ຂ່າວຫຼ້າສຸດ

ປະທານສູນກາງແນວລາວສ້າງຊາດ ຕ້ອນຮັບຜູ້ແທນເຊື້ອຊາດລາວ ຈາກອາເມຣິກາ

181 10 ພ.ຈ. 2017 ຂ່າວໜ້າ​ໜຶ່ງ

ໃນ​ວັນ​ທີ 9 ພະຈິກ 2017 ທີ່​ສູນ​ກາງ​ແນວ​ລາວ​ສ້າງ​ຊາດ ທ່ານ ໄຊ​ສົມ​ພອນ ພົມວິຫານ ປະທານ​ສູນ​ກາງ​ແນວ​ລາວ​ສ້າງ​ຊາດ ໄດ້​ຕ້ອນຮັບ​ຄະນະ​ຜູ້​ແທນ​ຄົນ​ເຊື້ອ​ຊາດ​ລາວ​ຈາກ​ສະຫະລັດ​ອາ​ເມ​ຣິ​ກາ ເກືອບ 50 ທ່ານ ນຳພາ​ໂດຍ​ທ່ານ ຄຳ​ຜຸຍ ມະນີ​ແສງ ໃນ​ໂອກາດ​ມາ​ເຄື່ອນ​ໄຫວ​ຢ້ຽມຢາມ ​ສປປ ລາວ ແຕ່​ວັນ​ທີ 3-11 ພະຈິກ ແລະ ເຂົ້າ​ຮ່ວມ​ການ​ແຂ່ງຂັນ​ກີ​ລາກ໊ອຟ​ມິດຕະພາບ​ຊີງ​ຂັນ​ທ່ານ​ລັດຖະມົນຕີກະຊວງ​ການ​ຕ່າງປະເທດ ໂດຍ​ມີ​ທ່ານ ສຸວັນ​ນາ ຜຸຍ​ຍະ​ວົງ ຫົວໜ້າ​ກົມ​ພົວພັນ​ເຊື້ອ​ຊາດລາວ​ຢູ່​ຕ່າງປະເທດ ກະຊວງ​ການ​ຕ່າງປະເທດ ມີ​ຮອງ​ປະທານ​ສູນ​ກາງ​ແນວ​ລາວ​ສ້າງ​ຊາດ ພ້ອມ​ດ້ວຍ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ໃນ​ໂອກາດ​ດັ່ງກ່າວ ທ່ານ ໄຊ​ສົມ​ພອນ ພົມວິຫານ ໄດ້​ກ່າວ​ສະແດງ​ຄວາມ​ຍິນ​ດີ​ຕ້ອນຮັບ​ພີ່ນ້ອງ​ຄົນ​ເຊື້ອ​ຊາດ​ລາວຢູ່ ສ ອາ​ເມ​ຣິ​ກາ ທີ່​ໄດ້​ເດີນທາງ​ມາ​ເຄື່ອນ​ໄຫວ​ຢ້ຽມຢາມ ຊຶ່ງ​ເປັນ​ກິດຈະກຳ​ທີ່​ມີ​ຄວາມ​ໝາຍ​ຄວາມ​ສຳຄັນ ລະຫວ່າງ​ເຊື້ອ​ຊາດ​ລາວ ຢູ່​ອາ​ເມ​ຣິ​ກາ ເຊິ່ງ​ຍາມ​ໃດ​ພັກ-ລັດຖະບານ ກໍ່​ຍັງ​ເປັນ​ຫ່ວງ​ເປັນ​ໃຍ​ສະເໝີ ເຖິງ​ຈະ​ໄປ​ຢູ່​ໃສປະເທດ​ໃດ​ ກໍ່​ບໍ່​ສາມາດ​ຕັດ​ແຍກ​ອອກ​ຈາກ​ວົງ​ຄະນາ​ຍາດ​ເຊື້ອ​ຊາດ​ລາວ​ເຮົາ​ໄດ້ ພ້ອມ​ນີ້ ທ່ານ​ປະທານ​ສູນ​ກາງ​ແນວ​ລາວ​ສ້າງ​ຊາດ​ ຍັງ​ໄດ້​ໂອ້​ລົມ​ຕໍ່​ຄະນະ​ຜູ້​ແທນ​ຄົນ​ເຊື້ອ​ຊາດ​ລາວ​ຢູ່​ຕ່າງປະເທດ ໂດຍ​ຍົກ​ໃຫ້​ເຫັນ​ການ​ສ້າງສາ​ພັດທະນາ​ປະເທດ​ຊາດ ແລະ ການ​ພັດທະນາ​ເສດຖະກິດ-ສັງຄົມ ໃນ​ການ​ນຳພາ​ປະເທດ​ຊາດ​ ໃຫ້​ຫຼຸດ​ພົ້ນ​ອອກ​ຈາກ​ສະຖານະ​ພາບ​ຄວາມ​ດ້ອຍ​ພັດທະນາ ໃນ​ປີ 2020 ກ້າວ​ໄປ​ສູ່​ປະເທດ​ກຳລັງ​ພັດທະນາ​ທີ່​ມີ​ລາຍ​ຮັບ​ປານ​ກາງ ສູງ ຕາມ​ທິດ​ພັດທະນາ​ສີຂຽວ ແລະ ຍືນ​ຍົງ ແຜນ​ຍຸດ​ທະ​ສາດ ເພື່ອ​ນຳພາ​ປະເທດ​ຊາດ ຮອດ​ປີ 2030.

ໃນ​ໂອກາດ​ດຽວ​ກັນ ທ່ານ ໄຊ​ສົມ​ພອນ ພົມ​ວິ​ພານ ຍັງ​ໄດ້​ຮຽກຮ້ອງ​ພີ່ນ້ອງ​ຊາວ​ລາວ​ຢູ່​ຕ່າງ​ປະເທດ ຈົ່ງ​ສືບ​ທອດ​ມູນເຊື້ອ​ແຫ່ງ​ຄວາມ​ສາມັກຄີ​ຮັກແພງ ​ທີ່​ບັນພະບຸລຸດ​ໄດ້​ສ້າງ​ມາ ແລະ ສາມາດ​ປະກອບ​ສ່ວນ​ເຂົ້າ​ໃນ​ພາລະກິດ ​ສ້າງສາ​ພັດທະນາ​ບ້ານ​ເກີດ​ເມືອງ​ນອນ​ຂອງ​ຕົນ​ດ້ວຍ​ຫຼາຍ​ວິທີ ເຊັ່ນ: ການ​ນຳ​ເອົາ​ສະພາບ​ຄວາມ​ເປັນ​ຈິງ​ ທີ່​ທ່ານ​ໄດ້​ພົບ​ເຫັນ​ໃນ ​ສປປ ລາວ ໄປ​ເຜີຍແຜ່ ຫຼື ສ້າງ​ຄວາມ​ເຂົ້າໃຈ​ໃຫ້ແກ່​ເພື່ອນ​ມິດ ບໍ່​ວ່າ​ຈະ​ເປັນ​ຊາວ​ລາວ ກໍ່​ຄື​ຊາວ​ຕ່າງປະເທດ ຈົ່ງ​ສືບຕໍ່​ສ້າງ​ເງື່ອນໄຂ​ໃຫ້​ພີ່ນ້ອງ​ລາວ​ຢູ່ຕ່າງປະເທດ ໄດ້​ເຕົ້າໂຮມ​ເຂົ້າກັນ​ດ້ວຍ​ຮູບ​ການ​ໃດ​ໜຶ່ງ​ທີ່​ເໝາະ​ສົມ ແລະ ຖືກຕ້ອງ ສ້າງ​ເງື່ອນໄຂ​ຕິດຕໍ່ພົວພັນ ແລະ ແລກປ່ຽນ​ຄວາມ​ຄິດ​ເຫັນ ລະຫວ່າງ​ຊຸມ​ຊົນ​ຊາວ​ລາວ​ຢູ່​ຕ່າງປະເທດກັບ ​ສປປ ລາວ ໃຫ້​ຫຼາຍ​ຂຶ້ນ ນອກ​​ນັ້ນ ກໍ່ສ້າງ​ກົນ​ໄກ ແລະ ວິທີ​ການ​ປະສານ​ງານລະຫວ່າງ​ຊຸມ​ຊົນ​ລາວ​ຢູ່​ຕ່າງປະເທດ ​ໃຫ້​ບັນດາ​ອົງ​ການຈັດຕັ້ງ​ທີ່​ກ່ຽວຂ້ອງ​ພາຍ​ໃນ​ປະເທດ ພ້ອມ​ກັນ​ສ້າງ​ບັນດາ​ແຜນ​ງານ ຫຼື ໂຄງການ​ຮ່ວມມື​ຊ່ວຍເຫຼືອ​ຕ່າງໆ​ຕາມ​ສະພາບ​ເງື່ອນໄຂ​ຕົວ​ຈິງ.

ຂ່າວທີ່ກ່ຽວຂ້ອງ