ລັດຖະບານຫວຽດນາມ ຊ່ວຍສ້າງຫໍສະພາແຫ່ງຊາດຫຼັງໃໝ່

2.550 02 ພ.ຈ. 2017 ຂ່າວໜ້າ​ໜຶ່ງ
ລັດຖະບານຫວຽດນາມ ຊ່ວຍສ້າງຫໍສະພາແຫ່ງຊາດຫຼັງໃໝ່

ເພື່ອ​ສະເຫຼີມສະຫຼອງ​ມູນເຊື້ອສາຍ​ພົວພັນ​ແບບ​ພິເສດ ແລະ ການ​ຮ່ວມ​ມື​ຮອບດ້ານລະຫວ່າງສອງ​ພັກ ສອງ​ລັດ ແລະ ປະຊາຊົນ​ສອງ​ຊາດ ລາວ-ຫວຽດນາມ ໂດຍ​ສະເພາະແມ່ນ​ການ​ຮ່ວມສະຫຼອງ​ສອງ​ວັນ​ປະຫວັດສາດ​ຄື: ວັນ​ເຊັນ​ສົນທິສັນຍາ​ມິດຕະພາບ ແລະ ການ​ຮ່ວມ​ມື ຄົບຮອບ 40 ປີ ແລະ ວັນ​ສ້າງຕັ້ງ​ສາຍ​ພົວພັນການ​ທູດ ຄົບຮອບ 55 ປີ ສະຫາຍ ຫງວຽນ ຝູ ຈອງ ເລຂາ​ທິການ​ໃຫຍ່​ຄະນະ​ບໍລິຫານ​ງານສູນ​ກາງ​ພັກ​ກອມ​ມູ​ນິດ​ຫວຽດນາມ ຕາງໜ້າ​ພັກ-ລັດຖະບານ ແລະ ປະຊາຊົນ​ຫວຽດນາມ ໄດ້ມອບ​ເງິນ ຈຳນວນ 100 ລ້ານ​ໂດລາ​ສະຫະລັດ ຫຼື ປະມານ 800 ຕື້​ກີບ ເພື່ອ​ເປັນ​ຂອງຂວັນ​ໃຫ້​ແກ່ພັກ-ລັດຖະບານ ແລະ ປະຊາຊົນລາວ ນຳ​ໃຊ້​ເຂົ້າ​ໃນ​ການ​ປຸກ​ສ້າງຫໍ​ປະຊຸມ​ສະພາ​ແຫ່ງ​ຊາດ​ຫຼັງ​ໃໝ່.

ພິທີ​ວາງ​ສີ​ລາ​ລຶກ ແລະ ເປີດໂຄງການ​ປຸກ​ສ້າງ​ຫໍ​ສະພາ​ແຫ່ງຊາດ​ຫຼັງ​ໃໝ່ ​ຈັດ​ຂຶ້ນວັນ​ທີ 1 ພະຈິກ 2017 ຢູ່​ນະຄອນຫຼວງ​ວຽງຈັນ (ດ້ານ​ຂ້າງ​ສະໜາມ​ຫຼວງ) ໃຫ້​ກຽດ​ເຂົ້າ​ຮ່ວມ​ມີ​ສະຫາຍ ບຸນຍັງ ວໍລະ​ຈິດ ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກປະຊາຊົນປະຕິວັດ​ລາວ ປະທານປະເທດ ສະຫາຍ​ນາງ ຫງວຽນ ຖິ​ກິມ​ເງິນ ກຳມະການ​ກົມ​ການເມືອງ​ສູນ​ກາງ​ພັກກອມ​ມູ​ນິດຫວຽດນາມ ປະທານ​ສະພາ​ແຫ່ງຊາດ​ຫວຽດນາມ ສະຫາຍ​ນາງ ປານີ ຢາ​ທໍ່​ຕູ້ ກຳມະການ​ກົມການເມືອງ​ສູນ​ກາງ​ພັກ ປະທານສະພາ​ແຫ່ງ​ຊາດ ພ້ອມ​ດ້ວຍ​ບັນດາ​ຄະນະ​ພັກ ຄະນະ​ນຳ​ຂັ້ນ​ສູງສອງ​ຝ່າຍ ແລະ ແຂກ​ຖືກ​ເຊີນ.

ສະຫາຍ ສົມ​ພັນ ແພງ​ຄຳ​ມີ ກຳມະການ​ສູນ​ກາງ​ພັກ ຮອງ​ປະທານ​ສະພາ​ແຫ່ງ​ຊາດ ທັງ​ເປັນຫົວໜ້າ​ຄະນະ​ຮັບຜິດຊອບ​ໂຄງການ​ປຸກ​ສ້າງ​ຫໍ​ສະພາ​ແຫ່ງ​ຊາດລາວ ໄດ້​ກ່າວ​ວ່າ: ຫໍ​ສະພາ​ແຫ່ງຊາດ​ຫຼັງ​ໃໝ່ ໄດ້​ປຸກ​ສ້າງ​ຂຶ້ນ​ຢູ່​ສະຖານ​ທີ່​ບ່ອນ​ເກົ່າ ໂດຍ​ຫຼັງ​ເກົ່າ​ປຸກສ້າງ​ມາ​ແຕ່​ປີ 1991 ທີ່​ມີ​ສະພາບຊຸດໂຊມ​ພໍ​ສົມຄວນ ເພື່ອ​ຈັດ​ຕັ້ງປະຕິບັດ​ແຈ້ງ​ການ​ຂອງ​ຫ້ອງ​ວ່າການ​ສູນ​ກາງ​ພັກ ກ່ຽວ​ກັບ​ການຕົກລົງ​ຂອງ​ກົມ​ການເມືອງ​ສູນກາງ​ພັກ ເຫັນ​ດີ​ໃຫ້​ຄະນະ​ປະຈຳສະພາ​ແຫ່ງ​ຊາດ ປຸກ​ສ້າງ​ຫໍ​ສະພາ​ຫຼັງ​ໃໝ່​ຕາມ​ການ​ສະເໜີ ເຊິ່ງຫໍ​ສະພາ​ແຫ່ງ​ຊາດ​ຫຼັງ​ໃໝ່​ ເປັນອາຄານ​ທີ່​ທັນ​ສະໄໝ ສວຍ​ງາມ ພ້ອມ​ກັບ​ສິ່ງ​ອຳນວຍ​ຄວາມ​ສະດວກ ແລະ ປອດ​ໄພ ມາດຖານສາກົນ ເຊິ່ງ​ມີ​ເນື້ອທີ່ທັງ​ໝົດ 23.400 ຕາ​ແມັດ ໃນ​ນັ້ນ ເນື້ອທີ່ປຸກ​ສ້າງ​ອາຄານ​ໜ້າດິນ 7.171 ຕາ​ແມັດ ກວ້າງ 78 ແມັດ ເລິກ 105 ແມັດ ເປັນ​ອາຄານ 5 ຊັ້ນ ແລະ 1 ຊັ້ນ​ໃຕ້​ດິນ ໂດຍ​ຫ້ອງ​ປະຊຸມ​ໃຫຍ່ ​ທີ່​ຈະ​ໃຊ້​ດຳເນີນ​ກອງ​ປະຊຸມ​ສະໄໝ​ສາມັນຂອງ​ສະພາແຫ່ງ​ຊາດ​ນັ້ນ ມີ​ຄວາມ​ສາມາດຮອງ​ຮັບ​ສະມາຊິກ​ສະພາ​ຈຳນວນ 450 ທ່ານ.

ຂ່າວທີ່ກ່ຽວຂ້ອງ