ທູຕານຸທູດ-ອົງການຈັດຕັ້ງສາກົນ ເຂົ້າອວຍພອນໃນໂອກາດວັນຊາດ

1.231 05 ທ.ວ. 2017 ຂ່າວໜ້າ​ໜຶ່ງ
ທູຕານຸທູດ-ອົງການຈັດຕັ້ງສາກົນ ເຂົ້າອວຍພອນໃນໂອກາດວັນຊາດ

ວັນ​ທີ 1 ທັນວາ 2017 ບັນດາທູຕານຸທູດ-ອົງ​ການຈັດຕັ້ງ​ສາກົນ ປະຈຳ​ລາວ ພ້ອມ​ຄູ່​ສົມລົດ​ ໄດ້ເຂົ້າ​ອວຍພອນ​ທ່ານ ບຸນ​ຍັງ ວໍລະຈິດ ປະທານ​ປະເທດ ທ່ານ ທອງລຸນ ສີ​ສຸ​ລິດ ນາຍົກລັດຖະມົນຕີ ທ່ານ ພັນ​ຄຳ ວິພາ​ວັນ ຮອງ​ປະທານ​ປະເທດ ພ້ອມ​ພັນ​ລະ​ຍາ ແລະ ບັນດາ​ລັດຖະມົນຕີ​ກ່ຽວຂ້ອງ​ທີ່​ທຳ​ນຽບ​ປະທານ​ປະເທດ ເນື່ອງ​ໃນ​ໂອກາດ​ວັນຊາດ​ທີ 2 ທັນວາ ຄົບຮອບ 42 (2/12/1975-2/12/2017).

ໃນ​ພິທີ ທ່ານ ຈອນ ໂອ​ເວນ ວິນ​ລຽມ ເອກ​ອັກ​ຄະ​ລັດ​ຖະ​ທູດອົດ​ສະ​ຕຣາ​ລີ ປະຈຳ​ລາວ ທູດອາວຸໂສ ໄດ້​ຕາງໜ້າ​ໃຫ້​ທູຕາ​ນຸທູດ ແລະ ອົງ​ການຈັດຕັ້ງ​ສາກົນ ປະຈຳ​ລາວ ຂຶ້ນ​ກ່າວ​ອວຍພອນການ​ນຳ ພັກ-ລັດ ແລະ ປະຊາຊົນ​ລາວ​ບັນດາເຜົ່າ ເຊິ່ງ​ທ່ານ​ໄດ້ສະແດງ​ຄວາມ​ຮູ້ສຶກ​ເປັນ​ກຽດ ​ໃນນາມ​ທູດ​ອາວຸໂສ​ກ່າວ​ອວຍພອນໄຊ​ອັນ​ປະເສີດ​ ມາ​ຍັງ​ການ​ນຳ​ພັກ-ລັດ ແລະ ປະຊາຊົນ​ລາວ​ບັນດາ​ເຜົ່າ ໃນ​ໂອກາດ​ວັນຊາດ ​ສປປ ລາວ ຄົບຮອບ 42 ປີ ແລະ ຕະຫຼອດ​ໄລຍະ​ຜ່ານ​ມາ​ລັດ​ຖະບານ ແລະ ປະຊາຊົນ​ລາວ​ບັນດາເຜົ່າ ​ສາມາດ​ຜ່ານ​ພົ້ນ​ສິ່ງ​ຫຍຸ້ງຍາກ​ທ້າ​ທາຍ​ຕ່າງໆ​ໃນ​ການ​ສ້າງສາ ແລະ ພັດທະນາ​ປະເທດ​ຊາດ ໃນ​ບໍ່​ດົນ​ມາ​ນີ້ ຂ້າພະເຈົ້າ​ພ້ອມດ້ວຍ​ທ່ານ​ທູດ ແລະ ອົງການ​ຈັດຕັ້ງ​ສາກົນ​ປະຈຳ​ລາວ ໄດ້​ເດີນທາງ​ໄປ​ຢ້ຽມຢາມ​ແຂວງ​ຊຽງຂວາງ ແລະ ແຂວງ​ຫົວພັນ ເຂດທີ່​ໝັ້ນ​ການ​ປະຕິວັດ​ລາວ ເຫັນ​ໄດ້ຮ່ອງຮອຍ​ປະຫວັດສາດ ແລະ ຄວາມ​ອຸດົມ​ສົມ​ບຸນ​ທາງ​ທຳ​ມະຊາດ​ຂອງ​ປະເທດ​ລາວ ແລະ ຊີວິດ​ການ​ເປັນ​ຢູ່​ຂອງ​ປະຊາຊົນລາວ​ ໄດ້​ຮັບ​ການ​ປັບປຸງ​ດີ​ຂຶ້ນ ແລະ ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ເທື່ອ​ລະ​ກ້າວ ປະຊາຊົນລາວ​ມີ​ຄວາມ​ຈິງ​ໃຈ ແລະ ມີຄວາມ​ອາດ​ຫານ ຂ້າພະເຈົ້າເຊື່ອ​ວ່າ ພາຍ​ໃຕ້​ການ​ນຳພາຂອງ​ພັກ​ປະຊາຊົນປະຕິວັດ​ລາວ ກໍ່​ຄືລັດຖະບານ ​ຈະ​ສາມາດ​ຜ່ານຜ່າ​ສິ່ງ​ທ້າ​ທາຍ​ຫຍຸ້ງຍາກ​ນາໆ​ປະການ​ທຸກ​ຢ່າງ ​ໃນ​ການຈັດຕັ້ງ​ປະຕິບັດ​ແນວທາງ​ນະໂຍບາຍ​ດ້ວຍ​ຜົນສຳເລັດ​ອັນ​ຈົບງາມ ພ້ອມ​ນີ້​ ທ່ານທູດ​ຍັງ​ໄດ້​ອວຍພອນ ​ສປປ ລາວ ຈົ່ງ​ປະສົບ​ຜົນສຳເລັດ​ໃນ​ການເປີດ​ປີ​ທ່ອງ​ທ່ຽວ​ລາວ 2018 ແລະ ອວຍພອນ​ການ​ນຳ​ພັກ-ລັດ ຈົ່ງ​ປະສົບ​ຜົນສຳເລັດ​ໃນ​ໜ້າທີ່ວຽກ​ງານ​ທຸກ​ປະການ.

