ຂ່າວຫຼ້າສຸດ

ເພີ່ມທະວີການຮ່ວມມືແບບໃຕ້-ໃຕ້ ແລະ ການຮ່ວມມືແບບສາມລ່ຽມ

161 09 ພ.ຈ. 2017 ຂ່າວໜ້າ​ໜຶ່ງ

ໃນ​ຫຼາຍ​ສິບ​ປີຜ່ານມາ​ການຮ່ວມ​ມື​ແບບ​ໃຕ້-ໃຕ້ ແລະ ແບບສາມ​ລ່ຽມ ຫຼື ການ​ຮ່ວມ​ມື​ລະຫວ່າງ​ປະເທດ​ກຳລັງ​ພັດທະນາ ໄດ້​ຖືກ​ເສີມ​ຂະຫຍາຍ ແລະ ເພີ່ມທະວີ​ທາງ​ດ້ານ​ບົດບາດ​ຢູ່​ໃນ​ການພັດທະນາ​ແບບ​ຍືນ​ຍົງ ສຳລັບ ​ສປປ ລາວ ລັດຖະບານ ແລະ ຄູ່ຮ່ວມ​ພັດທະນາ​ໄດ້​ໃຫ້​ຄວາມ​ສຳຄັນ ​ໃນ​ການ​ຍົກ​ສູງ​ການ​ປະກອບສ່ວນ​ຂອງ​ບັນດາ​ປະເທດ​ກຳລັງພັດທະນາ​ດ້ວຍ​ກັນ ແລະ ໄດ້​ມີການ​ຮັບ​ເອົາ​ຖະແຫຼງການ​ວຽງຈັນ ວ່າ​ດ້ວຍ​ການ​ເປັນ​ຄູ່​ຮ່ວມ ເພື່ອ​ການ​ພັດທະນາ​ທີ່​ມີ​ປະ​ສິດທິຜົນ ໂດຍ​ມີ​ຄູ່​ຮ່ວມ​ພັດທະນາຫຼາຍ​ກວ່າ 30 ອົງ​ກອນ​ເຂົ້າ​ຮ່ວມທີ່​ກອງ​ປະຊຸມ​ໂຕະມົນ​ລະດັບ​ສູງ ປີ 2015 ເຊິ່ງ​ຖະແຫຼງການ​ດັ່ງກ່າວ ​ໄດ້​ວາງ​ຂອບ​ວຽກ​ສຳລັບການ​ຮ່ວມ​ມື ການ​ປະຕິບັດ​ງານ ເພື່ອ​ແນໃສ່​ເພີ່ມ​ທະວີ​ການຮ່ວມ​ມື​ຢູ່​ຂັ້ນ​ຕ່າງໆ ໃຫ້​ມີ​ປະ​ສິດທິຜົນ​ຫຼາຍ​ຂຶ້ນ.

ວັນ​ທີ 7 ພະຈິກ 2017 ທີ່​ກະຊວງ​ແຜນການ ແລະ ການ​ລົງທຶນ ໄດ້​ຈັດ​ກອງ​ປະຊຸມ​ປຶກສາ​ຫາລື ກະກຽມ​ກອງ​ປະຊຸມ​ໂຕະມົນ ປະຈຳ​ປີ 2017 ໃນ​ຫົວຂໍ້ “ການ​ຮ່ວມ​ມື​ແບບ​ໃຕ້-ໃຕ້ ແລະ ການ​ຮ່ວມ​ມື​ແບບ​ສາມ​ລ່ຽມ” ເຊິ່ງ​ຈະຈັດ​ຂຶ້ນ​ຢູ່​ແຂວງ​ຈຳປາ​ສັກ ລະຫວ່າງ​ວັນ​ທີ 22-23 ພະຈິກ​ນີ້ ເປັນ​ປະທານ​ຂອງ​ທ່ານ ກິ​ແກ້ວ ຈັນທະ​ບູ​ຣີ ຮອງ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ມີ​ບັນດາ​ຫົວໜ້າ​ກົມ ຮອງກົມ ຜູ້ຕາງໜ້າ​ອົງ​ການຈັດຕັ້ງສາກົນ​ປະຈຳ​ລາວ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້ ໄດ້​ເປັນ​ເວທີສົນທະນາ​ແລກປ່ຽນ​ບົດຮຽນ ແລະ ຄົ້ນຄວ້າ​ກ່ຽວ​ກັບ​ການ​ເຂົ້າເຖິງ ການ​ອອກ​ແບບ ການຈັດຕັ້ງປະຕິບັດ ແລະ ການ​ຕິດຕາມການ​ຮ່ວມ​ມື​ຂອງ​ບັນດາ​ປະເທດກຳລັງ​ພັດທະນາ ​ທີ່​ເລັ່ງ​ໃສ່​ເພື່ອການ​ບັນລຸ​ເປົ້າ​ໝາຍ​ການ​ພັດ​ທະນາ​ແບບ​ຍືນ​ຍົງ ແລະ ຊ່ວຍ​ເຮັດໃຫ້ ​ສປປ ລາວ ບັນລຸ​ເປົ້າ​ໝາຍການ​ພັດທະນາ​ແຫ່ງ​ຊາດ​ທີ່​ກຳນົດ​ໄວ້​ໃນ​ແຜນ​ພັດທະນາ​ເສດ​ຖະກິດ-ສັງຄົມ​ແຫ່ງ​ຊາດ 5 ປີ ຄັ້ງ​ທີ VIII ໂດຍ​ສະເພາະແມ່ນ​ການເລັ່ງ​ໃສ່​ການ​ນຳພາ​ປະເທດ​ຫຼຸດພົ້ນ​ອອກ​ຈາກ​ສະຖານະ​ພາບ ປະເທດ​ດ້ອຍ​ພັດທະນາ ໃນ​ປີ 2020 ພ້ອມ​ນັ້ນ ຍັງ​ໄດ້​ປຶກສາ​ຫາລື ແລະ ສົນທະນາ​ກ່ຽວ​ກັບ​ວິທີ​ການເພີ່ມ​ທະວີ​ການ​ຮ່ວມ​ມືແບບ​ໃຕ້-ໃຕ້ ແລະ ການ​ຮ່ວມ​ມື​ແບບ​ສາມລ່ຽມ​ຢູ່​ລາວ ເປັນຕົ້ນ​ແມ່ນ​ການເຊື່ອມ​ສານ​ການ​ຮ່ວມ​ມື​ເຂົ້າ​ໃນກົນ​ໄກ​ການຈັດຕັ້ງ​ປະຕິບັດ​ວຽກງານ​ຄຸ້ມ​ຄອງ​ບໍລິຫານ ການ​ຕິດຕາມ​ກວດກາ ສະເໜີ​ພາບ​ລວມຂອງ​ການ​ຮ່ວມ​ມື​ລະດັບ​ສາກົນ ວິທີ​ການ​ການ​ຮ່ວມ​ມື​ໃນ​ຮູບ​ແບບດັ່ງ​​ກ່າວ​ຢູ່​ລາວ ແລະ ອື່ນໆ.

ຂ່າວທີ່ກ່ຽວຂ້ອງ