ຂ່າວຫຼ້າສຸດ

ສະມາຄົມເຟີນີເຈີລາວ ເປັນເຈົ້າພາບຈັດກອງປະຊຸມ AFIC

376 13 ພ.ຈ. 2017 ຂ່າວໜ້າ​ໜຶ່ງ
ສະມາຄົມເຟີນີເຈີລາວ ເປັນເຈົ້າພາບຈັດກອງປະຊຸມ AFIC

ສະມາຄົມ​ເຟີ​ນີ​ເຈີ​ລາວ (LFA) ເປັນ​ເຈົ້າພາບ​ຈັດ​ກອງ​ປະຊຸມ​ສະພາ​ອຸດສາຫະກຳ​ເຟີ​ນີ​ເຈີ​ອາ​ຊຽນ (AFIC) ຄັ້ງ​ທີ 35 ຄັ້ງ​ວັນ​ທີ 10-11 ພະຈິກ 2017 ທີ່​ໂຮງແຮມລາວ​ພລາ​ຊາ ໂດຍ​ມີ​ທ່ານ ທອງພັດ ວົງ​ມະນີ ຮອງ​ລັດຖະມົນຕີກະຊວງ​ກະສິກຳ ແລະ ປ່າໄມ້ ທ່ານ ອຸ​ເດດ ສຸວັນນະ​ວົງ ປະທານ​ສະພາ​ການ​ຄ້າ ແລະ ອຸດສາ​ຫະ​ກຳ​ແຫ່ງ​ຊາດ​ລາວ ທ່ານ ກໍ​ກໍ​ວິນ ປະທານ AFIC ທ່ານ ຄຳ​ໄພ ສົມ​ຊະນະປະທານ LFA ພ້ອມ​ດ້ວຍ​ຄະນະ​ບໍລິຫານ​ງານສະມາຄົມ​ເຟີ​ນີ​ເຈີ ປະເທດ​ສະ​ມາຊິກ ແລະ ແຂກ​ຖືກ​ເຊີນ​ທັງ​ພາຍໃນ ແລະ ຕ່າງປະເທດ​ເຂົ້າ​ຮ່ວມ.

ທ່ານ ຄຳ​ໄພ ສົມ​ຊະນະ ກ່າວວ່າ: AFIC ສ້າງຕັ້ງ​ຂຶ້ນ​ປີ 1978 ເປັນ​ສະມາຄົມ​ທີ່​ມີ​ຊື່​ສຽງ​ສົມຄວນ​ໃນ​ພາກ​ພື້ນ ແລະ ສາກົນ ປັດຈຸບັນມີ​ສະມາຊິກ 8 ສະ​ມາຄົມ​ຈາກ​ປະເທດ​ສະມາຊິກ​ອາຊຽນ ລວມ​ທັງ LFA ເຊິ່ງ​ເປັນ​ສະມາ​ຄົມ​ໜຶ່ງ​ທີ່​ຕາງໜ້າ​ໃຫ້ ​ສປປ ລາວ ເປັນ​ສະມາຊິກ AFIC ແຕ່ປີ 2014 ເປັນຕົ້ນ​ມາ ກອງ​ປະຊຸມຄັ້ງ​ນີ້ແມ່ນ​ເປັນ​ຄັ້ງ​ປະຫວັດສາດທີ່ LFA ໄດ້​ຮັບ​ກຽດ​ເປັນ​ເຈົ້າພາບ​ໃນ​ສະໄໝ​ຂອງ​ຄະນະ​ບໍ​ລິຫານ​ງານ LFA ຊຸດ​ທີ III ເຊິ່ງຂ້າພະເຈົ້າ​ເປັນ​ປະທານ ເປັນກອງ​ປະຊຸມ​ທີ່​ມີ​ຄວາມ​ໝາຍ​ສຳຄັນ​ຫຼາຍ ​ສຳລັບ​ຫົວໜ່ວຍ​ທຸລະກິດ​ເຟີ​ນີ​ເຈີ​ລາວ ໄດ້​ມີ​ໂອກາດປຶກສາ​ຫາລື ແລກປ່ຽນ​ຄຳ​ຄິດເຫັນ ແລະ ປະສົບ​ການ​ເຊິ່ງ​ກັນ ແລະ ກັນ​ກັບ​ສະມາຄົມ​ຟີ​ນີ​ເຈີ​ປະເທດ​ສະມາຊິກ​ອາ​ຊຽນ ເພື່ອ​ແນໃສ່​ສ້າງ​ຄວາມ​ເຂັ້ມແຂງ​ໃນ​ທຸກດ້ານ​ໃຫ້ LFA ສາມາດ​ແຂ່ງຂັນໃນ​ລະດັບ​ພາກ​ພື້ນ ແລະ ສາກົນ.

ໃນ​ວາລະ​ການ​ດຳເນີນ​ກອງປະຊຸມ​ຄັ້ງ​ນີ້ ພວກ​ເຮົາ​ຍັງ​ຈະ​ໄດ້ຮັບ​ຟັງ​ການ​ນຳ​ສະເໜີ​ບົດ​ກ່ຽວກັບ​ຂັ້ນ​ຕອນ​ການ​ຂໍອະນຸຍາດ​ລົງທຶນ ຍຸດ​ທະ​ສາດ​ປ່າໄມ້ ແລະ ທຸລະ​ກິດ​ໄມ້​ໃນ ​ສປປ ລາວ ຈາກກົມ​ສົ່ງເສີມ​ການ​ລົງທຶນ ກະຊວງແຜນການ ແລະ ການ​ລົງທຶນ ກົມ​ປ່າໄມ້ ກະຊວງ​ກະສິກຳ ແລະ ປ່າໄມ້ ກົມ​ອຸດສາຫະກຳ ແລະ ຫັດຖະກຳ ກະຊວງ​ອຸດສາຫະກຳ ແລະ ການ​ຄ້າ ນອກ​ນີ້ຍັງ​ຈະ​ໄດ້ຮັບ​ຟັງ​ການ​ສະເໜີ​ຄວາມ​ເປັນ​ມາຂອງ AFIC ແລະ ມີ​ການ​ສົນ​ທະນາ ຖາມ-ຕອບບັນຫາ​ສຳຄັນຕ່າງໆ​ທີ່​ມີ​ຄວາມ​ສົນໃຈ ທັງ​ນີ້​ກໍ່ເພື່ອ​ສ້າງ​ຄວາມ​ເຂົ້າໃຈ​ຢ່າງ​ຈະແຈ້ງ ແລະ ເລິກເຊິ່ງ​ກ່ຽວ​ກັບ​ບັນຫາ​ດັ່ງກ່າວ​ອີກ​ດ້ວຍ.

ຂ່າວທີ່ກ່ຽວຂ້ອງ