ລາວໂປເລມາຮອນດິງ ສະເໜີການຮ່ວມມືດ້ານໄອທີ

5.512 02 ພ.ຈ. 2017 ຂ່າວໜ້າ​ໜຶ່ງ
ລາວໂປເລມາຮອນດິງ ສະເໜີການຮ່ວມມືດ້ານໄອທີ

ບໍລິສັດ ລາວ​ໂປ​ເລ​ມາ​ຮອນດິງ ທີ່​ປຶກສາສະເໜີ​ການ​ຮ່ວມ​ມືທາງ​ດ້ານ​ໄອ​ທີ​ຢູ່​ນະຄອນຫຼວງວຽງ​ຈັນ ໂດຍ​ເນັ້ນ​ໃສ່​ຂະແໜງການ​ເງິນ ພາສີ ສ່ວຍ​ສາ​ອາກອນ ແລະ ວຽກ​ງານ​ອື່ນໆ ເພື່ອ​ປະກອບ​ສ່ວນ​ໃນ​ການ​ຄຸ້ມ​ຄອງ​ການເກັບ​ລາຍ​ຮັບ​ເຂົ້າ​ງົບປະມານ​ ມີ​ປະ​ສິດທິ​ຜົນ​ສູງ​ຂຶ້ນ.

ອີງ​ຕາມ​ການ​ລາຍ​ງານ​ທ່ານ ຄຳ​ພັນ ມາລາ​ບັນດິດ ຫົວໜ້າ​ພະແນກ​ການ​ເງິນ ນະຄອນຫຼວງວຽງ​ຈັນ ໃນ​ກອງ​ປະຊຸມ​ພົບ​ປະທາງ​ດ້ານ​ວິຊາ​ການ ລະຫວ່າງພະແນກການ​ເງິນ​ນະຄອນຫຼວງວຽງ​ຈັນ ກັບ​ບໍລິສັດ ລາວ​ໂປ​ເລມາ​ຮອນ​ດິງ ທີ່​ປຶກສາ ມີ​ບາງຕອນ​ທ່ານ​ກ່າ​ວວ່າ: ກອງ​ປະຊຸມພົບ​ປະ​ທາງ​ດ້ານ​ວິຊາ​ການ​ ແມ່ນເປັນ​ບ່ອນ​ອີງ​ໃຫ້​ແກ່​ພະແນກການເງິນ ໄປ​ລາຍ​ງານ​ຕໍ່​ທ່ານ​ເຈົ້າ​ຄອງນະຄອນຫຼວງ​ວຽງ​ຈັນ ເພື່ອ​ພິ​ຈາລະ​ນາ​ຮັບຮອງ​ເອົາ​ໂຄງການ ການ​ພັດທະນາ​ວຽກ​ງານ​ໄອ​ທີ ໃນ​ຂະແໜງການ​ເງິນ ຢູ່​ນະຄອນຫຼວງ​ວຽງ​ຈັນ ເພື່ອ​ນຳ​ໃຊ້​ເຂົ້າ​ໃນການ​ຈັດ​ເກັບ​ລາຍ​ຮັບ​ຈາກ​ສ່ວຍສາ​ອາກອນ ແລະ ວຽກ​ງານ​ບໍ​ລິຫານ​ອື່ນໆ​ຂອງ​ລັດ.

ກອງ​ປະຊຸມ​ໄດ້​ເຫັນ​ດີ​ຮັບຮອງເອົາ​ຫຼັກການ​ລວມ ​ທີ່​ບໍລິສັດ​ສະເໜີ​ມາ ​ເພື່ອ​ລາຍ​ງານ​ຕໍ່​ທ່ານ​ເຈົ້າຄອງ ນວ ເຫັນ​ດີ​ໃຫ້​ຈັດ​ກອງ​ປະຊຸມ​ທາງ​ດ້ານ​ວິຊາ​ການ ໂດຍມອບ​ໃຫ້​ພະ​ແນກ​ສ່ວຍ​ສາ​ອາກອນ​ເປັນ​ເຈົ້າ​ການ​ສົມທົບ​ກັບບໍລິສັດ ເພື່ອ​ປຶກສາ​ຫາລື​ກັນ​ລະອຽດ​ຕື່ມ​ທາງ​ດ້ານ​ເຕັກນິກ ແລະ ວຽກ​ງານ​ອື່ນໆ ພ້ອມ​ນັ້ນ ພະແນກ​ການ​ເງິນ ນວ ແລະ ບໍລິສັດ ລາວ​ໂປ​ເລ​ມາ​ຮອນ​ດິງ ທີ່​ປຶກສາ ໄດ້​ລົງ​ນາມ​ໃນ​ບົດ​ບັນທຶກ​ກ່ຽວ​ກັບການ​ຮ່ວມ​ມື​ພັດທະນາ​ວຽກ​ງານໄອ​ທີ​ໃນ​ອະນາຄົດ.

ປັດຈຸບັນ ບໍລິສັດ ລາວ​ໂປ​ເລມາ​ຮອນ​ດິງ ທີ່​ປຶກສາ ກຳລັງ​ສ້າງແຜນ​ຮ່ວມ​ມື​ກັນ ເພື່ອ​ພັດທະນາລະບົບ​ໄອ​ທີ​ເຊື່ອມ​ຕໍ່​ການ​ເກັບລາຍ​ຮັບ​ ໃນ​ຂົງເຂດ​ຂະແໜງການເງິນ ພາສີ ສ່ວຍ​ສາ​ອາກອນ ໃນ ​ສປປ ລາວ ໃຫ້​ໄດ້​ປະ​ສິດທິ​ຜົນ​ສູງຂຶ້ນ ໂດຍ​ອີງໃສ່​ການ​ນຳ​ໃຊ້​ສະກຸນ​ເງິນ​ກີບ ແລະ ລະບົບ​ການ​ດຳເນີນ​ງານ​ທີ່​ທາງ​ບໍລິສັດ​ນຳ​ໃຊ້​ຢູ່ມາ​ເປັນ​ພື້ນຖານ.

ກອງ​ປະຊຸມ​ຄັ້ງ​ນີ້ ໄດ້​ຈັດ​ຂຶ້ນວັນ​ທີ 30 ຕຸລາ 2017 ທີ່​ພະ​ແນກການ​ເງິນ ນວ ໂດຍ​ເປັນ​ປະທານຂອງ​ທ່ານ​ຫົວໜ້າ​ພະແນກການເງິນ ນວ ມີ​ຕາງໜ້າ​ພະ​ແນກສ່ວຍ​ສາ​ອາກອນ ນວ ບໍລິສັດ ລາວ​ໂປ​ເລ​ມາ​ຮອນ​ດິງ ທີ່​ປຶກສາ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ຂ່າວທີ່ກ່ຽວຂ້ອງ