ໂອກາດ​ນີ້ ທ່ານ ບຸນ​ຍັງ ວໍລະ​ຈິດ ໄດ້​ຂຶ້ນ​ກ່າວ​ປາ​ໄສ​ວ່າ: ຂ້າພະເຈົ້າ​ພ້ອມ​ດ້ວຍ​ການ​ນຳ​ພັກ-ລັດຖະບານ​ລາວ ມີ​ຄວາມ​ຍິນດີ​ເປັນ​ຢ່າງ​ຍິ່ງ​ທີ່​ໄດ້​ຕ້ອນຮັບ​ບັນດາ​ທູຕານຸທູດ ແລະ ຜູ້ຕາງໜ້າອົງ​ການຈັດຕັ້ງ​ສາກົນ​ປະຈຳລາວ ພ້ອມ​ດ້ວຍ​ຄູ່​ສົມລົດ​ທີ່​ໄດ້ເຂົ້າ​ມາ​ອວຍ​ໄຊ​ໃຫ້​ພອນ​ອັນ​ປະເສີດ​ ດ້ວຍ​ຄວາມ​ຮັກແພງ​ອັນ​ສະໜິດ​ສະໜົມ ແລະ ເຕັມ​ໄປ​ດ້ວຍໄມຕີ​ຈິດ​ມິດຕະພາບ​ມາສູ່​ພວກຂ້າພະເຈົ້າ ກໍ່​ຄືປະຊາຊົນ​ລາວທັງ​ຊາດ ເນື່ອງ​ໃນ​ໂອກາດ​ວັນ​ສະຖາປະນາ ສາທາລະນະ​ລັດ ປະຊາ​ທິ​ປະ​ໄຕ ປະຊາຊົນ​ລາວ ຄົບຮອບ 42 ປີ ແລະ ວັນ​ຂຶ້ນ​ປີ​ໃໝ່ສາກົນ 2018 ທີ່​ຈະ​ມາ​ເຖິງ ພ້ອມດຽວ​ກັນ​ນີ້ ຂ້າພະເຈົ້າ​ຂໍ​ສະແດງຄວາມ​ຂອບໃຈ​ຢ່າງ​ຈິງ​ໃຈ​ຕໍ່​ທ່ານ​ທູດ​ອາວຸໂສ ​ທີ່​ໄດ້​ມີ​ຄຳ​ເວົ້າ​ອັນ​ຈົບງາມ ແລະ ກ່າວ​ຍ້ອງຍໍ​ສັນ​ລະເສີນ​ຕໍ່​ຜົນສຳເລັດ​ໃນ​ຫຼາຍ​ດ້ານ​ທີ່ ​ສປປ ລາວ ຍາດ​ມາ​ໄດ້​ໃນ​ພາລະກິດ​ປົກ​ປັກ​ຮັກສາ ແລະ ສ້າງສາພັດທະນາ​ປະເທດ​ຊາດ ໂດຍ​ສະເພາະແມ່ນ​ການຈັດຕັ້ງ​ປະຕິບັດແຜນ​ພັດທະນາ​ເສດຖະກິດ-ສັງຄົມ​ໃນ​ໄລຍະ​ຜ່ານ​ມາ.

