ຂ່າວຫຼ້າສຸດ

ສສຊ ຮັບຮອງຮ່າງກົດໝາຍວ່າດ້ວຍຜູ້ພິພາກສາ

95 13 ພ.ຈ. 2017 ຂ່າວໜ້າ​ໜຶ່ງ

ກອງ​ປະຊຸມ​ສະໄໝ​ສາມັນເທື່ອ​ທີ 4 ຂອງ​ສະພາ​ແຫ່ງ​ຊາດ ຊຸດ​ທີ VIII ຢູ່​ຫ້ອງ​ວ່າການ​ສູນກາງ​ພັກ ໃນ​ວັນ​ທີ 10 ພະຈິກ 2017 ຜ່ານ​ມາ ພາຍ​ໃຕ້​ການເປັນ​ປະທານ​ຂອງ​ທ່ານ​ນາງ ສີໃສ ລື​ເດດ​ມູນ​ສອນ ຮອງ​ປະທານ​ສະພາ​ແຫ່ງ​ຊາດ ມີ​ບັນດາ​ສະ​ມາຊິກ​ສະພາ​ແຫ່ງ​ຊາດ (​ສສຊ) ເຂົ້າ​ຮ່ວມ ທ່ານ ຄຳ​ພັນ ສິດທິ​ດຳ ພາປະທານ​ສານ​ປະຊາຊົນ​ສູງສຸດ ໄດ້​ຕາງໜ້າ​ໃຫ້​ຄະນະ​ຮັບ​ຜິດຊອບ​ສ້າງ​ຮ່າງ​ກົດໝາຍວ່າ​ດ້ວຍຜູ້​ພິພາກສາ ຂຶ້ນ​ສະເໜີ​ໂດຍ​ຫຍໍ້ ກ່ຽວ​ກັບ​ກົດໝາຍ​ດັ່ງກ່າວ ເພື່ອ​ໃຫ້​ບັນດາ​ສະມາຊິກ​ສະພາ​ແຫ່ງ​ຊາດ ພິຈາລະ​ນາ ແລະ ຮັບຮອງ​ເອົາ.

ທ່ານ ຄຳ​ພັນ ສິດທິ​ດຳ​ພາ ໄດ້​ກ່າວ​ບາງ​ຕອນ​ວ່າ: ການ​ຄຸ້ມຄອງ​ຜູ້​ພິພາກສາ​ໃນ​ໄລຍະ​ທີ່​ຜ່ານມາ ແມ່ນ​ອີງໃສ່​ກົດໝາຍ​ວ່າດ້ວຍ​ສານ​ປະຊາຊົນ ດຳລັດ 171/​ນຍ ເລກ​ທີ 82/​ນຍ ແລະ ນິຕິ​ກຳ​ອື່ນທີ່​ກ່ຽວຂ້ອງ​ກັບ​ພະນັກງານ-ລັດຖະກອນ ໃນ​ປີ 2013 ຄະນະ​ປະຈຳ​ສະພາ​ແຫ່ງ​ຊາດ ໄດ້ອອກ​ມະຕິ​ຕົກລົງ ເລກ​ທີ 0132/​ຄປຈ ລົງ​ວັນ​ທີ 04 ທັນວາ 2013 ວ່າ​ດ້ວຍ​ລະບຽບ​ລັດ​ຖະກອນ​ຕຸລາການ ໂດຍ​ໄດ້​ກຳນົດບັນດາ​ຫຼັກການ​ລະບຽບ​ການ ມາດ​ຕະການ​ກ່ຽວ​ກັບ​ການ​ຄຸ້ມຄອງ ເຄື່ອນ​ໄຫວ ແຕ່ງຕັ້ງ ຍົກຍ້າຍ ປົດ​ຕຳແໜ່ງ ແລະ ກຳນົດຊັ້ນຂັ້ນ​ເງິນເດືອນຂອງ​ລັດ​ຖະກອນຕຸລາການ ທີ່​ປະກອບ​ດ້ວຍຜູ້​ພິພາກສາ ຜູ້​ຊ່ວຍ​ຜູ້​ພິພາກສາ ແລະ ຈ່າ​ສານ.

