ຂ່າວຫຼ້າສຸດ

ລາວ-ຈີນ ຢຶດໝັ້ນທິດທາງການພົວພັນແບບຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ

535 14 ພ.ຈ. 2017 ຂ່າວໜ້າ​ໜຶ່ງ
ລາວ-ຈີນ ຢຶດໝັ້ນທິດທາງການພົວພັນແບບຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ

ໂດຍ​ຕອບ​ສະໜອງ​ຕາມ​ການເຊື້ອ​ເຊີນ​ຂອງ​ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກ​ປະຊາ​ຊົນປະຕິວັດ​ລາວ ປະທານ​ປະເທດ ສະຫາຍ ສີ ຈິ້ນ​ຜິງ ເລຂາທິ​ການ​ໃຫຍ່​ຄະນະ​ກຳມະການສູນ​ກາງ​ພັກ​ກອມ​ມູ​ນິດ​ຈີນ ປະທານ​ປະເທດ ແຫ່ງ ​ສປ ຈີນ ພ້ອມ​ດ້ວຍ​ຄະນະ ໄດ້​ເດີນທາງຢ້ຽມຢາມ​ທາງ​ລັດ​ຖະ​ກິດ ​ສປປ ລາວ ໃນ​ວັນ​ທີ 13-14 ພະຈິກ​ນີ້.

ພິທີ​ຕ້ອນຮັບ​ສະຫາຍ ສີ ຈິ້ນ​ຜິງ ພ້ອມ​ດ້ວຍ​ຄະນະ​ຢ່າງ​ເປັນ​ທາງການ ​ໄດ້​ຈັດ​ຂຶ້ນ​ຢ່າງ​ສົມ​ກຽດ​ທີ່​ທຳນຽບ​ປະທານ​ປະເທດ ໂດຍ​ສະຫາຍ ບຸນ​ຍັງ ວໍລະ​ຈິດ ມີ​ບັນດາສະຫາຍ​ການ​ນຳ​ຂັ້ນ​ສູງ​ພັກ-ລັດ​ເຂົ້າ​ຮ່ວມ ສະຫາຍ ບຸນ​ຍັງ ວໍລະ​ຈິດ ໄດ້​ນຳພາ​ສະຫາຍ ສີ ຈິ້ນ​ຜິງ ໄປ​ຍັງ​ແທ່ນ​ກຽດຕິຍົດ ເພື່ອ​ເຄົາລົບ​ທຸງຊາດ​ຈີນ ລາວ ຕາມ​ລຳດັບ ຕໍ່​ຈາກ​ນັ້ນ​ ສະຫາຍ ບຸນ​ຍັງ ວໍລະ​ຈິດ ແລະ ສະຫາຍ ສີ ຈິ້ນ​ຜິງ ຍ່າງ​ກວດ​ແຖວ​ທະຫານ​ກອງ​ກຽດຕິຍົດ​ກອງທັບ​ປະຊາ​ຊົນ​ລາວ ແລະ ຜູ້ນຳ​ທັງ​ສອງສະຫາຍ ​ໄດ້​ຮັບ​ການ​ແນະນຳ​ຕໍ່​ຄະນະ​ຕ້ອນຮັບ​ທາງ​ການ​ຝ່າຍ​ລາວ ແລະ ຄະນະ​ຜູ້​ແທນ​ຂັ້ນ​ສູງ​ຂອງຈີນ ໃນ​ພິທີ​ດັ່ງກ່າວ ພາຍຫຼັງ​ສຳເລັດ​ພິທີ​ຕ້ອນຮັບ​ຢ່າງ​ເປັນ​ທາງການ ສະຫາຍ ບຸນ​ຍັງ ວໍລະ​ຈິດ ແລະ ສະຫາຍ ສີ ຈິ້ນ​ຜິງ ໄດ້​ນຳພາຄະ​ນະ​ຜູ້​ແທນ​ຂັ້ນ​ສູງ​ພົບ​ປະສອງ​ຝ່າຍ ຈັດ​ຂຶ້ນ​ຢູ່​ຫ້ອງ​ປະຊຸມທຳ​ນຽບ​ປະທານ​ປະເທດ ການຢ້ຽມຢາມ​ທາງ​ລັດ​ຖະ​ກິດ ​ສປປ ລາວ ຂອງ​ສະຫາຍ ສີ ຈິ້ນ​ຜິ້ງ ຄັ້ງນີ້ ເປັນ​ຂີດ​ໝາຍ​ປະຫວັດສາດສຳຄັນ​ແຫ່ງ​ການ​ຮັດ​ແໜ້ນ​ສາຍພົວພັນ ແລະ ເສີມ​ຂະຫຍາຍການ​ເປັນ​ຄູ່​ຮ່ວມ​ຍຸດ​ທະ​ສາດ ​ຮອບດ້ານ​ໝັ້ນຄົງ​ຍາວ​ນານ​ຕາມ​ທິດ 4 ດີ ທີ່​ມີ​ມູນເຊື້ອ​ແຫ່ງ​ມິດ​ຕະພາບ ແລະ ການ​ຮ່ວມ​ມື​ອັນ​ໜັກແໜ້ນ​ຍາວ​ນານ​ມາ​ແລ້ວ​ນັ້ນ ​ໃຫ້ສືບຕໍ່​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ.

