ນາຍົກລັດຖະມົນຕີ ແຫ່ງ ສປປ ລາວ ຢ້ຽມຢາມ ສ ອິນໂດເນເຊຍ ຢ່າງເປັນທາງການ

184 13 ຕ.ລ. 2017 ຂ່າວໜ້າ​ໜຶ່ງ

ຕອບ​ສະໜອງ​ຕາມ​ຄຳ​ເຊີນ​ຂອງ​ທ່ານ ໂຈ​ໂກ ວີ​ໂດ​ໂດ ປະທານາທິບໍດີ ແຫ່ງ ສ ອິນ​ໂດ​ເນ​ເຊຍ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ​ສປປ ລາວ ພ້ອມ​ຄະນະ ໄດ້​ເດີນທາງ​ໄປ​ຢ້ຽມຢາມ ສ ອິນ​ໂດ​ເນ​ເຊຍ ເປັນ​ເວລາ 2 ວັນ ຄື: ວັນ​ທີ 11 ຫາ 12 ຕຸລາ 2017 ການ​ຢ້ຽມຢາມ​ຄັ້ງ​ທຳ​ອິດ ນັບ​ແຕ່​ດຳລົງ​ຕຳແໜ່ງ​ເປັນ​ນາຍົກລັດຖະມົນຕີ ແຫ່ງ ສປປ ລາວ ການ​ຢ້ຽມຢາມ​ດັ່ງກ່າວ ໄດ້​ດຳເນີນ​ຢູ່​ໃນ​ປີ​ທີ່ສອງ​ປະເທດ ​ພ້ອມ​ກັນ​ສະເຫຼີມສະຫຼອງ​ວັນ​ສ້າງຕັ້ງ​ສາຍ​ພົວພັນ​ການ​ທູດ​ນຳ​ກັນ ຄົບຮອບ 60 ປີ ເຊິ່ງ​ເປັນນິມິດ​ໝາຍ​ອັນ​ດີ​ໃຫ້​ແກ່​ການ​ເສີມ​ຂະຫຍາຍ​ສາຍ​ພົວພັນ ສ ອິນ​ໂດ​ເນ​ເຊຍ ພົວພັນ​ມິດຕະພາບ ແລະ ການຮ່ວມ​ມື​ອັນ​ດີງາມລະຫວ່າງສອງ​ປະເທດ​ທີ່​ມີ​ມາ​ແຕ່​ດົນ​ນານ​ ໃຫ້​ນັບ​ມື້​ແໜ້ນ​ແຟ້ນ​ຂຶ້ນ​ເລື້ອຍໆ.

ພິທີ​ຕ້ອນຮັບ​ຢ່າງ​ເປັນ​ທາງ​ການ ໄດ້​ຈັດ​ຂຶ້ນ​ທີ່​ທຳ​ນຽບ​ປະທານາທິບໍດີ ໂບ​ໂກ (Bogor) ທີ່​ນະຄອນຫຼວງ​ຈາ​ກາ​ຕາ ຢ່າງ​ສົມ​ກຽດ ຫຼັງ​ຈາກ​ນັ້ນ ທັງ​ສອງ​ຝ່າຍ​ໄດ້​ເຂົ້າ​ຮ່ວມ​ພົບ​ປະ​ຢ່າງ​ເປັນ​ທາງ​ການ ເຊິ່ງ​ຕ່າງຝ່າຍ​ໄດ້​ສະແດງ​ຄວາມ​ຊົມເຊີຍ ແລະ ຕີ​ລາຄາ​ສູງ​ຕໍ່​ສາຍ​ພົວພັນ ແລະ ມິດຕະພາບ​ການ​ຮ່ວມ​ມື ແລະ ສະໜັບ​ສະ​ໜູນ​ໃຫ້ການ​ຊ່ວຍເຫຼືອເຊິ່ງ​ກັນ ແລະ ກັນ ໃນ​ລະດັບ​ພາກ​ພື້ນ ແລະ ສາກົນ​ຢ່າງ​ບໍ່​ຢຸດ​ຢັ້ງ ທັງ​ສອງ​ຝ່າຍ​ຍັງ​ໄດ້​ສືບຕໍ່​ແລກປ່ຽນ​ຄະນະ​ຜູ້​ແທນ​ໃນ​ທຸກ​ລະດັບ ຕະຫຼອດ​ປະຊາຊົນ​ທັງ​ສອງ​ຊາດ​ນຳ​ກັນ ປະຕິບັດ​ບົດ​ບັນທຶກ​ຄວາມ​ເຂົ້າໃຈ ແລະ ສັນຍາ​ວ່າ​ດ້ວຍ​ການ​ບໍລິການ​ທາງ​ອາກາດ​ທີ່​ໄດ້​ເຊັນ​ກັນ​ແລ້ວ​ນັ້ນ​ ໃຫ້​ໄດ້ຈັດ​ຕັ້ງ​ເປັນ​ຮູບ​ປະ​ທຳ​ຢ່າງ​ມີ​ປະ​ສິດທິ​ຜົນ​ຫຼາຍ​ຂຶ້ນ ທັງ​ສອງ​ຝ່າຍ​ເຫັນ​ດີ​ໃນ​ການ​ຮ່ວມ​ມື​ໃນ​ຂົງເຂດ​ເສດ​ຖະກິດ-ການ​ຄ້າ-ການ​ລົງທຶນ ການ​ສຶກ​ສາ-ວັດທະນະທຳ ສາທາລະນະ​ສຸກ ໂທລະ​ຄົມມະນາຄົມ ແລະ ການ​ສື່ສານ ກີລາ ທ່ອງ​ທ່ຽວ ແລະ ຂະແໜງ​ອື່ນໆ​ຕື່ມ​ອີກ.

ໃນ​ໂອກາດ​ດັ່ງກ່າວ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ໄດ້​ສະແດງ​ຄວາມ​ຂອບໃຈ​ຕໍ່ການ​ຕ້ອນຮັບ​ອັນ​ອົບ​ອຸ່ນ​ໃນ​ຄັ້ງ​ນີ້.

ຂ່າວທີ່ກ່ຽວຂ້ອງ