ປີ 2017 ແມ່ນ​ອີກ​ປີ​ໜຶ່ງ​ທີ່​ມີຄວາມ​ໝາຍ​ຄວາມ​ສຳຄັນ ​ໃນ​ປະຫວັດ​ສາດ​ຂອງ​ຊາດ​ລາວ ຕະຫຼອດ​ໄລຍະ​ເກືອບ 2 ປີ ແຫ່ງການຈັດຕັ້ງ​ຜັນ​ຂະຫຍາຍ​ມະຕິກອງ​ປະຊຸມ​ໃຫຍ່ ​ຄັ້ງ​ທີ 10 ຂອງພັກ ແລະ ແຜນ​ພັດທະນາ​ເສດຖະ​ກິດ-ສັງຄົມ​ແຫ່ງ​ຊາດ 5 ປີ ຄັ້ງ​ທີ 8 ພວກ​ຂ້າພະເຈົ້າ​ໄດ້​ສຸມໃສ່​ດຳເນີນ​ມາດ​ຕະການ​ແກ້​ໄຂ​ຂໍ້ຫຍຸ້ງຍາກ​ດ້ານ​ຕ່າງໆ ແນໃສ່ເພື່ອ​ສ້າງສາ​ພັດທະນາ​ປະເທດຊາດ ​ໃຫ້​ມີ​ຄວາມ​ຈະເລີນ​ຮຸ່ງເຮືອງ​ເທື່ອ​ລະ​ກ້າວ ພວກ​ຂ້າ​ພະເຈົ້າ​ມີ​ຄວາມ​ພາກພູມ​ໃຈ​ເປັນຢ່າງ​ຍິ່ງ ​ທີ່​ໄດ້​ເຫັນ​ວ່າ ​ສປປ ລາວ ຍັງ​ສືບຕໍ່​ມີ​ສະຖຽນ​ລະ​ພາບ​ທາງດ້ານ​ການເມືອງ ສັງຄົມ​ມີ​ຄວາມສະຫງົບ ເສດຖະກິດ​ມີ​ການ​ຂະຫຍາຍ​ຕົວຢ່າງ​ໝັ້ນ​ທ່ຽງ ລວມຍອດ​ຜະລິດ​ຕະ​ພັນ​ພາຍ​ໃນ​ປີ 2017 ເພີ່ມ​ຂຶ້ນ 6,83% ລາຍ​ຮັບສະເລ່ຍ​ຕໍ່​ຫົວ​ຄົນ​ບັນລຸ 2.472 ໂດ​ລາ​ສະຫະລັດ ການ​ຄຸ້ມ​ຄອງ ແລະ ການ​ບໍລິຫານ​ລັດ​ໄດ້​ຫັນເຂົ້າ​ສູ່​ລະບຽບ ແລະ ກົດໝາຍ ເຊິ່ງ​ເປັນ​ປັດ​ໄຈ​ສຳຄັນ​ປະກອບສ່ວນ​ເຂົ້າ​ໃນ​ການ​ສ້າງ​ເງື່ອນໄຂ ແລະ ສະພາບ​ແວດ​ລ້ອມ​ທີ່​ເອື້ອອຳນວຍ​ໃຫ້​ແກ່​ການ​ພັດທະນາ ກໍ່ຄືການ​ປັບປຸງ​ຊີວິດ​ການ​ເປັນ​ຢູ່ຂອງ​ປະຊາຊົນ​ໃຫ້​ດີ​ຂຶ້ນ​ຢ່າງ​ຕໍ່ເນື່ອງ ສືບຕໍ່​ນຳພາ​ປະເທດ​ຊາດ ຫຼຸດ​ພົ້ນ​ອອກ​ຈາກ​ສະຖານະ​ພາບ ດ້ອຍ​ພັດທະນາ ​ໃນ​ປີ 2020 ແລະ ກາຍເປັນ​ປະເທດ​ກຳລັງ​ພັດ​ທະນາ​ທີ່​ມີ​ລາຍ​ຮັບ​ປານ​ກາງສູງ ໃນປີ 2030.

