອງ​ທ່ານ ສັງຂານ ທ່ຽງ​ທຳມະ​ວົງ ຫົວໜ້າ​ກົມ​ຄຸ້ມ​ຄອງ​ການປ່ຽນແປງ​ດິນ​ຟ້າ​ອາກາດ ​ພ້ອມດ້ວຍ​ຜູ້ຕາງໜ້າ​ຈາກ​ອົງການ​ສະຫະ​ປະຊາ​ຊາດ ແລະ ພາກສ່ວນກ່ຽວຂ້ອງ​ທັງ​ສູນ​ກາງ-ທ້ອງຖິ່ນ.

ຂ່າວທີ່ກ່ຽວຂ້ອງ