ການ​ພົບ​ປະ​ຄັ້ງ​ນີ້ ສະຫາຍ ບຸນ​ຍັງ ວໍລະ​ຈິດ ໄດ້​ກ່າວ​ສະແດງຄວາມ​ຍິນ​ດີ​ຕ້ອນຮັບ​ສະຫາຍ ສີ ຈິ້ນ​ຜິງ ພ້ອມ​ດ້ວຍ​ຄະນະ ດ້ວຍໄມຕີ​ຈິດ​ມິດຕະພາບ​ອັນ​ອົບ​ອຸ່ນ ແລະ ສະແດງ​ຄວາມ​ປິ​ຕິ​ຊົມຊື່ນເປັນ​ຢ່າງ​ຍິ່ງ ​ທີ່​ໄດ້​ພົບ​ປະ​ກັບ​ສະຫາຍ ສີ ຈິ້ນ​ຜິງ ທີ່​ໄດ້​ນຳພາ​ຄະນະ​ຜູ້​ແທນ​ຂັ້ນ​ສູງ​ພັກ-ລັດ ມາຢ້ຽມຢາມ​ທາງ​ລັດ​ຖະ​ກິດ ​ສປປ ລາວ ພາຍຫຼັງ​ທີ່​ພັກ​ກອມ​ມູ​ນິດຈີນ​ຫາກໍ່​ສຳເລັດ​ກອງ​ປະຊຸມ​ໃຫຍ່ ​ຄັ້ງ​ທີ 19 ຂອງ​ພັກ​ຢ່າງ​ສະຫງ່າງາມ ແລະ ໃນ​ບັນຍາກາດ​ທີ່ການ​ພົວພັນ​ມິດຕະພາບ​ທີ່​ເປັນມູນເຊື້ອ​ອັນ​ດີງາມ ແລະ ແບບ​ຄູ່ຮ່ວມ​ຍຸດ​ທະ​ສາດ​ຮອບດ້ານ​ລາວ-ຈີນ ພວມ​ຢູ່​ໃນ​ໄລຍະ​ທີ່​ໄດ້​ຮັບການ​ເສີມ​ຂະຫຍາຍ​ຢ່າງ​ຕັ້ງໜ້າ ພ້ອມ​ດຽວ​ກັນ​ນີ້​ສະຫາຍ ບຸນ​ຍັງ ວໍລະ​ຈິດ ໄດ້​ສະແດງ​ຄວາມ​ຊົມເຊີຍ ແລະ ອວຍພອນ​ໄຊ​ຢ່າງ​ຈິງໃຈ​ຕໍ່​ສະຫາຍ ສີ ຈິ້ນ​ຜິງ ທີ່​ໄດ້​ຮັບການ​ເລືອກ​ຕັ້ງ​ເປັນ​ເລຂາທິການໃຫຍ່​ ຄະນະ​ກຳມະການ​ສູນ​ກາງພັກ​ກອມ​ມູ​ນິດ​ຈີນ​ອີກ​ສະໄໝ​ໜຶ່ງ ເຊິ່ງ​ເປັນ​ການສະແດງ​ໃຫ້​ເຫັນຄວາມ​ໄວ້​ວາງໃຈ ຄວາມ​ເຊື່ອ​ໝັ້ນ​ຢ່າງ​ສູງ​ຂອງ​ທົ່ວ​ພັກ​ທີ່​ມີ​ຕໍ່​ສະຫາຍ ​ເຊິ່ງ​ເປັນ​ຜູ້​ມີ​ປະສົບ​ການ​ໃນການ​ນຳພາ​ອັນ​ໂດດ​ເດັ່ນ​ໃນ​ໄລຍະ 5 ປີ​ທີ່​ຜ່ານ​ມາ ໃນ​ການ​ສ້າງສາ​ພັດທະນາ​ຕາມ​ທິດ​ສັງຄົມ​ນິຍົມ ຕາມ​ສີສັນ​ພິເສດ​ຂອງ​ຈີນ ແລະ ໄດ້​ຮັບ​ຜົນສຳເລັດ​ຢ່າງ​ສູງ ແລະ ແບບ​ກະໂດດ​ຂັ້ນ​ເປັນ​ທີ່​ປະຈັກ​ຕາ​ຕໍ່​ສາກົນ ສະຫາຍ ບຸນ​ຍັງ ວໍລະ​ຈິດ ໄດ້​ຕີ​ລາຄາ​ສູງ​ຕໍ່​ການມາ​ຢ້ຽມຢາມ ​ສປປ ລາວ ຂອງສະຫາຍ ສີ ຈິ້ນ​ຜິງ ເຊິ່ງ​ເປັນ​ການສະແດງ​ເຖິງ​ຄວາມ​ເອົາໃຈໃສ່ ແລະ ໃຫ້​ຄວາມ​ສຳຄັນ​ຂອງ​ພັກກອມ​ມູ​ນິດ​ຈີນ ລັດຖະບານ​ຈີນ ຕໍ່​ສາຍ​ພົວພັນ​ມິດຕະພາບ​ທີ່​ເປັນມູນເຊື້ອ ແລະ ແບບ​ຄູ່​ຮ່ວມ​ຍຸດທະ​ສາດ​ຮອບດ້ານ ໝັ້ນຄົງ ຍາວນານ ລະຫວ່າງ 2 ພັກ 2 ລັດ ແລະ ປະຊາຊົນ 2 ຊາດ ເຊິ່ງ​ເປັນການ​ນຳ​ເອົາ​ສາຍ​ພົວພັນ​ດັ່ງກ່າວ ກ້າວ​ສູ່​ລະດັບ​ສູງ​ອັນ​ໃໝ່ ແລະ ສະແດງ​ຄວາມ​ເຊື່ອ​ໝັ້ນ​ວ່າການຢ້ຽມຢາມ​ຄັ້ງ​ນີ້ ​ຈະ​ເປັນ​ໂອກາດ​ດີທີ່​ສຸດ​ໃຫ້​ແກ່​ການ​ນຳ​ຂັ້ນ​ສູງ​ຂອງ 2 ປະເທດ​ລາວ-ຈີນ ເພື່ອ​ຮ່ວມກັນ​ຕີ​ລາຄາ​ກ່ຽວ​ກັບ​ການ​ພົວພັນຮ່ວມ​ມື​ສອງ​ຝ່າຍ​ໃນ​ໄລຍະ​ຜ່ານມາ ແລະ ປືກ​ສາ​ຫາລື​ກ່ຽວ​ກັບທິດ​ທາງ​ການ​ຮ່ວມ​ມື​ໃນຕໍ່ໜ້າ​ໃນການ​ເປັນ​ຄູ່​ຮ່ວມ​ຊາຕາກຳ ລະຫວ່າງ​ສອງ​ພັກ ສອງ​ລັດ ຢູ່​ໃນ​ສະພາບ​ການ​ໃໝ່.