ກອງ​ປະຊຸມ​ຄັ້ງ​ປະຖົມ​ມະລຶກຂອງ​ສະພາ​ແຫ່ງ​ຊາດ ຊຸດ​ທີ VIII ໄດ້​ຮັບຮອງ​ເອົາ​ແຜນການ​ສ້າງ ແລະ ປັບປຸງ​ກົດໝາຍ 5 ປີ (2016-2020) ສະບັບ​ເລກ​ທີ 02/​ສພຊ ລົງ​ວັນ​ທີ 27 ເມສາ 2016 ສານ​ປະຊາຊົນ​ສູງ​ສຸດ ໄດ້ແຕ່ງຕັ້ງ​ຄະນະ​ຮັບຜິດຊອບ​ສ້າງກົດໝາຍວ່າ​ດ້ວຍຜູ້​ພິພາກສາ ເພື່ອ​ຄົ້ນຄວ້າ ເກັບ​ກຳ​ຂໍ້​ມູນ ແລະ ກຳນົດ​ໂຄງ​ຮ່າງ ເນື້ອ​ໃນ​ຂອງ​ກົດໝາຍ​ດັ່ງກ່າວ​ ມີ​ການ​ປະຊຸມ​ປຶກສາ​ຫາລື​ພາຍ​ໃນ​ຄະນະ​ຮັບ​ຜິດຊອບ ປະຊຸມ​ປຶກສາ​ຫາລື​ຮ່ວມ​ກັບຜູ້​ພິພາກສາ ແລະ ພາກສ່ວນ​ທີ່ກ່ຽວຂ້ອງ​ຂອງ​ສານ​ປະຊາຊົນ​ສູງສຸດ ​ໄປ​ແລກປ່ຽນ ແລະ ຖອດຖອນ​ບົດຮຽນ​ນຳ​ສານ​ປະຊາຊົນແຫ່ງ ​ສປ ຈີນ ​ສສ ຫວຽດນາມ ແລະ ບັນດາ​ປະເທດ​ໃນ​ກຸ່ມ​ອາຊຽນ ຈາກ​ນັ້ນ ກໍ່​ໄດ້​ນຳ​ເອົາ​ຮ່າງກົດໝາຍ​ດັ່ງກ່າວ ​ລົງ​ທາບ​ທາມຄຳ​ເຫັນ​ຢູ່​ທີ່​ສານ 3 ພາກຄື: ພາກ​ເໝືອ ກາງ ແລະ ໃຕ້.

ຜ່ານ​ການ​ຄົ້ນຄວ້າ​ທາບ​ທາມຢ່າງ​ກົງ​ໄປ​ກົງ​ມາ​ຫຼາຍ​ຫຼົບ​ຫຼາຍຕ່າວ ຈຶ່ງ​ໄດ້​ກຳນົດ​ໂຄງ​ປະກອບ ແລະ ເນື້ອ​ໃນ​ຂອງ​ກົດໝາຍ​ຜູ້​ພິພາກ​ສາ​ດັ່ງນີ້: ກົດໝາຍ​ວ່າ​ດ້ວຍຜູ້​ພິພາກສາ ແມ່ນ​ຍົກ​ລະດັບ​ຂອງມະຕິ​ຂອງ​ຄະນະ​ປະຈຳ​ສະພາແຫ່ງ​ຊາດ ສະບັບ​ເລກ​ທີ 0132/​ສພຊ ລົງ​ວັນ​ທີ 04 ທັນວາ 2013 ວ່າ​ດ້ວຍ​ລະບຽບ​ຕຸລາການ ທີ່​ມີ 16 ໝວດ 48 ມາດຕາ ມາເປັນ​ກົດໝາຍ​ວ່າ​ດ້ວຍ​ຜູ້​ພິພາກສາ​ສະບັບ​ນີ້ ເຊິ່ງ​ປະກອບ​ມີ XII ພາກ 10 ໝວດ ແລະ 58 ມາດຕາ.

ພາຍຫຼັງ​ທີ່​ໄດ້​ຮັບ​ຟັງ​ການ​ສະເໜີ ​ກ່ຽວ​ກັບ​ຮ່າງ​ກົດໝາຍ​ວ່າດ້ວຍ​ຜູ້​ພິພາກສາ​ ຈາກທ່ານ​ປະທານ​ສານ​ປະຊາຊົນ​ສູງ​ສຸດ​ໂດຍສັງເຂບ​ແລ້ວ ຈາກ​ນັ້ນ ບັນດາ ​ສສຊ ກໍ່​ໄດ້​ຜັດປ່ຽນ​ກັນ​ຂຶ້ນ​ປະກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປກົງ​ມາ​ໃສ່​ຮ່າງ​ກົດໝາຍ​ດັ່ງກ່າວ ແລະ ກໍ່​ລົງ​ຄະແນນ​ສຽງ​ຮັບຮອງເອົາ​ຮ່າງ​ກົດໝາຍ​ວ່າ​ດ້ວຍ​ຜູ້​ພິພາກ​ສາ ​ດ້ວຍ​ຄະແນນ​ສຽງ​ສ່ວນຫຼາຍ.

ຂ່າວທີ່ກ່ຽວຂ້ອງ