ຄຽງ​ຄູ່​ກັນ​ນັ້ນ ປີ 2017 ຍັງເປັນ​ປີ​ທີ່​ມີ​ຄວາມ​ໝາຍ​ສຳຄັນ​ຕໍ່ປະຊາ​ຄົມ​ອາ​ຊຽນ ແລະ ​ສປປ ລາວ ເຊິ່ງ​ແມ່ນ​ປີ​ຄົບຮອບ 50 ປີ ແຫ່ງ​ການ​ສ້າງຕັ້ງ​ສະມາຄົມ​ບັນດາ​ປະຊາ​ຊາດ​ອາຊີ​ຕາເວັນ​ອອກສຽງ​ໃຕ້ ຫຼື ອາ​ຊຽນ ແລະ ເປັນປີ​ຄົບຮອບ 20 ປີ ທີ່ ​ສປປ ລາວ ເຂົ້າ​ເປັນ​ສະມາຊິກ​ອາ​ຊຽນ ຕະຫຼອດ​ໄລຍະ​ຜ່ານ​ມາ ​ສປປ ລາວ ເຫັນ​ໄດ້​ຜົນສຳເລັດ​ອັນ​ພົ້ນ​ເດັ່ນ ແລະ ໃຫຍ່​ຫຼວງ​ຂອງ​ອາ​ຊຽນ​ໃນການ​ປົກ​ປັກ​ຮັກສາ​ສັນຕິພາບຄວາມ​ໝັ້ນຄົງ ແລະ ສະຖຽນ​ລະພາບ​ຢູ່​ອາຊີ​ຕາເວັນ​ອອກສຽງ​ໃຕ້ ເຊິ່ງ​ໄດ້​ກາຍເປັນ​ເງື່ອນໄຂ​ເອື້ອ​ອຳນວຍ​ໃຫ້​ແກ່​ການ​ພັດທະນາ​ເສດຖະ​ກິດ-ສັງຄົມ​ຂອງ​ບັນດາ​ປະເທດ​ສະມາຊິກ​ອາ​ຊຽນ ແລະ ການ​ເພີ່ມ​ທະວີ​ການ​ຮ່ວມ​ມື​ພາຍໃນ​ອາ​ຊຽນ ກໍ່​ຄືການ​ສົ່ງເສີມການ​ຮ່ວມ​ມື​ກັບ​ພາຍ​ນອກ ອັນໄດ້​ນຳໄປ​ສູ່​ການ​ສ້າງຕັ້ງ​ເປັນ​ປະຊາ​ຄົມ​ອາ​ຊຽນ​ໃນ​ວັນ​ທີ 31 ທັນວາ 2015 ສະເພາະ ​ສປປ ລາວ ແມ່ນ​ມີ​ຄວາມ​ພາກພູມ​ໃຈ​ເປັນຢ່າງ​ຍິ່ງ​ ທີ່​ໄດ້​ເປັນ​ສ່ວນ​ໜຶ່ງ​ຂອງຄອບຄົວ​ອາ​ຊຽນ ເຊິ່ງ​ໃນ​ຕະຫຼອດໄລຍະ 20 ປີທີ່​ຜ່ານ​ມາ ​ສປປ ລາວ ໄດ້​ເຄື່ອນ​ໄຫວ​ວຽກ​ງານລວມ​ຂອງ​ອາ​ຊຽນ​ຢ່າງ​ຕັ້ງໜ້າ​ ໃນ​ທຸກ​ຂົງເຂດການ​ຮ່ວມ​ມື​ພາຍ​ໃຕ້ຂອບ 3 ເສົາຄ້ຳ​ປະຊາ​ຄົມ​ອາຊຽນ ແລະ ໄດ້​ປະຕິບັດ​ພັນທະຕ່າງໆ​ຂອງ​ຕົນ​ຢ່າງ​ເຕັມ​ສ່ວນ ອັນ​ໄດ້​ນຳ​ເອົາ​ຜົນ​ປະໂຫຍດ​ອັນຊອບ​ທຳ​ມາສູ່​ປະເທດ​ຊາດ ແລະ ປະຊາຊົນ​ລາວ​ຢ່າງ​ແທ້​ຈິງ.

ໃນ​ໂອກາດ​ອັນ​ສະຫງ່າ​ລາສີນີ້ ຂ້າພະເຈົ້າ​ຂໍ​ຕາງໜ້າ​ພັກ-ລັດ ແລະ ປະຊາຊົນ​ລາວ​ທັງ​ຊາດ ສະແດງ​ຄວາມ​ຂອບໃຈ​ຢ່າງ​ຈິງ​ໃຈ ແລະ ຄວາມ​ຮູ້​ບຸນຄຸນ​ຢ່າງ​ເລິກເຊິ່ງ ​ຕໍ່​ບັນດາ​ປະເທດ​ເພື່ອນ​ມິດ ແລະ ອົງ​ການຈັດຕັ້ງ​ສາກົນຕ່າງໆ ທີ່​ໄດ້​ໃຫ້ການ​ສະໜັບ​ສະໜູນ ແລະ ຊ່ວຍເຫຼືອ ​ສປປ ລາວ ໃນ​ການ​ປະຕິບັດ​ພາລະກິດ​ສ້າງສາ​ພັດທະນາ​ປະເທດ​ຊາດ ​ໃນ​ຕະຫຼອດ​ໄລຍະ​ຜ່ານ​ມາ​ຢ່າງ​ສຸດ​ອົກສຸດ​ໃຈ.

​ສປປ ລາວ ຍາມ​ໃດ​ກໍ່​ຖື​ເອົາການ​ສົ່ງເສີມ​ການທ່ອງທ່ຽວ​ເປັນຂະແໜງການ​ເສດຖະກິດ​ປາຍແຫຼມ​ໜຶ່ງ​ທີ່​ສຳຄັນ ເພື່ອ​ປະກອບສ່ວນ​ພັດທະນາ​ເສດຖະກິດ-ສັງຄົມ​ຂອງ​ປະເທດ​ຊາດ ເພື່ອ​ເປັນການ​ໂຄສະນາ​ດຶງ​ດູດ​ນັກ​ທ່ອງທ່ຽວ​ທັງ​ພາຍ​ໃນ ແລະ ຕ່າງ​ປະເທດ​ເຂົ້າ​ມາ​ທ່ອງ​ທ່ຽວ ແລະ ຢ້ຽມຢາມ ສປປ ລາວ ໃຫ້​ຫຼາຍຂຶ້ນ ເນື່ອງ​ໃນ​ໂອກາດ​ສຳຄັນ​ນີ້ ຂໍເຊີນຊວນ​ເດີນທາງ​ມາ​ທ່ອງ​ທ່ຽວລາວ ເພື່ອ​ໄດ້​ມີ​ໂອກາດ​ມາ​ສຳຜັດກັບ​ບັນຍາກາດ ເອກະລັກ ວັດທະນະ​ທຳ ຮີດຄອງ​ປະເພນີ​ອັນ​ດີງາມ ແລະ ທິວ​ທັດ​ທຳ​ມະ​ຊາດ ອັນ​ສວຍ​ສົດ​ງົດ​ງາມ​ຂອງ ສປປ ລາວ.

ຂ່າວທີ່ກ່ຽວຂ້ອງ