ສະຫາຍ ບຸນ​ຍັງ ວໍລະ​ຈິດ ໄດ້​ຕາງໜ້າ​ໃຫ້​ພັກ-ລັດ ແລະ ປະຊາ​ຊົນ​ລາວ​ບັນດາເຜົ່າ​ສະແດງຄວາມ​ຮູ້​ບຸນຄຸນ ແລະ ຂອບ​ອົກຂອບໃຈ​ຕໍ່​ພັກ-ລັດ ແລະ ປະຊາຊົນ​ຈີນ ທີ່​ໄດ້​ໃຫ້ການ​ຊ່ວຍເຫຼືອອັນ​ລ້ຳ​ຄ່າ ໃຫ້ການ​ສະໜັບ​ສະໜູນ​ອັນ​ໃຫຍ່​ຫຼວງ​ແກ່​ປະຊາຊົນລາວ​ ໃນ​ພາລະກິດ​ຕໍ່ສູ້ ເພື່ອ​ຍາດເອົາ​ເອກະລາດ​ແຫ່ງ​ຊາດ ແລະ ໃນ​ການ​ປົກ​ປັກ​ຮັກສາ ແລະ ສ້າງສາ ສປປ ລາວ ໃນ​ປັດຈຸບັນ.

ໂອກາດ​ດຽວ​ກັນ​ນີ້​ສະຫາຍ ສີ ຈິ້ນ​ຜິງ ໄດ້​ກ່າວ​ສະແດງ​ຄວາມຂອບ​ອົກ​ຂອບໃຈ ​ຕໍ່​ການ​ຕ້ອນຮັບຄະນະ​ຜູ້​ແທນ​ຂັ້ນ​ສູງ​ພັກ-ລັດ ​ສປ ຈີນ ຢ່າງ​ອົບ​ອຸ່ນ​ເຕັມ​ໄປ​ດ້ວຍ​ໄມຕີ​ຈິດ​ມິດຕະພາບ​ທີ່​ສະໜິດ​ສະໜົມ​ຂອງ​ສະຫາຍ ບຸນ​ຍັງ ວໍລະຈິດ ແລະ ການ​ນຳ​ຂັ້ນ​ສູງ​ຂອງລາວ ພ້ອມ​ດ້ວຍ​ມວນ​ຊົນ​ຊາວນະຄອນຫຼວງ​ວຽງ​ຈັນ​ຢ່າງ​ຫຼວງຫຼາຍ ແລະ ໄດ້​ກ່າວ​ສະແດງຄວາມ​ປິ​ຕິ​ຍິນ​ດີ​ເປັນ​ຢ່າງ​ຍິ່ງ ​ທີ່​ໄດ້ນຳພາ​ຄະນະ​ຜູ້​ແທນ​ຂັ້ນ​ສູງ​ພັກ-ລັດ ​ສປ ຈີນ ເດີນທາງ​ມາ​ຢ້ຽມຢາມ​ທາງ​ລັດ​ຖະ​ກິດ ​ສປປ ລາວ ເປັນ​ຄັ້ງ​ທຳ​ອິດ ​ໃນ​ຖານະເປັນ​ເລຂາທິການ​ໃຫຍ່​ອີກ​ຄັ້ງໃໝ່​ ໃນ​ກອງ​ປະຊຸມ​ໃຫຍ່​ຄັ້ງ​ທີ 19 ຂອງ​ພັກ​ກອມ​ມູ​ນິດ​ຈີນ ເຊິ່ງ​ເປັນການສະແດງ​ໃຫ້​ເຫັນ​ເຖິງ​ການໃຫ້​ຄວາມ​ສຳຄັນ ແລະ ເອົາໃຈໃສ່​ຕໍ່​ການ​ຊຸກຍູ້​ສົ່ງເສີມ​ສາຍ​ພົວພັນ​ມິດຕະພາບ​ອັນ​ເປັນ​ມູນເຊື້ອ ແລະ ແບບ​ຄູ່​ຮ່ວມ​ຍຸດ​ທະ​ສາດຮອບດ້ານ ໝັ້ນຄົງ ຍາວ​ນານ ຕາມ​ທິດ 4 ດີ ລະຫວ່າງ​ສອງພັກ ສອງ​ລັດ ແລະ ປະຊາຊົນສອງ​ຊາດ​ລາວ-ຈີນ ທີ່​ນັບ​ມື້​ນັບໄດ້​ຮັບ​ການ​ເສີມ​ຂະຫຍາຍ​ແຕກດອກ​ອອກ​ຜົນ​ຍິ່ງ​ຂຶ້ນ​ຕະຫຼອດ​ມາ ພ້ອມ​ດຽວ​ກັນ​ນັ້ນ​ສະຫາຍ ສີ ຈິ້ນ​ຜິງ ໄດ້​ຊົມເຊີຍ​ປະຊາຊົນລາວ​ອ້າຍ​ນ້ອງ ​ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນປະຕິວັດລາວ ໂດຍ​ມີ​ສະຫາຍ ບຸນ​ຍັງ ວໍລະ​ຈິດ ເປັນ​ຜູ້ນຳ​ໜ້າທີ່​ຍາດ​ໄດ້ຜົນສຳເລັດ​ອັນ​ໃຫຍ່​ ໃນ​ການ​ພັດທະ​ນາ​ເສດຖະກິດ-ສັງຄົມ ໃນ​ໄລຍະ​ຜ່ານ​ມາ ແລະ ໄດ້​ຢືນຢັນ​ວ່າ ​ສປ ຈີນ ຈະ​ຮ່ວມ​ກັບ ​ສປປ ລາວ ສືບຕໍ່​ເພີ່ມ​ພູນ​ຄູນ​ສ້າງ​ສາຍ​ພົວພັນ ແລະ ຮ່ວມ​ມື​ດັ່ງກ່າວ​ໃຫ້​ນັບມື້​ເກີດ​ດອກ​ອອກ​ຜົນ​ຢ່າງ​ບໍ່​ຢຸດຢັ້ງ.

ສອງ​ຝ່າຍ​ໄດ້​ຮ່ວມ​ກັນ​ທົບ​ທວນຄືນ ແລະ ຕີ​ລາຄາ​ສູງ​ກ່ຽວ​ກັບການ​ພົວພັນ​ຮ່ວມ​ມື​ສອງ​ຝ່າຍ​ໃນໄລຍະ​ຜ່ານ​ມາ ເຊິ່ງ​ໄດ້​ຮັບ​ການເສີມ​ຂະຫຍາຍ​ທັງ​ທາງ​ກວ້າງ ແລະ ລວງ​ເລິກ ປະເທດ​ບ້ານ​ໃກ້ເຮືອນ​ຄຽງ​ທີ່​ດີ ລາວ-ຈີນ ລ້ວນແຕ່​ເປັນ​ປະເທດ​ສັງຄົມ​ນິຍົມ​ທີ່​ມີພັກ​ກອມ​ມູ​ນິດ​ນຳພາ ມີ​ອຸດົມການ ລະບອບ​ການເມືອງ ເສັ້ນທາງ​ແຫ່ງ​ການ​ພັດທະນາ​ທີ່​ຄ້າຍກັນ ສອງ​ຝ່າຍ​ໄດ້​ຢຶດ​ໝັ້ນ​ທິດ​ທາງການ​ພົວພັນ​ແບບ​ຄູ່​ຮ່ວມ​ຍຸດ​ທະສາດ​ຮອບດ້ານ ໝັ້ນຄົງ ຍາວນານ ຕາມ​ທິດ 4 ດີ ເປັນ​ຄູ່​ຮ່ວມຊາຕາກຳ​ສັງຄົມ​ນິຍົມ​ລາວ-ຈີນ ທີ່​ບໍ່​ສາມາດ​ຕັດ​ແຍກ​ອອກ​ຈາກກັນ​ໄດ້ ການ​ພົວພັນ​ດ້ານ​ການເມືອງ​ໄດ້​ມີ​ການ​ເສີມ​ຂະຫຍາຍເປັນ​ຢ່າງ​ດີ ແລະ ໄດ້​ເປັນ​ພື້ນຖານອັນ​ດີ​ໃຫ້​ແກ່​ການ​ເສີມ​ຂະຫຍາຍສາຍ​ພົວພັນ​ສອງ​ຝ່າຍ​ໃນ​ດ້ານຕ່າງໆ ການ​ພົວພັນ​ຮ່ວມ​ມື​ດ້ານທິດ​ສະ​ດີ ບົດຮຽນ​ການ​ປົກຄອງລັດ-ບໍລິຫານ​ປະເທດ ການ​ກໍ່ສ້າງ​ພັກ ການ​ຮ່ວມ​ມື​ດ້ານ​ເສດຖະ​ກິດ ການ​ຄ້າ-ການ​ລົງທຶນ ແລະ ອື່ນໆ ນັບ​ມື້​ມີ​ບາດກ້າວ​ຂະຫຍາຍ​ຕົວ​ໄປ​ສູ່​ຄຸນະພາບ​ໃໝ່ ພວມ​ນຳ​ຜົນ​ປະໂຫຍດ​ຕົວ​ຈິງ​ໃຫ້ແກ່​ປະຊາຊົນ​ສອງ​ຊາດ​ລາວ-ຈີນ ພ້ອມ​ດຽວ​ກັນ​ນີ້ ​ສອງ​ຝ່າຍ​ເຫັນ​ດີສືບຕໍ່​ຮັກສາ​ກົນ​ໄກ​ການ​ແລກປ່ຽນ​ການ​ຢ້ຽມຢາມ ລະຫວ່າງການ​ນຳ​ຂັ້ນ​ສູງ​ລະຫວ່າງ 2 ພັກ ແລະ 2 ລັດຢ່າງ​ເປັນ​ປົກກະຕິ ເອົາໃຈໃສ່​ເສີມ​ຂະຫຍາຍ​ກົນ​ໄກການ​ຮ່ວມ​ມື​ຂອງ​ສອງ​ຝ່າຍ ​ທີ່​ມີໃນ​ປັດຈຸບັນ​ໃຫ້​ມີ​ປະ​ສິດທິ​ຜົນກວ່າ​ເກົ່າ ສືບຕໍ່​ສ້າງ​ຄູ່​ຮ່ວມ​ຊາຕາ​ກຳ​ທີ່​ຕັດ​ແຍກ​ອອກ​ຈາກ​ກັນ​ບໍ່ໄດ້ ສືບຕໍ່​ຈັດ​ຕັ້ງ​ຜັນ​ຂະຫຍາຍແຜນການ​ຮ່ວມ​ມື 2 ພັກ ໄລຍະສົກ​ປີ 2016-2020 ໃນ​ການ​ກໍ່ສ້າງ​ພະນັກງານ​ນຳພາ​ຄຸ້ມ​ຄອງຂອງ​ພັກ-ລັດ​ລາວ​ຢູ່​ຈີນ ສືບຕໍ່ເພີ່ມ​ທະວີ​ການ​ຮ່ວມ​ມື ເພື່ອ​ເຊື່ອມໂຍງ​ຍຸດ​ທະ​ສາດ “ການ​ຫັນ​ປະເທດ​ບໍ່​ມີ​ຊາຍ​ແດນ​ຕິດ​ກັບ​ທະເລ ເປັນ​ປະເທດ​ທາງ​ຜ່ານ​ເຊື່ອມ​ໂຍງເຊື່ອມ​ຈອດ” ຂອງ​ລາວ ​ເຂົ້າ​ກັບຍຸດ​ທະ​ສາດ “ໜຶ່ງ​ແລວ​ທາງ​ໜຶ່ງເສັ້ນທາງ” ຂອງ​ຈີນ ເພື່ອ​ນຳ​ເອົາຜົນ​ປະໂຫຍດ​ຕົວ​ຈິງ​ມາສູ່​ປະຊາຊົນ 2 ຊາດ.

