ຂ່າວຫຼ້າສຸດ

ເຢຍ​ລະ​ມັນ ເບີ 1 ໂລກ ສ່ວນ​ລາວ ຢູ່​ອັນ​ດັບ 5 ອາ​ຊຽນ

414 18 ຕ.ລ. 2017 ວົງຈອນກີລາ
ເຢຍ​ລະ​ມັນ ເບີ 1 ໂລກ ສ່ວນ​ລາວ ຢູ່​ອັນ​ດັບ 5 ອາ​ຊຽນ

    ທີມ​ຊາດ​ເຢຍ​ລະ​ມັນ​ຍັງ​ຄົງ​ຄອງ​ຕຳ­ແໜ່ງ​ທີມ​ໝາຍ​ເລກ 1 ຂອງ​ໂລກ​ຕໍ່​ອີກ​ເດືອນ ສ່ວນ​ທີມ​ຊາດ​ລາວ ອັນ​ດັບ​ຫຍັບ​ດີ​ຂຶ້ນ​ອີກ 4 ຂັ້ນ ຈາກ​ທີ 166 ເມື່ອ​ເດືອນ​ທີ່​ຜ່ານ​ມາ ຫຍັບ​ມາ​ຢູ່​ອັນ​ດັບ 162 ຂອງ​ໂລກ ທີ 31 ຂອງ​ທະ­ວີບ ອາ­ຊີ ແລະ ເລື່ອນ​ຂຶ້ນ​ເປັນ​ອັນ​ດັບ​ທີ 5 ຂອງ​ກຸ່ມ​ອາ​ຊຽນ ຮອງ​ຈາກ​ອັນ​ດັບ1 ຢ່າງ​ຟີ​ລິບ​ປິນ ຫວຽດ­ນາມ  ໄທ ແລະ ມຽນ​ມາ​ຕາມ​ລຳ­ດັບ.

    ສະ­ຫະ­ພັນ​ເຕະ­ບານ​ນາ­ນາ​ຊາດ ໄດ້​ປະ­ກາດ​ຜົນ​ການ​ຈັດ​ອັນ​ດັບ​ຄະ­ແນນ​ທີມ​ຊາດ​ປະ­ຈຳ​ເດືອນ​ຕຸ­ລາ ຜົນ​ປາ­ກົດ​ວ່າ ທີມ​ຊາດ​ເຢຍ​ລະ​ມັນ ຍັງ​ຄົງ​ຮັກ­ສາ​ບັນ­ລັງ​ທີມ​ໝາຍ​ເລກ 1 ຂອງ​ໂລກ​ຕໍ່​ອີກ​ເດືອນ.

    ທີມ​ຊາດ​ເຢຍ​ລະ​ມັນ​ເກັບ​ຄະ­ແນນ​ແຊງ ບຣາ​ຊິນ ຂຶ້ນ​ມາ​ຄອງ​ອັນ​ດັບ 1 ໃນ​ຟີ​ຟ່າ​ແຣງ​ກິງ​ເມື່ອ​ເດືອນ​ທີ່​ຜ່ານ​ມາ ກ່ອນ​ຫຼ້າ​ສຸດ​ພວກ​ເຂົາ​ຈະ​ໂຊ​ຟອມ​ແຂງ​ແກ່ນ ຊະ­ນະ ອຽກ​ລັງ​ເໜືອ ແລະ ອາ​ແຊກ​ໄບ​ຊານ ພ້ອມ​ທະ­ລຸ​ສູ່​ບານ​ໂລກ 2018 ຮອບ​ສຸດ​ທ້າຍ ເຮັດ​ໃຫ້​ຍັງ​ຄົງ​ຮັກ­ສາ​ຕຳ­ແໜ່ງ​ທີມ​ໝາຍ​ເລກ 1 ຂອງ​ໂລກ​ໄວ້​ໄດ້​ຢ່າງ​ໜຽວ​ແໜ້ນ.

    ຂະ­ນະ​ທີ່ 5 ອັນ​ດັບ​ທຳ​ອິດ​ຍັງ​ບໍ່​ມີ​ອັນ​ໃດ​ປ່ຽນ­ແປງ​ຈາກ​ເດືອນ​ກ່ອນ ໂດຍ​ບຣາ​ຊິນ​ຍັງ​ຄອງ​ອັນ​ດັບ 2 ຕາມ​ມາ​ດ້ວຍ ປອກ​ຕຸຍ​ການ ອາກ​ຊັງ​ຕິນ ແລະ ແບນ​ຊິກ.

    ສ່ວນ​ທີມ​ທີ່​ໄຕ່​ອັນ​ດັບ​ເຂົ້າ​ມາ​ຢູ່​ໃນ 10 ທີມ​ສູງ​ສຸດ​ໃນ​ເດືອນ​ນີ້​ໄດ້­ແກ່ ແອັດ​ສະ​ປາຍ​ທີ່​ຂຶ້ນ​ມາ​ຢູ່​ອັນ​ດັບ 8 ແລະ ເປ​ຣູ​ທີ່​ຂຶ້ນ​ມາ​ຢູ່​ອັນ​ດັບ 10 ຫຼັງ​ໄດ້​ສິດ​ເຕະ​ແບບ​ໄປ-ກັບ (ເພລ​ອອຟ) ລຸ້ນ​ໄປ​ບານ​ໂລກ​ທີ່​ຣັດ​ເຊຍ.

    ສ່ວນ​ໃນ​ລະ­ດັບ​ທະ­ວີບ­ອາ­ຊີ ອີ​ຣ່ານ ເຖິງ​ແມ່ນ​ຈະ​ຫຼົ່ນ​ລົງ​ມາ​ເຖິງ 9 ອັນ​ດັບ ຢູ່​ທີ 34 ຂອງ​ໂລກ ແຕ່​ຍັງ​ເປັນ​ທີມ​ເບີ 1 ອາ­ຊີ ຕາມ​ມາ​ດ້ວຍ ອົດ​ສະ​ຕຣາ​ລີ ອັນ​ດັບ 43 ຂອງ​ໂລກ ສ່ວນ​ອັນ​ດັບ 3 ໄດ້­ແກ່ ຍີ່­ປຸ່ນ ອັນ​ດັບ 4 ຈີນ ອັນ​ດັບ 5 ສ ເກົາ­ຫຼີ ອັນ​ດັບ 6 ຊາ​ອູ​ດິ​ອາ​ຣະ​ເບຍ ອັນ​ດັບ 7 ສະ­ຫະ­ລັດ​ອາ​ຣັບ​ເອ​ມີ​ເຣດ ອັນ​ດັບ 8 ອຸ​ຊ​ເບ​ກິດ​ສະ­ຖານ ອັນ​ດັບ 9 ຊີ​ຣີ ແລະ ອັນ​ດັບ 10 ອີ​ຣັກ.

ຂ່າວທີ່ກ່ຽວຂ້ອງ