IFC ສະໜອງທຶນໂຄງການກໍ່ສ້າງອາພາດເມັນ

960 06 ທ.ວ. 2017 ຂ່າວໜ້າ​ໜຶ່ງ
IFC ສະໜອງທຶນໂຄງການກໍ່ສ້າງອາພາດເມັນ

ພິທີ​ເຊັນ​ສັນຍາ​ສະໜອງ​ເງິນກູ້ 2 ລ້ານ​ໂດ​ລາ​ສະຫະລັດ ຫຼື ປະມານ 16 ຕື້​ກີບ ລະຫວ່າງ​ອົງການການ​ເງິນ​ສາກົນ (IFC) ແລະ ບໍລິສັດ ອາ​ນານ​ດິ​ລາວ ຈຳກັດ ໄດ້ຈັດ​ຂຶ້ນ​ວັນ​ທີ 1 ທັນວາ 2017 ທີ່ນະຄອນຫຼວງ​ວຽງ​ຈັນ ເພື່ອ​ກໍ່ສ້າງ​ຕຶກ​ອາພາດ​ເມັນ​ໃຫ້​ເຊົ່າ​ຈຳນວນ 76 ຫ້ອງ​ນອນ ຕັ້ງ​ຢູ່​ໃຈກາງ ນວ ໂຄງການ​ຕຶກ ‘’Aanandi Riverview’’ ຈະ​ສ້າງ​ສຳເລັດ​ພາຍ​ໃນ 24 ເດືອນ ແລະ ຄາດ​ວ່າ​ຈະ​ເປີດ​ໃຫ້​ບໍລິການ​ພາຍ​ໃນ​ປີ 2020 ຮ່ວມ​ລົງ​ນາມ​ລະຫວ່າງທ່ານ ໄຄລ໌ເຄວ ຮອບ​ເຟີ້ ຜູ້ຕາງໜ້າ​ອົງການ IFC ປະຈຳ​ພາກ​ພື້ນ ສຳລັບ ລາວ ກຳປູເຈຍ ແລະ ຫວຽດນາມ ແລະ ທ່ານ​ນາງ ຊູ​ມາ ຜູ້ອຳນວຍ​ການ​ຝ່າຍ​ພັດທະນາໂຄງການກຸ່ມ​ບໍລິສັດ Aanandi ມີ​ພາກສ່ວນ​ທີ່​ກ່ຽວຂ້ອງ​ທັງ​ສອງຝ່າຍ​ເຂົ້າ​ຮ່ວມ.

ທ່ານ​ນາງ ຊູ​ມາ ໄດ້​ກ່າວ​ວ່າ: ການ​ສະໜອງ​ທຶນ​ໄລຍະ​ຍາວຂອງ IFC ສອດຄ່ອງ​ກັບ​ວິໄສ​ທັດໃນ​ໄລຍະ​ຍາວ​ຂອງ​ກຸ່ມ​ບໍລິສັດ ເພື່ອ​ຍົກ​ສູງ​ຕະຫຼາດ​ອະ​ສັງ​ຫາ​ລິມະ​ຊັບ​ໃນ​ປະເທດ​ລາວ​ ໃຫ້​ກ້າວເຂົ້າ​ສູ່​ລະດັບ​ສາກົນ ນອກ​ນັ້ນ ການ​ປະກອບສ່ວນ​ຂອງ IFC ແລະ ຄູ່​ຮ່ວມ​ທຸລະ​ກິດ​ຈາກ​ປະເທດຍີ່ປຸ່ນ ຈະ​ຊ່ວຍ​ເພີ່ມ​ຄວາມໜ້າ​ເຊື່ອ​ຖື ແລະ ສະໜອງ​ຄວາມຮູ້​ລະດັບ​ສາກົນ ຕະຫຼອດ​ເຖິງຄວາມ​ຊຳນິ​ຊຳນານ​ດ້ານ​ເຕັກນິກ ແລະ ດ້ານ​ຂະແໜງການເຂົ້າ​ໃນ​ໂຄງການ​ນີ້ ເພື່ອ​ກຽມຄວາມ​ພ້ອມ​ໃຫ້​ແກ່​ໂຄງການ​ທີ່ຢູ່ອາໄສ​ຕື່ມ​ອີກ​ໃນຕໍ່ໜ້າ​ຢູ່​ໃນ​ລາວ ເຊິ່ງ​ກຸ່ມ​ບໍລິສັດ Aanandi ສ້າງຂຶ້ນ​ຈາກ 4 ຄົນ ທີ່​ປະສົບ​ຜົນ​ສຳເລັດ​ຮ່ວມ​ມື​ກັນ ເພື່ອ​ພັດທະນາໃນ​ຂົງເຂດ​ອາຊີ ພວກ​ເຂົາ​ໄດ້​ນຳເອົາ​ປະສົບ​ການ​ທີ່​ກວ້າງຂວາງ ທາງ​ດ້ານ​ສະ​ຖາ​ປັດວຽກ​ງານ​ບໍລິ​ການ​ທີ່​ພັກ ການ​ຄຸ້ມ​ຄອງ​ໂຄງການ ການ​ກໍ່ສ້າງການ​ຕະຫຼາດ ແລະ ການ​ເງິນ.

ຂ່າວທີ່ກ່ຽວຂ້ອງ