ພາຍຫຼັງ​ການ​ພົບ​ປະ​ສອງຝ່າຍ ສະຫາຍ ບຸນ​ຍັງ ວໍລະ​ຈິດ ແລະ ສະຫາຍ ສີ ຈິ້ນ​ຜິງ ໄດ້​ເປັນສັກຂີ​ພິຍານ​ໃນ​ການ​ລົງ​ນາມ​ບັນດາ​ເອກະສານ​ການ​ຮ່ວມ​ມື ຈຳນວນ 17 ສະບັບ​ຄື: ສັນຍາ​ການຮ່ວມ​ມືລະຫວ່າງກະຊວງ​ການຕ່າງປະເທດ​ລາວ ແລະ ກະຊວງການ​ຕ່າງປະເທດ​ຈີນ ກ່ຽວ​ກັບການ​ເພີ່ມ​ທະວີ​ການ​ຮ່ວມ​ມື​ໃນ​ສະພາບ​ການ​ໃໝ່ ບົດ​ບັນທຶກ​ຄວາມເຂົ້າໃຈ​ວ່າ​ດ້ວຍ​ການ​ຮ່ວມ​ກັນ​ກໍ່ສ້າງ​ແລວ​ທາງ​ເສດຖະກິດ​ລາວ-ຈີນ ບົດ​ບັນທຶກ​ຄວາມ​ເຂົ້າໃຈວ່າ​ດ້ວຍ​ການ​ເພີ່ມ​ທະວີ​ການ​ພັດທະ​ນາ​ເສັ້ນທາງ​ສາຍໄໝ ​ດີ​ຈີ​ຕອນ​ຂໍ້​ມູນ​ຂ່າວສານ ເພື່ອ​ຊຸກຍູ້​ການເຊື່ອມ​ຈອດ​ຂໍ້​ມູນ​ຂ່າວສານ ສັນຍາ​ວ່າ​ດ້ວຍ​ການ​ຮ່ວມ​ມື​ດ້ານ​ວິ​​ທະ​ຍາ​ສາດ ແລະ ເຕັກ​ໂນ​ໂລ​ຊີ ບົດ​ບັນທຶກ​ຄວາມ​ເຂົ້າໃຈ​ວ່າ​ດ້ວຍ​ການຈັດຕັ້ງ​ປະຕິບັດ​ຮ່ວມ​ໂຄງການ​ໂຕ​ແບບ ​ໃນ​ການ​ສ້າງ​ສູນ​ຂໍ້ມູນ​ຂ່າວສານ​ຊັບພະຍາກອນ​ນ້ຳແຫ່ງ​ຊາດ ແລະ ການ​ສ້າງ​ແຜນແມ່​ບົດ​ການ​ຄຸ້ມ​ຄອງ​ອ່າງ​ຮັບ​ນ້ຳ​ອູ ແລະ ນ້ຳ​ເທີນ-ນ້ຳ​ກະດິງ ບົດບັນທຶກ​ຄວາມ​ເຂົ້າໃຈ​ວ່າ​ດ້ວຍການ​ຮ່ວມ​ກັນ​ຊຸກຍູ້​ສ້າງ​ເຂດ​ຕົວແບບ​ພັດທະນາ​ກະສິກຳ​ຄົບ​ວົງຈອນ​ທີ່​ທັນ​ສະໄໝ ບົດ​ບັນທຶກຄວາມ​ເຂົ້າໃຈ​ກ່ຽວ​ກັບ​ການ​ເພີ່ມທະວີ​ການ​ຮ່ວມ​ມື​ໃນ​ຂົງເຂດ​ພື້ນຖານ​ໂຄງ​ລ່າງ ບົດ​ບັນທຶກ​ຄວາມເຂົ້າໃຈວ່າ​ດ້ວຍ​ການ​ຮ່ວມ​ມືດ້ານ​ການ​ຊ່ວຍເຫຼືອ​ໃນ 3 ປີ​ຕໍ່ໜ້າ ບົດ​ບັນທຶກ​ຄວາມ​ເຂົ້າໃຈ​ວ່າດ້ວຍ​ການ​ຮ່ວມ​ມື​ດ້ານ​ພັດທະນາຊັບພະຍາກອນ​ມະນຸດ ສານ​ແລກປ່ຽນ​ວ່າ​ດ້ວຍ​ຝ່າຍ​ຈີນ​ເຫັນ​ດີ​ກຳນົດ​ເອົາ​ໂຄງການ​ປັບປຸງ ແລະ ຍົກ​ລະດັບ​ລະບົບ ICT ຂອງ​ກະຊວງ​ອຸດສາຫະກຳ ແລະ ການ​ຄ້າລາວ ສັນຍາ​ຂອບ​ສະໜອງ​ເງິນກູ້​ພິເສດ​ໃຫ້​ແກ່​ລາວ ເພື່ອ​ຈັດ​ຕັ້ງປະຕິບັດ​ໂຄງການ​ເຂື່ອນ​ໄຟຟ້າຫ້ວຍ​ປາ​ຫຼາຍ ບົດ​ບັນທຶກ​ຄວາມເຂົ້າໃຈ​ການ​ສ້າງ​ຄູ່​ຮ່ວມ​ມື​ຍຸດ​ທະສາດ​ດ້ານ​ການ​ຮ່ວມ​ມື​ໄຟຟ້າ ບົດ​ບັນທຶກ​ຄວາມ​ເຂົ້າໃຈ​ວ່າ​ດ້ວຍການ​ຮ່ວມ​ມື​ທາງ​ດ້ານ​ການ​ເງິນ ເພື່ອ​ສົ່ງເສີມ​ວິ​ສາ​ຫະ​ກິດ​ຂະໜາດນ້ອຍ ແລະ ກາງ ໃນ​ລາວ ສັນຍາເງິນ​ກູ້​ພິເສດ​ດອກ​ເບ້ຍ​ຕ່ຳ​ໂຄງການ​ເຂື່ອນ​ໄຟຟ້າ​ຫ້ວຍ​ປາ​ຫຼາຍ ສັນຍາ​ເງິນ​ກູ້​ທຸລະ​ກິດ​ໂຄງການສາຍ​ສົ່ງ 115 (ກິ​ໂລ​ໂວນ) ຊຽງຮ່ອນ-ຫົງ​ສາ ສັນຍາ​ຮ່ວມ​ທຶນສ້າງ​ໂຄງການ​ກໍ່ສ້າງ​ທາງ​ດ່ວນນະຄອນຫຼວງ​ວຽງ​ຈັນຫາ​ບໍ່​ເຕັນ ຕອນ​ທີ I ນະຄອນຫຼວງ​ວຽງ​ຈັນຫາວັງ​ວຽງ ສັນຍາ​ເງິນ​ກູ້​ທຸລະກິດ​ໂຄງການ​ສາຍ​ສົ່ງ 500/230 KV ອ້ອມ​ນະຄອນຫຼວງ​ວຽງ​ຈັນ.

​ສປ ຈີນ ແຈ້ງ​ໃຫ້ການ​ຊ່ວຍເຫຼືອ ສປປ ລາວ 4 ຕື້​ຢວນ ໃນ​ໄລຍະ 3 ປີ​ຕໍ່ໜ້າ ພ້ອມ​ທັງ​ໃຫ້ການຊ່ວຍເຫຼືອ​ປັບປຸງ​ຊີວິດ​ການ​ເປັນ​ຢູ່ຂອງ​ປະຊາຊົນ​ລາວ​ໃນ 8 ໂຄງການ​ໃໝ່ ພ້ອມ​ດຽວ​ກັນ​ນີ້ ສະຫາຍ ສີ ຈິ້ນ​ຜິງ ໄດ້​ເຊື້ອ​ເຊີນສະຫາຍ ບຸນ​ຍັງ ວໍລະ​ຈິດ ຢ້ຽມຢາມ ສປ ຈີນ ໃນ​ເວລາ​ເໝາະ​ສົມ​ໃນ​ປີໜ້າ.

ໃນ​ຕອນ​ຄ່ຳ​ວັນ​ດຽວ​ກັນ ສະຫາຍ ບຸນ​ຍັງ ວໍລະ​ຈິດ ໄດ້​ເປັນເຈົ້າພາບ​ຈັດ​ງານ​ລ້ຽງ​ຕ້ອນຮັບເປັນ​ກຽດ​ແດ່​ສະຫາຍ ສີ ຈິ້ນ​ຜິງ ພ້ອມ​ດ້ວຍ​ຄະນະ ​ທີ່​ທຳ​ນຽບ​ປະທານ​ປະເທດ ໂດຍ​ມີ​ບັນດາ​ການນຳ​ຂັ້ນ​ສູງ​ພັກ-ລັດ ​ສປ ຈີນ ແລະ ​ສປປ ລາວ ເຂົ້າ​ຮ່ວມ.

ຂ່າວທີ່ກ່ຽວຂ້ອງ