ມອບ-ຮັບສູນວິໄຈທົດລອງວິທະຍາສາດ

118 06 ທ.ວ. 2017 ຂ່າວໜ້າ​ໜຶ່ງ

ໃນ​ວັນ​ທີ 5 ທັນວາ 2017 ນີ້ຢູ່​ສະ​ຖາ​ບັນ​ນິເວດ​ວິທະຍາ ແລະ ຊີວະ​ເຕັກ​ໂນ​ໂລ​ຊີ ຫຼັກ 14 ເມືອງ​ໄຊ​ທານີ ນະຄອນຫຼວງ​ວຽງ​ຈັນ ໄດ້​ຈັດ​ມີ​ພິທີ​ມອບ-ຮັບສູນ​ວິໄຈ-ທົດ​ລອງ​ວິທະຍາສາດ ຕາງໜ້າມອບ​ໂດຍ​ທ່ານ ເຈົາ​ວັນ​ມິງ ປະທານ​ສະພາ​ວິທະຍາສາດ ແລະ ເຕັກ​ໂນ​ໂລ​ຊີ ແຫ່ງ ​ສສ ຫວຽດນາມ ແລະ ຕາງໜ້າ​ຮັບ​ໂດຍ​ທ່ານ ບໍ່​ວຽງ​ຄຳ ວົງ​ດາລາ ລັດຖະມົນຕີ​ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ປະທານ​ສະພາ​ວິທະຍາສາດ​ແຫ່ງ​ຊາດ​ລາວ.

ທ່ານ ບໍ່​ວຽງ​ຄຳ ວົງ​ດາລາ ກ່າວ​ວ່າ: ການ​ຈັດ​ພິທີ​ມອບ-ຮັບ​ສູນ​ດັ່ງກ່າວ​ ມີ​ຄວາມ​ໝາຍ​ຄວາມ​ສຳຄັນ​ຕໍ່ວຽກ​ງານ​ການ​ຄົ້ນຄວ້າ​ພັດທະນາ​ວິທະຍາສາດ ແລະ ເຕັກ​ໂນ​ໂລ​ຊີ​ຂອງ ​ສປປ ລາວ ພວກ​ເຮົາສູນ​ວິໄຈ-ທົດ​ລອງ​ດັ່ງກ່າວ ພາຍ​ໃຕ້​ໂຄງການ​ເພີ່ມ​ທະວີ​ຄວາມ​ອາດ​ສາມາດ​ໃນ​ການ​ຄົ້ນຄວ້າ ແລະ ພັດທະນາ​ວິ​ທະຍາ​ສາດ​ເຕັກ​ໂນ​ໂລ​ຊີ ​ໃຫ້​ແກ່​ສະພາ​ວິທະຍາສາດ​ແຫ່ງ​ຊາດ ​ສປປ ລາວ ໂດຍ​ການ​ຊ່ວຍເຫຼືອ​ລ້າ​ຈາກ​ລັດ​ຖະບານ ​ສສ ຫວຽດນາມ ເວົ້າ​ລວມ ເວົ້າ​ສະເພາະ ຍ້ອນ​ຄວາມ​ເອົາໃຈໃສ່ ແລະ ໃຫ້ການ​ສະໜັບສະໜູນຂອງ​ສະພາ​ວິທະຍາສາດ ແລະ ເຕັກ​ໂນ​ໂລ​ຊີ ​ສສ ຫວຽດນາມ ກໍ່​ຄືຄະນະ​ກຳມະການ​ຮ່ວມ​ມື​ລະຫວ່າງ ລາວ-ຫວຽດນາມ ຫວຽດນາມ-ລາວ ຕໍ່​ສະພາ​ວິທະຍາສາດ​ແຫ່ງ​ຊາດ​ລາວ.

ເປົ້າ​ໝາຍ​ຂອງ​ໂຄງການ​ເບື້ອງ​ຕົ້ນ ແມ່ນ​ແນໃສ່​ເພີ່ມ​ທະວີ​ຄວາມ​ອາດ​ສາມາດ​ໃນ​ການ​ຄົ້ນຄວ້າ​ວິທະຍາສາດ ແລະ ພັດທະນາ​ເຕັກ​ໂນ​ໂລ​ຊີ​ໃນ​ຂົງເຂດ​ວິທະຍາສາດ ທໍລະນີ​ສາດ ແລະ ວິທະຍາສາດ​ສິ່ງ​ທີ່​ມີ​ຊີວິດ (ເຄ​ມີ-ຊີວະ) ເພື່ອ​ຕອບ​ສະໜອງ​ໃນ​ການ​ພັດທະນາ​ເສດຖະກິດ-ສັງຄົມ​ຂອງ ​ສປປ ລາວ ສຳລັບ​ໂຄງການດັ່ງກ່າວ ​ເລີ່ມ​ແຕ່ 2016-2018 ດ້ວຍ​ມູນ​ຄ່າ 63 ຕື້​ດົງ.

ຂ່າວທີ່ກ່ຽວຂ້ອງ