ຂ່າວຫຼ້າສຸດ

ຈັດພິທີອວ່າຍນ້ຳ ເລີ່ມລົງມືກໍ່ສ້າງເຂື່ອນໄຟຟ້ານ້ຳອູ 1 ໄລຍະ II

173 10 ພ.ຈ. 2017 ຂ່າວໜ້າ​ໜຶ່ງ

ຈັດ​ພິທີ​ອວ່າຍ​ນ້ຳ ເພື່ອ​ກໍ່ສ້າງ​ເຂື່ອນ​ໄຟຟ້າ​ນ້ຳ​ອູ 1 ໄລຍະ II ຢູ່​ເມືອງ​ປາກ​ອູ ແຂວງ​ຫຼວງ​ພະບາງ ໄດ້​ຈັດ​ຂຶ້ນ​ໃນ​ວັນ​ທີ 8 ພະຈິກ​ນີ້ ທີ່​ບໍລິເວນ​ຂອງ​ເຂື່ອນ​ດັ່ງກ່າວ ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ແຫ່ງ ​ສປປ ລາວ ພ້ອມ​ດ້ວຍ​ຄະນະ​ນຳ​ຂອງ​ກະຊວງ​ກ່ຽວຂ້ອງ ແຂກ​ຮັບ​ເຊີນ ຈາກ​ຝ່າຍ​ລາວ ແລະ ຈີນ ເຂົ້າ​ຮ່ວມ.

ເຂື່ອນ​ໄຟຟ້າ​ນ້ຳ​ອູ 1 ມີ​ກຳລັງ​ຕິດ​ຕັ້ງ 180 ເມ​ກາ​ວັດ ເປັນ​ລະບົບ​ເຂື່ອນ​ນ້ຳ​ລົ້ນ ໂດຍ​ໄລຍະ​ທີ I ໄດ້ເລີ່ມ​ລົງມື​ກໍ່ສ້າງ​ມາ​ແຕ່​ເດືອນ​ເມສາ ປີ 2016 ຄາດ​ວ່າການ​ກໍ່ສ້າງ​ຈະ​ສຳເລັດ​ໃນ​ປີ 2019 ສຳລັບ​ເຂື່ອນ​ໄຟຟ້າ​ນ້ຳ​ອູ​ຢູ່​ເຂດ​ແຂວງ​ຫຼວງ​ພະ​ບາງ ມີ​ທັງ​ໝົດ 3 ເຂື່ອນ ປັດຈຸບັນ​ສຳເລັດ​ການ​ກໍ່ສ້າງ​ແລ້ວ 1 ເຂື່ອນ ຄື: ເຂື່ອນ​ໄຟຟ້າ​ນ້ຳ​ອູ 2.

ທ່ານ ຄຳ​ມະນີ ອິນ​ທິ​ລາດ ລັດຖະມົນຕີກະຊວງ​ພະລັງງານ ແລະ ບໍ່​ແຮ່ ໄດ້​ມີ​ຄຳ​ເຫັນ​ວ່າ: ການ​ພັດທະ​ນາ​ພະລັງງານ​ໄຟຟ້າ​ຂອງ ​ສປປ ລາວ ນັບ​ມື້​ໄດ້​ຮັບ​ການ​ພັດທະນາ​ດ້ວຍ​ບາດກ້າວ​ທີ່​ດີ ຮັບປະກັນ​ຄວາມ​ໝັ້ນ​ທ່ຽງ ແລະ ກ້າວ​ກະໂດດ ປະຊາຊົນ​ພາຍ​ໃນ​ປະເທດ​ໄດ້​ຊົມໃຊ້​ໄຟຟ້າ​ຖາວອນ ໂດຍ​ພື້ນຖານ​ທັງ​ມີ​ການ​ສົ່ງ​ອອກ​ເພື່ອ​ນຳ​ເງິນຕາ​ເຂົ້າ​ປະເທດ​ຢ່າງ​ຫຼວງຫຼາຍ ເຮັດ​ໃຫ້​ພື້ນຖານ​ເສດຖະກິດ​ຂອງ​ຊາດ​ນັບ​ມື້​ເຕີບ​ໃຫຍ່ ແລະ ເຂັ້ມແຂງ​ເປັນ​ກ້າວໆ.

ໂອກາດ​ນີ້ ທ່ານ​ຮອງ​ນາຍົກລັດຖະມົນຕີ ໄດ້​ໃຫ້​ກຽດ​ຂຶ້ນ​ລັ່ນຄ້ອງ 9 ບາດ ເພື່ອ​ເປັນ​ສີ​ລິ​ມຸງຄຸນ​ໃຫ້​ພິທີ​ອວ່າຍ​ນ້ຳ ແລະ ຊົມ​ການ​ຕັດ​ແລວ​ນ້ຳ ເພື່ອ​ກະກຽມ​ການ​ກໍ່ສ້າງ​ໄລຍະ​ສອງ​ຢ່າງ​ເປັນ​ທາງ​ການ.

ຂ່າວທີ່ກ່ຽວຂ້ອງ