ຂ່າວຫຼ້າສຸດ

ມອບເງິນຊ່ວຍເຫຼືອຜູ້ປະສົບໄພນ້ຳຖ້ວມ ຢູ່ຫວຽດນາມ

347 14 ພ.ຈ. 2017 ຂ່າວໜ້າ​ໜຶ່ງ
ມອບເງິນຊ່ວຍເຫຼືອຜູ້ປະສົບໄພນ້ຳຖ້ວມ ຢູ່ຫວຽດນາມ

ສະມາຄົມ​ມິດຕະພາບ ລາວ-ຫວຽດນາມ ຂັ້ນ​ສູນ​ກາງ ແລະ ຄະນະ​ພົວພັນ​ຕ່າງປະເທດ​ສູນກາງ​ພັກ ໄດ້​ມອບ​ເງິນ​ຈຳນວນ 100 ລ້ານ​ກີບ ໃຫ້​ແກ່​ສະຖານທູດ ​ສສ ຫວຽດນາມ ປະຈຳ​ລາວ ເພື່ອ​ນຳໄປ​ປະກອບສ່ວນ​ເຂົ້າ​ໃນການ​ຊຸກຍູ້​ຊ່ວຍເຫຼືອ​ແກ່​ປະຊາຊົນ ຜູ້​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳຖ້ວມຢູ່ຫວຽດນາມ ໃນ​ວັນ​ທີ 10 ພະຈິກ 2017 ທີ່​ຄະນະ​ພົວພັນຕ່າງປະເທດ​ສູນ​ກາງ​ພັກ ຕາງໜ້າ​ກ່າວ​ມອບ​ໂດຍ​ທ່ານ ສົມ​ດີ ບຸນ​ຄຸ້ມ ຮອງ​ຫົວໜ້າ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ ແລະ ຮັບ​ໂດຍ​ທ່ານ ຫງວຽນ ບ໋າ ຮຸ່ງ ເອກ​ອັກ​ຄະ​ລັດ​ຖະ​ທູດ ​ສສ ຫວຽດນາມ ປະຈຳ​ລາວ ມີ​ພະນັກ​ງານ-ວິຊາ​ການ​ກ່ຽວຂ້ອງສອງ​ຝ່າຍ​ເຂົ້າ​ຮ່ວມ.

ທ່ານ ສົມ​ດີ ບຸນ​ຄຸ້ມ ໄດ້​ກ່າວວ່າ: ປະຊາຊົນ​ສອງ​ຊາດ ລາວ-ຫວຽດນາມ ແລະ ຫວຽດນາມ-ລາວ ແມ່ນ​ມີ​ມູນເຊື້ອ​ສາຍ​ພົວພັນ​ມິດຕະພາບ ຄວາມ​ສາມັກຄີພິເສດ ແລະ ການ​ຮ່ວມ​ມື​ຮອບດ້ານ ຖານ​ມິດ​ອ້າຍ​ນ້ອງ​ມາ​ແຕ່ດົນ​ນານ ຕະຫຼອດ​ໄລຍະ​ທີ່​ຫວຽດນາມ​ປະສົບ​ໄພພິບັດ​ທາງ​ທຳ​ມະຊາດ ພັກ ລັດ ແລະ ປະຊາຊົນລາວ ກໍ່​ໄດ້​ຕິດຕາມ​ຢ່າງ​ໃກ້ຊິດ ແລະ ໃຫ້​ຄວາມ​ສຳຄັນ​ໃນ​ການຊ່ວຍເຫຼືອ​ຕະຫຼອດ​ມາ ດັ່ງນັ້ນ ການ​ຊ່ວຍເຫຼືອ​ຄັ້ງ​ນີ້ ແມ່ນ​ໄດ້ຈາກ​ຄະນະ​ສະມາຄົມ​ມິດ​ຕະພາບ ລາວ-ຫວຽດນາມ ທີ່​ໄດ້​ປຸກລະດົມ​ຂົນຂວາຍ​ປະຊາຊົນ​ລາວ ເພື່ອ​ຊ່ວຍ​ປະຊາຊົນ​ຫວຽດນາມໃນ​ເບື້ອງ​ຕົ້ນ ແລະ ຕໍ່ໜ້າ​ພວກເຮົາ​ຈະ​ສືບຕໍ່​ຊ່ວຍເຫຼືອ​ປະຊາຊົນຫວຽດນາມ ເຖິງ​ແມ່ນ​ວ່າ​ຈະ​ມີຈຳນວນ​ບໍ່​ຫຼາຍ ອາດ​ຊ່ວຍ​ບໍ່​ໄດ້ທົ່ວ​ເຖິງ​ແຕ່​ເປັນ​ນ້ຳໃຈ​ຂອງ​ປະຊາຊົນ​ລາວ ​ທີ່​ຢາກ​ຊ່ວຍເຫຼືອ​ປະຊາຊົນ​ຫວຽດນາມ​ຢ່າງ​ຈິງ​ໃຈ ແລະ ປະຊາຊົນ​ລາວ ຫວັງ​ວ່າ​ຈະ​ຊ່ວຍເຫຼືອ​ບັນເທົາ​ທຸກ​ໃຫ້​ແກ່​ປະຊາຊົນ ຜູ້​ທີ່​ໄດ້​ຮັບ​ຜົນ​ກະທົບ​ຈຳນວນ​ໜຶ່ງ.

ຂ່າວທີ່ກ່ຽວຂ້ອງ