ສສ ນວ ຄົ້ນຄວ້າ ແລະ ພິຈາລະນາຫຼາຍບັນຫາສຳຄັນ

111 05 ທ.ວ. 2017 ຂ່າວໜ້າ​ໜຶ່ງ

ກອງ​ປະຊຸມ​ຄະນະ​ປະຈຳ​ສະພາ​ປະຊາຊົນ ນະຄອນຫຼວງ​ວຽງຈັນ (​ສສ ນວ) ປະຈຳ​ເດືອນ​ຕຸລາ 2017 ໄດ້​ດຳເນີນ​ຂຶ້ນ​ວັນ​ທີ 27 ພະຈິກ 2017 ທີ່​ສະພາ​ປະຊາຊົນ ນວ ເປັນ​ປະທານ​ຂອງ​ທ່ານ ອານຸ​ພາບ ຕຸ​ນາ​ລົມ ປະທານ​ສະພາປະຊາຊົນ ນວ ມີ​ບັນດາ​ກຳມາ​ທິການ​ເຂົ້າ​ຮ່ວມ.

ກອງ​ປະຊຸມ​ໄດ້​ພິຈາລະນາ ແລະ ປຶກສາ​ຫາລື​ກ່ຽວ​ກັບ​ຄວາມຄືບ​ໜ້າ​ຂອງ​ການ​ກະກຽມ​ດຳເນີນ​ກອງ​ປະຊຸມ​ສະໄໝ​ສາມັນເທື່ອ​ທີ 4 ເຊິ່ງ​ຈະ​ດຳເນີນ​ຂຶ້ນ​ໃນຕົ້ນ​ເດືອນ​ທັນວາ 2017 ແລະ ກອງ​ປະຊຸມ​ດັ່ງກ່າວ ​ຄາດ​ວ່າ​ຈະໄດ້​ຮັບ​ຟັງ​ການ​ລາຍ​ງານ ແລະ ພິຈາລະ​ນາ​ຮັບຮອງ​ເອົາ​ບັນຫາ​ສຳຄັນ​ຕ່າງໆ​ຂອງ​ອົງການ​ປົກຄອງ ນວ ເປັນຕົ້ນ ຮັບ​ຟັງ​ລາຍ​ງານກ່ຽວ​ກັບ​ການຈັດຕັ້ງ​ປະຕິບັດແຜນການ​ຄຸ້ມ​ຄອງ​ບໍລິຫານ ປີ 2017 ແລະ ໜ້າທີ່​ຕົ້ນຕໍ ແລະ ສຳຄັນຂອງ​ອົງການ​ປົກຄອງ ນວ ປີ 2018 ການຈັດຕັ້ງ​ປະຕິບັດແຜນ​ພັດທະນາ​ເສດຖະກິດ-ສັງຄົມ ແລະ ແຜນ​ງົບປະມານ​ປະຈຳປີ 2017 ແລະ ທິດ​ທາງ​ແຜນການປີ 2018 ຂອງ ນວ ບົດລາຍ​ງານ​ຂອງ​ອົງການ​ໄອ​ຍະການ​ປະຊາຊົນສານ​ປະຊາຊົນ ນວ ວຽກ​ງານ​ການເຄື່ອນໄຫວຂອງ​ສະພາ​ປະຊາຊົນ ແລະ ພິ​ຈາລະ​ນາ​ຮັບຮອງ​ເອົາ​ນິຕິ​ກຳ​ຂອງອົງການ​ປົກຄອງ ນວ ຈຳນວນໜຶ່ງ ພ້ອມ​ນັ້ນ ໄດ້​ຄົ້ນຄວ້າ​ພິ​ຈາລະ​ນາ​ແຜນການ​ດຳເນີນ​ກອງ​ປະຊຸມ​ປະຈຳ​ປີ 2017 ຂອງ​ຄະນະສະມາຊິກ​ສະພາ​ແຫ່ງ​ຊາດ ປະຈຳ​ເຂດ​ເລືອກ​ຕັ້ງ​ທີ 1 ນວ.

ນອກ​ນີ້ ກອງ​ປະຊຸມ​ຈະ​ໄດ້​ພິ​ຈາລະ​ນາ​ຮ່າງ​ມະຕິ​ຂອງ​ຄະນະ​ປະຈຳ​ສະພາ​ປະຊາຊົນ ນວ ວ່າ​ດ້ວຍການ​ສ້າງຕັ້ງ​ໜ່ວຍ​ສະມາຊິກ​ສະພາ​ປະຊາຊົນ ນວ ທີ່​ປະຈຳ​ເຂດເລືອກ​ຕັ້ງ​ເມືອງ ເຊິ່ງ​ມະຕິ​ດັ່ງກ່າວ​ໄດ້​ກຳນົດ​ເຂດ​ເລືອກ​ຕັ້ງເມືອງ ແລະ ຄະນະ​ໜ່ວຍ​ສະ​ມາຊິກ​ສະພາ​ປະຊາຊົນ ນວ ປະຈຳ 9 ເມືອງ ການ​ອອກ​ມະຕິ​ນີ້ ເພື່ອເປັນ​ການ​ຂະຫຍາຍ​ການ​ປະຕິບັດພາລະ​ບົດບາດ​ຂອງ​ສະມາຊິກ​ສະພາ​ປະຊາຊົນ ນວ ສູ່​ຂັ້ນ​ເມືອງ ແລະ ເພື່ອ​ຍົກ​ສູງ​ພາລະ​ບົດບາດຂອງ​ສະມາຊິກ​ສະພາ​ປະຊາຊົນປະຈຳເມືອງ ຮັບປະກັນ​ໃຫ້​ແກ່ການຈັດຕັ້ງ​ປະຕິບັດ​ວຽກ​ງານ​ຕິດຕາມ​ກວດກາ ແລະ ພິຈາລະນາບັນຫາ​ສຳຄັນ​ຂອງ ນວ ໃຫ້​ມີຄຸນະພາບ​ສູງ​ຂຶ້ນ​ກວ່າ​ເກົ່າ ນອກນີ້ ກອງ​ປະຊຸມ​ຍັງ​ໄດ້​ປຶກສາ​ຫາລືບັນຫາ​ສຳຄັນ​ຕ່າງໆ​ຂອງ​ສະພາປະຊາຊົນ​ອີກ​ຈຳນວນ​ໜຶ່ງ.

ຂ່າວທີ່ກ່ຽວຂ້ອງ